Lukas

Ya Madyaw na Ubat-ubat//kan Jisu-Kristu//na Pigsulat ni

Lukas

Ya muna pagpa-edeꞌ

Si Lukas, utaw na Héntil na taga Antiyokiya, sakup na Sirya. Bekeꞌ sakanan na Judiyu aw bekeꞌ uman na apostol ni Jisus. Sambuk sakanan na doktor, aw migkakilala͡ay silan si Apostol Pablo adti lunsud na Troas sakup na Asia. Aw nyagad sakanan kan Pablo aw kan Silas aw kan Timotiyo adti madég na panaw nilan. Aw si Lukas ya sambuk na eped ni Pablo adti syudad na Roma talana pa ni Pablo migtagad sa pag-usay kanan adti asdangan na impirador na si Néro.

To-o si Lukas matadeng sa tingeg na Grigo, aw matadeng uman magdalugdalug sa tultulanen. Pangkay walaꞌ ni Lukas kita-a ya manga pig-imoꞌ ni Jisus, manang awun manga utaw na tengteng kyumitaꞌ sa kadég yeiy aw silan ya pig-usip ni Lukas, aw yan ya pigsulat nan. Awun duwa ya libru na pigsulat ni Lukas na awun ni Bibliya tadun: Ya Madyaw na Ubat-ubat kan Jisu-Kristu, aw Ya Manga Pigpan-imoꞌ na Manga Apostolés.

Yan ya pigsulatan ni Lukas ya sambuk na utaw na dengganen na si Tyupilo. Aw ya sambuk na pigkasampetan nan asini kanan sulat, na nya-imoꞌ utaw ya Iseꞌ na Tyumanem na si Jisus. Kaliman ni Lukas na ka-ede-an na kadég na utaw pangkay Judiyu aw pangkay Héntil na si Jisus ya tengteng na pigpadala na Tyumanem pada magpaluwaꞌ sa manga utaw lekat adti salaꞌ nilan.

Si Lukas dakulaꞌ ya kallat nan sa manga utaw na makalalat. Aw pigsulat nan na pigpadala na Tyumanem si Jisus adti kadég na manga utaw, dala ya walaꞌ ya pagkamangan, labi la ya manga pyangkedelan, aw ya pigkele͡an na manga eped, aw ya pigpanseledan na manga busaw.

Aw madég uman ya pigsulat ni Lukas na walaꞌ sulata na eped na utaw sa manga pigpan-imoꞌ ni Jisus aw sa manga pundinganan na piglong nan.