Kufuma 11

Musa watubula palua kufua kwa mabeli

1Yawe waamwanine Musa nangue, “Kwasyala kimina kimo kinakaba kumuleetela Farao pamo ni bekazi ba mu Misri, mane pa kyamba akabe kumiitabizia kuya ni kumikumbilila sie lonse kufuma pano. 2Ale endo ubaane Baizraeli bonse, balalume ni banakazi, baye balombe bifwanizio bya mutofue, ni bya oro ku Bamisri babapalameene nabo.” 3Yawe waalengiizie Baizraeli kutonua na Bamisri. Musa ni ye waali wakindamiisie pa babombi bakua Farao, ni pa bantu bonse ba mu kyalo kya Misri.

4Ni pakako, Musa waamwanine Farao nangue, “Yawe walanda evi, ‘Lelo pakati busiku ndikwiza kupita mu kyalo kyonse kya Misri. 5Musita undikwiza kupita, kubalua libeli ali mu Misri alikufua, kubambila pa libeli obe wa kukupyana pa kitebe kya bukolo, mpaka ku libeli wakua mwanakazi muzia aliwapela nghano. Mabeli onse a biteekua ni o alikufua. 6Mu kyalo kyonse kya Misri mwakaba kuya mwali malilo akata asinaunvwikemo ni asikikonvwikamo. 7Inzi ku Baizraeli tekukaba kunvwika lizui lya kabua ka kuboza Baizraeli, ni ka kuboza nama. Papo i pa mwakaba kwinika Yawe vi-abiikile bupusano pakati ka Bamisri ni Baizraeli. 8Babombi bobe bonse bakaba kwiza kun'mpaapaata kuti nfume ni bantu bane, ni ne nakaba kufuma.’” Kupwako, Musa wafuma pali Farao ni kuya wakilile kufiitua.

9Yawe waamwanine Musa nangue, “Farao wakaba kukaana. Ni pakako, tupapo twane twakaba kutwalilila kukitika mu kyalo kya Misri.” 10Musa ni Haruni baakitile toto tupapo tonse ntanzi yakua Farao. Inzi Yawe waafiniizie mutima wakua Farao. Farao ni ye waakeene kwitabizia Baizraeli kufuma mu kyalo kyakue.