Eastern Tamang Language Bible
१ काइ 11
दाऊद इस्राएलला ग्ले दोबा
२ शमू ५:१-१०
जमाहेन्से इस्राएलला जम्मान म्हिगदे हेब्रोनरी दाऊद मुबा ग्लारी खजी। ओच्छे थेनीगदेसे दाऊददा चुह्रङ् भिसी पाङ्जी, “ङनी ह्राङलान स्यादेन नख्रु हिन्ना। ङाच्छा शाऊल ग्ले मुबा धुइरीनोन ह्राङसेन इस्राएलला सिपाहीगदेदा लडाइ लबारी आँट पिन्बा मुबा। ओच्छे परमप्रभु ह्राङला परमेश्वरसे ह्राङदा ‘ए, ङाला म्हि इस्राएलला गोठालो दोला, ए, थेनीगदेथोरी शासन लबा म्हि दोला’” भिसी सुङ्बा मुबा।
इस्राएलला जम्मान गन्बागदे हेब्रोनरी दाऊद ग्ले मुबा ग्लारी खजी। जमाहेन्से थेसे थेरीन परमप्रभुला ओन्छाङ्री थेनीगदेदेन छ्याम कबुल लजी। परमप्रभुसे शमूएलग्याम सुङ्बा ह्रङ्नोन थेनीगदेसे दाऊदला थोबोरी छ्युगु युसी दाऊददा इस्राएलला ग्ले स्होबारी धम्जी।
दाऊदसे यरूशलेमदा ह्राङला यारी किन्बा
दाऊददेन जम्मान इस्राएलीगदे यरूशलेम अथवा यबूसरी निजी। थेरी यबूसीगदे चिमुबा।1 थेनीगदेसे दाऊददा “ह्राङ खाइमै चुरी खबारी आखम” भिसी पाङ्जी। तसैनोन थेनीगदेसे लडाइ लबाला लागिरी सियोनरी स्होबा ग्ला दाऊदसे ह्राङला यारी किन्जी। थे ग्लादा दन्दे दाऊदला सहर भिसी पाङ्मुला। दाऊदसे “जम्मान भन्दा ङाच्छा यबूसीगदेदेन छ्याम लडाइ लबारी निबा म्हि चा सिपाहीगदेला हाकिम दोला” भिसी पाङ्बा मुबा। थेरी जम्मान भन्दा ङाच्छा निबा म्हि सरूयाहला झा योआब तजी। थेतबासेलमा थे सिपाहीगदेला हाकिम दोजी। यबूसीगदेसे लडाइ लबाला लागिरी स्होबा ग्लादा दाऊदसे ह्राङ चिबा दिम स्होजी। थेतबासेलमा म्हिगदेसे थे ग्लादा दाऊदला सहर भिसी पाङ्जी। थेसे गारागदेला क्युर्सीन पर्खालधोनान लडाइ लबाला लागिरी स्होबा ग्लाला क्युर्सीन सहर स्होजी, ओच्छे स्होबारी बाँकी मुबा सहर चा योआबसे स्होजी। दाऊद झन झन शक्तिशाली तबान निजी। तिग्दा भिसम जम्मान भन्दा शक्तिशाली परमप्रभु थेदेन छ्याम मुबा।
दाऊदला भङ्बा म्हिगदे
२ शमू २३:८-३९
दाऊददा ग्ले दोबारी ह्रो लबा दाऊदला भङ्बा भङ्बा मूल म्हिगदे चुगदेन हिन्ना, परमप्रभुसे जम्मान इस्राएलीगदेदेन छ्याम कबुल लबा अन्छार थेनीगदेसे इस्राएलीगदेदेन छ्याम ढिक्सी दाऊदला य्हुल्सा कोङ्ना लसी थान्बा मुबा।
सिपाहीगदेला हाकिमगदेलाएनोन हाकिम हक्मोनी वंशला याशोबाम मुबा। तिरेम थेसे ग्यार्जा सोम म्हिगदेदा भालासे भ्लोसी साइबा मुबा। थे भन्दा लिच्छाला चा अहोही वंशला दोदोला झा एलाजार मुबा, थे भङ्बा म्हिगदे सोम न्हङ्ला गिक मुबा। थे दाऊददेन छ्याम पास-दम्मीमरी मुबा, थेरी जौ व्हारारी पलिश्तीगदे लडाइ लबाला लागिरी ह्रुप तबा मुबा। थेनीगदेदा म्राङ्सी इस्राएलीगदे थेग्याम य्हार्जी। तर थेदेन दाऊद चा थे व्हाराला गुङ्री लडाइ लबाला लबान लजी, ओच्छे पलिश्तीगदेदा ब्रेना लसी थे व्हारा जोगब लजी। चुह्रङ् लसी परमप्रभुसे थेदा ढाना लजी।
थे बोगल गिकसे च्युइ मूल म्हिगदे न्हङ्ला गोर सोम चा अदुल्लामरी मुबा उ ङाम्ला पहरारी दाऊददेन छ्याम ह्रुप तबारी निबा मुबा। थे धुइरी पलिश्तीगदे रपाईगदेला ब्याँसीरी पाल फ्रेङ्सी चिबा मुबा। दाऊद चा नोबा गङ्री मुबा, पलिश्तीगदेला सिपाहीगदे चा बेथलेहेमरी मुबा। दाऊदसे ह्राङला दिमदा ल्हानान ढन्बासेलमा घ्रेन काइ तेःसी “बेथलेहेमला मूल म्राप ङाम्री मुबा वदीला क्युइ थुङ्म्याङ्सम तसेला मुबा” भिसी पाङ्जी। थेतबासेलमा थे भङ्बा गोर सोम सिपाही पलिश्तीगदेला पाल गुङ्ग्याम निसी बेथलेहेम नाम्साला मूल म्राप ङाम्री मुबा वदीग्याम क्युइ ख्योसी दाऊद मुबा ग्लारी भजी। तर दाऊदसे थे क्युइ थुङ्बारी आङ्यन्नी। बरू थेसे थे क्युइ परमप्रभुला ओन्छाङ्री ल्हूबान चुह्रङ् भिसी पाङ्जी, “तिग ङाइ चु म्हिगदेला का थुङ्से? परमेश्वरसे ङादा चुह्रङ्बा गे लआपुङ्गै। थेनीगदेसे चु क्युइ ह्राङला ज्यान गोजाला धाररी थान्सी भबा हिन्ना।” थेतबासेलमा थेसे थे क्युइ आथुङ्नी। चु भङ्बा म्हि सोमसे आँट किन्सी लबा गे चुह्रङ्बान मुबा।
योआबला आले अबीशै चा थे भङ्बा मूल म्हि सोमदा च्याबा मूल म्हि मुबा। थेसे तिरेकुनु ग्यार्जा सोम म्हिदा भालासे भ्लोसी साइबा मुबा। चुह्रङ् लसी थे सोमला ह्रङ्नोन थेलाएनोन मिन चलब तजी। थे सोमसे भन्दा थेसे ल्हानान मान याङ्सी थे थेनीगदेला हाकिम दोजी। तर थेला मिन थे सोमला ते चा चलब आतनी।
कब्सेल सहरला यहोयादाला झा बनायाह ल्हानान भङ्बा सिपाही मुबा। थेसे ल्हानान घ्रेन गेगदे लबा मुबा, थेसे मोआबला भङ्बा भङ्बा सिपाही न्हीदा साइबा मुबा। तिरेकुनु घ्लिङ् ताइबा धुइरी व्हाङ न्हङ्री वाङ्सी थेसे सिंहदा साइबा मुबा। थेसे क्रु ङ्हा नोबा घ्रेन मिश्री गिकदा साइजी, थे घ्रेन मिश्रीला यारी क्वान राबा तानना कडी तेबान भाला मुबा। थे चा कडी गिक थोसी लडाइ लबारी निजी। ओच्छे थे घ्रेन मिश्रीला भाला ब्यन्सी थेनोन भालासे थेसे थे घ्रेन मिश्रीदा साइबा मुबा। यहोयादाला झा बनायाहसे लबा घ्रेन गे चुह्रङ्बान मुबा। थे सोमला ह्रङ्नोन थेलाएनोन मिन चलब तजी। थे बोगल गिकसे च्युइ मूल म्हिगदे भन्दा थेसे ल्हानान मान याङ्जी। तर थेला मिन थे सोमला ते चा चलब आतनी। दाऊदसे थेदा ह्राङला सिपाहीगदेला हाकिम स्होजी। दाऊदला भङ्बा भङ्बा सिपाहीगदे चुगदेन हिन्ना,
योआबला आले असाहेल,
बेथलेहेम नाम्साला दोदोला झा एल्हानान,
हारोर वंशला शम्मोत,
पेलोन वंशला हेलेस,
तकोरी चिबा इक्केशला झा ईरा,
अनातोतरी चिबा अबीएजेर,
हूशा वंशला सिब्बकै,
अहोही वंशला ईलै,
नतोपातरी चिबा महरै,
नतोपातरी चिबा बानना झा हेलेद,
बेन्यामीन वंशला गिबारी चिबा रीबैला झा ईथै,
पिरातोनरी चिबा बनायाह,
गाशला होपगदेरी चिबा हूरै,
अर्बा वंशला अबीएल,
बहूरीमरी चिबा अज्मावेत,
शाल्बोनरी चिबा एल्याहबा,
गीजोन वंशला हाशेमला झागदे,
हरार वंशला शागेला झा जोनाथन,
हरार वंशला साकारला झा अहीआम,
ऊरला झा एलीपाल,
मकेरात वंशला हेपेर,
पेलोन वंशला अहियाह,
कर्मेलरी चिबा हेस्रो,
एज्बैला झा नारै,
नातानना आले योएल,
हग्रीला झा मिभार,
अम्मोन वंशला सेलेक,
बेरोतरी चिबा नहरै, चुसे सरूयाहला झा योआबला हतियार पुइमुबा,
यित्रीरी चिबा ईरादेन गारेब,
हित्त वंशला उरियाह,
अहलैला झा जाबाद,
रूबेन वंशला शीजाला झा अदीना, चु रूबेनीगदेला मूल म्हि मुबा, थेदेन छ्याम बोगल गिकसे च्युइ सिपाहीगदे मुबा,
माकाला झा हानान,
मित्न वंशला योशापात,
अस्तेरातरी चिबा उज्जीया,
अरोएररी चिबा होतामला झा शमादेन यीएल,
शिम्रीला झा येदीएल,
येदीएलला आले तिज वंशला योहा,
महाबा वंशला एलीएल,
एल्नामला झागदे यरीबैदेन योशब्याह,
मोआबरी चिबा यित्मा,
एलीएल, ओबेद
ओच्छे मेजोबा वंशला यासीएल मुबा।
Source notes (1)
- Cross-reference यहो १५:६३; निसाफ १:२१
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.