Pilipos

Ya Sulat ni Pablo adti//manga mangintu-uway na awun ni

Pilipos

Ya muna pagpa-edeꞌ

Ya Pilipos, yan ya dakulaꞌ na syudad adti probinsiya na Macédoniya. Aw sa pagkadtu ni Pablo dun eped ni Silas, awun manga nyangintu-u kan Kristu, aw silan ya muna mangintu-uway na migkatipun dun ni Macédoniya. Ya manga pig-imoꞌ nilan adti Pilipos mabasa yeiy adti Manga Pigpan-imoꞌ na Manga Apostolés 16:11-40. Aw adti moli na allaw, pigpadala͡an nilan si Pablo sa kuwalta na un tabang sa imo-unun nan. Aw yan ya du-an na migsulat sakanan kanilan kay kaliman nan silan pasalamatan sa kuwalta na pigpadala nilan.

Na, dyumateng ya allaw na nyakalabusu si Pablo adti syudad na Roma aw tyumagad sa pag-usay na impirador na si Néro, aw pig-iman nan na paluwa-en sakanan. Ya balay na pig-eya-an ni Pablo dun sakanan kalabusuwa, aw pagpa-agadan sakanan na sambuk na sundalu. Manang pangkay pigkalabusu sakanan, dakula ya pagleya nan, aw yeiy ya sambuk na téma asini pigsulat nan.

Asini sulat ni Pablo, pigpa-edeꞌ nan na awun eped na manga Judiyu na nyangintu-u la manang piggelgel nilan pigpadalug sa manga mangintu-uway na Héntil ya manga katanem na manga Judiyu. Aw miglong si Pablo na diliꞌ galu gayed mag-ayil ya mangintu-uway manang magsiling baling silan kan Jisus. Dun uman ni seled na sulat, to-o si Pablo migleya asuntu na pigtuman nilan ya kadég na pigpalna-u nan idtu muna.