1 Juan

Ya Tagnaꞌ na Sulat ni

Juan

Ya muna pagpa-edeꞌ

Ya apostol na si Juan, yan ya migsulat sa Tagnaꞌ aw Kadwa aw Katlu na Juan. Pigpa-edeꞌ nan dun ni kanan manga sulat na sambuk sakanan na kyumitaꞌ sa kadég na pigpan-imoꞌ ni Jisus aw yan uman ya pig-ubat-ubat nan adti manga mangintu-uway.

Idtu muna, nyeyaꞌ si Juan adti syudad na Jérusalim. Manang kya-ede-an nan na un kalaten na manga sundalu na Romanen ya Jérusalim kay pigpa-edeꞌ dadan ni Jisus. Yanagaw mig-alin si Juan adti syudad na Épéso sakup na probinsiya na Asia. Aw sa talana nan dun, pigdumala͡an nan ya manga mangintu-uway na magkatipun manimba dun ni kanilan manga banwa. Pigpakabagseg nan ya pagpangintu-u nilan kan Jisus.

Sa pag-eyaꞌ ni Juan dun ni Épéso, pigsulat nan ya tulu ya libru yeiy. Yan uman ya migsulat sa libru na Pigbukasan. Si Juan oloꞌ ya apostol na walaꞌ pataya na gubirnu na Romanen.

Ya tud na sulat ni Juan yeiy pada ka-ilawan ya anenganeng na manga utaw na bagu pa nyangintu-u kan Kristu. Kay ya muna mangintu-uway, masalig ya pagpangintu-u nilan asuntu na pigka-iyeped nilan si Jisus, manang ya mangayseꞌ nilan aw kanilan manga umpu diliꞌ to-o masalig ya kanilan pagpangintu-u. Aw sambuk uman na du-an, awun da madég na utaw na sallong kunu nyangintu-u manang migpalna-u silan sa galuꞌ. Yanagaw pigsulatan ni Juan ya manga mangintu-uway pada diliꞌ silan makasuway lekat adti matinaw na palna-u ni Jisus.