1 Pédro

Ya Tagnaꞌ na Sulat ni

Pédro

Ya muna pagpa-edeꞌ

Ya migsulat seiy si Simon na pigngalanan uman ni Jisus na Pédro. Sambuk sakanan na manga apostolés, aw kyinitaꞌ nan ya kadég na manga pigpan-imoꞌ ni Jisus. Pigsulatan nan ya manga mangintu-uway na awun ni lima ya probinsiya na nyasakup na Roma. Aw adun da, ya manga banwa yeiy nya-imoꞌ da nasud na Turkey.

Pangkay ya manga probinsiya yan pig-eya-an na madég na manga Héntil, manang awun pa uman manga Judiyu na nyeyaꞌ dun. Aw madég ya manga Judiyu na nyadtu ni Jérusalim pada tumambung sa Pista na Péntékostés. Aw dyengeg nilan ya pag-ubat-ubat ni Pédro. Aw sa pag-uliꞌ nilan adti kanilan manga banwa, pigpa-edeꞌ nilan ya kanilan pigdengeg na Madyaw na Ubat-ubat kan Jisus. Aw madég kanilan ya nyangintu-u. Aw dun da pagpalekat ya pagkatipun aw pagpanimba na manga mangintu-uway adti kadakulaꞌ na kasakupan na Roma.

Asuntu na pigpamulayaman ya manga mangintu-uway dun ni manga probinsiya yan, yan ya du-an na migsulat si Pédro kanilan pada pakasaligen ya kanilan pagpangintu-u. Aw nyanginayuꞌ si Pédro kanilan na ma-imoꞌ silan madyaw na pundinganan adti manga utaw na walaꞌ pa pangintu-u.

Na, pigsulat ni Apostol Pédro ya sulat ini dengan na pagdumala na Impirador Néro dun ni kasakupan na Roma. Pangkay awun pagpamulayam adti manga eped na probinsiya, manang dun ni seled na syudad na Roma walaꞌ pa ya pagpamulayam. Yanagaw dun si Pédro pag-eyaꞌ aw ya sambuk uman na apostol na si Pablo dala si Markos aw si Silas. Manang awun dakulaꞌ na sunug dun ni syudad na Roma aw pigpasalaꞌ na impirador ya manga mangintu-uway kan Kristu aw madég kanilan ya pigpapatay nan. Aw dun pagpalekat ya dakulaꞌ na pagpamulayam sa manga mangintu-uway dun ni Roma.