Hebru 1

Pwknvyarnv gv Gamchar hv Ninyigv Kuunyilo gv lokv

1Pwknvyarnv krim ngonugv abuapa vdwa nyijwk vdw gvlokv achialvgo okv aku-akusinv lamtv lokv gaam japtoku, 2vbvritola ataranya alu vdwso nw ninyigv Kuunyilo gv lokv ngonua japduku. Nw hvkvnv nyi ako ninyigv lokv Pwknvyarnv chinggodogo nga pwklinyarlin pvkunv, okv ataranya alu lo ogumvnwng nga paamu dukubv Pwknvyarnv ninyia darpvkunv. 3Nw Pwknvyarnv gv achialvbv Yunglit kunam ha unglit kargojito okv Pwknvyarnv oguaingbv ripvdw vbv aringchingnv, ninyigv jwkrw doonv gamchar lokv chinggodogo nga turmudu. Nyia nyi mvnwng gv rimur vdwa mvngnga dukubv rijiro kochingbvku, nw nyidomooku tolo Kaiyachokbv jwkrw bv rinv, Pwknvyarnv gv lakbik tangvlo doolwk pvku.

Pwknvyarnv gv Kuunyilo gv Kainam

4Kuunyilo nga nyidogindung vdwa kaiyanv gubv mvpvnv, Pwknvyarnv gv ninyia amin jinamv bunu vdwgv amin hv kaiyanvngv. 51Vkvlvgabv Pwknvyarnv ninyigv nyidogindung vdwa vdwloka vbv mimato

“No ngoogv Kuunyilo ngv;

Silu ngo noogv Abu bv ridu.”

Pwknvyarnv nyidogindung vdwa vbvka mima,

“Ngo ninyigv Abu bv rire,

okv nw ngoogv Kuunyilo bv rire.” 62

Vbvritola Pwknvyarnv vdwlo ninyigv Kuunyilo bvngtua nyia mooku lo vngmu tvikulo nw vbv minto,

“Pwknvyarnv gv nyidogindung mvnwngngv ninyia kumrungjorung laka.” 73

Vbvritola nyidogindung gv lvkwnglo Pwknvyarnv vbv minto,

“Pwknvyarnv ninyigv nyidogindung vdwa doori bv mvto,

okv ninyigv pakbu vdwa vmv gv mvriakbv mvtoku.” 84

Kuunyilo gv lvkwnglo, ogubvrijeka, Pwknvyarnv minto:

“Ho Pwknvyarnv ngam, noogv5 karv ngv dvbvsingtambv ataranya gobv doobwngre!

No noogv nyi vdwa jvjv6 lokv rigvdogvre.

9No jvjv nvnga pakdu okv rimur nvnga no kaanwng madu.

Vkvlvgabv Pwknvyarnv, noogv Pwknvyarnv, nam darpvkunv

okv noogv richam ajin vdwa kaiyago

nam hv mvngdv okv mvngpusakpua jiyapvnv.” 107

Nw vbvka mintato,

“Ahtu, no, atuake ho sichingmookua pwklinto,

okv no atubogv laak lokv no nyidomooku vdwa mvpvkunv.

11Bunu nyeriku, vbvritola no doobwngre;

bunu vji nyenam aingbv nyeare.

12No bunua jvtvlaklwk ha tinam aingbv tireku,

okv bunu vji aingbv akusubv ridinre.

Vbvritola no vbvdvdvbv doobwngre,

okv noogv svngtung ngv vdwloka nyemare.” 138

Pwknvyarnv ninyigv nyidogindung vdwa vdwloka vbv mimato:

“Ngoogv lakbik tangvso dootung tvka

ngo noogv nyimak vdwa

noogv lvpa lvkwnglo vvpvma dvdvlo.”

14Vbvrikunamv nyidogindung vdwv oguv? Bunu dow bv rila Pwknvyarnvnyi rijiyanv okv yvvbunudw ringlinbaalin nama paajikunv vdwa nw bunua ho vngmula ridur yamudu.