Hibriyu

Ya Sulat adti manga

Hibriyuwanen

Ya muna pagpa-edeꞌ

Ya manga utaw na Hibriyu, silan ya manga buwadbuwad ni Jakub na pigngalanan uman na Isra-él, aw walaꞌ kadugay pigtawag da uman silan na utaw na Judiyu. Awun eped kanilan na nyangintu-u kan Jisus, aw madég uman ya pigpamulayaman asuntu sa pagpangintu-u nilan.

Walaꞌ ka-ede-i kun singalan ya migsulat sa libru ini. Manang to-o nan kya-ede-an ya Uldin na manga Hibriyu na yan ya manga suguꞌ na pig-atag na Tyumanem kan Moysis. Aw kya-ede-an nan uman ya pa-agi na pagsimba na manga Hibriyu sa Tyumanem magi sa pagdugsuꞌ dun ni Témplo na awun ni Jérusalim.

Aw ya pigsulatan nan, yan ya manga utaw na Hibriyu na nyangintu-u la kan Jisu-Kristu. Ya manga utaw na dyumawat seiy, yan ya kadwa na alintuwad na manga mangintu-uway, kay ya tagnaꞌ na manga mangintu-uway na pig-ubat-ubatan na manga apostolés, nyangkamatay da silan.

Asini pigsulat, awun madég na birsikulu na pigkamang lekat adti pigpasulat na Tyumanem asini muna adti tingeg na Hibriyu. Pig-ubad da dadan adti tingeg na Grigo, aw yan ya Bibliya na piggamit na manga apostolés. Aw adti manga birsikulu yan, pigpa-edeꞌ dun na si Jisu-Kristu ya matas pa kay sa manga propita aw sa manga anghil aw sa kadég, kay sakanan ya kalingeban sa kadég na palpa na Tyumanem. Aw si Jisu-Kristu, yan da ya To-o Matas na Magdadugsu-ay, aw dun ni pagdugsuꞌ nan sa kanan pagka-utawun, yan ya umbaꞌ pada malanas ya salaꞌ na manga utaw. Aw ya migsulat sa libru yeiy, pigpalna-u nan sa manga utaw na nyangintu-u kan Jisu-Kristu na pangkay Hibriyu aw pangkay bekeꞌ na Hibriyu, diliꞌ da nilan ka-ilangan dalugun ya pagdugsuꞌ na pigsuguꞌ dun ni Uldin nilan.