Colosas

Ya Sulat ni Pablo adti//manga mangintu-uway na awun ni

Colosas

Ya muna pagpa-edeꞌ

Ya lunsud na Colosas nyakabetang adti probinsiya na Asia. Matas ya dengeg nan idtu muna asuntu sa pagbaligyaꞌ nilan sa bulbul na karniro na pig-imoꞌ nilan abul aw kadégkadég. Aw yeiy ya du-an na pagka-agiyan ya Colosas na madég na utaw. Asini muna, dakulaꞌ ya syudad yan, manang dun ni manga allaw na migsulat si Pablo, migkatagbiꞌ da ya dengeg nan.

Maynini ya pagdateng na Madyaw na Ubat-ubat kan Kristu adti Colosas: Idtu muna, sa pag-eyaꞌ ni Pablo adti syudad na Épéso, madég ya utaw na pigpalna-uwan nan, aw ya sambuk kanilan si Épapras na taga Colosas. Yanagaw sa pag-uliꞌ da ni Épapras, pigpa-edeꞌ nan uman adti Colosas ya Madyaw na Ubat-ubat kan Kristu, aw awun manga Héntil aw manga Judiyu na nyangintu-u la, aw nya-imoꞌ sakanan maggagaday nilan. Manang walaꞌ pa si Pablo pakakadtu ni tampid nilan.

Sa talana ni Pablo tyumagad adti syudad na Roma na un usayan na impirador, nyadtu si Épapras adti Roma kay un magsekat sa palna-u ni Pablo kun unu ya pagpateneng sa palna-u na galuꞌ. Kay awun manga magpalna-uway sa galuꞌ na miglong na kun kaliman na utaw makaluwaꞌ aw maka-edeꞌ sa Tyumanem, bekeꞌ kunu oloꞌ na pagpangintu-u kan Kristu ya makapaluwaꞌ kanan. Aw awun pa uman piglong nilan na ka-ilangan dalugun ya palili aw ya pagsimba sa manga anghil. Yanagaw pigsulatan ni Pablo ya manga mangintu-uway pada ka-ede-an nilan ya matinaw.

Asini pigsulat nan, pigpa-edeꞌ nan na si Kristu to-o pa matas kay sa manga tyumanem na galuꞌ na pigsimba na manga Héntil. Aw ya sulat yeiy, pigpadateng uman adti eped na manga pagkatipun na manga mangintu-uway dun ni palibed na Colosas dala ya manga syudad na La͡odiciya aw Hérapolis.