ಲುಕ 15

ಜ಼ವೈ ಗಯಲ ಬಕ್ರು

(ಮತ್ತಾಯ 18:12-14)

1ಯಕ್ಕ ದಿನ್ನ ಘನ್ನಾ ಭು ಭಾಡೊಲಿವಾಲಾ ವರಿ ಪಾಪಿಯೊ ಯೆಸು ಕವಾನು ಉಪದೆಶ ಐಕು ಕೈನ ಆಯಾತಾ. 2ತೆಳಾಮಾ ಫರಿಸಾಯರೊ ವರಿ ಶಾಸ್ತ್ರಿಯೊ"ದೆಕೊ! ಎ ಮನಕ್ಹ (ಯೆಸು) ಪಾಪಿಯೊನೆ ಬಲೈನ ತ್ಯುನಾ ಕ್ಹಾತೆ ಮಳಿನ ಅನ್ನ ಖಾವಾಡ್ಯೊಸ"ಕತಾ ಯೆಸುಪರ ಗುಣ ಗುಟ್ಟಾಡ್ಯಾತಾ.

3ತೆಳಾಮಾ ಯೆಸು ತ್ಯುನೊನೆ ಯಕ್ಕ ಸಾಮ್ಯ ಕದ್ಯೊ. 4ತುಮೊಮಾನಾ ಯಕ್ಲಾಕನ ಕ್ಹೊ ಬಕ್ರಾ‌ ಛೆ ಕೈನ ತಿಳದಿಲಿಯೆ ತೆ ಕ್ಹೊ ಬಕ್ರಾವೊಮಾನು ಯಕ್ಕ ಬಕ್ರು ಜ಼ವೈ ಗಯುಮ, ತೆ ಮನಕ್ಹ ನವ್ವದಪರ ನೌ ಬಕ್ರಾ ತ್ಯಾಜ಼ ಛೊಡಿನ ಜ಼ವೈಗಯಲ ಯಕ್ಕ ಬಕ್ರಾನೆ ಹುಡ್ಕತೊ ಜಾ಼ವಸ. ತೆ ಬಕ್ರು ಮಳೆ ಲಕ್ಕಾ ತೆ ಹುಡ್ಕತೊಜ಼ ರ‍್ಹವಸ. 5ತೆ ಮನಕ್ಹನೆ ಜ಼ವೈಗಯಲ ಬಕ್ರು ಮಳ್ತಮಾ ಘನ್ನೊ ಖುಶಿ ಥಾವಸ. ತೆ ಬಕ್ರಾನೆ ಖಾಂದಾಪರ ಉಚೈಲಿನ ತಿನಾ 6ಘರೆ ಆವಸ ತೆ ತಿನಾ ದೊಸ್ತೊನೆ ವರಿ ಆಜು಼ಬಾಜು಼ವಾಲಾನೆ ಬಲೈನ ಮಾರಾ ಕ್ಹಾತೆ ಖುಶಿ ಕರೊ, ಮಾರು ಜ಼ವೈಗಯಲ ಬಕ್ರು ಮಳ್ಯುಸ ಕವಸ.

7ತಿನಾ ಲಿಂಗತಜ಼, ಯಕ್ಕ ಪಾಪಿ ತಿನು ಮನಸ. ಕ್ಹುದಾ ಬಗಲ ಫರಯೊಮ ಸ್ವರಗಾಮಾ ಘನ್ನಾ ಖುಶಿ ಥಾವಸ ಕೈನ ಮಿ ತುಮೊನೆ ಕೌಸ. ನೌವ್ವದಪರ ನೌ ಮನಕ್ಹೊ ಕ್ಹುದಾಬಗಲ ಫರಲ ವಾಲಾತಿಬಿ ಯಕ್ಕ ಪಾಪಿ ಕ್ಹುದಾ ಬಗಲ ಫರಯೊಮ ತಿನಾ ವಾಸ್ತರ ಘನ್ನಾ ಖುಶಿ ಥಾವಸ.

8ನೈತೊ "ಯಕ್ಕ ಹೆಣ ಮನಕ್ಹಕನ ದಕ್ಹ ರುಪ್ಪಾನಾ ಬಿಲ್ಲಾ ಛೆ ಕೈನ ತಿಳದಿಲಿಯೆ. ತೆ ಹೆಣ ಮನಕ್ಹ ತಿಮಾನೊ ಯಕ್ಕ ರುಪ್ಪಾನೊ ಬಿಲ್ಲೊ ಜ಼ವೈ ಲಿಪಾಡಸ್. ತೆ ದಿವ್ವೊ ಲೈನ ತಿನು ಘರ ಝಾಡಸ. ತೆ ರುಪ್ಪಾನೊ ಬಿಲ್ಲೊ ಮಳೆ ಲಕ್ಕಾ ಹುಡ್ಕಸ, 9ಜ಼ವೈ ಗಯಲ ರುಪ್ಪಾನೊ ಬಿಲ್ಲೊ ಮಳಲ್ಪರ ತೆ ತಿನಾ ದೊಸ್ತನಾ ಕ್ಹಾತೆ ಆಜು಼ಬಾಜು಼ವಾಲಾವೊನೆ ಬಲೈನ, ಮಾರಾ ಕ್ಹಾತೆ ಖುಶಿ ಕರೊ ಜ಼ವೈ ಗಯಲ ರುಪ್ಪಾನೊ ಬಿಲ್ಲೊ ಮಳ್ಯೊಸ, ಕವಸ.

10ತಿನಾ ಲಿಂಗತಜ಼ ಯಕ್ಕ ಪಾಪಿ ತಿನಾ ಪಾಪನೆ ಪಶ್ಚಾತಾಪ ಪಡಿನ ಕ್ಹುದಾಬಗಲ ಫರಯೊಮ ಸ್ವರ್ಗಮಾ ರ‍್ಹಯಲ ದೆವದುತೊ ಘನ್ನಾ ಖುಶಿ ಥಾವಸ.

ಘರ ಛೊಡಿನ ಗಯಲ ದಿಕ್ರೊ

11ಪಾಚಲ್ತೊ ಯೆಸು ಅಮ್ಮ ಕದ್ಯೊ" ಯಕ್ಕ ಮನಕ್ಹನೆ ಬೆ ದಿಕ್ರಾ ವ್ಹತ್ತಾ. 12ತಿಮಾನೊ ನ್ಹಾನೊ ದಿಕ್ರೊ, ತಿನಾ ಬಾನೆ "ತಾರಿ ಆಸ್ತಿಮಾನೊ ಮಾರೊ ವಾಟೊ ದೆ ಕೈನ ಕದ್ಯೊ. ತಿನಾಹುತಿ ತಿನೊ ಬಾ ತಿನಿ ಆಸ್ತಿಮಾನೊ ವಾಟೊ, ತಿನಾ ನ್ಹಾನಾ ದಿಕ್ರಾನೆ ವಾಟಿನ ದಿದ್ಯೊ.

13"ತೆಳಾಮಾ ತಿನೊ ನ್ಹಾನೊ ದಿಕ್ರೊ ತಿನೊ ವಾಟೊ ಲಿನ ಭಾರಲ್ಯಾ ದೆಶೆ ಗೈಪಡ್ಯೊ. ತ್ಯಾ ತೆ ಕೆಟ್ಟ ಚಟಾ ಸಿಕ್ಕಕಿನ ಪುರಾ ಆಸ್ತಿ ಹಾಳ ಕರಲಿ ಪಾಡ್ಯೊ. 14ದಕ್ಹಾ ದಿನ್ಪರ‍ ತೆ ರ‍್ಹಯಲ ದೆಶಮಾ ಬರಗಾಲ ಐಯು. ತೆಳಾಮಾ ತೆ ದೆಶಮಾ ಸು ನ್ಹೊತು, ತೆ ಪಟ್ಟಾನೆ ಘನ್ನಿ ಭುಕ್ಕ ಲಾಗಿತಿ ತಿನಾ ಹುತಿ ತಿನೆ ದೊಕಡಾನಿ ಜ಼ರುರತ ವ್ಹತ್ತಿ. 15ತಿನಾ ಹುತಿ ತೆ ದೆಶಮಾ ರ‍್ಹಯಲ ಯಕ್ಲಾಕನ ಕುಲಿ ಕರಾನೆ ತಿಕನ ವ್ಹತ್ತೊ. ತೆ ಮನಕ್ಹ ತೆ ಪಟ್ಟಾನೆ ಢುಕ್ಕಕುರೊ ಚ಼ರಾವಾನಾ ಹುತಿ ತಿನೆ ಖೆರತೆ ಮೊಕಲ್ಯೊ. 16ತೆಳಾಮಾ ತೆ ಪಟ್ಟಾನೆ ಘನ್ನಿ ಭುಕ್ಕ ಲಾಗಿತಿ ತಿನಾಹುತಿ ಢುಕ್ಕಕುರೊ ಖಾವಾನಿ ತರಕಾರಿ ಖೌಕೈನ ತೆ ಪಟ್ಟೊ ಕೈಲಿದ್ಯೊ. ತಿಮ್ಮ ರ‍್ಹಯುತಬಿ ತಿನೆ ತೆ ಖಾವಾನೆ ದಿದ್ಯೊ ನೈ.

17ತೆಳಾಮಾ ತೆ ಪಟ್ಟೊ ಗ್ಯಾನ ಐಯು ತೆ ಕಾಮ ಕರಲ ತಿನೆ ತಿಳದ್ಯು. ವರಿ ತಿನಾ ಮನಸ್ಮಾ ಕೈಲಿದ್ಯೊ. ಮಾರಾ ಬಾನಾ ಘರಮಾ ರ‍್ಹಯಲ ಆಳೊನೆ ಘನ್ನು ಅನ್ನ ರ‍್ಹವಸ ಮಿ ತೊ ನ್ಹ್ಯಾ ಭುಕ್ಕೊ ಮರಾಡ್ಯೊಸ. 18ಮಿ ನ್ಹ್ಯಾಂತೊ ಗೈ ಪಡಸು. ವರಿ ಮಿ ಮಾರಾ ಬಾಕನ ಗೈನ ಬಾ ಮಿ ತಾರಾ ವಿರೊದ ವರಿ ಕ್ಹುದಾನಾ ವಿರೊದ ಪಾಪ ಕರ‍್ಯೊಸ, 19ತಾರೊ ದಿಕ್ರೊ ವ್ಹೈ ಕೈನ ಕವೈಲಿವಾನೆ ಯೊಗ್ಯ ನತ್ತಿ. ಮನೆ ತಾರಾ ಘರನಾ ಆಳೊಮಾ ಮಿಬಿ ಯಕ್ಲೊ ವ್ಹೈ ಕೈನ ತಿಳದಿಲೆ ಕೈನ ಕೈಲಿದ್ಯೊ. 20ತಿನಾ ಲಿಂಗತಜ಼ ತೆ ತಿನಾ ಬಾಕನ ಚಾ಼ಲ್ಯೊತೊ" ತಿನೊ ನ್ಹಾನೊ ದಿಕ್ರೊ ದುರತೊ ಆವಾನು ವಳ್ಕಿನ ತಿನೆ ಮರಗಿನ ತಿಕನ ನ್ಹಾಟತೊ ಐನ ತಿನಾ ಗಳೆ ಮಳಿನ ದಿಕ್ರಾನೆ ಮಟ್ಟಿ ಲಿದ್ಯೊ.

21ದಿಕ್ರೊ ತಿನಾ ಬಾಪನೆ, ಬಾ, ಮಿ ಕ್ಹುದಾ ವಿರೊದ ಥೈನ ತುನೆ ವಿರೊದ ಥೈನ ಪಾಪ ಕರ‍್ಯೊಸ. ತಾರೊ ದಿಕ್ರೊ ವ್ಹೈ ಕೈನ ಕವೈಲಿವಾನೆ ಮಿ ಯೊಗ್ಯ ನತ್ತಿ. 22ತೆನೈಸೊ ಬಾಪ ತಿನಾ ಸೆವಕೊನೆ, ಐಕೊ! ಚೊ಼ಕಾ ವಣ್ಣಾ ಲೈನ ಅನೆ ಘಾಲೊ. ತಿನಾ ಬೊಟೊನೆ ಇಟ್ಟಿಯೊ ಘಾಲೊ. ಪಗೊನೆ ಚೊ಼ಕಾ ಚಪ್ಲೊ ಘಾಲೊ. 23ಘಟ್ಟಮುಟ್ಟ ರ‍್ಹಯಲ ಹೊರಿನೆ ಕಾಟಿನ ಖುಶಿ ಕರಿಯೆ. 24ಮಾರೊ ದಿಕ್ರೊ ಜ಼ವೈ ಗಯೊತೊ,

ಎ ತಪ್ಪಿನ ಗಯೊತೊ. ಹಮ್ನಾ ವರಿ ಮಳ್ಯೊಸ" ಕದ್ಯೊ. ತೆನೈಸೊ ತ್ಯುನೆ ಖುಶಿ ಕರಾಡಾತಾ. 25ತೆಳಾಮಾ ಮ್ಹೊಟೊ ದಿಕ್ರೊ ಖೆತರಮಾ ವ್ಹತ್ತೊ. ತೆ ಘರೆ ಆತಾಮಾ ಗಿದ್ದೊ ಕವಾನು ನ್ಹಾಚಾ಼ನು ಅವಾಜ಼ ಐಕ್ಯೊ. 26ತಿನಾಹುತಿ ತೆ ತ್ಯುನಾ ಆಳಮಾನಾ ಯಕ್ಲಾನೆ ಬಲೈನ ಆ ಸು ಕರಾಡಾಸ? ತಿನೆ ಪುಚ್ಯೊ. 27ತೆಳಾಮಾ ತೆ ಆಳ ಕದ್ಯೊ. ತಾರೊ ಜ಼ವೈಗಯಲ ಭೈ ಫರಿನ ಆಯೊಸ. ತಿನಾ ಹುತಿ ತಾರೊ ಬಾ ಘಟ್ಟ ಮುಟ್ಟ ರ‍್ಹಯಲ ಹೊರಿ ಕಾಟಾ ಲಗಾಡ್ಯೊಸ್. ವರಿ ತಾರೊ ಬಾ ಘನ್ನೊ ಖುಶಿಮಾ ಛೆ! ಕದ್ಯೊ ಕಾಕದ್ಯಾಮ ತಾರೊ ಭೈ ಫರಿನ ಆಯೊಸ. 28ತೆಳಾಮಾ ತಿನೊ ಮ್ಹೊಟೊ ದಿಕ್ರೊ ಶಿಟ್ಟ ಥೈನ ತೆ ಘರಮಾ ಗಯೊ ನೈ. ತೆಳಾಮಾ ತಿನೊ ಬಾ ಭಾರೊ ಐನ ತಿನೆ ಮ್ಹೈ ಆ ಕೈನ ಮಾಂಗಿಲಿದ್ಯೊ. 29ತೆಳಾಮಾ ತಿನೊ ಮ್ಹೊಟೊ ದಿಕ್ರೊ ತಿನಾ ಬಾನೆ ಮಿ ತಾರೊ ಆಳ ಥೈನ ಘನ್ನಾ ವರಘತೊ ಸೆವಾ ಕರ‍್ಯೊಸ! ವರಿ ತು ಕದಲ ತಿಮ್ಮಜ಼ ಮಿ ಐಕ್ಯೊಸ. ವರಿಬಿ ತು ಮಾರಾಹುತಿ ಮಾರಾ ದೊಸ್ತೊನಾ ಹುತಿ ಯಕ್ಕ ಬಕ್ಕರುಬಿ ಕಾಟ್ಯೊ ನತ್ತಿ. ವರಿ ತು ಮಾರಾಹುತಿ ಮಾರಾ ದೊಸ್ತೊನೆ ಖಾವಾನೆ ಅನ್ನ ಕರಾಯೊ ನತ್ತಿ. 30ತೆನೈಸೊ ತಾರೊ ನ್ಹಾನೊ ದಿಕ್ರೊ ತಾರಾ ಕ್ಹಾರಾ ದೊಕ್ಡಾ ಸುಳಿಯೊನಾ ಹುತಿ ಜ಼಼ವೈ ಲಿದ್ಯೊ. ವರಿ ತೆ ಘರೆ ಫರಿನೆ ಆತಾಮಾ ತಿನಾಹುತಿ ತು ಹೊರಿ ಕಾಟಾಲಗಾಡ್ಯೊ. ಕೈನ ಕದ್ಯೊ.

31ತಿಮ್ಮ ಕತಾಮಾ ತಿನೊ ಬಾ ಕದ್ಯೊ ದಿಕ್ರಾ, ತುತೊ ಮಾರಾ ಕ್ಹಾತೆ ಕೆಳಾಮಾಬಿ ರ‍್ಹಸಿ. ಮಕನ ರ‍್ಹಯಲ ಕ್ಹಾರುಜ಼ ತಾರು ವ್ಹೈ. 32ಅಪೆ ಖುಶಿ ಕರು ಕಾಕದ್ಯಾಮ ತಾರೊ ಭೈ ತೊ ಜ಼಼ವೈ ಗಯೊತೊ. ತೆ ಮರಿಗಯೊತೊ ಜಿವ್ತೊ ಥಯೊಸ ವರಿ ಅಪೊಕನ ಫರಿನ ಆಯೊಸ.