VaEfeso

Tsamba ridonyohwa naPhauro

KuvaEfeso

Kuwidzira

Tsamba kuvaEfeso idonyohwa panguwa inenge idofanana noidonyohwa kuvaKorose mumakore 60 musure mokuzvahwa kwaKhirisitu. Munyori anozvizivisa kuti ndiNhumwa Phauro (VaEfeso1:1).

Nyanzvi dzoBhaibhiri dzizinji dzinobvumirana kuti ndiPhauro adonyora vaEfeso kunyange zvazvene pasinai zvidofanana nokumoresana kwaanoita pachake fanike zviri muna vaKorose. Nochikonzero chakarechi tsamba iyoyi yaigona kutenderedzewa ichiverengewa kumakherekhe yese mudunhu rakarero. Phauro adonyaira pakare kuti waiva mutorongo paadonyora tsamba irori (vaEfeso 3:1, 4:1 Na6:20).

Phauro adotumira tsamba iyoyi naTaichikasi paaiva pahwendo hwokubvakachira kherekhe yokuEfeso (vaEfeso 6:21-22).

Efeso raiva guta ridokuritsa futi ndiro raiva rikuru mudunhu roRoma raiitiwa Ezhiya Maina. Efeso raiva guta ridokurumbira nondava yokuva noimba yochimwarikadzi chomabhwodo chochiGiriki chaiitiwa Atemisi (Mabasa 19:23-31).

Kherekhe yopaEfeso idothanga nosimba asi mumasure monguwa idorosa (Zvidozaruhwa 2:1-7).

Muzvitsauko zvitatu zvokuthanga zvotsamba Phauro anotsanangura kuti Mwari adosarura tini vanhu vache nokuvaponesa kubva kuzvitadzo zvavo kuburikidza naJesu Khirisitu. Anofananidza kherekhe kuti idoita kunge muviri naJesu ari musoro, yofanana futi nochivakwa icho Khirisitu ari nheyo yachene. Muzvitsauko zvitatu zvokupedzisira mutsamba Phauro anoraira pamusoro pomagariro yochiKhirisitu.

Marongehwo

Muchitsauko (vaEfeso 1:1-2) Phauro anotaura kuti iye mbani futi anomoresa vanhu vomuEfeso

Zvino anodzotsanangura kuti ukama hwokherekhe naKhirisitu hudomira tini (vaEfeso 1:3—3:21)

Phauro anonyora pamusoro pomagariro yomaKhirisitu (vaEfeso 4:1—6:20)

Pakupedzisira Phauro anopasa kurudziro yaanodzovhara nayo tsamba (vaEfeso 6:21-24)