Skip to content
BibleKenya
TAW Hiblu 2 Verse

Jisas Klays Takaw Teplep Ne

Hiblu 2

God chɨnop tɨg asɨk dup ak, tap awl yɨbɨl

God Ñɨne yɨb awl dup anɨb ak tek, takaw anɨb ak agñel nopun ak, nɨgtep gɨl pɨsnep dɨnɨgun. Pen nɨgtep gɨl ma donɨgabun, takaw anɨb ak kelɨgɨl mɨd dad amɨl, kɨdek pɨsnep kelɨgɨnɨgabun. 1 Bɨlel God takaw agɨnɨg, takaw ne ak dɨl ensel okok kɨlop ñak. Ñek, ensel okok agñelɨgɨpal ak nɨm, binɨb okok kɨlop yomak, takaw anɨb ak takaw nɨŋɨd yɨbɨl yek.2 Pen binɨb takaw anɨb ak tɨbɨlɨkɨl kɨdek ma gɨlak okok, tap tɨmel gɨlak anɨb okok nep, God kɨlop pen gɨ tɨmel gak. 3 Kɨlop anɨgak ak mɨñɨl pen, God chɨnop tɨg asɨk dup ak, tap awl yɨbɨl. Anɨb ak chɨn God chɨnop tɨg asɨk dup ak kud ñɨl ma nɨgɨnɨgabun ak, tɨtay dɨnɨgabun? Pɨlɨk amnɨgun tek ma lɨnɨgab. Nɨgɨm. Ned Bɨawl ne takaw tep anɨb ak agek, binɨb ogɨnap nɨgɨlak. Kɨli nɨŋɨd, chɨnop pen agñel chɨn nɨŋɨd nɨgɨnok, takaw anɨb ak nɨŋɨd yɨbɨl yek. 4 Pen gos kɨli anep nɨŋɨd ma agɨlak. God kɨli ayɨp mɨdaknɨŋ, tap mageptek keke ogɨnap gɨlɨg chɨnop agñɨlak. God gos ne ke nɨŋɨd, Kawnan ne ak agyokek apɨl, binɨb ogɨnap ayɨp mɨdɨl kɨles gek, ke yɨbɨl gelak abe nɨgɨnok. Anɨb ak nɨm, takaw ne anɨb ak, nɨŋɨd yɨbɨl agebal agɨl nɨgɨnok.

Jisas apɨl bɨ yɨbɨl tek yek ak, ne ke chɨnop tɨg asɨk dup

5

Pen takaw apun anɨb ak, God chɨnop dɨl ne ayɨp yonɨgabun ñɨn ak, chɨn nopun, ne ensel okok kɨlop agek kɨli anɨb okok kod yenɨgabal ak, anɨgɨl ma agak. Mel yɨbɨl. 6 Pen buk Baybol, bɨ olap ne takaw olap tɨkɨl anɨb agak,

God, nad binɨb okok tap tay mɨdel, kɨlop gos nɨgɨlɨg mɨdeban agɨl tɨkak?7 Nad tek ma mɨdebal, binɨb yokɨp ak pen, taynen kɨlop kod mɨdtep gɨpan agɨl tɨkak? Nad genak, yokɨp sɨkol won ak ensel okok bɨawl tek yelak, binɨb okok tam okok tek yelak agɨl tɨkak. Pen binɨb okok kɨlop genak, yɨb awl dɨl bɨnonɨm tek yelak agɨl tɨkak. 8 Bɨnonɨm tek mɨdel, tap anɨb okok mɨdupsek kɨlop muk okok le, kɨli anɨb okok kod yelak agɨl tɨkak.

Takaw anɨb agɨl tɨkak ak anɨgɨl yomak, God tap okok mɨdupsek kɨlop muk okok lek, anɨb okok mɨdupsek kod yelak. Mɨñɨl pen chɨn nopun, tap anɨb okok mɨdupsek kod ma mɨdebal. 9 Chɨn pen Jisas bɨnonɨm yɨb awl dup ak nopun. God ne binɨb okok mɨdupsek kɨlop yɨmug nɨŋɨd gɨtep gɨnɨm agɨl agek, Jisas kɨlop nen kumak. Anɨb ak yokɨp sɨkol won ak ensel okok bɨawl tek yelak, Jisas ne tam okok tek yek. Pen yul awl dɨl kumek, God gek mɨñɨl yɨb awl dɨl bɨnonɨm yɨbɨl mɨdeb. 10

Chɨn nopun, God ne tap okok mɨdupsek jɨj ak mɨdeb, tap okok mɨdupsek gɨlak. Pen ne anɨgɨl gos nɨgak, Jisas ne God ñapay ne kuŋay yɨbɨl dɨl, kɨlop poŋɨd man teplep ne alaŋ dad amnɨmuŋ. Pen abe gos nɨgak, Jisas binɨb anɨb okok kɨlop tɨg asɨk dɨnɨmuŋ. Anɨb ak tek, Jisas nop agyokek apɨl yul awl yɨbɨl dak. Yul awl dak tek, ne bɨ teplep yɨbɨl ned ameb ak, binɨb okok kɨlop dɨl God ayɨp jɨmñɨl lup. God ne anɨgak ak, tep yɨbɨl mɨdeb. 11 Pen nɨgɨm. Jisas ayɨp, binɨb okok ne kɨlop gek God binɨb suŋtep ne mɨdebal okok ayɨp, Bapi kɨli nokom mɨdeb. Anɨb ak tek mam ay agɨnɨg nebeŋ ma dup, wɨsɨbɨl nep agup. 12 Ne God nop anɨb agak,

Binɨb yad okok kɨlop, kesɨm nep ak agñɨnɨgayn agak. Kɨli nep gos nɨgɨnɨg apnan gɨnɨgabal ak, yad kɨlop nab okok kɨmep agɨlɨg, yɨb nep dad aplanɨgayn agak. 13

Pen tepayaŋ agak,

Yad nop gos sek kod yenɨgayn, ne yad gɨnɨgayn agɨl agup ak gɨtep gɨnɨgab agak.

Pen olap agak,

Nɨgɨm, God ñapay yɨp agak okok, ayɨp mɨdebin awl agak. 14

Ñapay agak anɨb okok, kɨli binɨb yɨbɨl ak nɨm, ne abe binɨb yɨbɨl yelak tek olap tek lak. Pen ne Satan bɨ binɨb gek kubal ak nop ñag juyokɨnɨm agɨl, bɨ yɨbɨl lɨl kumak. 15 Anɨgek nɨm, binɨb kumnɨgabun agɨl pelnep gos pal lɨl yelak okok, kɨlop wɨsɨb yokek nag lep yelak anɨb ak kelɨgɨl kɨm amnɨgel tek lak. 16 Nɨŋɨd apun, ne ensel okok dɨtep gin agɨl ma gak. Eblaham ñapay ne okok dɨtep gin agɨl anɨgak. 17 Adek anɨb ak nep, Jisas ne binɨb ne okok binɨb yɨbɨl mɨdebal nep tek lɨnɨmuŋ. Bɨ yɨbɨl lek, God nop gek ne bɨ God nop sɨbogep bɨawl yɨbɨl ak yonɨmuŋ. Ne bɨ God nop sɨbogep bɨawl yɨbɨl mɨdeb ak, binɨb okok kɨlop mapen nɨŋɨd dɨtep gɨl, God agak tek nep gɨl wog ne gonɨmuŋ. Anɨgɨnɨmuŋ ak nɨm, binɨb tap si tap tɨmel gɨpal okok tɨg walɨg gɨyokɨnɨmuŋ. Anɨb ak tek ne bɨ yɨbɨl lak. 18 Kɨcheki Jisas nop apɨl yɨl yɨl ñek, nop ke mɨŋel dak. Anɨb ak kɨcheki binɨb okok kɨlop apɨl yɨl yɨl ñɨnɨgab won ak, Jisas ne ke kɨlop gɨñɨnɨmuŋ tek lɨnɨgab.

Source notes (18)
  1. Cross-reference Sng 68.17
  2. Footnote Takaw ensel agñelɨgɨpal anɨb ak, takaw Mosis ñu kɨl tɨkak ak. Kisim Bek sapta 19-20 nɨgɨnɨmɨn. Buk Kisim Bek adaŋ mɨdeb ak, ensel kɨli takaw anɨb ak agñelɨgɨpal ak ma agak ak pen, Juda bɨ kɨli anɨgɨl nɨgɨlak, God takaw ne ensel kɨlop agñek, kɨli Mosis nop agɨlak. Aposel 7.38 ayɨp, 7.53 ayɨp, Galesiya 3.19 ayɨp nɨgɨnɨmɨn.
  3. Cross-reference Mat 4.17, Mak 1.14, Luk 1.2, Hib 10.28-29, 12.25
  4. Cross-reference Mak 16.20, Apo 2.22, 14.3, 1 Ko 2.4, 12.4, 12.7, 12.11, Epe 1.5, 1.9
  5. Cross-reference Hib 6.5, 2 Pi 3.13
  6. Cross-reference Jop 7.17, Sng 144.3
  7. Cross-reference Sng 8.4-6
  8. Cross-reference Mat 28.18, 1 Ko 15.25-27, Epe 1.22
  9. Cross-reference Jon 3.16, Lom 5.18, Plp 2.7-9, 1 Ti 2.6, 1 Jo 2.2, Lep 5.9
  10. Cross-reference Luk 24.46, Jon 20.17, Apo 3.15, Lom 8.29, 11.36, Hib 5.9, 10.10
  11. Cross-reference Mat 25.40, Mak 3.35, Jon 20.17, Apo 17.26, Lom 8.29, Hib 10.10
  12. Cross-reference Sng 22.22
  13. Cross-reference Sng 18.2, Ais 12.2, Jon 17.6, 17.9-12
  14. Cross-reference Jon 1.14, 12.31, Lom 8.3, Plp 2.7, Kol 2.15, 1 Jo 3.8, Lep 12.10
  15. Cross-reference Lom 8.15, 2 Ti 1.7
  16. Cross-reference Ais 41.8-9
  17. Cross-reference Plp 2.7, Hib 2.14, 4.15, 5.1-2, 1 Jo 2.2, 4.10
  18. Cross-reference Hib 4.15-16, 5.2, 7.25

Jisas Klays Takaw Teplep Ne. Copyright © 2013 Pioneer Bible Translators. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.