Skip to content
BibleKenya
SIX Ep 1 Verse

Xoiteupo Kuna

Ep 1

Kristusu xosa Xoiteue sini oma xuiapu saisiketai

1—3

Ye1 Polu, ye Kristusu Yesusupo tianuwopi. Nukoe ye xouweyati Xoiteue ye Yesusupo tianuwopi tumuyeretai. Tini Xoiteupo xuiapue Epesesi erewese purinuku Kristusu Yesusu taiwopi menamenaukiriai xosa mua nakau xayaritikine. Sikou Emisiki Xoiteu2 xeika Kokaipa Yesusu Kristusu xeikae, tini xonikietikineri xonikikemu tikeria tinipo xotikikemu yoroara puropina.

Xoiteue Kristusu xosa xokupa mena xouropu asinaku sapi siketai

Sini 3Xoiteupo wenumu xourorepu, nu sikou Kokaipa Yesusu Kristusupo Omo xeika nukou Xoiteu xeika. Sikou xenisiki tianuwopure, nukoe Yesusu wenumurei mena xouropu xokupa asinaku sapi siketai. Sini4 xeseu puropure Xoiteue ou iyarepu xuweu yauseni, sini Kristusu xeika etokepure tumusikeretai. Kakeki xati sini nukou ekero kutu asinaku xu xuweu xuiapu puropu. Yesusu Kristusue5 saina tina siko xiyeri tisikepinaure, ekimeni kutu nukoe xouwesikina nukou nononi kutu sayepure tumusikeretai. Xoiteue nukou nanunanuni nimaririeina taina panumu kaketai. Nukoe pa Nono xiri xouwewotai wenumurei6, Xoiteue xiri xouwesikina xoukemu sikeyai. Pa xati nue ere xouwesikina xoukemu siketaire nanunuku Xoiteupo wenumu xourorepu.

Xoiteue xouwesikina xoukemu sikepu kapia7 xiri xokopexina. Pa xati Kristusue sini xiyeri isayasikepure xumotai xati, nupo yawie sikou xokupa xunu Xoiteue xesauwetai. Xoiteue xouwesikina xoukemu siketai kapia siko xosa panipani kusauna, xokupa xetaxetau sipa xeika asinaku nanunanu xeika siketai. Ekime8 Xoiteue Kristusupo saina xosa mua kapia kakepure nanunanuwoyai. Pana nupo pa nanunanu paiya ximiaki puriyai xati ximine nupo nanunanu itou atarisikina. Pa9 sapi kakepure xetaia muanumu. Xokupa sapi taitai xouna xouna, pa yause iyaretai xosa paiya, xokupa sapi mena xouropu xeika ouropu xeika rania Kristusu xosa kununuwopina. Kakatia Kristusue xokupa sapi tapaxi puropina.

Xoiteu10 nukou xouweni nukou nanunanu taina xokupa sapi kakati marouna, kakina ekime nukou xouweni apimi Kristusu xeika etokinuku nupo xuiapu sayepinukure tumusikereyai. Sinie akerinuku Kristusure xosikisunuku taikiri, nukou kokaipa memeremu xeika sokisoki xeika xosa sipesi nanunuku nukou wenumu xourorepinukure sini Xoiteue tumusikeretai.

Tini11 xetau xuiapu kini tinie rania suau kuna iyesieikiriai, paiya pa Xoiteupo asinaku kunae tini xiyeri titiketai. Kakati Kristusure xotikisunuku. Tinie nukou xuiapu kinini kutu purinuku, Kristusu xeika etokari, ekime Xoiteue sokisoki kuna kunawoyai taina Xoiteupo Supo Youya tiketai. Sini12 Xoiteupo Supo Youya tieikiriai, pa xati siko sipa, Xoiteue kireu asinaku sapi nukou xokupa xuiapu tinikepure sokisoki kuna kunawoyai sie xurise sini rania tepu. Xoiteue xiyeri tisikati nuko xeika somoni kutu puropu yause xosa pa sapi tepure yakunuku. Kakinuku pa sokisoki saina tixanauwoyaire nanunuku nukou kokaipa wenumu xourorepu.

Xoiteue Epesesi sipa tinikepinaure Polue kunikuniwotai

Tinie13 Kokaipa Yesusure xotikisunuku Xoiteupo xokupa xuimiapimi xosa xotikikemu tinikirounuku kuna ye iyesitiai. Pa xati14 ye kunikuninepa, sipesi tinire nanunanune Xoiteu eiyaseuroune. Kakine ye Xoiteu kotoutiai15, nu Kokaipa Yesusu Kristusupo Xoiteu, nu kokaipa memeremu xeika sokisoki xeika nikau Eminiki. Nue asinaku nanunanu tikatia tinie nukou kuna xotapani kutu sipawari, nukoini kakatia, tini nupo xiri sipawakuai. Nue16 tinipo nanunanu xosa memeremu tikepinaure xoiyeune, kakatia tini takuai sapire yaitikatia atinari sipawakuai xine, paiya tinie yaku purikiriai sapire kunaune. Kakinaria Xoiteue sini nukou xuiapu xosa asinaku asinaku sapi iyarerisiketai sipawakuai. Kakinari17 ipaki sipaunaria, mua Xoiteupo sokisokie sini nure sipesi xosikisuwopi saina tikiriai xuiapu xosa pani kokaipa saina tina xakuai. Sini nupo sokisoki uteiwopu xana xuweni kutu. Pa Xoiteupo kokaipa sokisoki sini xosa saina tirouna, paie18 sore ekime Kristusu xosa saina tetai. Kristusue xumurati, pa Xoiteupo kokaipa sokisokie sarina mena xouro sou xouna nukou xupo meruira miseretai. Pa xati19 Kristusue xokupa xetau xetau yaniyani xouroni kutu puroto, xokupa tumu teu xouro puroto, xokupa kapmani xouro puroto, xokupa sapi sokisoki tuku teu xouro purotouna. Nue xokupa apimi mua yause xosa weniniki tuku xeika sewai yausepu xeika tuku xouro purina. Xoiteue20 xokupa sapi Kristusu21 turo iyarina kawati, nue xokupa sapi tapaxi purati, pa kapiarei nu Yesusure xonikisuwoteneai nikau tumu purina. Kristusure xonikisuwoteneai apimi22 paiya nini Kristusupo mupokemu. Kristusue xokupa sapi minika purina xiri xokopexina, nue Yesusure xonikisuwoteneai apimi xosa xokope xetai.

Source notes (22)
  1. Cross-reference YT 18.19-21; 19.1;Ro 1.1; 1.7;1 Ko 1.1;Kl 1.1
  2. Cross-reference 2 Ko 1.2;Ka 1.3;Kl 1.2;Ta 1.4
  3. Cross-reference Ep 2.6
  4. Cross-reference Yo 15.16; 17.24;Ro 8.28;Ep 5.27;Kl 1.22;2 Ts 2.13;2 Ti 1.9;Ye 2.5;1 Pi 2.20
  5. Cross-reference Yo 1.12;Ro 8.29-30;2 Ko 6.18;Ka 4.5
  6. Cross-reference Mt 3.17;Yo 3.35;Ro 3.24; 5.15;Kl 1.13
  7. Cross-reference YT 20.28;Ep 2.7;Kl 1.14; 1.20;Ip 9.12;1 Pi 1.18-19
  8. Cross-reference Ro 16.25;Ep 3.4; 3.9-11;Kl 1.26;2 Ti 1.9
  9. Cross-reference 1 Ko 3.22-23;Ka 4.4;Pl 2.9-10;Kl 1.16; 1.20;Ip 1.2;1 Pi 1.20
  10. Cross-reference Ro 8.17; 8.28-29;Kl 1.12;Ta 3.7;Ye 2.5;1 Pi 1.4
  11. Cross-reference 2 Ko 1.22; 6.7;Ep 4.30;Kl 1.4-6
  12. Cross-reference Lu 21.28;Ro 8.23;2 Ko 1.22;1 Pi 2.9
  13. Cross-reference Kl 1.4
  14. Cross-reference Pl 1.2-4;Kl 1.3;1 Ts 1.2
  15. Cross-reference Kl 1.9
  16. Cross-reference YT 26.18;Ep 2.12; 4.4;Kl 1.12
  17. Cross-reference Ep 3.7;Kl 1.11; 1.29; 2.12
  18. Cross-reference Siri 110.1;2 Ko 13.4;Kl 1.16; 2.10-12; 3.1;Ip 1.3
  19. Cross-reference Ro 8.38;Pl 2.9-10;Kl 2.10; 2.15;Ip 1.4
  20. Cross-reference Siri 8.6;Mt 28.18;Kl 1.18;Ip 2.7
  21. Cross-reference Kl 1.18
  22. Cross-reference Ro 12.5;Ep 4.10; 4.15;Kl 2.9; 3.11

Xoiteupo Kuna. Copyright © 2024 Pioneer Bible Translators. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.