Juan

Ya Madyaw na Ubat-ubat//kan Jisu-Kristu//na Pigsulat ni

Juan

Ya muna pagpa-edeꞌ

Ya apostol na si Juan yan ya migsulat sa libru ini. Aw piglong nan dun ni kanan sulat na sambuk sakanan na tengteng kyumitaꞌ sa kadég na pigpan-imoꞌ aw pig-ubat-ubat ni Jisus, kay pigpamalliꞌ sakanan ni Jisus aw nya-imoꞌ sambuk na umagakan nan. Dun ni kanan pagsulat, pigtawag nan ya kanan pagka-utawun na “umagakan na pigginawa͡an ni Jisus.” Na, si Juan awun inulug nan na si Santiago na nya-imoꞌ uman apostol, alag silan iseꞌ ni Zibidiyo aw ni Salomé. Aw dun ni Bibliya, madég uman ya kasangay ni Juan, kasiling ni Juan na Magba͡utismuway, aw si Juan Markos, aw si Juan na ama ni Simon Pédro aw ni Andrés. Dun ni Bibliya, madég ya eped uman na pigsulat ni Apostol Juan: Ya Tagnaꞌ na Juan, Kadwa na Juan, Katlu na Juan, aw ya Pigbukasan.

Sa kadég na migsulat sa Madyaw na Ubat-ubat kan Kristu, si Juan ya nyakamoli migsulat. Aw pigpa-edeꞌ nan ya du-an na migsulat sakanan, aw ka-ede-an yeiy adti Juan 20:30-31 aw adti Juan 21:24. Dun ni allaw na pagsulat nan, bakleg da si Juan, aw ya manga eped nan na apostolés nyabus da pigpatay na manga po-on ni Kristu. Aw dun sakanan pag-eyaꞌ ni syudad na Épéso, aw dun uman pag-eyaꞌ si Timotiyo, aw pigpakabagseg nilan ya pagpangintu-u na manga mangintu-uway dun.

Madég da ya manga Judiyu aw manga Héntil na nyangintu-u kan Jisus. Manang pagdateng da adti katlu na alintuwad, nyampakasuway ya eped kanilan lekat adti tengteng na palna-u kan Kristu. Yanagaw pigsulat ni Juan ya Madyaw na Ubat-ubat pada pakasaligen ya pagpangintu-u nilan.

Awun madég na manga téma asini pigsulat ni Juan. Sambuk na téma, yan ya manga piglong ni Jisus sa pagka-utawun na yan ya kalalamdag, aw suwangan, aw magdadiyaga͡ay sa karniro, aw ya punu-an na paras, aw ya agiyanan, aw ya katinawan, aw ya ginawa na walaꞌ ya katigkasan.