Biblica® Open Tagalog Contemporary Bible 2025
Mga Salmo 23
Awit na isinulat ni David.
Ang Panginoon ang aking pastol,
hindi ako magkukulang ng anuman.
Pinagpapahinga niya ako
sa malagong damuhan,
inaakay niya ako patungo
sa tahimik na batisan.
Binibigyan niya ako
ng panibagong kalakasan.
Pinapatnubayan niya ako
sa tamang daan,
upang siyaʼy aking maparangalan.
Dumaan man ako sa madilim
na libis ng kamatayan,
hindi ako matatakot
dahil kayoʼy aking kasama.
Ang inyong pamalo1 at tungkod
ang sa akiʼy umaaliw.
Ipinaghahanda nʼyo ako ng piging
sa harap ng aking mga kaaway.
Pinapahiran nʼyo ng langis ang aking ulo.
At hindi nauubusan ng laman
ang aking inuman.
Tiyak na ang pag-ibig at kabutihan nʼyo
ay mapapasaakin
habang akoʼy nabubuhay.
At akoʼy maninirahan2
sa inyong tahanan,3
aking Panginoon, magpakailanman.
Source notes (3)
- Footnote pamalo : Ginagamit ng pastol upang itaboy ang mga mababangis na hayop.
- Footnote maninirahan : Ito ang nasa tekstong Septuagint. Sa Hebreo, babalik.
- Footnote sa inyong tahanan : Maaaring ang ibig sabihin, sa templo o sa tahanan ng Diyos sa langit.
Biblica® Open Tagalog Contemporary Bible 2025. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.