Pigpan-imoꞌ

Ya Manga Pigpan-imoꞌ//na Manga Apostolés

na Pigsulat ni Lukas

Ya muna pagpa-edeꞌ

Ya pigkasampetan asini libru yeiy, yan ya pagbekkal sa Madyaw na Ubat-ubat kan Jisus na migpalekat adti Jérusalim aw dyumateng adti kadakulaꞌ na banwa, dala ya manga banwa na manga utaw na Héntil. Kay yeiy saba ya pigsuguꞌ ni Jisus sa manga umagakan nan. Kya-ede-an tadun uman asini ya pagdateng na Ispiritu Santo na pigpakang ni Jisus kanilan aw dun da pagpalekat ya manga imo-unun nilan magi sa tabang na Ispiritu Santo.

Duwa ya libru na pigsulat ni Lukas na awun ni seled na Bibliya: Ya Madyaw na Ubat-ubat kan Jisus, aw Ya Manga Pigpan-imoꞌ na Manga Apostolés. Si Lukas, utaw sakanan na Héntil aw sambuk uman sakanan na doktor. Nyaka-iyeped sakanan kan Pablo adti madég na manga panaw nan. Na, si Lukas matadeng sa tingeg na Grigo, aw matadeng uman magdalugdalug sa tultulanen.

Asini libru yeiy, madég ya pigsulat ni Lukas na ngalan na banwa na kyadtuwan nilan aw manga utaw dun ni manga banwa yan. Madég uman ya pigpansulat nan dala ya pigkitaꞌ nan aw ya pig-ubat kanan na manga eped na utaw. Pigsulat nan ya kya-agiyan ni Pédro aw ni Pablo aw manga eped na sugu-anen na Tyumanem, labi la ya manga pigpan-imoꞌ na Ispiritu Santo aw ya katulus nan dun ni manga mangintu-uway.

Ya kasampetanen ini migpalekat adti Jérusalim dengan na pagka-engat ni Jisus adti tas na langit. Aw nyatigkas dun ni pagkawun ni Pablo adti syudad na Roma na un tumagad sa pag-usay kanan na impirador na si Néro.

Na, ya utaw na pigsulatan ni Lukas yan si Tyupilo, aw kaliman ni Lukas na ya sulat nan basa͡en uman na eped na manga Héntil adti kadakulaꞌ na banwa pada ka-ede-an nilan ya Madyaw na Ubat-ubat kan Kristu Jisus.