Roma

Ya Sulat ni Pablo adti//manga mangintu-uway na awun ni

Roma

Ya muna pagpa-edeꞌ

Ya Roma, to-o dakulaꞌ na syudad aw yan ya ulu sa nasud na Italiya. Madég ya manga nasud na nyasakup na Roma dala ya nasud na Isra-él. Aw ya pangulu adti kadég nilan pagtawagen na impirador. Kaliman ni Pablo madtu ni syudad na Roma pada magpa-edeꞌ na Madyaw na Ubat-ubat kan Kristu, manang asuntu na madég ya salang nan dun ni imo-unun na Tyumanem adti eped na banwa, yanagaw walaꞌ sakanan pakakadtu. Manang pigsulatan nan silan talana nan adti syudad na Corinto pada makapalna-u kanilan.

Na, awun duwa ya punganan na utaw asini tas na lupaꞌ: Ya sambuk, yan ya manga Judiyu aw silan ya manga buwadbuwad ni Jakub na pigngalanan uman na Isra-él. Ya kadwa, yan ya manga Héntil, bekeꞌ silan na buwadbuwad ni Jakub aw walaꞌ nilan kilala͡a ya tengteng Tyumanem asini muna.

Mawat ya Roma lekat adti banwa na Isra-él, manang asuntu na madengeg ya dakulaꞌ na syudad yeiy, madég ya manga Judiyu na mig-alin mig-eyaꞌ dun ni Roma. Aw pagdateng na pista na Péntékostés adti Jérusalim, awun manga Judiyu na taga Roma na nyadtu na un tumambung sa pista. Aw migpakanyeg silan sa pag-ubat-ubat ni Pédro aw madég kanilan ya nyangintu-u kan Jisu-Kristu. Sa pag-uliꞌ nilan adti Roma, pigpa-edeꞌ nilan adti kanilan manga sinagoga ya pigdengeg nilan, aw awun manga Judiyu na nyadala dun ni pagpangintu-u. Aw awun uman manga Héntil na nyan-apit dun pada magpakanyeg sa palna-u na lekat adti Tyumanem. Maya-mayaꞌ migkadég ya manga Judiyu aw manga Héntil na nyangintu-u la kan Kristu dun ni syudad na Roma.

Aw sambuk na tima asini sulat ni Pablo na ya Tyumanem walaꞌ ya pigkibang nan sa manga Judiyu aw sa manga Héntil. Diliꞌ mabatug na utaw tumanen ya kadég na suguꞌ dun ni Uldin na manga Judiyu. Magi oloꞌ sa kallat na Tyumanem aw sa pagpangintu-u kan Jisu-Kristu, makaluwaꞌ ya utaw lekat adti pag-allang na salaꞌ aw adti pagpa-emel-emel nan.