Matiyo

Ya Madyaw na Ubat-ubat//kan Jisu-Kristu//na Pigsulat ni

Matiyo

Ya muna pagpa-edeꞌ

Ya sambuk na migsulat sa Madyaw na Ubat-ubat kan Jisu-Kristu, yan ya apostol na si Matiyo na pigngalanan uman na Libi. Sa walaꞌ pa sakanan ka-imoꞌ umagakan ni Jisus, ya talabahu nan magkubla͡ay sa buwis.

Ya du-an na pigsulatan ni Matiyo ya kadég na eped nan na Judiyu, pada mangintu-u silan na si Jisus yan ya Misiyas na pigpadala na Tyumanem na madugay da nilan pigtagadan. Adti tingeg na Grigo, ya pagtawag nilan sa Misiyas: Kristu. Aw yan ya magpaluwaꞌ aw magdumala kanilan.

Na, ya kadég na utaw asini tas na lupaꞌ asini muna alag Héntil. Manang pigpamalliꞌ na Tyumanem si Abraham na ma-imoꞌ tyugbulan na manga utaw na Isra-él. Aw dyumateng ya manga allaw na pigtawag da silan na manga Judiyu.

Aw awun uman pigsulat ni Apostol Matiyo na manga tingeg na lekat adti pigsulat na manga propita asini muna, pada pa-edeꞌ adti manga Judiyu na dun ni kan Jisus katuman ya kadég na pigpasulat na Tyumanem. Aw pigdandan nan ya manga tyugbulan ni Jisus lekat adti kan Abraham, kay si Jisus buwadbuwad uman ni Dabid na mighariꞌ sa kasakupan na Isra-él asini muna.

Ya sambuk uman na pigkasampetan ni Matiyo asini, yan ya Kasakupan na Tyumanem. Asini muna, ya kasakupan na Tyumanem, yan ya manga buwadbuwad ni Isra-él, kay silan ya pigpamalliꞌ nan na ma-imoꞌ kanan manga utaw. Manang pagdateng ni Jisus asini tas na lupaꞌ, pigpalna-u nan na awun bagu na Kasakupan na Tyumanem, aw maka-akup dun ya manga utaw na mangintu-u kanan pangkay Judiyu silan aw pangkay Héntil. Madég ya utaw na nyangintu-u kanan, manang madég ya manga magdadumala͡ay sa manga Judiyu na kyumele uman kanan.