1 Corinto

Ya Tagnaꞌ na Sulat ni Pablo adti//manga mangintu-uway na awun ni

Corinto

Ya muna pagpa-edeꞌ

Idtu na manga allaw ni Apostol Pablo, pigdumala͡an na Roma ya madég na manga banwa dala ya Grécia. Ya sambuk na probinsiya dun ni Grécia yan ya Akaya. Aw ya ulu na Akaya yan ya syudad na Corinto.

Ya Akaya kyapalibedan na dagat, aw ya Corinto yan ya agiyanan na madég na manga barko na lekat adti silatan aw sallepan. Aw madyaw ya pagpakabetang na syudad yan asuntu na awun manga mayaman aw manga magbalikwatay dun, aw alag silan pigkamangan na buwis.

Malapit adti Corinto ya syudad na Aténas. Aw adti Aténas pagkatipun ya madég na manga utaw na matas ya kya-ede-an na migpalna-u sa pangkay unu ya pig-anenganeng nilan, aw nyakadateng uman silan adti Corinto. Aw malapit dun uman ni Corinto, kada umay awun to-o dakulaꞌ na manga danga na pag-imo-un na kadég na manga banwa na nyakapalibed dun.

Madég ya banwa na pigkadtuwan ni Pablo, aw pagdateng nan adti Corinto, mig-eyaꞌ pa sakanan dun seled na sangka͡umay aw tengaꞌ. Mabasa yeiy adti Manga Pigpan-imoꞌ na Manga Apostolés 18:1-18. Aw ya pagpalna-u nan dun, yan ya tagnaꞌ na pagpakadengeg na manga utaw dun ni Corinto sa Madyaw na Ubat-ubat kan Kristu, aw madég kanilan ya nyangintu-u.

Dun ni manga mangintu-uway adti Corinto, madég ya manga utaw na lekat adti eped na banwa aw madég uman ya kanilan manga katanem. Aw awun kanilan sangkamuluꞌ na pyangintu-uwan idtu na walaꞌ pa silan pangintu-u kan Kristu, aw madég ya pigpantulluk nilan dun ni Corinto na manga témplo na manga tyumanem nilan. Yanagaw sa pagpangintu-u la nilan kan Kristu, awun manga usip nilan na pigpadala adti kan Pablo magi sa manga sulat talana nan adti syudad na Épéso. Aw asini sulat nan kanilan, pigtubag nan ya manga usip nilan.