Eastern Tamang Language Bible
१ कोरि 15
येशू ख्रीष्ट सिबाग्याम सोबा
दाहेन्से ज्योज्यो आले नाना आङागदे, ङाइ एनीगदेदा थेःना लबा थार्बा पिन्बा समाचारला बारेरी एनीगदेदा दोःसी पाङ्ला। थे समाचाररी विश्वास लसी एनीगदे थेनोन अन्छार भ्रबान मुला। चुदे ङाइ थेःना लबा थार्बा पिन्बा समाचाररी विश्वास लबा आख्लानी भिसम जे एनीगदेसे थार्बा याङ्ला, आहिन्सम एनीगदेसे लबा विश्वास गेआखेल्बा तला।
ङाइ था याङ्बा मूल तामनोन ङाइ एनीगदेदा थेःना लबा मुला। थे ताम चा चुनोन हिन्ना, परमेश्वरला बचन अन्छार ख्रीष्ट य्हाङला पापला लागिरी सिजी।1 थेदा ल्हुजी ओच्छे परमेश्वरला बचन अन्छार थे सोमरेलाकुनु सिबाग्याम दोःसी सोजी।2 ओच्छे थेदा पत्रुससे म्राङ्जी, जमाहेन्से थेदा च्युक न्ही मूल चेलासे म्राङ्जी।3 जमाहेन्से थेदा ह्राङदा विश्वास लबा ग्यार्जा ङ्हा भन्दा ल्हाना ज्योज्यो आले नाना आङागदेसे तिक्खुरीन म्राङ्जी। थेनीगदे न्हङ्ला ल्हाना ह्रङ्बा म्हिगदे दन्देधोनाएनोन मुला, तर कोइ कोइ चा सिसी जिन्जी। जमाहेन्से थेदा याकूबसे म्राङ्जी, ओच्छे लिच्छा जम्मान मूल चेलागदेसे म्राङ्जी। थेदा जम्मान भन्दा लिच्छा चा ङाइ म्राङ्जी। थे धुइरी चा ङा ल आछ्योना न्हबा कोला ह्रङ्बान मुबा।4
तिग्दा भिसम जम्मान मूल चेलागदे ङा भन्दा घ्रेन हिन्ना, थेनीगदे न्हङ्री ङा चा तिगैनोन आहिन। ङाइ परमेश्वरला मण्डलीदा ल्हानान दुख पिन्बासेलमा ङा मूल चेला भिबाधोनाला आरे।5 तर दन्दे ङा परमेश्वरला दयामायासे लमान मूल चेला दोबा मुला। ओच्छे थेसे ङादा लबा दयामाया खेरोरी आनिनी। बरू ङाइ स्य्हान्दो मूल चेलागदेसे भन्दा ल्हानान गे लजी। तर चु जम्मान गे ङाइ लबा आहिन, ङादेन छ्याम मुबा परमेश्वरला दयामायासेन हिन्ना। थेतबासेलमा ङाइ थेःना लसै, थेनीगदेसे थेःना लसै, ङन्से थेःना लबा ताम चा गिकनोन हिन्ना। ओच्छे थेनोन तामरी एनीगदेसे विश्वास लबा मुला।
य्हाङ सिबाग्याम सोला
ङन्से चा ख्रीष्ट सिबाग्याम सोजी भिसी थेःना लसी भ्रमुला भिसम एनीगदे न्हङ्ला कोइ कोइसे चा तिग्दा सिबागदे दोःसी आसो भिसी पाङ्बा? तर चुदे सिबागदे दोःसी आसो भिसम ख्रीष्टएनोन सिबाग्याम सोबा आहिन। चुदे ख्रीष्ट सिबाग्याम आसोबा हिन्सम ङन्से थेःना लबा ताम गेआखेल्बा तला, ओच्छे एनीगदेसे लबा विश्वासएनोन गेआखेल्बा तला। थे भन्दाएनोन ङनी परमेश्वरला बारेरी लुसीला ताम पाङ्बा म्हि दोला। तिग्दा भिसम परमेश्वरसे ख्रीष्टदा सिबाग्याम सोना लजी भिसी ङन्से परमेश्वरला बारेरी थेःना लबा मुला। तर च्यागो, सिबागदे दोःसी आसोबा हिन्सम परमेश्वरसे ख्रीष्टदाएनोन सोना आलसेला मुबा। सिबागदे आसोमुला भिसम परमेश्वरसेनोन ख्रीष्टदा सोना लबा आहिन। ख्रीष्ट सिबाग्याम आसोबा हिन्सम एनीगदेसे लबा विश्वास गेआखेल्बा तला, ओच्छे एनीगदे अझ पापरीन तला। थेह्रङ् भिसम ख्रीष्टदा विश्वास लसी सिबा म्हिगदेएनोन जम्मान सिबाला सिबान तजी। चुदे चु जुनी मुदेधोनाला लागिरी जे य्हाङदा ख्रीष्टग्याम ज्यबा तला भिसी आश लबा हिन्सम स्य्हान्दो जम्मान म्हिगदे भन्दा य्हाङ चा ल्हाना दया याङ्तोःबा म्हि दोला।
तर ख्रीष्ट मि सिबाग्याम सोबा हिन्ना। सिबागदे न्हङ्ग्याम ख्रीष्ट जम्मान भन्दा ङाच्छा सोसी स्य्हान्दो सिबागदेएनोन सोला भिसी उन्बा मुला। तिग्दा भिसम म्हि गिकसे लमान जम्मान म्हि सिबा मुला। थेह्रङ् लसीन गिकसे लमान सिबागदेएनोन दोःसी सोला। आदमग्याम6 जम्मान म्हि सिबा मुला। थेह्रङ् लसीन ख्रीष्टग्याम चा जम्मान म्हि सोला। तर जम्मान म्हि ह्राङ ह्राङला पालो अन्छार सिबाग्याम सोला। ख्रीष्ट चा सिबाग्याम जम्मान भन्दा ङाच्छा सोजी। ओच्छे ख्रीष्ट दोःसी फेप्खबा धुइरी चा थेदा विश्वास लबा म्हिगदेएनोन सिबाग्याम सोला। जमाहेन्से चु जम्बुलिङ नाश तला। थे धुइरी ख्रीष्टसे जम्मान अधिकारगदे, शक्तिगदेदेन शासन लबागदेदा नाश लसी परमेश्वरला य्हुल्सा परमेश्वर आबादान जिम्मा पिन्ना। तिग्दा भिसम ख्रीष्टसे जम्मान शत्रुगदेदा ब्रेना लसी ह्राङला काङ धिरी आथान्देधोना थेसे शासन लतोःला।7 जम्मान भन्दा लिच्छा चा शत्रु कालदा नाश लला। तिग्दा भिसम बचनरी चुह्रङ् भिसी भ्रिबा मुला, “परमेश्वरसे जम्मान स्हेगदे ख्रीष्टला स्य्हाब धिरी थान्ना।” चु भिबा चा परमेश्वरएनोन ख्रीष्टला तहरी तला भिसी पाङ्बा आहिन। तर परमेश्वरसे जम्मान स्हेगदेथोरी ख्रीष्टदा शासन लपुङ्ला भिबा हिन्ना।8 जम्मान स्हे ख्रीष्टला शासनरी भमाहेन्से ख्रीष्टएनोन परमेश्वरला तहरी धन्छ्याला। ओच्छे जम्मान स्हेथोरी परमेश्वरसेन शासन लला।
सिबाग्याम दोःसी आसोबा हिन्सम सिबागदेला लागिरी बप्तिस्मा किन्बा म्हिगदेदा तिग फाइदा तला? चुदे सिबाग्याम आसो भिसम थेनीगदेसे थेला लागिरी तिग्दा बप्तिस्मा किन्बा? ओच्छे ङनीएनोन तिग्दा सदन ह्राङला ज्यान गोजाला धाररी थान्सी भ्रसे? ज्योज्यो आले नाना आङागदे, एनीगदे य्हाङला प्रभु ख्रीष्ट येशूदेन छ्याम गिक तबासेलमा ङा ल्हानान ताङ्बा मुला। थेतबासेलमा ङाइ सेमहेन्सेन चु ताम पाङ्ला, “ङा धिन धिननोन सिबारी तयार मुला।” म्हिसे म्हन्बा अन्छार जे एफिसस सहररी ङा ह्रि जन्तुदेन9 छ्याम छेबा तामसे ङादा तिग फाइदा तला? चुदे सिबागदे दोःसी आसो भिसम म्हिगदेसे पाङ्बा ह्रङ्नोन
“य्हाङएनोन चबा थुङ्बा लइ,
तिग्दा भिसम न्हङ्गर मि य्हाङ सिनोन सिला!”10
चु तामरी एनीगदे झ्युक्याब आतउ। आज्यबा म्हिला संगत लजी भिसम ज्यबा बानीबेहोरएनोन न्होङ्ला। दाहेन्से एनीगदेसे ठीक ताम म्हन्गो, ओच्छे पाप आलउ। तिग्दा भिसम एनीगदे न्हङ्ला गादे म्हिसे मि परमेश्वरदा ङोसेबान आरे। ङाइ चु ताम पाङ्मा एनीगदेदा पेःबा खतोःबा।
सिबाग्याम सोबा ल्हुइ
तर खालै म्हिसे चुह्रङ् भिसी ङ्योइला तला, “सिबागदे दोःसी खाह्रङ् लसी सोला? ओच्छे सोमाहेन्से थेनीगदेला ल्हुइ खाह्रङ्बा तला?” मूर्ख म्हि! एसे जुन स्हेला ब्लु ढ्वला थे ब्लु आनाइदेधोना आफुइ। एनीगदेसे ग्वा तसै, अर्गु तिगैला ब्लु मुसै, थेला गेडा ढ्वबा हिन्ना, तर दोङनोन सूबा आहिन। तर परमेश्वरसे ह्राङसे म्हन्बा अन्छार थे ब्लुगदेदेन अर्गु ब्लुगदेदा जेःबा ल्हुइ पिन्ना। जम्मान ल्हुइ खाल गिकलान आत। म्हिला ल्हुइ अर्गु खाल्ला, जन्तुगदेला ल्हुइ अर्गु खाल्ला, चरागदेला ल्हुइ अर्गु खाल्ला ओच्छे तार्ङागदेला ल्हुइ अर्गु खाल्ला तला।
मुरी मुबा स्हेगदेला ह्राङ ह्राङलान रुपदेन य्हाल तला ओच्छे जम्बुलिङरी मुबा स्हेगदेलाएनोन ह्राङ ह्राङलान रुप तला। धिनीला य्हाल अर्गुन खाल्ला तला, लनीला य्हाल अर्गु खाल्ला तला ओच्छे सारगदेला य्हाल अर्गुन खाल्ला तला। जम्मान सारगदेला य्हालएनोन गिकनोन आत।
सिबागदेएनोन थेह्रङ् लसीन सोला। सिमाहेन्से ल्हुबा ल्हुइ चा नाइसी निला, तर सिबाग्याम दोःसी सोमाहेन्से चा खाइमै आसि। सिमाहेन्से ल्हुबा य्हाङला ल्हुइ आज्यबादेन कमजोर तला। ओच्छे सिबाग्याम सोमाहेन्सेला ल्हुइ जेःबादेन शक्तिशाली तला। ल्हुबा धुइरी स्या काला ल्हुइरी ल्हुला, तर सोबा धुइरी थे आत्माला ल्हुइरी सोला। स्यादेन काला ल्हुइ तला भिसम आत्माला ल्हुइएनोन तनोन तला।
थेतबासेलमा बचनरीनोन, “जम्मान भन्दा ङाच्छाला म्हि आदम चा सोबा म्हि दोजी” भिसी भ्रिबा मुला। तर लिच्छाला आदम11 चा स्य्हान्दोदा जुकजुकधोनाला जुनी पिन्बा आत्मा तजी।12 आत्माला ल्हुइ ङाच्छा खबा आहिन, तर स्या काला ल्हुइ चा ङाच्छा खबा हिन्ना। जमाहेन्से जे आत्माला ल्हुइ खबा हिन्ना। ङाच्छाला म्हि आदम चा जम्बुलिङला साप्राग्याम स्होबा म्हि मुबा। तर थे भन्दा लिच्छाला म्हि ख्रीष्ट चा स्वर्गग्याम फेप्खबा मुबा। जम्बुलिङरी मुबा म्हिगदे चा थे साप्रासे स्होबा म्हि ह्रङ्बान मुला, ओच्छे स्वर्गरी मुबा म्हिगदे चा स्वर्गग्याम फेप्खबा म्हि ह्रङ्बान मुला। दन्दे य्हाङसे साप्रासे स्होबा म्हिला रुप किन्बा ह्रङ् लसी लिच्छा चा य्हाङसे स्वर्गग्याम फेप्खबा म्हिला रुप किन्म्याङ्ला।
ज्योज्यो आले नाना आङागदे, ङाइ पाङ्बारी म्हाइबा ताम चा चुनोन हिन्ना, चु स्या काला ल्हुइदा परमेश्वरला य्हुल्सारी वाङ्बा हक आरे। ओच्छे नाश तसी निबा ल्हुइसे खाइमै आसिबा जुनी आयाङ्। च्यागो, ङाइ एनीगदेदा म्हिसे था आयाङ्बा ताम गिक पाङ्ला। य्हाङ जम्मान मि आसि, तर य्हाङ जम्मालान ल्हुइ पोला। य्हाङला मी चिम जे तमा छिन्नङ्रीन जम्मान भन्दा लिच्छारेम बिगुलला काइ थेःला। जमाहेन्से तुरुन्तन सिबागदे दोःसी खाइमै नाश आतबा जुनी किन्सी सोला, ओच्छे य्हाङला ल्हुइ पोला।13 तिग्दा भिसम सिबा ल्हुइ खाइमै आसिबा ततोःला, ओच्छे चु नाइसी निबा ल्हुइ दोःसी खाइमै आनाइबा ततोःला। सिबा ल्हुइ खाइमै आसिबादेन नाइसी निबा ल्हुइ खाइमै आनाइबा दोमाहेन्से बचनरी चुह्रङ् भिसी भ्रिबा ताम पूरा तला, “कालदाएनोन ढाजी”14
“काल, एसे खानङ् ढाबा मुला?
काल, खाइ एला शक्ति?”15
पापग्याम कालसे दुख पिन्बा शक्ति याङ्ला ओच्छे ठिमग्याम पापसे शक्ति याङ्ला।16 तर परमेश्वरदा धन्यवाद तगै, थेसे य्हाङदा य्हाङला प्रभु येशू ख्रीष्टग्याम ढाना लबान मुला।
थेतबासेलमा ङाला सेम निबा ज्योज्यो आले नाना आङागदे, एनीगदे विश्वासरी कोङ्सी य्हाङ्य्होङ् आतना चिउ। ओच्छे झन्सी प्रभुला गे लउ। तिग्दा भिसम एनीगदेसे दुख लसी लबा प्रभुला गे खाइमै खेरोरी आनि भिबा ताम एनीगदेदा थानोन मुला।
Source notes (16)
- Cross-reference यशै ५३:५-१२
- Cross-reference व्हाइ १६:८-१०; मत्ती १२:४०; मूल २:२४-३२
- Cross-reference मत्ती २८:१६-१७; मर्कू १६:१४; लूका २४:३४,३६; यूह २०:१९
- Cross-reference मूल ९:३-६
- Cross-reference मूल ८:३
- Footnote “आदम” चा परमेश्वरसे स्होबा जम्मान भन्दा शुरूला म्हि हिन्ना। परमेश्वरसे कुल्बा ताम आङ्यन्बासेलमा आदम पापी दोजी। आदम पापी दोबासेलमा य्हाङएनोन पापी दोजी।
- Cross-reference व्हाइ ११०:१
- Cross-reference व्हाइ ८:६
- Footnote “ह्रि जन्तु” भिबा चा पावलदा एफिससरी बिरोध लबा म्हिगदे हिन्ना।
- Cross-reference यशै २२:१३
- Footnote “लिच्छाला आदम” भिबा चा ख्रीष्ट हिन्ना।
- Cross-reference ठुङ् २:७
- Cross-reference १ थेस ४:१५-१७
- Cross-reference यशै २५:८
- Cross-reference होशे १३:१४
- Footnote चु पदला अर्थ चा पाप लबासेलमा म्हिगदे आत्मा सिला, ओच्छे ठिमग्याम म्हिगदेसे पाप लजी भिबा ताम घोला भिबा हिन्ना।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.