1 Timotiyo

Ya Tagnaꞌ na Sulat ni Pablo kan

Timotiyo

Ya muna pagpa-edeꞌ

Si Timotiyo sambuk sakanan na mangintu-uway na bagu pa ya ginawa, aw mig-eyaꞌ sakanan adti lunsud na Listra sakup na Lica͡oniya probinsiya na Galasiya. Dun ni kadwa na panaw ni Pablo, yan ya tagnaꞌ na pagkakilala͡ay nilan si Timotiyo. Judiyu ya ina ni Timotiyo aw nyangintu-u la kan Kristu, aw utaw na Grigo ya ama nan. Mabasa adti Manga Pigpan-imoꞌ na Manga Apostolés 16:1-3. Si Timotiyo pigsayaꞌ na manga bagu na mangintu-uway asuntu na madyaw sakanan magpalna-u dun ni Listra aw Ikoniyo. Mabasa adti Pilipos 2:22. Yanagaw pigpa-agad sakanan ni Pablo adti manga panaw nan.

Si Timotiyo nya-imoꞌ pigsaligan ni Pablo sa eped na imo-unun nan, aw yan uman ya eped ni Pablo dun ni pagsulat nan adti manga mangintu-uway na awun ni Tésalonika, Corinto, Pilipos, Colosas, aw adti sambuk na utaw na si Pilémon. Aw pigtagak sakanan ni Pablo adti syudad na Épéso pada maggagad sa manga mangintu-uway dun.

Ya tud ni Pablo asini sulat yeiy, na palna-uwan si Timotiyo sa un nan paglongun adti manga mangintu-uway na awun ni Épéso. Pigpakabagseg nan si Timotiyo na mag-ubat-ubat adti manga utaw sa matinaw na palna-u kan Kristu aw magpakatadeng sakanan, kay dun ni Épéso awun eped na manga maggagaday na migpalna-u sa galuꞌ. Awun pa uman palna-u ni Pablo kun singalan ya umbaꞌ pamalli-en na ma-imoꞌ manga dyakunu aw maggagaday sa manga mangintu-uway. Aw pigpalna-u nan uman kun unu ya pagdala sa manga balu aw manga allang.