Eastern Tamang Language Bible
१ ग्ले 1
दाऊद ग्ले खेप्पा दोबा धुइला ताम
दाऊद ग्ले ल्हानान खेप्पा दोसी जिन्बा मुबा। थे धुइरी थेदा क्वान न्हन्सी पिन्सैनोन थेला जीउ आलेप्मुबा। थेतबासेलमा थेला गे लबा म्हिगदेसे थेदा चुह्रङ् भिसी पाङ्जी, “ह्राङदा क्योङ्बारीदेन ह्राङदा सयार लबारी ङन्से खालै कन्ये-केटी गिक म्हाइसी भला। थे ङन्ना ग्लेदेन छ्यामनोन म्हेर्सी ङन्ना ग्लेदा लेप्ना लगै।”
जमाहेन्से थेनीगदेसे इस्राएल य्हुल्सा नाङ्नोन म्हाइमा शूनम्मी अबीशग मिन लबा जेःबा कन्ये-केटी गिक स्याप्जी। ओच्छे थेनीगदेसे थे म्रिङ्कोलादा ग्ले मुबा ग्लारी भजी। थे म्रिङ्कोला ल्हानान जेःबा मुबा। थेसे ग्लेदा क्योङ्बादेन सयार लबारी छ्याइजी। तर ग्ले थेदेन छ्याम आब्रेल्नी।
अदोनियाहसे ह्राङसे ह्राङदान ग्ले स्होबा
जमाहेन्से हग्गीतला झा अदोनियाहसे “ग्ले मि ङानोन ततोःला” भिसी ह्राङसे ह्राङदान ग्ले स्होबारी म्हाइजी। थेतबासेलमा थेसे ह्राङला ङाच्छा ङाच्छा छ्योङ्बाला लागिरी बोगल न्हीसे च्युइ म्हिगदेदेन तारी क्रेबा म्हिगदे ओच्छे रथगदेएनोन ठीक लजी।1 थेदा थेला आबासे “तिग्दा एसे चुह्रङ्बा गे लबा?” भिसीएनोन आपाङ्नी। अदोनियाहएनोन ल्हानान जेःबा म्हि मुबा, थे अब्शालोम भन्दा लिच्छा न्हबा मुबा।
अदोनियाहसे सरूयाहला झा योआबदेन पूजाहारी अबियाथारदेन छ्याम सल्लाह किन्जी। ओच्छे थेनीगदेसेनोन थेदा ह्रो लजी। तर पूजाहारी सादोक, यहोयादाला झा बनायाह, नातान अगमवक्ता, शिमी, रेईदेन दाऊददा जोगब लबारी चिबा सिपाहीगदेसे चा अदोनियाहला ताम आङ्यन्नी।
जमाहेन्से अदोनियाहसे एन-रोगेलनेर ङाम्री मुबा जोहेलेत भिबा युङ्बारी ग्युगदे, म्हेगदे ओच्छे छोबा छोबा म्हे बहरगदे बलि लजी। थेसे ग्लेला जम्मान झागदेदेन यहूदाला जम्मान मूल म्हिगदेदा निम्तो पिन्जी। तर थेसे नातान अगमवक्ता, बनायाह, ग्लेदा जोगब लबारी चिबा सिपाहीगदेदेन ह्राङलान आले सोलोमनदा चा निम्तो आपिन्नी।
जमाहेन्से नातानसे सोलोमनना आमा बतशेबादा चुह्रङ् भिसी ङ्योइजी, “य्हाङला मालिक दाऊददा थानोन आपिन्ना हग्गीतला झा अदोनियाह ग्ले दोबा ताम ह्राङदा था आरे?2 दाहेन्से ङाला ताम सान्गो, खाह्रङ् लसी ह्राङदेन ह्राङला झा सोलोमनना ज्यान जोगब लबारी खम्ला, ङाइ ह्राङदा सल्लाह पिन्ना। तुरून्तन दाऊद ग्लेदा स्याप्सी चुह्रङ् भिसी सुङ्गो, ‘प्रभु, ङाला ग्ले, ङा भन्दा लिच्छा पक्कान एला झा सोलोमन ग्ले दोला ओच्छे थेनोन ङाला ठिरी चिला भिसी ह्राङसे ह्राङला गे लबा म्हि ङादेन छ्याम घ्रान चबा आहिन? दन्दे चा खाह्रङ् लसी अदोनियाह ग्ले दोजी?’ ह्राङसे ग्लेदेन छ्याम ताम लबान लबा धुइरी ङा दिम न्हङ्री खला, ओच्छे ह्राङसे सुङ्बा तामदा प्रस्टन घोना लला।”
जमाहेन्से खेप्पा दोसी जिन्बा ग्लेदेन छ्याम ह्रुप तबारी बतशेबा ग्लेला कोठारी निजी, थेरी ग्लेदा शूनम्मी अबीशगसे सयार लमुबा। ओच्छे बतशेबासे ग्लेदा फ्या लजी। ग्लेसे थेदा “एदा तिग तोःजी?” भिसी ङ्योइजी।
थेसे ग्लेदा चुह्रङ् भिसी पाङ्जी, “ङाला प्रभु, ह्राङसे ह्राङला गे लबा म्हि ङादेन छ्याम परमप्रभु ह्राङला परमेश्वरला मिनरी चुह्रङ् भिसी घ्रान चबा मुबा, ‘ङा भन्दा लिच्छा एला झा सोलोमन ग्ले दोला, ओच्छे थेनोन ङाला ठिरी चिला।’ तर दन्दे मि अदोनियाह गा ग्ले दोजीम। चु ताम ङाला प्रभु ङाला ग्लेदा थानोन आरे। थेसे ल्हानान म्हेगदेदेन छोबा छोबा म्हे बहरगदे ओच्छे ग्युगदे बलि फुल्बा मुला। थेसे ग्लेला जम्मान झागदे, पूजाहारी अबियाथारदेन सिपाहीगदेला मूल म्हि योआबदा निम्तो पिन्जीम। तर ह्राङला गे लबा म्हि सोलोमनदा चा निम्तोन आपिन्जीम। ङाला प्रभु, ङाला ग्ले, दाहेन्से ह्राङ भन्दा लिच्छा खाला ह्राङला ठिरी चिला भिसी था याङ्बाला लागिरी जम्मान इस्राएलीगदेसे ह्राङदान भ्रान्सी चिबा मुला। चुदे ह्राङसे तिगै आलनी भिसम ह्राङसे जम्बुलिङ ख्लामाहेन्से ङादेन ङाला झा सोलोमनदा नाइबा गे लबा म्हिदा ह्रङ्बान व्यवहार लला।”
थेसे ग्लेदेन छ्याम ताम लबान लबा धुइरी नातान अगमवक्ता ग्लेखाङ्री दोखजी। थेनीगदेसे ग्लेदा “नातान खबा मुला” भिसी पाङ्जी। जमाहेन्से नातान न्हङ्री खसी ग्लेदा फ्या लजी। ओच्छे नातानसे चुह्रङ् भिसी पाङ्जी, “ङाला प्रभु, ङाला ग्ले, तिग ह्राङ भन्दा लिच्छा अदोनियाह ग्ले दोला? ओच्छे थेनोन ह्राङला ठिरी चिला भिसी ह्राङसेन सुङ्बा हिन्ना? तिनी थे मार जोहेलेत भिबा युङ्बारी निसी ल्हानान म्हेदेन छोबा छोबा म्हे बहरगदे ओच्छे ग्युगदे बलि फुल्बा मुला। थेसे ग्लेला जम्मान झागदे, सिपाहीगदेला मूल म्हिगदेदेन पूजाहारी अबियाथारदा भोज चबारी निम्तो पिन्बा मुला। चु धुइरी थेनीगदे थेदेन छ्यामनोन चबा थुङ्बा लबान ‘अदोनियाह ग्लेला छे ह्रेङ्गै’ भिसी पाङ्बान मुला। तर थेसे ह्राङला गे लबा म्हि ङादादेन पूजाहारी सादोक, यहोयादाला झा बनायाहदेन ह्राङला गे लबा सोलोमनदा चा निम्तो आपिन्नी। तिग चु ह्राङसेन कुल्बा अन्छार तबा हिन्ना? ङनी ह्राङला गे लबा म्हिगदेदा चा ह्राङ भन्दा लिच्छा ह्राङला ठिरी खाला चिला भिसी तिग्दा ह्राङसे आसुङ्बा?”
दाऊदसे सोलोमनदा ग्ले स्होबा
जमाहेन्से दाऊद ग्लेसे “बतशेबादा दिम न्हङ्री ङ्योइगो” भिसी पाङ्जी। थेतबासेलमा बतशेबा ग्लेला ङाच्छापट्टि खसी राप्जी। जमाहेन्से ग्लेसे चुह्रङ् भिसी घ्रान चजी, “ङादा जम्मान दुखग्याम फेबा ङाला छोन्बो परमप्रभुला मिनरी ङाइ घ्रान चसी पाङ्ला। परमप्रभु इस्राएलला परमेश्वरला मिनरी ङाइ घ्रान चबान एदा चुह्रङ् भिसी पाङ्बा मुबा, ‘ङा भन्दा लिच्छा एला झा सोलोमननोन ग्ले दोला, ओच्छे ङाला साटोरी ङाला ठिरी चिला।’ ङाइ चबा चु घ्रान तिनीला धिनकुनुन ङाइ पूरा लला।” जमाहेन्से बतशेबासे ग्लेदा फ्या लबान चुह्रङ् भिसी पाङ्जी, “ङाला प्रभु, ङाला ग्लेला छे ह्रेङ्गै।”
दाऊद ग्लेसे चुह्रङ् भिसी पाङ्जी, “पूजाहारी सादोकदेन नातान अगमवक्ता ओच्छे यहोयादाला झा बनायाहदा दिम न्हङ्री ङ्योइगो।” थेनीगदे ग्लेला ङाच्छापट्टि खमाहेन्से ग्लेसे थेनीगदेदा चुह्रङ् भिसी पाङ्जी, “एनीगदेसे ङाला गे लबा म्हिगदेदा एनीगदेदेन छ्यामनोन भोर्गो, ओच्छे ङाला झा सोलोमनदा ग्लेला खच्चररी थान्सी गीहोनधोना छ्यामनोन भोर्गो। पूजाहारी सादोकदेन नातान अगमवक्तासे सोलोमनदा थेरी इस्राएलला ग्ले स्होगै। ओच्छे बिगुल ह्राप्सी ‘सोलोमन ग्लेला छे ह्रेङ्गै’ भिसी क्रिङ्गो। जमाहेन्से एनीगदे थेदेन छ्यामनोन तोर खउ, ओच्छे दिम न्हङ्री वाङ्सी थे ङाला ठिरी चिगै, ओच्छे ङाला साटोरी थेसेन शासन लगै। थेदा इस्राएलदेन यहूदाथोरी शासन लबारी ङाइनोन धम्बा हिन्ना।”
यहोयादाला झा बनायाहसे ग्लेदा चुह्रङ् भिसी जोहाब पिन्जी, “आमेन! ङाला मालिक ङाला ग्लेला परमप्रभु परमेश्वरसे चुह्रङ्बान सुङ्गै। ङाला ग्लेदेन छ्याम परमप्रभु खाह्रङ् लसी धन्छ्याबा मुबा, थेह्रङ् लसीन परमप्रभु सोलोमनदेन छ्यामएनोन धन्छ्यागै। ओच्छे परमप्रभुसे सोलोमनना ठि ङाला प्रभु ङाला ग्ले दाऊदला ठि भन्दाएनोन शक्तिशाली स्होगै।”
जमाहेन्से सोलोमनदा दाऊद ग्लेला खच्चररी थान्सी पूजाहारी सादोक, नातान अगमवक्ता, यहोयादाला झा बनायाह, करेतीदेन पेलेथीगदे मार गीहोनधोना छ्यामनोन निजी। परमप्रभु धन्छ्याबा पाल न्हङ्ग्याम पूजाहारी सादोकसे छ्युगु थान्बा रू किन्सी सोलोमनना थोबोरी छ्युगु युसी ग्ले स्होजी। जमाहेन्से थेनीगदेसे बिगुल ह्राप्जी, ओच्छे जम्मान म्हिगदेसे क्रिङ्बान, “सोलोमन ग्लेला छे ह्रेङ्गै” भिसी पाङ्जी। जमाहेन्से जम्मान म्हिगदे ताङ्सी ताङ्सी बाँसुरी ह्राप्बान सोलोमनदेन छ्यामनोन तोर खजी। थेनीगदे क्रिङ्मा सनोन ल्हीगल्हीग तजी।
अदोनियाहदेन थेला ढोन्बोगदेसे भर्खर जे चसी जिन्बा मुबा, थेनीगदेसे म्हिगदे क्रिङ्बा थेःजी। बिगुल ह्राप्बा थेःसी योआबसे “चु म्हिगदे सहररी तिग्दा क्रिङ्बा?” भिसी ङ्योइजी। थेसे चुह्रङ् भिसी पाङ्बान लमा पूजाहारी अबियाथारला झा जोनाथन दोखजी। अदोनियाहसे थेदा चुह्रङ् भिसी पाङ्जी, “न्हङ्री खउ, ए ह्रङ्बा ज्यबा म्हिसे ज्यबान समाचार भजी तला।”
जोनाथनसे अदोनियाहदा चुह्रङ् भिसी जोहाब पिन्जी, “अँहँ, आहिन। य्हाङला प्रभु य्हाङला दाऊद ग्लेसे मि सोलोमनदा ग्ले स्होबा मुला। ग्लेसे पूजाहारी सादोक, नातान अगमवक्ता, यहोयादाला झा बनायाह, करेतीदेन पेलेथीगदेदा सोलोमनदेन छ्यामनोन पुइबा मुला। ओच्छे थेनीगदेसे चा सोलोमनदा ग्लेला खच्चरथोरी थान्सी भोर्बा मुला। ओच्छे पूजाहारी सादोकदेन नातान अगमवक्तासे गीहोनरी थेला थोबोरी छ्युगु युसी ग्ले स्होबा मुला। दन्दे थेनीगदेसे थेदा थेग्याम ताङ्सी ताङ्सी तोर भोर्बा मुला, ओच्छे सहररी म्हिगदे क्रिङ्बान मुला। ह्राङनीसे थेनोन काइ थेःबा हिन्ना। अझ थे भन्दा घ्रेन ताम मि ग्लेला ठिरी सोलोमन धन्छ्याबा मुला। ओच्छे य्हुल्साला मूल म्हिगदेएनोन य्हाङला प्रभु दाऊद ग्लेदा फ्या लबान चुह्रङ् भिसी पाङ्बारी निबा मुला, ‘ह्राङला परमेश्वरसे ह्राङला मिन भन्दा अझ ह्राङला झा सोलोमनना मिन ल्हानान ग्लारी दोना लगै। ओच्छे ह्राङला ठि भन्दाएनोन थेला ठि अझ शक्तिशाली स्होगै।’ ओच्छे ह्राङलान खटनरी चिसी ग्लेसे परमप्रभुदा फ्या लबान चुह्रङ् भिसी पाङ्जी, ‘परमप्रभु इस्राएलला परमेश्वरला जयजयकार तगै, तिनी परमप्रभुसे ङाला ठिरी ङाला झा चिबा च्यापुङ्जी।’”
थेतबासेलमा अदोनियाहला ढोन्बोगदे जम्मान लोङ्सी डाङ्डोङ् रेःसी ह्राङ ह्राङला ग्यामसे निजी। तर अदोनियाह चा सोलोमनदेन छ्याम लोङ्सी ढोङ् रेःजी, ओच्छे निसी बलि फुल्बा ग्लाला रूगदे चुङ्सी चिजी। जमाहेन्से खालै म्हि निसी चु ताम सोलोमनदा पाङ्जी, “अदोनियाह सोलोमन ग्लेदेन छ्याम लोङ्सी बलि फुल्बा ग्लाला रूगदे चुङ्सी चिबा मुला। ओच्छे थेसे चुह्रङ् भिसी पाङ्बा मुला, ‘तिनी ह्राङला गे लबा म्हि ङादा सोलोमन ग्लेसे “ङाइ तरवारसे ताम्सी आसाइ” भिसी घ्रान चसी पाङ्गै।’”
सोलोमन ग्लेसे चुह्रङ् भिसी जोहाब पिन्जी, “चुदे थेसे ह्राङसे ह्राङदान ज्यबा म्हि हिन्ना भिसी उन्खम्जी भिसम थेला क्रा भा गिकएनोन सरी आताइ। तर थे आज्यबा म्हि हिन्सम थेदा पक्कान साइला।” जमाहेन्से सोलोमन ग्लेसे म्हिगदे पुइसी थेदा बलि फुल्बा ग्लाग्याम मार भजी। ओच्छे अदोनियाह खसी सोलोमन ग्लेदा फ्या लजी। ओच्छे सोलोमन ग्लेसे थेदा “ए ह्राङला दिमरी निउ” भिसी पाङ्जी
Source notes (2)
- Cross-reference २ शमू ३:४
- Cross-reference २ शमू १२:२४
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.