ಮಾರ್ಕ 10

ಬೈಕೊನೆ ಛೊಡಿ ಪಾಡಾನಾ ಹುತಿ

(ಮತ್ತಾಯ 19:1-12)

1ಯೆಸು ತ್ಯಾಂತೊ ಉಟಿನ ಯೊರ್ದನ ನದಿನಾ ಬಿಜಿ಼ ದಂಡಿಯೆ ರ‍್ಹಯಲ ಯೊದಾಯಾ ಪ್ರಾಂತ್ಯ ಗಯೊ. ತ್ಯಾ ಮನಕ್ಹೊ ಫರಿನ ಗುಂಪ-ಗುಂಪ ಥೈನ ತಿಕನ ಆತಾಮಾ ಯೆಸು ತ್ಯುನೊನೆ ಪದ್ದತ ಲಿಂಗತ ಕ್ಹುದಾನಿಯೊ ವಾತೊ ಕವಾಡೊತೊ. 2ತೆಳಾಮಾ ಫರಿಸಾಯರೊ ಕುಡಿನ ಐನ ಯೆಸುನೆ ಪರಿಕ್ಷಾ ಲಿವುಕೈನ ವಿಚಾರ ಕರಿನ ಆಯಾತಾ-ಯಕ್ಲೊ ತಿನಿ ಬೈಕೊನೆ ಛೊಡಿಪಾಡಾನು ಧರಮ ವ್ಹೈಸು ಕೈನ ಪುಚ್ಯೊ. 3ತೆ ವಾತೆ ಯೆಸು - ಮೊಶೆ ತುಮೊನೆ ಸು ಆಗನ್ಯೆ ದಿದ್ಯೊಸ ಕತಾಮಾ 4ತ್ಯುನೆ ತ್ಯಾಗ ಪತ್ರ ಬರ್ದಿನ ದಿನ್ನ ತಿನಿ ಬೈಕೊನೆ ಛೊಡಿಪಾಡ ಕೈನ ಮೊಶೆ ಅಪ್ಪಣೆ ದಿದ್ಯೊಸ ಕದ್ಯಾ. 5ತೆಳಾಮಾ ಯೆಸು ತ್ಯುನೊನೆ ತಮಾರಿ ಮಂಡತನಾ ದೆಕಿನ ಮೊಶೆ ತೆ ಆಗನ್ಯಾ ಬರ್ದಿನ ಮ್ಹೆಲಿನ ಗಯೊಸ. 6ವರಿ ಕ್ಹುದಾ ಸೃಷ್ಟಿತೊಬಿ ಮನಕ್ಹೊನೆ ದಾಣಗೊ ಹೆಣ ಮನಕ್ಹ ಕರ‍್ಯೊಸ ಇನಾಹುತಿ ಧರಮ ಶಾಸ್ತ್ರ ಕವಸ್ತೊ. 7ದಾಣಗೊ ತಿನಾ ಯಾ ಬಾ ನೆ ಛೊಡಿನ ತಿನಿ ಬೈಕೊನಾ ಕ್ಹಾತೆ ಮಳಿನ ತ್ಯುನೆ ಭಂಬಿಜ಼ನಾ ಮಳಿನ ಯಕ್ಕ ಅಂಗ ಥಾವಸಕೈನ ಬರ್ದಲ ಛೆ. 8ಇಮ್ಮ ರ‍್ಹಯಲ ತ್ಯುನೆ ಬೆಜ಼ನಾ ನ್ಹವೈ. ಯಕ್ಕ ಅಂಗ ಥಯಾಸ. 9ತಿನಾಹುತಿ ಕ್ಹುದಾ ಕರಲ ಜೊ಼ಡಿ ಮನಕ್ಹೊ ದುರ ಕರುಜ಼ ನೈ. ಕದ್ಯೊ. 10ಘರಮಾ ತಿನಾ ಶಿಷ್ಯಾ ಯೆಸುನೆ ತಿನಾಹುತಿ ಫರಿನ ಪುಚ಼ತಾಮಾ ತೆ ತ್ಯುನೊನೆ 11ತಿನಿ ಬೈಕೊನೆ ಛೊಡಿನ ಬಿಜೆಕ್ಕಲಿನೆ ಹಿವಾ ಕರಲಿವಾಲೊ. ತಿನಿ ಬೈಕೊನೆ ದ್ರೊಹಿಥೈನ ವ್ಯಭಿಚಾರಕರಾಲೊ ಥಾವಸ. 12ತಿನಾನಿOಗತ ಬೈಕೊ ಮಾಟಿನೆ ಛೊಡಿನ ಬಿಜೆಕ್ಕಲಾನ ಹಿವಾ ಕರಲಿದಿಮ ತೆ ವ್ಯಭಿಚಾರ ಕರಾಲಿ ವ್ಹೈ ಕದ್ಯೊ.

ಯೆಸು ನ್ಹಾನಾ ಬಚ್ಚಾವೊನೆ ಆಶಿರ್ವಾದ ದಿದಲ

(ಮತ್ತಾಯ 19:13-17; ಲುಕ 18:15-17)

13ತೆ ಥಯಲ್ಪರ ದಕ್ಹಾಜ಼಼ನಾ ತಿವ್ನಾ ನ್ಹಾನಾ ಬಚ್ಚಾ಼ವೊನೆ ಯೆಸುನಾ ಹತೆ ಮುಟ್ಟಾವು ಕೈನ ತಿಕನ ಲಾತಾಮಾ ತಿನಾ ಶಿಷ್ಯಾ ತ್ಯುನೊನೆ ಭುಚ್ಕಾ಼ಡ್ಯಾ. 14ತೆ ಯೆಸು ದೆಕಿನ ಶಿಟ್ಟಥೈನ ತಿನಾ ಶಿಷ್ಯಾವೊನೆ ಸು ಕದ್ಯೊ ಕದ್ಯಾಮ -ಬಚ್ಚಾವೊನೆ ಮಕನ ಆವಾನೆ ದಿವೊ ತ್ಯುನೊನೆ ಅಡ್ಡಿ ಕರೊ ನಕೊ. ಕ್ಹುದಾನಿ ರಾಜ್ಯ ಇವ್ನಾ ವರಕ್ಹಾವೊನೆ ವ್ಹೈ 15ತುಮೊನೆ ಕ್ಹರಿಜ಼ ಕೌಸ ಕುನ್ನ ಬಚ್ಚಾ಼ನಾ ಮನಸ ಲಿಂಗತ ಕ್ಹುದಾನಿ ರಾಜ್ಯ ಕುನ್ನ ವಪ್ಪಿಲೆತಾ ನೈ. ತೆ ತಿಮಾ ಮಳತೊಜ಼ ನೈ. 16ತಿಮ್ಮ ಕೈನ ಬಚ್ಚಾವೊನೆ ಅವಳಿಲಿನ ಯಕೆಕ್ಕಲಾವೊಪರ ಹತ್ ಮ್ಹೆಲಿನ ಆಶಿರ್ವಾದ ದಿದ್ಯೊ.

ಯೆಸು ದೊಕಡಾವೊನಾ ಹುತಿ ಥಾವಾನು ಕೆಟ್ಟ ದೆಕಾಡಲ

(ಮತ್ತಾಯ 19:16-30; ಲುಕ 18:18-30)

17ಯೆಸು ವಾಟ ಧರಿನ ಜಾ಼ತಾಮಾ ಯಕ್ಲೊ ನ್ಹಾಟತೊ ತಿನಾ ಕ್ಹಾಮೊ ಐನ ಉಂದಾಗುಡಗಾ ಘಾಲ್ಲಿನ ಚೊ಼ಕಾ ಭೊದಕ ಮನೆ ಹಮೆಶಾನೊ ಜ಼ಲಮ ಮಳು ಕದ್ಯಾಮ ಮಿ ಸುಕರು ಕೈನ ಯೆಸುನೆ ಪುಚ಼ತಾಮಾ, 18ಯೆಸು ತಿನೆ ಮಿ ಚೊ಼ಕೊ ವ್ಹೈ ಕೈನ ಕಾ ಕವಾಡ್ಯೊಸ? ಕ್ಹುದಾನೆ ಛೊಡಿನ ಬಿಜು಼ ಕುನ್ನಜ಼ ಚೊ಼ಕು ನ್ಹವೈ. 19ತುನೆ ಆ ಗೊತ್ತ ಛೆ ಸು ನರಹತ್ಯಾ ಕರುನೈ; ವ್ಯಭಿಚಾರ ಕರುನೈ ;ಚೊ಼ರಿಕರು ನೈ; ಸುಳ್ಳ ಸಾಕ್ಷಿ ಕವೊನೈ; ಮೊಸ ಕರುನೈ ತಾರಾ ಯಾ ಬಾನೆ ಮರ್ಯಾದಿ ದ್ಯು. ಕವಾನಿಯೊ ಕ್ಹುದಾನಿಯೊ ಆಗನ್ಯಾ ತುನೆ ಗೊತ್ತ ಛೆ ಕೈನ ಕದ್ಯೊ. 20ತೆ ಯೆಸುನೆ -ಭೊದಕ ಮಿ ನ್ಹಾನೊ ರ‍್ಹತಾಮಾತೊ ಬಿ ಎ ಕ್ಹಾರು ಚೊ಼ಕಿತರಾ ಕರತೊ ಆಯೊಸ. ಕೈನ ಕತಾಮಾ 21ಯೆಸು ತಿನೆ ಯಕ್ಕ ಸಂವಾ ದೆಕಿನ ಮಯಾ ಕರಿನ ತಿನೆ ತುನೆ ಯಕ್ಕ ಕಮ ಥಯುಸ ಜಾ಼ ತು ಗಳಸಲ ತೆಕ್ಲು ಇಕ್ಕಿನ ಗರಿಬೊನೆ ವಾಟ ಸ್ವರ್ಗಮಾ ತು ಸೌಕಾರ ರ‍್ಹಸಿ ತು ಮಾರಾ ಪಾಚೊ಼ ಆ ಕದ್ಯೊ. 22ತೆ ಘನ್ನೊ ಸೌಕಾರ ರ‍್ಹಯಲ ಹುತಿ ಎ ವಾತೆ ತೆ ಮ್ಹೊಡು ಉತಾರಲಿನ ದುಖಕ್ಹು ಗೈ ಪಾಡ್ಯೊ. 23ತೆಳಾಮಾ ಯೆಸು ಸುತ್ತೆ ದೆಕಿನ ತಿನಾ ಶಿಷ್ಯಾವೊನೆ ಸೌಕಾರ ರ‍್ಹಯಲ ವಾಲೊ ಕ್ಹುದಾನಿ ರಾಜ್ಯಮಾ ಆವಾನು ಘನ್ನು ಕಷ್ಟ ಛೆ ಕದ್ಯೊ. 24ಶಿಷ್ಯಾ ತಿನಿ ವಾತ ಐಕಿನ ಘಾಬ್ರಾಥಯಾ. ಯೆಸು ಫರಿನೆ ತ್ಯುನೊನೆ-ಮಾರಾ ಬಚ್ಚಾ಼ವೊ,ಕ್ಹುದಾನಿ ರಾಜ್ಯಮಾ ಮಳಾನು ಕೆಕ್ಲು ಕಷ್ಟ ವ್ಹೈ. ಕದ್ಯೊ. 25ಸೌಕಾರ ರ‍್ಹಯಲ ವಾಲೊ ಕ್ಹುದಾನಿ ರಾಜ್ಯಮಾ ಸೆರಾನು ಕೆಕ್ಲೊ ಕಷ್ಟ ವ್ಹೈ ಕದ್ಯಾಮ ಹುಂಟ ಕ್ಹೊಯಿನಾ ಡೊಳಾಮಾತು ಜಾ಼ವಾನು ಆಸಾನ ವ್ಹೈ ಕದ್ಯೊ. 26ಎ ವಾತೆ ತ್ಯುನೆ ವರಿ ಘಾಬ್ರಾಥೈನ. ಇಮ್ಮ ರಹ್ಯುಮ ಕಿನೆ ರಕ್ಷಣೆ ಥಾವಸ.

27ಕೈನ ತ್ಯುನೊ ತ್ಯುನೊಮಾಜ಼ ಕೈಲಿವಾನು ದೆಕಿನ ಯೆಸು ತ್ಯುನೊನೆ ದೆಕಿನ ಎ ಮನಕ್ಹೊನೆ ಅಸಾದ್ಯ ವ್ಹೈ; ಕ್ಹುದಾನೆ ಅಸಾದ್ಯ ನ್ಹವೈ ಕ್ಹುದಾನೆ ಕ್ಹಾರು ಸಾದ್ಯ ವ್ಹೈ. 28ಪೆತ್ರಾ ಬೊಲ್ಯೊ- ದೆಕ ಹಮೆ ಕ್ಹಾರುಜ಼ ಛೊಡಿನ ತಾರಾ ಪಾಚಾ಼ ಆವಾಡ್ಯಾಸ. ಕೈನ ಕವಾನು ಚ಼ಾಲು ಕರು ಕವಾಕ್ಹುಜ಼. 29ಯೆಸು. ಮಿ ತುಮೊನೆ ಕ್ಹರಿಮಾಜ಼ ಕೌಸ ಕುನ್ನಬಿ ಮಾರಾಹುತಿ ಸುವಾರ್ತೆನಾ ಹುತಿ ಘರನೆ ರ‍್ಹವಾದೆ ಭೈ ಭೆನ ಯಾ ಬಾಪನೆ ಬಚ್ಚಾವೊನೆ ಜಿಮಿನ್ನೆ ಛೊಡಿನ. 30ಛೊಡಲವಾಲಾನೆ ತಿನೆ ಹಮ್ನಾನಾ ಕಾಲಮಾ ಘರ, ಭಾಯೊ, ಭೆನೊ, ಯಾ, ಬಚ್ಚಾ, ಜಿಮಿನ ಎ ಕ್ಹಾರು ತ್ರಾಸನಾ ಕ್ಹಾತೆ ಕ್ಹಾರು ಮಳಸ. ವರಿ ಅಗಲ್ಯಾ ಜಗತಮಾ (ದುನಿಯಾ) ಕ್ಹುದಾಕನ ರ‍್ಹವಾನೊ ಹಮೆಶಾನೊ ಜ಼ಲಮ ಮಳಸ 31ಘನ್ನಾ ಮನಕ್ಹೊ. ಪಾಚಾ಼ರ‍್ಹಯಲವಾಲಾ ಅಗಾ ಥಾವಸ ಅಗಾ ರ‍್ಹಯಲವಾಲಾ ಪಾಚಾ಼ಥಾವಸ ಇಮ್ಮ ಕದ್ಯೊ.

ಯೆಸು ತೆ ಮರಾನು ತನವಾ ಸಲಾ ತಿಳಸಾಯಲ

(ಮತ್ತಾಯ 20:17-19; ಲುಕ 18:31-34)

32ಯೆಸು ವರಿ ತಿನಾ ಶಿಷ್ಯಾ ಯೆರುಸಲೆಮಿನಿ ವಾಟ ಧರಿನಜಾ಼ತಾಮಾ ಯೆಸು ಅಗೊ-ಅಗೊ ಚಾ಼ಲ್ಯೊತೊ. ತಿನಾ ಪಾಚಾ಼ ರಹೆಲ ಶಿಷ್ಯಾ ಗಲಿಬಿಲಿ ಥಯಾ ತಿವ್ನಾ ಕ್ಹಾತೆ ಆವಾಲಾ ಮನಕ್ಹೊ ಭುಚ಼್ಕಾ ವರಕ್ಹಾ ಥಯಾ. ತೆಳಾಮಾ ತೆ ತಿನಾ ಬಾರಾ ಶಿಷ್ಯಾವೊನೆ ಬಲೈನ ಫರಿನ ತಿನಾ ಕ್ಹಾತೆ ಅಗು ಥಾವಾನು ಕತೊರ‍್ಹತಾಮಾ ತ್ಯುನೊನೆ ಕತಾಮಾ 33ದೆಕೊ ಅಪೆ ಯೆರುಸಲೆಮೆ ಚಾ಼ಲ್ಯಾಸ ವರಿ ಮನಕ್ಹನಾ ದಿಕ್ರಾನೆ ಖಾಸ ಯಾಜಕೊ ವರಿ ಶಾಸ್ತ್ರಿಯೊನಾ ಹತ್ಮಾ ಧರಿನ ದಿವಸ. ವರಿ ತ್ಯುನೆ ತಿನೆ ತಿಪರ ತಪ್ಪ ಘಾಲಿನ ಮರವಾನಿ ಶಿಕ್ಕಷಾದಿವಸ ಬಿಜಾ಼ ಮನಕ್ಹೊನಾ ಹತ್ಮಾ ದಿವಸ. 34ಇವ್ನೆ ತಿನೆ ಕದ್ರಾವಸ ತಿಪರ ಥುಕ್ಕಕಸ ತ್ಯುನೆ ತಿನೆ ಬಾರಕೊಲಕ್ಹು ಮಾರಸ ವರಿ ಖಲಾಸ ಕರಿಪಾಡಸ ತೆ ತನ ದಿನ್ನ ಥಯಲ್ಪರ ಜುತೊಥೈನ ಉಟಿನ ಆವಸ. ಕದ್ಯೊ.

ಯಾಕೊಬ ವರಿ ಯೊಹಾನ ಪುಚ಼ಲ

(ಮತ್ತಾಯ 20:20-28)

35ತೆಳಾಮಾ ಜೆಬೆದಾಯನಾ ದಿಕ್ರಾ ಯಾಕೊಬ ಯೊಹಾನ. ಯೆಸುಕನ ಐನ ತಿನೆ ಗುರು ಹಮೆ ಯಕ್ಕ ಮಾಂಗಿಯೆಸ. ತೆ ಹಮಾರಾ ಹುತಿ ಪುರಾಕರು ಕದ್ಯಾ. ಯೆಸು ತ್ಯುನೊನೆ - 36ತುಮೊನೆ ಸು ಪುರಾಕರು ಕೈನ ಕತಾಮಾ. 37ತು ಮಹಿಮಾನಾ ರಾಜ್ಯ ಸಿಂಹಾಸನಿ ಪದವಿಪರ ಬೈಟತಾಮಾ ಹಮೊಮಾ ಯಕ್ಲಾನೆ ಸಿದಾಹತೆ ಯಕ್ಲಾನೆ ಡಾವಾ ಹತ್ ಬಗಲ ಹಮೊನೆ ಬೈಟಾನೆ ದೆ ಕದ್ಯಾ. 38ತೆಳಾಮಾ ಯೆಸು ತ್ಯುನೊನೆ-ತುಮೆ ಸು ಪುಚಾ಼ಡ್ಯಾಸ ತುಮೊನೆ ಗೊತ್ತನತ್ತಿ. ಮಿ ಪಾನಿ ಪಿವಾನಾ ತ್ರಾಸನಾ ತಾಂಬಿಯಾಮಾ ತುಮೊನೆ ಪಿವಾನೆ ಥಾವಸು? ಮನೆ ಥಾವಾನು ಬಾಪ್ತಿಸ್ಮ ತುಮೊನೆ ಕರೈಲಿವಾನೆ ಥಾವಸು. ಕೈನ ಪುಚ್ತಾ಼ಮಾ. 39ತ್ಯುನೆ-ಥಾವಸ ಕದ್ಯಾ ತೆಳಾಮಾ ಯೆಸು ತ್ಯುನೊನೆ ಮಿ ಪಿವಾನಾ ತಾಂಬಿಯಾಮಾ ತುಮೆ ಪಿವೊಸಿ. ಮನೆ ಥಾವಾನು ಬಾಪ್ತಿಸ್ಮ ತುಮೊನೆ ಥಾವಸ. 40ವರಿಬಿ ಮಾರಾ ಆಜು಼ ಬಾಜು಼ಮಾ ಬೈಟಾನು ಅದಿಕಾರ ದಿವಾನು ಮಾರಾ ಹತ್ಮಾ ನತ್ತಿ. ಕ್ಹುದಾಜ಼ ದಿವಸ ತೆ ಕಿನಾಹುತಿ ತೆ ತಯ್ಯಾರ ಥೈಸ ತೆ ತಿನೆಜ ಮಳಸ ಕದ್ಯೊ. 41ಉಗ್ರಲ ದಕ್ಹೆ ಶಿಷ್ಯಾ ಎ ಐಕಿನ ಯಾಕೊಬ ಯೊಹಾನ ಪರ ಶಿಟ್ಟಥಯಾ. 42ಯೆಸು ಕ್ಹಾರಾವೊನೆ ನಜಿಕ ಬಲೈನ ತ್ಯುನೊನೆ ಯೆಹುದಿ ನಾಯಕೊನೆ ಕ್ಹಾರು ಅದಿಕಾರ ದಿದ್ಯಾಸ ಎ ಕ್ಹಾರು ಅದಿಕಾರ ಬಿಜಾ಼ ಮನಕ್ಹೊಪರ ರಾಜ಼ ಕರುಸ ಕವಾಲಾ ತ್ಯುನೊಪರ ಅಹಂಕಾರಕ್ಹು ರಾಜ಼ ಕರಸ. ವರಿ ತ್ಯುನೊಮಾ ಮ್ಹೊಟೊ ಜ಼ಬರದಸ್ತಿಕ್ಹು ರಾಜ಼ ಚ಼ಲಾವಸ. 43ತುಮೊಮಾ ತಿಮ್ಮ ರ‍್ಹೌ ನೈ ತುಮೊಮಾ ಮ್ಹೊಟೊ ಥೌಸ ಕವಾಲೊರ‍್ಹಯೊಮ ತೆ ತಮಾರೊ ಸೆವಕ ಥೌ; 44ವರಿ ತುಮೊಮಾ ಪೈಲಾ ಥೌಸಕವಾಲೊ ಕ್ಹಾರಾವೊನೊ ಆಳ ಥೌ. 45ಮನಕ್ಹನೊ ದಿಕ್ರೊಬಿ ಸೆವಾ ಕರೈಲಿವಾನೆ ನತ್ತಿ ಆಯೊ. ಸೆವಾ ಕರಾನೆ. ವರಿ ತೆ ಜ಼ಲಮ ದಿನ್ನ ಘನ್ನಾಜ಼ನಾವೊನೆ ಛೊಡಾವಾನೆ ಆಯೊಸ ಕದ್ಯೊ.

ಯೆಸು ಬಾರತಿಲೊಮಾಯಾ ಕವಾಲಾ ಕುಡ್ಡಾನೆ ಅರಾಮ ಕರಲ

(ಮತ್ತಾಯ 20:29-34; ಲುಕ 18:35-43)

46ತ್ಯುನೆ ಯೆರಿಕೊವಿಯೆ ಆಯಾ ಯೆಸು ತಿನಾ ಶಿಷ್ಯಾ ಮನಕ್ಹೊನು ಗುಂಪ ತೆ ಗಾಮತಾ ಜಾ಼ತಾಮಾ ತಿಮಾಯನೊ ದಿಕ್ರೊ ಬಾರ್ತಿಮಾಯಾ ತೆ ಕುಡ್ಡೊ ಮಾOಗಾನೆ ವಾಟನಾ ಬಾಜು಼ಮಾ ಬೈಟ್ಯೊತೊ. 47ತೆ ಕುಡ್ಡೊ ಭಿಕ ಮಾಂಗಾಲೊ ವ್ಹತ್ತೊ. ಎ ವಾಟಪರ ಜಾ಼ವಾನೊ ನಜ಼ರೆತನೊ ಯೆಸು ವ್ಹೈ ಕೈನ ಐಕಿನ ದಾವಿದನಾ ದಿಕ್ರಾ ಯೆಸು. ಮನೆ ಮರಗ ಕೈನ ವದ್ರಾನು ಚಾಲುಕರ‍್ಯೊ. 48ಘನ್ನಾಜ಼ನಾ ತಿನೆ ಗಪ ರ‍್ಹೆ ವರಿ ತೆ ದಾವಿದನಾ ದಿಕ್ರಾ ಮನೆ ಮರಗ ಕೈನ ವರಿ ಜೊ಼ರ ವದರ‍್ಯೊ. 49ತೆಳಾಮಾ ಯೆಸು ಹುಬ್ರೈನ ತಿನೆ ಬಲೈ ಲಾವೊ ಕದ್ಯೊ. ತೆಳಾಮಾ ಮನಕ್ಹೊ ತೆ ಕುಡ್ಡಾನೆ ಬಲೈನ ಖುಶಿ ಕರ ಉಟ. ತುನೆ ಬಲಾವಾಡ್ಯೊಸ ಕದ್ಯಾ. 50ತೆ ತಿಪರ ವಳ್ಳಿದಲ ಪ್ಹಡಕು ನಾಕಿನ ಗಪ್ನೆ ಉಟಿನ ಯೆಸುಕನ ಆಯೊ. 51ಯೆಸು ತಿನೆ ಮಿ ತುನೆ ಸುಕರು ಕೈನ ಆಸ ಛೆ. ಕೈನ ಪುಚ್ತಾ಼ಮಾ. ತೆ ಕುಡ್ಡೊ ಮನೆ ಡೊಳಾ ದಿಕ್ಹಾವರಕ್ಹಾ ಕರು. ಗುರು. ಕದ್ಯೊ. 52ಯೆಸು ತಿನೆ - ಜಾ಼ ತಾರೊ ಬರೊಕ್ಹೊ ತುನೆ ಅರಾಮ ಕರ‍್ಯೊಸ ಕದ್ಯೊ. ತೆಳಾಮಾಜ಼ ತಿನಾ ಡೊಳಾ ಆಯಾ. ತೆ ವಾಟಮಾ ತಿನಾ ಪಾಚೊ಼ಗಯೊ.