Eastern Tamang Language Bible
१ काइ 27
सिपाहीगदेला समूहदेन मूल म्हिगदे
जमाहेन्से इस्राएलीगदेला म्हेमे म्हेमेला मूल म्हिगदे, हजार हजारदेन ग्यार्जा ग्यार्जाला सिपाहीगदेला हाकिम ओच्छे थेनीगदेला कप्तानगदेएनोन मुबा। थेनीगदेसे ग्लेला लागिरी थरीथरीला गे लमुबा। समूह गिकसे तिदिङ्री ल गिक गे लतोःमुबा। समूह गिकरी २४,००० म्हिगदे मुबा।
शुरूला लरी गे लबा समूहदा च्याबा मूल म्हि चा जब्दीएलला झा याशोबाम मुबा। थेला समूहरी २४,००० म्हिगदे मुबा। याशोबाम फारेसला झा मुबा, ओच्छे शुरूला लरी गे लबा सिपाहीगदेला हाकिम न्हङ्री थे जम्मान भन्दा मूल म्हि मुबा। अर्गु लरी गे लबा समूहदा च्याबा मूल म्हि चा अहोही वंशला दोदै मुबा। दोदैदा ह्रो लबा म्हि मिक्लोत मुबा। दोदैला समूहरी २४,००० म्हिगदे मुबा। अर्गु लरी गे लबा समूहदा च्याबा मूल म्हि चा मूल पूजाहारी यहोयादाला झा बनायाह मुबा। थेला समूहरी २४,००० म्हिगदे मुबा। चु बनायाह चा भङ्बा भङ्बा बोगल गिकसे च्युइ म्हिगदेला मूल म्हि मुबा। थेला समूहदा च्याबा जिम्मा थेलान झा अम्मीजाबाददा पिन्बा मुबा। अर्गु लरी गे लबा समूहदा च्याबा मूल म्हि चा योआबला आले असाहेल मुबा। थे सिमाहेन्से थेला झा जबदियाहदा जिम्मा पिन्जी। थेला समूहरी २४,००० म्हिगदे मुबा। अर्गु लरी गे लबा समूहदा च्याबा मूल म्हि चा यिज्याही वंशला शम्हूत मुबा। थेला समूहरी २४,००० म्हिगदे मुबा। अर्गु लरी गे लबा समूहदा च्याबा मूल म्हि चा तको सहरला म्हि इक्केशला झा ईरा मुबा। ईराला समूहरी २४,००० म्हिगदे मुबा। अर्गु लरी गे लबा समूहदा च्याबा मूल म्हि चा एफ्राइम वंशला हेलेस मुबा। थे पेलोन सहरला म्हि मुबा, थेला समूहरी २४,००० म्हिगदे मुबा। अर्गु लरी गे लबा समूहदा च्याबा मूल म्हि चा हूशाह सहरला सिब्बकै मुबा। थे जेरह वंशला म्हि मुबा, थेला समूहरी २४,००० म्हिगदे मुबा। अर्गु लरी गे लबा समूहदा च्याबा मूल म्हि चा बेन्यामीन वंशला अबीएजेर मुबा। थे अनातोत सहरला म्हि मुबा, थेला समूहरी २४,००० म्हिगदे मुबा। अर्गु लरी गे लबा समूहदा च्याबा मूल म्हि चा जेरह वंशला महरै मुबा। थे नतोपात सहरला म्हि मुबा, थेला समूहरी २४,००० म्हिगदे मुबा। अर्गु लरी गे लबा समूहदा च्याबा मूल म्हि चा एफ्राइम वंशला बनायाह मुबा। थे पिरातोन सहरला म्हि मुबा, थेला समूहरी २४,००० म्हिगदे मुबा। जम्मान भन्दा लिच्छाला लरी गे लबा समूहदा च्याबा मूल म्हि चा ओत्निएल वंशला हेल्दै मुबा। थे नतोपात सहरला म्हि मुबा, थेला समूहरी २४,००० म्हिगदे मुबा।
वंश वंशला मूल म्हिगदे
इस्राएलला वंश वंशला मूल म्हिगदे चुगदेन हिन्ना।
रूबेनना वंशग्याम जिक्रीला झा एलीएजर,
शिमियोनना वंशग्याम माकाला झा शपत्याह,
लेवीला वंशग्याम कमूएलला झा हशब्याह,
हारूनना वंशग्याम सादोक,
यहूदाला वंशग्याम दाऊदला ज्योज्यो एलीहू,
इस्साखारला वंशग्याम मिखाएलला झा ओम्री,
जबूलूनना वंशग्याम ओबदियाला झा यिश्मायाह,
नप्तालीला वंशग्याम अज्रीएलला झा यरीमोत,
एफ्राइमला वंशग्याम अजज्याहला झा होशिया,
न्हुपपट्टि चिबा मनश्शेला गङ्सल वंशग्याम पदायाहला झा योएल,
स्यारपट्टिला गिलादरी मुबा मनश्शेला गङ्सल वंशग्याम जकरियाला झा इद्दो,
बेन्यामीनना वंशग्याम अबनेरला झा यासीएल,
दानना वंशग्याम यरोहामला झा अज्रेल मूल म्हि मुबा।
वंश वंशला मूल म्हिगदे चुगदेन मुबा।
दाऊद ग्लेसे बोगल गिक दिङ् भन्दा मारला म्हिगदेदा आझ्यानी। तिग्दा भिसम इस्राएलला म्हिगदेदा मुला सारगदे तेनोन ल्हाना तना लला भिसी परमप्रभुसे कबुल लबा मुबा।1 सरूयाहला झा योआबसे य्हुल्साला म्हिगदे झ्याबारी छ्याइबा मुबा। थेतबासेलमा परमेश्वरसे इस्राएलदा सजाय पिन्जी। जमाहेन्से योआबसे म्हि झ्याबा गे आजिन्मन ख्लाजी। ओच्छे म्हिगदे गादे मुला भिसी दाऊद ग्लेला काइरन भ्रिबा किताबरी आभ्रिनी।2
ग्लेला सम्पत्ति च्याबा म्हिगदे
दाऊद ग्लेसे ह्राङला सम्पत्ति च्याबारी चा सिपाहीगदेला चुनोन हाकिमगदेदा जिम्मा पिन्बा मुबा। ग्लेला ढुकुटीगदे च्याबा जिम्मा अदीएलला झा अज्मावेतदा पिन्बा मुबा।
ओच्छे य्हुल्साला ढुकुटी, सहरगदेला ढुकुटी, नाम्सागदेला ढुकुटीदेन य्हुल्सादा जोगब लबाला लागिरी सिपाहीगदे चिबा ग्लाला ढुकुटी च्याबाला लागिरी उज्जियाहला झा जोनाथनदा जिम्मा पिन्बा मुबा।
य्हुल्साला खेतीपाती लबागदेदा च्याबाला लागिरी कलूबला झा एस्रीदा जिम्मा पिन्बा मुबा। अङ्गुर व्हारागदे च्याबाला लागिरी रामत सहरला शिमीदा जिम्मा पिन्बा मुबा।
अङ्गुरला निङ्गु ज्यना लसी थान्बाला लागिरी अङ्गुर थुबा जिम्मा शेपेम सहरला जब्दीदा जिम्मा पिन्बा मुबा।
न्हुपपट्टिला चेरी मुबा जैतूनदेन अञ्जीर च्याबा म्हि चा गेदेर सहरला बाल-हानान मुबा।
जैतूनना छ्युगु ज्यना लसी थान्बारी योआशदा जिम्मा पिन्बा मुबा।
शारोनरी छाबा म्हेमुइगदे च्याबारी शारोन भिबा ग्लाला शित्रैदा जिम्मा पिन्बा मुबा।
ब्याँसीला म्हेमुइगदे च्याबारी अदलैला झा शाफातदा जिम्मा पिन्बा मुबा।
ऊँटगदे च्याबारी इश्माएलला सन्तान ओबीलदा जिम्मा पिन्बा मुबा।
गधागदे च्याबारी मेरोनोत सहरला येहदयाहदा जिम्मा पिन्बा मुबा।
राग्युगदे च्याबारी हग्रीला सन्तान याजीजदा जिम्मा पिन्बा मुबा।
दाऊद ग्लेसे ह्राङला सम्पत्ति च्याबारी सिपाहीगदेला चुनोन हाकिमगदेदा जिम्मा पिन्बा मुबा।
दाऊददा सल्लाह पिन्बा म्हिगदे
दाऊदला अगु जोनाथन ज्यबा सल्लाह पिन्बा, बुद्धि मुबा धर्मगुरु मुबा। हक्मोनीला झा यहीएल चा ग्लेला कोलागदेदा लोप्बा म्हि मुबा।
अहीतोपेल ग्लेदा सल्लाह पिन्बा म्हि मुबा। अरक वंशला हूशै चा ग्लेला ह्रो मुबा। अहीतोपेल सिमाहेन्से बनायाहला झा यहोयादादेन अबियाथार चा ग्लेदा सल्लाह पिन्बा म्हि दोजी। ओच्छे योआब चा सिपाहीगदेला हाकिमला मूल म्हि मुबा।
Source notes (2)
- Cross-reference ठुङ् १५:५; २२:१७; २६:४
- Cross-reference २ शमू २४:१-१५; १ काइ २१:१-१४
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.