Épéso

Ya Sulat ni Pablo adti//manga mangintu-uway na awun ni

Épéso

Ya muna pagpa-edeꞌ

Ya syudad na Épéso, yan ya ulu na probinsiya na Asia, aw dun si Pablo pag-eyaꞌ seled na tulungka͡umay aw migpalna-u sa manga bagu na mangintu-uway. Mabasa adti Manga Pigpan-imoꞌ na Manga Apostolés kapitulu 19. Dun ni Asia, madég uman ya manga mangintu-uway na migkatipun nyanimba dun ni kanilan manga lunsud, dala ya manga lunsud na Ismirna, aw Pérgamo, aw Tiyatira, aw Sardiya, aw Piladélpiya, aw La͡odiciya. Yanagaw sa pagsulat ni Pablo sa sulat ini, kaliman nan na basa͡en na kadég na manga mangintu-uway na nyeyaꞌ dun ni kadakulaꞌ na Asia.

Ya manga utaw na pigsulatan ni Pablo asini, yan ya manga utaw na Héntil na bagu pa nyangintu-u kan Kristu. Yanagaw to-o nan pigbangal ya madég na palna-u, kasiling na pagtawag kanaten na Tyumanem, aw ya pag-atag nan kanaten sa kanan grasya, dala ya Ispiritu Santo na pigbetang nan dun ni seled tadun. Aw ya sambuk uman na pigpa-edeꞌ nan, yan ya pagbukas na Tyumanem sa palpa nan na pigtaguꞌ asini muna. Kay dun ni pagkamatay ni Kristu adti krus, pigsambuk na Tyumanem adti bagu na kasakupan ya manga Judiyu aw manga Héntil na nyangintu-u la kan Kristu. Pigpalna-uwan pa uman ni Pablo ya manga eseg aw manga ka͡ubayan sa kanilan kapangugnanay. Aw pigpalna-u nan adti kadég na manga mangintu-uway ya manga pig-atag kanaten na Tyumanem pada mabatug tadun degen ya manga kapandayan ni Satanas aw pada pakasaligen ya pag-isambuk na kadég na manga mangintu-uway.