Pigbukasan

Ya Pigbukasan

kan Juan

Ya muna pagpa-edeꞌ

Ya apostol na si Juan, yan ya migsulat sa libru yeiy. Aw pigsulat nan uman Ya Madyaw na Ubat-ubat kan Jisu-Kristu, aw ya Tagnaꞌ na Juan, ya Kadwa na Juan, aw ya Katlu na Juan.

Paglabay da na madég na umay lekat na pagkataw ni Jisus adti pagkamatay, nyadtu si Juan adti syudad na Épéso aw dun da sakanan pag-eyaꞌ. Aw yan ya migdumala sa kadég na manga maggagaday sa manga mangintu-uway na nyanimba adti pitu ya syudad na sakup na probinsiya na Asia. Na, ya manga mangintu-uway pigpamulayaman silan na manga Romanen na migdumala sa banwa yan. Yanagaw awun eped kanilan na nyaleges migsimba sa manga inutaw adti manga témplo na Grigo aw tyumambung sa manga pista nilan, pada diliꞌ silan kalagakan sa kanilan talabahu. Aw pigpamulayaman pa uman silan na manga Judiyu na kyumele sa Madyaw na Ubat-ubat kan Kristu.

Na, ya impirador na migdumala sa kasakupan na Roma, kaliman nan na gayed sakanan patasen na kadég na manga utaw aw silingen nilan sakanan na sambuk na tyumanem nilan. To-o malatay ya tud nan, aw ya manga mangintu-uway diliꞌ malim ma͡agad kanan, yanagaw pyamulayaman nan silan. Aw si Juan nyaka-agad uman sa pagpamulayam na impirador. Pig-alilinan sakanan lekat adti Épéso aw dun da betangan adti puluꞌ na Patmos. Aw bakleg da sakanan. Aw sa talana nan dun, pigsulat nan ya manga pigpakitaꞌ kanan na Tyumanem na un pa ma-imoꞌ adti kamoliyan na manga allaw.

Ini ya manga téma na pigkasampetan asini libru yeiy: Ya Tyumanem, yan ya migdumala sa kadég. Aw yan uman ya mag-ukum sa kadég na utaw, labi la ya manga utaw na pigdumala͡an na malatay asini tas na lupaꞌ. Si Satanas aw kasakupan nan alag kalaten. Manang ya manga mangintu-uway kan Jisus, maka-akup silan adti Kasakupan na Pighari-an na Tyumanem, aw matagtun nilan ya ginawa na walaꞌ ya katigkasan.