Jeremias 47

Ang Mensahe tungkol sa Filistia

1Ito ang salita ng Panginoon na ipinahayag niya kay Propeta Jeremias tungkol sa Filistia noong hindi pa sinasalakay ng Faraon1 ang Gaza:

2Ito ang sinasabi ng Panginoon:

“May bansang sasalakay mula sa hilaga

na tulad ng bahang aapaw

sa buong lupain.

Wawasakin ng bansang ito ang lahat ng lungsod

pati ang mga mamamayan nito.

Magsisigawan at mag-iiyakan

nang malakas ang mga tao;

dahil sa takot.

3Maririnig nila ang ingay ng lagapak

at mga yabag ng mga kabayo

at mga karwahe.

Hindi na lilingon ang mga ama

upang tulungan ang mga anak nila.

4Sapagkat darating ang araw

na wawasakin ang lahat ng Filisteo

pati ang mga kakampi nila

na tumutulong sa kanila

mula sa Tiro at Sidon.

Wawasakin ng Panginoon

ang mga Filisteo.

Ito ang mga taong mula sa Caftor.2

5Ang mga taga-Gaza ay magpapakalbo,

tanda ng kanilang pagluluksa,

at ang mga taga-Ashkelon

ay tatahimik sa kalungkutan.

Kayong mga mamamayan sa kapatagan,

hanggang kailan ninyo susugatan

ang inyong sarili

upang ipakita ang inyong kalungkutan?

6Nagtatanong kayo

kung kailan ko ititigil ang pagpaparusa sa inyo

sa pamamagitan ng espada

ng Panginoon.

Sinasabi ninyong ibalik ko na

sa lalagyan ang aking espada

at pabayaan na lang kayo.

7Ngunit paano ito mapipigil

kung inutusan na ito ng Panginoon

na salakayin ang Ashkelon

at ang mga naninirahan

sa baybayin ng dagat?”