ರೊಮಾಪುರ 3

1ಇಮ್ಮ ರ‍್ಹಯುಮ ಯೆಹುದಿ ಥೈನ ರ‍್ಹವಾನು ಫೈದೊ ಸುವೈ? ಸುನ್ನತಿ ಕರೈಲಿದಲ ವಾಲಾವೊಮಾ ಸುಬಿ ಫೈದೊ ಛೆಸು? 2ಹೊ, ಯಹುದಿಯೊನೆ ಘನ್ನಾ ತರಾನು ಖಾಸ ಕವಾನು ಛೆ. ಕ್ಹಾರಾವೊತಿ ಘನ್ನು ಖಾಸ ಸು ವ್ಹೈ ಕದ್ಯಾಮ, ಕ್ಹುದಾ ಯೆಹುದಿಯೊಪರ ಬರೊಕ್ಹೊ ಮ್ಹೆಲಿನ ತಿನು ವಾಕ್ಯಾ ತ್ಯುನೊನೆ ದಿದ್ಯೊ. 3ದಕ್ಹಾ ಯೆಹುದಿಯೊನಾ ಮನಕ್ಹೊ ಕ್ಹುದಾನೊ ಬರೊಕ್ಹೊ ಮ್ಹೆಲ್ಲಿದ್ಯಾನೈತೊ ಸು ಥಯು? ಇನು ಮತ್ಲಬ ಕ್ಹುದಾ ಬರೊಕ್ಹೊ ನೈಸೊ ರ‍್ಹವಸ ಸು? 4ನೈ! ಕ್ಹಾರಾ ಮನಕ್ಹೊ ಸುಳ್ಳ ರ‍್ಹಯಾತಬಿ ಕ್ಹುದಾ ಕ್ಹರಿಕ್ಹು ರ‍್ಹವಾಲೊ ವ್ಹೈ. ಪವಿತ್ರ ಗ್ರಂಥ ಇಮ್ಮ ಕವಸ. ತಾರಿಯೊ ವಾತೊಮಾ ತು ಕ್ಹರಿನೊ ಫೈಸಲೊ ಕರಾಲೊ ವ್ಹೈ ಕೈನ ದೆಕಾಡಿನ ದ್ಯು. ತುನೆ ಫೈಸಲೊ ಥಾತಾಮಾ ತು ಝಿತ್ತು. ಕಿರ್ತನೆ 51:4

5ಕ್ಹುದಾ ಕ್ಹರಿಕ್ಹು ರ‍್ಹವಾಲೊ ವ್ಹೈ ಕೈನ ಅಪೆ ಹಗ್ಲೆಲ್ಲಾ ಕರಾನಾ ತಪ್ಪೊ ದೆಕಾಡಿನ ದಿವಸ. ಇಮ್ಮ ರ‍್ಹಯೊತಬಿ ಕ್ಹುದಾ ಅಪೊನೆ ಶಿಕ್ಷಾ ದೆತಾಮಾ, ತೆ ಅನ್ಯಾಯ ಕರಾಡ್ಯೊಸ ಕೈನ ಅಪೆ ಕವಾನೆ ಥಾವಸ್ಸು? ಕ್ಹುದಾ ತಿನಿ ಶಿಟ್ಟ ಅಪ್ನೊಪರ ಲೈನ ಅನ್ಯಾಯ ಕರಸು? 6ಕ್ಹರಿಜ಼ ನೈ! ಕ್ಹುದಾ ಅಪೊನೆ ಶಿಕ್ಷಾ ನೈ ದಿವತ್ತೊ, ಕ್ಹುದಾ ಜಗತ್ನೆ ಫೈಸಲೊ ಕರಾನೆ ಥಾತು ನೈ.

7"ಮಿ ಕವಾನು ಸುಳ್ಳ ರ‍್ಹಯಲ ಕ್ಹುದಾನೆ ಕ್ಹರಿಮಾಜ಼ ಮಹಿಮಾ ಥಾವಸ. ಇಮ್ಮ ರ‍್ಹಯುಮ ಮನೆ "ಪಾಪಿ "ವ್ಹೈ ಕೈನ ಫೈಸಲೊ ಥಾವಾನು ಕಾ? 8ಚೊ಼ಕು ಥಾವಾನಾ ಹುತಿ ಅಪೆ ಕೆಟ್ಟ ಕರಿಯೆ ಕೈನ ಕವಾಕ್ಹು ತಿನೆ ಸುಜ಼ ಫರಕ ನತ್ತಿ. ಘನ್ನಾ ಮನಕ್ಹೊ ಹಮೊನೆ ನಾಮ-ಬೊಟ ಮ್ಹೆಲಸ ವರಿ ಹಮೆ ತ್ಯಯ್ಯೊ ಸಂಗತಿಯೊ ಕಯೆಸ ಕೈನ ಕವಸ. ತೆ ಮನಕ್ಹೊ ತಪ್ಪ ಕರಾಲಾ ಥಯಾಸ. ತ್ಯುನೊನೆ ಶಿಕ್ಷಾ ಥೌ.

ಕುನ್ನಜ ನಿತಿವಂತವಾಲಾ ನತ್ತಿ

9ಇಮ್ಮ ರ‍್ಹತಾಮಾ,ಹಮೆ ಲಾಸ್ಟಮಾ ಸು ಕೈಯೆ? ಯಹುದ್ಯೊ ಥಯಲ ಅಪೆ ಬಿಜಾ಼ವೊತಿ ಚೊ಼ಕಾ ವ್ಹೈ ಸು? ನ್ಹವೈ! ಯಹುದಿಯೊನೆ ಯಹುದ್ಯೊ ನೈಸೊವಾಲಾ ಪಾಪಮಾ ಛೆ ಕೈನ ತೆಳಾಮಾಜ಼ ದೆಕಾಡಿನ ದಿದ್ಯೊಸ.

10ಪವಿತ್ರ ಗ್ರಂಥ ಅಮ್ಮ ಕವಸ" ನಿತಿವಂತವಾಲೊ ಕುನ್ನಜ಼ ನತ್ತಿ. ಯಕ್ಲೊಬಿ ನತ್ತಿ

11ಯಕ್ಲೊಬಿ ಶಾಣ್ಯೊ ನತ್ತಿ.

ಕ್ಹುದಾನಿ ಆರಾಧನಾ ಕರಾಲು ಕುನ್ನಜ಼ ನತ್ತಿ.

12ಕ್ಹಾರಾ ಮನಕ್ಹೊ ಕ್ಹುದಾ ಕಂತಾ ಫರಿ ಗಯಾಸ.

ಕ್ಹಾರಾ ಮನಕ್ಹೊ ಉಪಯೊಗ ನೈಸೊ ಥಯಾಸ.

ಚೊ಼ಕು ಕರಾಲೊ ಯಕ್ಲೊಬಿ ನತ್ತಿ. ನತ್ತಿಜ಼ ನತ್ತಿ. ಕಿರ್ತನೆ 14:1-3

13"ತ್ಯುನಾ ವಾತೊ ಖುಲ್ಲಾ ಥಯಲ ಮಜಾ಼ರ ಲಿಂಗತ ಛೆ.

ತ್ಯುನೆ ಸುಳ್ಳ ಬೊಲಾನೆ ತ್ಯುನಿ ಜಿಬ್ಬ ಉಪಯೊಗ ಕರಸ"

"ತ್ಯುನೆ ಕವಾನಾ ಸಂಗತಿಯೊ ಜ಼ಹರ ರ‍್ಹಯಲ ಕ್ಹಾಪೊಲಿಂಗತ ಛೆ. ಕಿರ್ತನೆ 140:3

14"ತ್ಯುನಾ ಮ್ಹೊಡಾ ಕ್ಹರಾಪಾಕ್ಹು ವರಿ ಇಸಾಕ್ಹು ಭರಿ ಗಯಾಸ"

15"ದುಖ ದಿವಾನೆ ವರಿ ಖಲಾಸ ಕರಾನೆ ತ್ಯುನೆ ಕೆಳಾಮಾಬಿ ತಯ್ಯಾರ ಛೆ.

16ತ್ಯುನೆ ಗಯಲ ಕ್ಹಾರಿ ಜ಼ಗಾ ತ್ರಾಸೊ ವರಿ ಬರಬಾದಿ ಲಾವಸ.

17ತ್ಯುನೆ ಶಾಂತಿನಿ ವಾಟ ತಿಳ್ದಿಲಿದ್ಯಾ ನತ್ತಿ" ಯೆಶಾಯ 59:7-8

18"ತ್ಯುನಾ ನಜ಼ರಮಾ ಕ್ಹುದಾನೊ ಭೆ ನತ್ತಿ" ಕಿರ್ತನೆ 36:1

19ಹಮೊನೆ ಹಮ್ನಾ ಗ್ವತ್ತ ಛೆ ನಿಯೊಮೊಮಾ ಸು ಕದ್ಯಾಸ. ಎ ನಿಯಮೊನಾ ಅದಿನಮಾ ಕುನ ಛೆ ತಿನೆ ತ್ಯುನೊನೆ ಧರಮಶಾಸ್ತ್ರನೆ ಅದಿನ ಥೈನ ರ‍್ಹವಾಲಾ ತ್ಯುನಾ ವಿಷಯಮಾ ಧರಮಶಾಸ್ತ್ರ ಎ ಸಂಗತಿಯೊ ಕವಾಡ್ಯುಸ. ಇನಾಹುತಿ ಹರಯಕ್ಕ ಮ್ಹೊಡು ಭಂದೈನ ವರಿ ಕ್ಹಾರಿ ಜಗತ್ತ ಕ್ಹುದಾನಿ ನ್ಯಾಯನಾ ಫೈಸ್ಲಾನೆ ಯೊಗ್ಯ ವ್ಹೈ ಕೈನ ದಿಕ್ಹಸ. 20ಕಾಕದ್ಯಾಮ ಧರಮಶಾಸ್ತ್ರ ಲಿಂಗತ ಚಾ಼ಲಾನಾ ಮುಕಾಂತರ ಕಯೊಜ಼ ಮನಕ್ಹ ಕ್ಹುದಾನಿ ನಜ಼ರಮಾ ನಿತಿವಂತವಾಲಾ ಥಾವಾನೆ ಕಿನೆಜ಼ ಸಾದ್ಯ ನತ್ತಿ. ಧರಮಶಾಸ್ತ್ರ ಅಪೆ ಕರಲ ಪಾಪೊ ದೆಕಾಡಿನ ದಿವಸ.

ಅಪೆ ಕಿಮ್ಮ ಕ್ಹುದಾನಾ ಕ್ಹಾಮಾ ಧರಮಿ ಥೈನ ರ‍್ಹಯೆಸ

21ತೆನೈಸೊ ಹಮ್ನಾ ಕ್ಹುದಾ ಧರಮಶಾಸ್ತ್ರ ನೈಸೊಜ಼ ಮನಕ್ಹೊನೆ ಕ್ಹುದಾ ನಿತಿವಂತವಾಲಾ ಥಾವಾ ಹುತಿ ವಾಟ ದೆಕಾಡಿನ ದಿದ್ಯೊಸ. ಎನೈಸೊ ಎ ವಾತನಿ ಸಾಕ್ಷಿ ಮೊಶೆನು ಧರಮಶಾಸ್ತ್ರ ವರಿ ಪ್ರವಾದಿಯೊ ದಿದ್ಯಾಸ. 22ಬರೊಕ್ಹಾನಾ ಮುಲಕ ಕದ್ಯಾಮ ಯೆಸು ಕ್ರಿಸ್ತಪರ ಬರೊಕ್ಹೊ ಮ್ಹೆಲಾಲಾ ಕ್ಹಾರಾ ಮನಕ್ಹೊನೆ ಕ್ಹುದಾ ನಿತಿವಂತವಾಲಾ ಕರಸ. ಕ್ಹಾರಾ ಮನಕ್ಹೊ ಯಕ್ಕಜ಼ ವ್ಹೈ. 23ವರಿಬಿ ಕ್ಹಾರಾ ಮನಕ್ಹೊ ಪಾಪ ಕರಿನ ಕ್ಹುದಾನಿ ಮಹಿಮಾ ದೆಕ್ಯಾವಾಚಿ ಛೆ. 24ತೆನೈಸೊ ಯೆಸು ಕ್ರಿಸ್ತನ ಬಿಡುಗಡೆನಾ ಮುಕಾಂತರ ಕ್ಹುದಾನಿ ಫ್ರಿ ಗಿಫ್ಟನಿ ವರಾ ಮರಗಾಕ್ಹು ತಿನಾ ಕ್ಹಾಮಾ ನಿತಿವಂತವಾಲಾ ವ್ಹೈ ಕೈನ ಫೈಸಲೊ ಥಯೊಸ. 25ಕ್ಹುದಾ ಬರೊಕ್ಹಾನಾ ಮುಕಾಂತರ ಮನಕ್ಹೊನಾ ಪಾಪೊನೆ ಮಾಫ ಕರಾನಿ ವಾಟ ದೆಕಾಡ್ಯೊಸ. ತೆ ವಾಟ ಯೆಸು ಕ್ರಿಸ್ತ ವ್ಹೈ. ಕ್ಹುದಾ ಯೆಸುನು ರಗತನಾ ಮುಲಕ ಪಾಪ ಮಾಫ ಕರಸ. ಕ್ಹುದಾ ಕರಾನು ಕ್ಹಾರುಜ಼ ಚೊ಼ಕೊಜ಼ ವ್ಹೈ. ವರಿ ಕ್ಹರಿಕ್ಹು ರ‍್ಹವಸ ಕವಾನು ಎ ದೆಕಾಡಿನ ದಿವಸ. ಕ್ಹುದಾ ಪಾಚ಼ಲ್ಯಾ ಕಾಲಮಾ ತಡ್ದಿಲಿವಾನು ಮನಕ್ಹೊನಾ ಪಾಪನೆ ದಂಡದಿದ್ಯಾವಾಚಿ ಜಾ಼ತಾಮಾ ತೆಳಾಮಾಬಿ ಕ್ಹುದಾ ನಿತಿವಂತವಾಲೊ ವ್ಹತ್ತೊ. 26ಇಮ್ಮ ಕ್ಹುದಾ ತೆಜ಼ ನಿತಿವಂತವಾಲೊ ವ್ಹೈ ಕೈನ ವರಿ ಯೆಸುಪರ ಬರೊಕ್ಹೊ ಮ್ಹೆಲಲ ಕಯೊಬಿ ರ‍್ಹೈನೆಕಾ ನಿತಿವಂತವಾಲೊ ಥಾವಸ ಕೈನ ದೆಕಾಡಿನ ದಿದ್ಯೊಸ.

27ತೆನೈಸೊ ಅಪೆ ಕಯಾ ವಿಷಯನಾ ಹುತಿ ಮ್ಹೊಟುಪನ ಕರಸಕೆಸ. ಕಯುಜ಼ ನ್ಹವ್ಹೈ! ವರಿ ತಿನೆ ಕಾರಣ ಸುವ್ಹೈ? ಅಪೆ ಧರಮಶಾಸ್ತ್ರ ಲಿಂಗತ ಚಾ಼ಲಾನು ತಿನು ಕಾರಣ ವ್ಹೈಸು? ನ್ಹವೈ! ತೆನೈಸೊ ಅಪೆ ಕಿಪರ ಬರೊಕ್ಹೊ ಕರೆಸ ತೆ ಅಪ್ನು ಮ್ಹೊಟಾಪನನೆ ಕಾರಣ ಥಯುಸ. 28ಲಾಸ್ಟಮಾ ಮಿ ಅಮ್ಮ ಕೌಸ ಕಯೊಬಿ ಧರಮಶಾಸ್ತ್ರನಾ ಕಾಮೊಕ್ಹು ನೈ ತೆನೈಸೊ ಬರೊಕ್ಹಾಕ್ಹುಜ಼ ತೆ ನಿತಿವಂತ ವ್ಹೈ ಕೈನ ಕವೈಲಿವಸ. 29ಕ್ಹುದಾ ಯಹುದ್ಯೊನೊ ಕ್ಹುದಾ ಯಕ್ಕಜ಼ ವ್ಹೈ ಸು? ತೆ ಯಹುದ್ಯೊ ನೈ ರ‍್ಹಯಲ ಮನಕ್ಹೊನೊಬಿ ಕ್ಹುದಾ ನ್ಹವೈ ಸು? ಹೊ, ತೆ ಯೆಹುದಿಯೊ ನೈ ರ‍್ಹಯಲ ಮನಕ್ಹೊನೊಬಿ ಕ್ಹುದಾ ವ್ಹೈ. 30ತೆ ಖತ್ನಾ ಕರಿಲಿದಲವಾಲಾವೊನೆ ನಿತಿವಂತವಾಲಾ ವ್ಹೈ ಕೈನ ಫೈಸಲೊ ಕರಾನು ತ್ಯುನೊ ಬರಕ್ಹೊಜ಼ ಆಧಾರ ವ್ಹೈ. 31ಇಮ್ಮ ರ‍್ಹತಾಮಾ, ಬರೊಕ್ಹಾನಿ ವಾಟಮಾ ಚಾ಼ಲಾನಾ ಮುಕಾಂತರ ಅಪೆ ಧರಮಶಾಸ್ತ್ರನೆ ನೈ ವಪ್ಪಿಲೆತಾ ನೈ ಸು? ನೈ! ನ್ಹವೈ ಕ್ಹರಿಜ಼ ನ್ಹವೈ! ತೆನೈಸೊ ಅಪೆ ಧರಮಶಾಸ್ತ್ರಮಾ ಹಜು಼ನ ಘನ್ನಿ ತಾಕತ ಕ್ಹು ಘಟ್ಟ ಥೈನ ರ‍್ಹವಾಡ್ಯಾಸ.