ಮತ್ತಾಯ 9

ಲಕ್ವೊ ಮಾರಲವಾಲಾನೆ ಅರಾಮ ಕರಲ

(ಮಾರ್ಕ 2:1-12; 5:17-26)

1ಯೆಸು ಹಡ್ಗೊ ಚ಼ಡಿನ ಸಮುಂದರ ದಾಟಿನ ತಿನಾ ಸ್ವಂತ ಗಾಮೆ ಗಯೊ. 2ತೆಳಾಮಾ ದಕ್ಹಾ ಜ಼ನಾ ಯಕ್ಕ ಲಕ್ವೊ ಮಾರಲ ರೊಗಿನೆ ಯೆಸು ಕನ ಲಾಯಾ ತೆ ತಿನಾ ವಚ್ಚಾನಾಪರ ಕ್ಹುರಯೊತೊ. ಯೆಸು ಎ ಮನಕ್ಹೊಮಾ ರ‍್ಹಯಲ ಮ್ಹೊಟ್ಟೊ ಭರೊಕ್ಹೊ ದೆಕಿನ ಲಕ್ವೊ ಮಾರ ರೊಗಿನೆ, ಎ ಜಾಂಜಿಮಾನ ಪಟ್ಟಾ, ಕ್ಹುಶಿ ಥಾ. ತಾರಾ ಪಾಪೊ ಮಾಫ ಥಯಾಸ” ಕೈನ ಕದ್ಯೊ. 3ತ್ಯಾ ರ‍್ಹಯಲ ಧರಮ ಉಪದೆಶಕೊ ತೆ ಐಕಿನ, ಎ ಕ್ಹುದಾನಿ ದುಶಣೆ ವ್ಹೈ” ಐನ ತ್ಯುನೊಮಾಜ಼ ಕೈಲಿದ್ಯಾ. 4ತ್ಯುನೆ ಇಮ್ಮ ವಿಚಾರ ಕರಾನು ಯೆಸುನೆ ಗ್ವತ್ತ ಥಯುತು. ತೆ ತ್ಯುನೊನೆ, ತುಮೆ ಕಾ ಕೆಟ್ಟ ವಿಚಾರ ಕರಾಡಾಸ? 5ಕಯು ಆಸಾನ ವ್ಹೈ? ಎ ಲಕ್ವೊ ಮಾರಲ ರೊಗಿನೆ, ‘ತಾರಾ ಪಾಪೊ ಮಾಫ ಥಯಾಸ’ ಕೈನ ಕವಾನು ಸು ತೆನೈಸೊ ‘ಉಪ್ಪರ ಉಟ್ಟ ಚಾ಼ಲ’ ಕೈನ ಕವಾನು ಸು? 6ತೆನೈಸೊ ಮನಕ್ಹನಾ ದಿಕ್ರಾನೆ ಪಾಪ ಮಾಫ ಕರಾನೆ ಭುಲೊಕಮಾ ಅದಿಕಾರ ಛೆ ಕವಾನು ಮಿ ತುಮೊನೆ ಗ್ವತ್ತ ರ‍್ಹೌ” ಕದ್ಯೊ. ಪಾಚಲ್ತೊ ಯೆಸು ಲಕ್ವೊ ಮಾರಲ ರೊಗಿನೆ, ಉಟ್ಟ, ತಾರು ವಚ್ಚಾ಼ನೊ ಲಿನ ಘರೆ ಜಾ಼” ಕದ್ಯೊ. 7ತೆಳಾಮಾ ತೆ ಉಟಿನ ಘರೆ ಗಯೊ. 8ಮನಕ್ಹೊ ಎ ದೆಕಿನ ಘಾಬ್ರಾ ತಿಬ್ರ ಥಯಾ. ಮನಕ್ಹೊನೆ ಹೈ ಅದಿಕಾರ ದಿದಲಕ್ಹು ಮನಕ್ಹೊ ಕ್ಹುದಾನೆ ಸ್ತುತಿ ಕರ‍್ಯಾ

ಭು ಭಾಡೊ ಲಿವಾಲಾನೆ ಬಲಾಯಲ

(ಮಾರ್ಕ 2:13-17; ಲುಕ 5:27-32)

9ಯೆಸು ಜಾ಼ತಾಮಾ, ಮತ್ತಾಯ ಕವಾಲಾ ಮನಕ್ಹನೆ ದೆಕ್ಯೊ. ಮತ್ತಾಯ ಭು ಭಾಡೊ ಲಿವಾನಾ ಕಟ್ಟಾಪರ ಬೆಟ್ಯೊತೊ. ಯೆಸು ತಿನೆ, ಮಾರಾ ಪಾಚೊ಼ ಆ” ಕದ್ಯೊ. ತೆಳಾಮಾ ಮತ್ತಾಯ ಉಟಿನ ಯೆಸುನಾ ಪಾಚೊ಼ ಗಯೊ. 10ಯೆಸು ಮತ್ತಾಯನಾ ಘರಮಾ ಗೈನ ಖಾವಾನೆ ಬೈಟ್ಯೊ. ಘನ್ನಾ ಮನಕ್ಹೊ ಭು ಭಾಡೊ ಲಿವಾಲಾ ವರಿ ಕೆಟ್ಟ ಮನಕ್ಹೊಬಿ ಯೆಸುನಾ ಕ್ಹಾತೆ ವರಿ ತಿನಾ ಶಿಷ್ಯಾವೊನಾ ಕ್ಹಾತೆ ಖಾವಾನೆ ಬೈಟ್ಯಾ. 11ಎ ದೆಕಿನ ಪರಿಸಾಯರೊ ಯೆಸುನಾ ಶಿಷ್ಯಾವೊನೆ, ತುಮಾರೊ ಬೊದಕ ಭು ಭಾಡೊ ಲಿವಾಲಾವೊನಾ ಕ್ಹಾತೆ ವರಿ ಕೆಟ್ಟ ಮನಕ್ಹೊನಾ ಕ್ಹಾತೆ ಕಾ ಖಾವಸ?” ಕೈನ ಪುಚ್ಯಾ. 12ಪರಿಸಾಯರೊ ಕದಲ ಐಕಿನ ಯೆಸು ತ್ಯುನೊನೆ, ಅರಾಮ ರ‍್ಹಯಲ ಮನಕ್ಹೊನೆ ಡಾಕ್ಟರನಿ ಜ಼ರುರತ ನತ್ತಿ. ರೊಗಮಾ ರ‍್ಹಯಲ ಮನಕ್ಹೊನೆ ಡಾಕ್ಟರನಿ ಜರುರತ ಛೆ. 13ತುಮೆ ಜಾ಼ವೊ, ‘ಮನಿ ಬಲಿ ನಕೊ, ಮರ್ಗಾ ಚಾ಼ಯೆ’ ಕೈನ ಪವಿತ್ರ ಗ್ರಂಥಮಾ ಬರದಲ ವಾಕ್ಯಾನು ಮತಲಬ ಶಿಕ್ಕಿಲಿವೊ. ಮಿ ನಿತಿವಂತವಾಲಾವೊನೆ ಬಲಾವೊನೆ ನತ್ತಿ ಆಯೊ, ಪಾಪಿಯೊನೆ ಬಲಾವಾನೆ ಆಯೊಸ” ಕೈನ ಕದ್ಯೊ.

ಉಪಾಸನಾ ಹುತಿ ಪ್ರಶ್ನೆ

(ಮಾರ್ಕ 2:18-22; ಲುಕ 5:33-39)

14ಪಾಚಲ್ತಾ ಯೊಹಾನನಾ ಶಿಷ್ಯಾ ಯೆಸುಕನ ಆಯಾ. ತ್ಯುನೆ ಯೆಸುನೆ, ಹಮೆ ವರಿ ಪರಿಸಾಯರೊ ತೆಳಾಮ ತೆಳಾಮಾ ಉಪಾಸ ಕರಿಯೆಸ. ತೆನೈಸೊ ತಾರಾ ಶಿಷ್ಯಾ ಕಾ ಉಪಾಸ ನೈ ಕರ್ತಾ?” ಕೈನ ಪುಚ್ಯಾ. 15ಯೆಸು, ಹಿವಾನಾ ಟೈಮಮಾ ನ್ಹೌರಾನಾ ಕ್ಹಾತೆ ರ‍್ಹವಾನಾ ದೊಸ್ತೊ ದುಖಿ ನೈ ಥಾತಾ. ತೆನೈಸೊ ನ್ಹೌರೊ ತ್ಯುನೊನೆ ಛೊಡಿನ ಜಾ಼ವಾನೊ ಟೈಮ ಆವಸ. ತೆಳಾಮಾ ತ್ಯುನೆ ದುಖಿ ಥಾವಸ ವರಿ ಉಪಾಸ ಕರಸ. 16ಯಕ್ಲೊ ಪ್ಹಾಟಿಗಯಲ ಜು಼ನ್ನಾ ಅಂಗ್ಡಾನೆ ನವಾ ಫಡ್ಕಾನು ಥಿಗ್ಡು ಘಾಲಿನ ಶಿತಾ ನೈ. ಯಕ್ಕೆಳೆ ಶಿಯಾತೊಬಿ, ತೆ ತಿಗ್ಡು ಅಂಗ್ಡಾಪರತು ಕಿತೈಜಾ಼ವಸ. ತೆಳಾಮಾ ತೆ ಅಂಗ್ಡು ಬಿದಕ್ಹು ಫಾಟಿ ಜಾ಼ವಸ. 17ತೆನೈಸೊ ಮನಕ್ಹೊ ನವು ದ್ರಾಕ್ಷಿಯೊನು ರಕ್ಹ ಜು಼ನ್ನಿಯೊ ದ್ರಾಕ್ಷಿಯೊನಾ ರಕ್ಹನಾ ಕೈಚಿಲಾಮಾ ನೈ ಘಾಲ್ತಾ; ಕಾ ಕದ್ಯಾಮ ಜುನ್ನಿಯೊ ಕೈಚಿಲಾ ಫಾಟಿ ಜಾ಼ವಸ; ವರಿ ದ್ರಾಕ್ಷಿಯೊನು ರಕ್ಹ ನಕೈ ಜಾ಼ವಸ. ತಿನಾ ಹುತಿ ಮನಕ್ಹೊ ಕೆಳಾಮಾಬಿ ನವು ದ್ರಾಕ್ಷಿಯೊನು ರಕ್ಹ ನವಾ ಕೈಚಿಲಾವೊಮಾ ಘಾಲಸ. ತೆಳಾಮಾ ಭಂಬಿ ಉಗ್ರಸ” ಕದ್ಯೊ.

ಮರಲ ಛೊಕ್ರಿ ವಾಚ಼ಲ ವರಿ ರೊಗಮಾ ರ‍್ಹಯಲ ಬಾಕ್ಡಿನೆ ಅರಾಮ ಥಯಲ

(ಮಾರ್ಕ 5:21-43; ಲುಕ 8:40-56)

18ಯೆಸು ಎ ಸಂಗತಿಯೊ ಕತಾಮಾ ಸಭಾಮಂದಿರನೊ ಅದಿಕಾರಿ ಯಕ್ಲೊ ತಿಕನ ಐನ ತಿನೆ ಡೊಗ್ಗಿನ ನಮಸ್ಕಾರ ಕರಿನ, ಮಾರಿ ದಿಕ್ರಿ ಹಮನಾತೊಬಿ ಮರಿ ಗೈ. ತು ಐನ ತಿನೆ ಮುಟ್ಯೊಮ ತೆ ವರಿ ಜ್ಯುತಿ ಥಾವಸ” ಕೈನ ಕದ್ಯೊ. 19ತಿನಾಹುತಿ ಯೆಸು ಉಟಿನ ಅದಿಕಾರಿನಾ ಕ್ಹಾತೆ ಗಯೊ. ತಿನಾ ಕ್ಹಾತೆ ಶಿಷ್ಯಾಬಿ ಗಯಾ. 20ಬಾರಾ ವರಕ್ಹತಿ ರಕ್ತ ಕುಸಮ ರೊಗಮಾ ರ‍್ಹಯಲ ಯಕ್ಕ ಬಾಕ್ಡಿ ತ್ಯಾ ವ್ಹತ್ತಿ. ತೆ ಬಾಕ್ಡಿ ಯೆಸುನಾ ಪಾಚಿ ಐನ ತಿನಾ ಉಪ್ಪರಲ್ಯಾ ಅಂಗಡಾನಿ ತುದಿನೆ ಮುಟ್ಟಿ. 21ತೆಳಾಮ ತೆ ಬಾಕ್ಡಿ, ಮಿ ತಿನಾ ಅಂಗಡಾನೆ ಮುಟ್ಟಿಮ ಬಸ, ಮಿ ಅರಾಮ ಥೈ ಜೌಸ” ಕೈನ ವಿಚಾರ ಕರಿಲಿದಿತಿ. 22ಯೆಸು ಪಾಚೊ಼ ಫರಿನ ತೆ ಬಾಕ್ಡಿನೆ ದೆಕಿನ, ದಿಕ್ರಿ, ಖುಶಿ ಥಾ! ತಾರಾ ಭರೊಕ್ಹಾಕ್ಹುಜ ತುನೆ ಅರಾಮ ಥಯುಸ” ಕೈನ ಕದ್ಯೊ. ತೆಳಾಮಾ ತೆ ಅರಮ ಥೈ. 23ಪಾಚಲ್ತೊ ಯೆಸು ಅದಿಕಾರಿನಾ ಕ್ಹಾತೆ ಅಗೊ ಗೈನ ತಿನಾ ಘರಮಾ ಗಯೊ. ಮಾತಿ ಕರಾನಾ ಹುತಿ ಆಯಲ ಭಜ್ನಿ ವಾಲಾವೊನೆ ಬಿ ವರಿ ರವಾಲಾವೊನೆ ಬಿ ಯೆಸು, 24ದುರ ಜಾವೊ, ಚೊಕ್ರಿ ಮರಿ ನತ್ತಿ. ತೆ ನಿಂದರ ಕರಾಡಿಸ” ಕದ್ಯೊ. ತೆನೈಸೊ ತ್ಯುನೆ ಯೆಸುನೆ ಕದರಾಯಾ. 25ಮನಕ್ಹೊನೆ ಘರಮಾತೊ ಭಾರೊ ವಳಾಯಲ್ಪರ ಯೆಸು ಛೊಕ್ರಿನಾ ಖೊಲಿಮಾ ಗಯೊ. ಯೆಸು ಛೊಕ್ರಿನು ಹತ್ತ ದರಲ್ಪರ ತೆ ಛೊಕ್ರಿ ಉಟಿನ ಹುಬ್ರೈ. 26ಎ ಸುದ್ದಿ ಸುತ್ತೆ ರ‍್ಹಯಲ ಗಾಮೊಮಾ ಫೈಲಿ.

ಬೆ ಕುಡ್ಡಾವೊನೆ ಡೊಳಾ ದಿದಲ

27ಯೆಸು ತ್ಯಾಂತೊ ಜಾ಼ತಾಮಾ ಬಿ ಕುಡ್ಡಾ ತಿನಾ ಪಾಚಾ಼ ಲಾಗ್ಯಾ. ತ್ಯುನೆ, ದಾವಿದನಾ ದಿಕ್ರಾ, ಹಮೊನೆ ದಯಾ ದೆಕಾಡ” ಕೈನ ಜೊ಼ರ ಅಡ್ಯಾ. 28ಯೆಸು ಘರಮಾ ಗಯೊ. ಕುಡ್ಡಾ ಬಿ ತಿನಾ ಕ್ಹಾತೆ ಗಯಾ. ಯೆಸು ತ್ಯುನೊನೆ, ಮಿ ತುಮೊನೆ ಅರಾಮ ಕರುಸ ಕೈನ ತುಮೆ ಭರೊಕ್ಹೊ ಕರೊಶಿ ಸು?” ಕೈನ ಪುಚ್ಯೊ. ಕುಡ್ಡಾ, ಹೊ ಪ್ರಭು, ಹಮೆ ಭರೊಕ್ಹೊ ಕರಿಯೆಸ” ಕೈನ ಉತ್ತರ ದಿದ್ಯಾ. 29ತೆಳಾಮಾ ಯೆಸು ತ್ಯುನಾ ಡೊಳಾ ಮುಟ್ಟಿನ, ತುಮೆ ಭರೊಕ್ಹೊ ಕರಲ ಲಿಂಗತಜ ತುಮೊನೆ ಅರಾಮ ಥಾವಾದೆ” ಕದ್ಯೊ. 30ತೆಳಾಮಾಜ಼ ತ್ಯುನೊನೆ ಡೊಳಾ ಆಯಾ. ಎ ವಿಶಯ ಕಿಜೆಜ಼ ಕೌ ನೈ” ಕೈನ ಯೆಸು ತ್ಯುನೆನೊ ಹುಶಾರಕಿ ದಿದ್ಯೊ. 31ತೆನೈಸೊ ತೆ ಕುಡ್ಡಾ ತ್ಯಾಂತಾ ಗೈನ ಯೆಸುನಿ ಸುದ್ದಿ ತೆ ಗಾಮ್ನಾ ಸುತ್ತೆ ಫೈಲಾಯಾ.

ಮುಕೊ ಬೊಲಲ

32ತ್ಯುನೆ ಭಂಬಿಜ಼ನಾ ಜಾ಼ತಾಮಾ ದಕ್ಹಾ ಜ಼ನಾ ವರಿ ಯಕ್ಲಾನೆ ಯೆಸುಕನ ಲಾಯಾ. ತಿನಾಮಾ ಕೆಟ್ಟ ಆತ್ಮಾ ರ‍್ಹಯಲಕ್ಹು ತೆ ಮುಕೊ ಥಯೊತೊ. 33ಯೆಸು ತೆ ಕೆಟ್ಟ ಆತ್ಮಾನೆ ತಿನೆ ಛೊಡಿನ ಜಾ಼ ಕೈನ ಆಗನ್ಯಾ ದಿದ್ಯೊ. ತೆ ಬೊಲಾನು ಶುರು ಕರ‍್ಯೊ. ಎ ದೆಕಲ ಮನಕ್ಹೊ ಘಾಬ್ರಾ ತಿಬ್ರಾ ಥೈನ, ಇಸ್ರಾಯೆಲಮಾ ಹೌ ಕಾಮ ದೆಕ್ಯಾಜ ನತ್ತಿ” ಕದ್ಯಾ. 34ತೆನೈಸೊ ಪರಿಸಾಯರೊ, ಎ ಕೆಟ್ಟ ಆತ್ಮಾವೊನಿ ಮಾಲಕನಿ ತಾಕತಕ್ಹು ಕೆಟ್ಟ ಆತ್ಮಾವೊನೆ ಛೊಡಾವಸ” ಕದ್ಯಾ.

ಯೆಸುನಿ ಮರ್ಗಾ

35ಯೆಸು ಕ್ಹಾರಾ ಗಾಮೊಮಾ ವರಿ ಕ್ಹಾರಾ ಖೆಡಾವೊಮಾ ಪ್ಹರ‍್ಯೊ. ಯೆಸು ತ್ಯುನಾ ಸಭಾಮಂದಿರೊಮಾ ಉಪದೆಶ ಕರಿನ ಪರಲೊಕ ರಾಜ್ಯನಿ ವಿಶಯನಾ ಹುತಿ ಚೊ಼ಕಿ ಸುವಾರ್ತೆ ಕದ್ಯೊ. ಕ್ಹಾರಾ ತರಾನಾ ರೊಗೊನೆ ದುಕ್ಕೊನೆ ಅರಾಮ ಕರ‍್ಯೊ. 36ದುಕ್ಕೊಕ್ಹು ವದ್ಯಾಡಾಲಾ ವರಿ ಸಹಾರೊ ನೈ ರ‍್ಹಯಲವಾಲಾ ಘನ್ನಾ ಮನಕ್ಹೊನೆ ಯೆಸು ದೆಕಿನ ದುಖಿ ಥಯೊ. ಕುರಬುರ‍್ಯೊ ನೈಸೊ ಬಿಚ಼ಡಿಗಯಲ ಬಕ್ರಾವೊಲಿಂಗತ ತ್ಯುನೆ ಛೆ ಕೈನ ತ್ಯುನೊನೆ ಮರಗ್ಯೊ. 37ಯೆಸು ತಿನಾ ಶಿಷ್ಯಾವೊನೆ, ಬೆಳಿ ಘನ್ನಿ ಛೆ, ತೆನೈಸೊ ಕಾಮ ಕರಾಲಾ ದಕ್ಹಾ ಜ಼ನಾ ಛೆ. 38ಬೆಳಿನೊ ಮಾಲಕ ಕ್ಹುದಾಜ ವ್ಹೈ. ತಿನಾ ಹುತಿ ಘನ್ನಾ ಕಾಮವಾಲಾವೊನೆ ಸುಗ್ಗಿ ಕಾಲನಾ ಹುತಿ ವಳೌಕೈನ ತಿನೆ ಪ್ರಾಥನಾ ಕರೊ” ಕೈನ ಕದ್ಯೊ.