Galasiya

Ya Sulat ni Pablo adti//manga mangintu-uway na awun ni

Galasiya

Ya muna pagpa-edeꞌ

Ya Galasiya yan ya sambuk na probinsiya adti banwa na pigngalanan da adun na Turkey. Madég ya manga utaw na nyangintu-u kan Kristu asuntu sa palna-u ni Pablo aw ni Bérnabi idtu na tagnaꞌ na pagpanaw nilan adti madég na banwa. Manang sa walaꞌ pa si Pablo likuꞌ adti tampid nilan, awun manga eped na Judiyu na migpalna-u na ka-ilangan dalugun na manga mangintu-uway ya manga katanem na manga Judiyu. Yanagaw to-o migkabegat ya ginawa ni Pablo, aw asini sulat ini, piglongan nan ya manga mangintu-uway dun ni Galasiya na diliꞌ nilan pagdawaten ya maynan na palna-u.

Aw ya palna-u ni Pablo asini sulat ini, palna-u saba uman adti kadég na manga mangintu-uway. Kay pigpalna-u nan na bekeꞌ da kitadun na allang na Uldin na manga Judiyu, pangkay Judiyu kitadun aw pangkay Héntil. Kun maglong ya utaw na dawaten sakanan na Tyumanem magi sa pigpan-imoꞌ nan na madyaw, sangkamuluꞌ yan na palna-u. Kay piglong ni Pablo asini sulat nan na magi saba oloꞌ sa kallat na Tyumanem aw sa pagkamatay ni Jisus adti krus, yan oloꞌ ya du-an na dawaten na Tyumanem ya utaw na mangintu-u kanan.