Kutendeka 20

Abimeleki wamutwama Sara kuti abe mukazi wakue

1Abrahamu waafumine papo ni kuya ku kyalo kya Negebu, waile kwikala pa bukata bwa Kadesi ni Suri. Pa kyamba waile kwendela mu Gerari. 21Abrahamu waalandile palua mukazi wakue Sara nangue, “Ozu ni nkazyamwine.” Abimeleki Likolo wa mu Gerari wa-anine bantu bamuleetele Sara. 3Inzi Leza waamumonekeele Abimeleki busiku mu kilooto ni kumwana nangue, “Unvua, wafua wewe! Pantu watwamanga muka nghwana.”

4Abimeleki ni ye waali tanapalamane nakue. Waamwanine evi, “Ati we Mulopue, ulikwipaya ntundu isili na mulandu? 5Wene wakinghana nangue, Sara ni nkaziize. Mwanakazi ni ye wakinghana nangue, Abrahamu ni ndumeze. Nakikita evi na mutima waswetele.”

6Leza waamwanine Abimeleki mu kilooto nangue, “Ee, n'manine nangue wewe wakikita evi na mutima waswetele, ni ne nakikukingilila tekuti ubale. Ni pakako, nsyakikulekeela kuti umukumie. 7Ale kansi mubwezie ozu mwanakazi ku mulume wakue Abrahamu, pantu Abrahamu ni kabika, ni ye alikukulombela pantu wene ni kabika, ni we uli kuba mukose. Inzi kine teumubweziizie, umane nangue kisinka wakaba kufua pamo ni bonse bauli nabo.”

Abrahamu wabweziiziwa mukazi

8Abimeleki waabuukile paakili ni kukuuta babombi bakue bonse ni kubabwila milandu yonse. Ni babo bantu baatiinisie. 9Kupwako, Abimeleki wamukuuta Abrahamu ni kumwipuzia nangue, “Ewe, ni kiki kiwaakitukitila? Ati, nene nakikuluviaki pakuti uleete kibalo kikata pali nene ni pa bukolo bwane? Waakinkitila bintu bisipalile.” 10Kabili Abimeleki waamwipuziizie Abrahamu nangue, “Ati, wakilengiwa naki pakuti ukite evi?”

11Abrahamu wa-asukile evi, “Nene nakimona nangue, kisinka pano tepali muntu aliwatiina Leza, kuti bangipaya pa mulandu wa mukazi wane. 12Inzi kulanda kisinka ozu mwanakazi ni nkazyamwine pantu situe ni umo sie, inzi banghinetue i balekenkeene. Anzia kine kili evio, ozu ni mukazi wane. 13Leza lu-aanghenziizie kufuma mu nghanda yakua tawe, naamwanine Sara nangue, ‘Konse kutwaakaba twaya ukabe wanandila biweme nangue nene ndi ndumezo.’”

14Abimeleki waabuulile mikooko ni nghombe ndume pamo ni babombi balalume ni banakazi, wamupeela Abrahamu ni kumubweziizia mukazi. 15Abimeleki waalandile evi, “Mona, keki kyalo kyonse kiumwene ni kyane, kuti waikala konse ku ulikutona.” 16Kabili Abimeleki waamwanine Sara nangue, “Mona namupeela ndumezo nfolanga 1,000 kuti iye yali nfuto pa menso a bonse bauli nabo. Ni pakako, teuli na mulandu.”

17Abrahamu waamulombele Leza, Leza wamukosia Abimeleki ni mukazi wakue pamo ni babombi bakue banakazi. Ni bo baavyele baana 18pantu Yawe waali waimikile luvyalo lwa bantu ba mu nghanda yakua Abimeleki pa mulandu wakua Sara muka Abrahamu.