2 Timotiyo

Ya Kadwa na Sulat ni Pablo kan

Timotiyo

Ya muna pagpa-edeꞌ

Adti seled na Bibliya tadun, madég ya pigsulat ni Pablo adti manga utaw. Aw ya kadwa na sulat nan adti kan Timotiyo, yan da ya tengteng na kamoliyan na sulat nan.

Sa kadwa na pagpakalabusu kan Pablo adti syudad na Roma, walaꞌ da sakanan pakalikuꞌ adti syudad na Épéso, yanagaw pigsulatan pa nan uman si Timotiyo. Sa pagsulat nan seiy, malapit da sakanan papatay ni Impirador Néro. Dun ni Roma, dakulaꞌ ya pagpamulayam ni Néro sa manga mangintu-uway kan Kristu asuntu na nyasangab ya syudad na Roma aw nyaninaw si Néro sa partido na un nan pasala-en. Madugay da ya kaliman ni Néro na simba͡en sakanan na manga utaw kasiling na tyumanem nilan, yanagaw asuntu na walaꞌ pagsimba kanan ya manga mangintu-uway, silan baling ya pigpasalaꞌ nan sa pagkasangab na syudad, aw madég kanilan ya pigpapatay nan.

Asuntu sa pagpamulayam sa manga mangintu-uway, madég kanilan ya mig-ayaw sa pagpangintu-u kan Kristu. Yanagaw piglongan ni Pablo si Timotiyo na padelegen aw tibullukun nan ya pagpa-edeꞌ sa Madyaw na Ubat-ubat pangkay awun manga kalugan. Aw ya kadwa na sulat nan yeiy kan Timotiyo kasiling na nyamalintugun da sakanan, aw yan ya du-an na maksay ni Pablo pigpakawun si Timotiyo dun ni sayid nan kay un da sakanan patayen.