ಯೊಹಾನ 5

ವ್ಹಂಡಮಾ ಅರಾಮ ಥಾವಾನು

1ಎ ಥಯಲ್ಪರ ಯೆಸು ಯೆಹುದಿಯೊನಾ ಯಕ್ಕ ಸನ್ನನಾ ಹುತಿ ಯೆರುಸಲೆಮೆ ಗಯೊ. 2ಯೆರುಸಲೆಮಾ ಪಾಂಚ಼ ಮಂಟಪೊ ಮಳಲ ಯಕ್ಕ ವ್ಹಂಡ ಛೆ. ಯಹುದಿಯೊನೆ ವಾತೊಮೊ ತಿನೆ "ಬೆತ್ಸಥ" ಕೈನ ಕವಸ. ಎ ವ್ಹಂಡ "ಬಕ್ರಾನು ಬಾಕಲ" ಕವಾನಿ ಜ಼ಗಾನಾ ನಜಿಕ ಛೆ. 3ವ್ಹಂಡಕನ ರ‍್ಹಯಲ ಮಂಟಪಮಾ ಘನ್ನಾ ರೊಗಿಯೊ ಪಡಲ ರ‍್ಹತಾತಾ. ತ್ಯುನಾಮಾ ದಕ್ಹಾ ಜ಼ನಾ ಕುಡ್ಡಾ ವ್ಹತ್ತಾ. ದಕ್ಹಾ ಜ಼ನಾ ಲಂಗ್ಡಾ ವ್ಹತ್ತಾ, ವರಿ ದಕ್ಹಾ ಜ಼ನಾ ಲಕ್ವೊ ಮಾರಲವಾಲಾ ವ್ಹತ್ತಾ. ತ್ಯುನೆ ಪಾನಿ ಹಲ್ಲೆಲಕ್ಕಾ ಕೈದತಾ ರ‍್ಹತಾತಾ, 4ಕಾಕದ್ಯಾಮ ಹರಿಯಕ್ಕಸಲಾ ದಕ್ಹೊ ಟೈಮ್ಮ ಥಯಲ್ಪರ ಪ್ರಭುನೊ ದುತ ಹೆಟೊ ಉತ್ರಿನ ಐನ ತೆ ವ್ಹಂಡಮಾನು ಪಾನಿ ಹಲಾತೊತೊ ಅರಾಮ ನೈಸೊವಾಲೊ ಕಯೊಬಿ ಮನಕ್ಹ ಪಾನಿ ಹಲ್ತಾಮಾ ಪೈಲಾ ಗೈಯಾಮ ತೆ ಕಯಾಬಿ ರೊಗ್ಮಾ ರ‍್ಹಯೊತಬಿ ಅರಾಮಾ ಥಾತೊತೊ. 1 5ಮುವತ್ತಪರ ಆಟ ವರಕ್ಹತೊ ರೊಗ್ಮಾ ರ‍್ಹಯಲವಾಲೊ ಯಕ್ಲೊ ತ್ಯಾ ಪಡಲ ವ್ಹತ್ತೊ. 6ಯೆಸು ತಿನೆ ದೆಕ್ಯೊ. ತೆ ಘನ್ನಾ ದಿನ್ನತೊ ರೊಗ್ಮಾ ರ‍್ಹಯಲ ತಿನೆ ಗ್ವತ್ತ ವ್ಹತ್ತೊ. ತಿನಾಹುತಿ ತೆ ತಿನೆ"ಅರಾಮ ಥಾವಾನೆ ಮನಸ ಛೆ ಸು? ಕೈನ ಪುಚ್ಯೊ.

7ತೆ ರೊಗಿ"ಅಯ್ಯಾ, ಪಾನಿ ಭರ್ತಾಮಾ ಉತಾರಾನೆ ಮನೆ ಕುನ್ನಜ ಆಸ್ರೊ ಕರ್ತು ನೈ. ಮಿ ಕ್ಹಾರಾವೊತಿ ಪೈಲಾಜ ಪಾನಿಮಾ ಉತ್ರಾನೆ ಕೊಶಿಶ ಕರುಸ. ತೆನೈಸೊ ಹರಯಕ್ಕ ಸಲಾ ಮತ್ತಿಬಿ ಪೈಲಾಜ ಉತ್ರಿಪಡಸ ಕೈನ ಕದ್ಯೊ.

8ತೆಳಾಮಾ ಯೆಸು"ಉಟಿನ ಹುಬ್ರೆ! ತಾರು ವಚ್ಚಾ಼ನು ಉಚೈನ ಲಿನ ಜಾ಼" ಕೈನ ಕದ್ಯೊ.

9ತೆಳಾಮಾಜ಼ ತೆ ಮನಕ್ಹ ಅರಾಮ ಥೈನ ತಿನಾ ವಚ್ಚಾನ ಲಿನ ಚಾಲ್ಯೊ. ಎ ಕ್ಹಾರು ಥಯಲ ಸಬ್ಬತನಾ ದಿನ್ನಮಾ ವ್ಹೈ. 10ತಿನಾಹುತಿ ಯೆಹುದಿಯೊನಾ ಅದಿಕಾರಿಯೊ ಅರಾಮ ಥಯಲ ತೆ ಮನಕ್ಹನೆ"ಆಜ ಸಬ್ಬತನೊ ದಿನ್ನ ವ್ಹೈ. ತು ವಚ್ಚಾ಼ನಾ ಉಚೈಲಿನ ಜಾ಼ವಾನು ಅಪ್ನಾ ಧರಮಶಾಸ್ತ್ರನಾ ವಿರುದ್ದ ವ್ಹೈ" ಕದ್ಯಾ.

11ತೆಳಾಮಾ ತೆ"ಮನೆ ಅರಾಮ ಕರಲವಾಲೊ ಮನಕ್ಹ "ತಾರು ವಚ್ಚಾ಼ನು ಲಿನ ಜಾ಼" ಕದ್ಯೊ ಕೈನ ಉತ್ತರ ದಿದ್ಯೊ. 12ತಿನೆ ತ್ಯುನೆ"ತಾರು ವಚ್ಚಾ಼ನು ಉಚೈಲಿನ ಜಾ಼ವಾನೆ ತುನೆ ಕದಲವಾಲು ಕುನ್ನ ವ್ಹೈ? ಕೈನ ಪುಚ್ಯಾ.

13ತೆನೈಸೊ ಅರಾಮ ಥಯಲ ಮನಕ್ಹನೆ ಯೆಸು ಕುನ್ನ ವ್ಹೈ ಕವಾನು ಗ್ವತ್ತ ನ್ಹೊತು. ತೆ ಜ಼ಗಾಪರ ಘನ್ನಾ ಮನಕ್ಹೊನು ಗುಂಪ ವ್ಹತ್ತು. ಯೆಸು ತೆ ಜ಼ಗಾತೊ ತ್ಯುನೊಕಂತೊ ಗಪ್ಪ ಗೈಪಡ್ಯೊ.

14ತೆ ಥಯಲ್ಪರ ಯೆಸು ತೆ ಮನಕ್ಹನೆ ದೆವಾಲಯಮಾ ದೆಕಿನ ತಿನೆ, ಐಕ ಹಮ್ನಾ ತು ಅರಾಮ ಥಯೊಸ. ತೆನೈಸೊ ಪಾಪ ಕರಾನು ಛೊಡಿಪಾಡ. ತಿನಾಹುತಿ ತುನೆ ಕಯುಜ಼ ಕೆಟ್ಟ ಥೌ ನೈ! ಕದ್ಯೊ.

15ತೆಳಾಮಾ ತೆ ಮನಕ್ಹ ತೆ ಯಹುದ್ಯೊನಾ ಅದಿಕಾರಿಯೊ ಕನ ಗೈನ ತಿನೆ ಅರಾಮ ಕರಲವಾಲೊ ಯೆಸು ವ್ಹೈ ಕೈನ ಕದ್ಯೊ. 16ತಿನಾಹುತಿ ತ್ಯುನೆ ಯೆಸು ಎ ಕಾಮೊ ಸಬ್ಬತ ದಿನ್ನೊಮಾ ಕರಲಹುತಿ ತ್ಯುನೆ ತಿನೆ ತ್ರಾಸ ಕರಾನು ಶುರು ಕರ‍್ಯಾ. 17ತೆನೈಸೊ ಯೆಸು ತ್ಯುನೊನೆ "ಮಾರೊ ಬಾ ತಿನಾ ಕಾಮೊ ಕೆಳಾಮಾಬಿ ಕರ್ತೊಜ ರ‍್ಹವಸ. ತಿನಾಹುತಿ ಮಿಬಿ ಕಾಮ ಕರ್ತೊಜ" ಕೈನ ತಿನಾಹುತಿ ಕದ್ಯೊ.

18ಎ ವಾತ ಯೆಹುದಿನಾ ಅದಿಕಾರಿಯೊ ತಿನೆ ಖಲಾಸ ಕರುಜ ಕೈನ ಫೈಸಲೊ ಕರಾ ವರ್ಕ್ಹು ಥಯು, ತೆಕ್ಲುಜ ನೈಸೊ ತೆ ಕ್ಹುದಾನಿ ಸಬ್ಬತನು ನಿಯಮ ತೊಡ್ಯೊ ನ್ಹೊತೊ, ತೆನೈಸೊ ತೆ ಕ್ಹುದಾ ತಿನೊ ಸ್ವಂತ ಬಾ ವ್ಹೈ ಕೈನ ಕದ್ಯೊ ವರಿ ಇನಾಲಿಂಗತ ತಿನಾಕ್ಹು ತಿನೆ ಕ್ಹುದಾ ಲಿಂಗತ ಕರಿಲಿದ್ಯೊತೊ.

ದಿಕ್ರಾನಾ ಅದಿಕಾರನಾ ಹುತಿ

19ತಿನಾಹುತಿ ಯೆಸು ತ್ಯುನೊನೆ"ಮಿ ತುಮೊನೆ ಕ್ಹರಿಜ ಕೌಸ. ದಿಕ್ರೊ ತಿನಾಕ್ಹು ತೆ ಸುಜ಼ ನೈ ಕರತೊ, ಬಾ ಕರಾನು ದೆಕಿನ ತೆಬಿ ತಿಮ್ಮಜ ಕರಸ. ಬಾ ಕರಾನಾ ಕಾಮೊಜ ದಿಕ್ರೊಬಿ ಕರಸ. 20ಬಾ ದಿಕ್ರಾನೆ ಮಯಾ ಕರಸ ವರಿ ತೆ ಕರಾನಾ ಕ್ಹಾರಾ ಕಾಮೊ ದಿಕ್ರಾನೆ ದೆಕಾಡಸ. ಇತ್ತಿಬಿ ಹೆಚ್ಕಿ ಕಾಮೊ ಬಾ ದಿಕ್ರಾನೆ ದೆಕಾಡಸ. ತೆಳಾಮಾ ತುಮೆ ಕ್ಹಾರಾ ಘಾಬ್ರಾ ಥಾವೊಶಿ. 21ಬಾ ಮರಲವಾಲಾವೊನೆ ಉಟಾಡಿನ ತ್ಯುನೊನೆ ಜ಼ಲಮ ದಿವಸ. ತಿನಾಲಿಂಗತ ದಿಕ್ರೊಬಿ ತಿನೆ ಚಾ಼ಯೆ ಥಯಲವಾಲಾವೊನೆ ಜ಼ಲಮ ದಿವಸ. 22"ಎನೈಸೊ ಬಾ ತಿನಾಕ್ಹು ತೆ ಕಿನೆ ಫೈಸಲೊ ಕರ‍್ತೊ ನೈ ತೆನೈಸೊ ಬಾ ಪೈಸ್ಲೊ ಕರಾನು ಪುರಾ ಅದಿಕಾರ ದಿಕ್ರಾನೆ ದಿದ್ಯೊಸ. 23ತಿನಾಹುತಿ ಕ್ಹಾರಾ ಜ಼ನಾ ಬಾನೆ ಮರ್ಯಾದಿ ದಿದಲ ಲಿಂಗತ ದಿಕ್ರಾನೆಬಿ ಮರ್ಯಾದಿ ದ್ಯುಕೈನ ಕ್ಹುದಾ ಇಮ್ಮ ಕರ‍್ಯೊ. ಕುನ್ನ ದಿಕ್ರಾನೆ ಮರ್ಯಾದಿ ನೈ ದೆತು ತೆ ತಿನೆ ಮೊಕ್ಲಲವಾಲೊ ಬಾನೆ ಮರ್ಯಾದಿ ನೈ ದೆತೊ.

24"ಮಿ ತುಮೊನೆ ಕ್ಹರಿಜ ಕೌಸ. ಮಾರಿ ವಾತ ಐಕಿನ ಮನೆ ಮೊಕ್ಲಲವಾಲಾನೆ ನಂಬಾಲೊ ಹಮೆಶಾನೊ ಜ಼ಲಮ ವ್ಹಂದಿಲಿದ್ಯೊಸ. ತಿನೆ ಫೈಸಲೊ ಥಾತೊ ನೈ. ತೆನೈಸೊ ತೆ ಹಮ್ನಾಜ ಮರಣ ದಾಟಿನ ಜ಼ಲಮಮಾ ಆಯೊಸ. 25ಮಿ ತುಮೊನೆ ಕ್ಹರಿಜ ಕೌಸ ಮರಲವಾಲಾ ಕ್ಹುದಾನಾ ದಿಕ್ರಾನು ಅವಾಜ಼ ಐಕಾನೊ ದಿನ್ನ ಆವಸ. ತೆ ಹಮ್ನಾಜ ಆಯುಸ. ಕುನ್ನ ಐಕಸ ತ್ಯುನೆ ಜ಼ಲಮ ವ್ಹಂದಿಲಿವಸ. 26ಬಾ ಜ಼ಲಮ ದಿವಾನಿ ತಾಕತ ತೆ ವ್ಹಂದಲಲಿಂಗತ ದಿಕ್ರಾನೆ ಜ಼ಲಮ ದಿವಾನಿ ತಾಕತ ದಿದ್ಯೊಸ, 27ವರಿ ಕ್ಹಾರಾ ಮನಕ್ಹೊನೊ ಫೈಸಲೊ ಕರಾನು ಅದಿಕಾರ ಬಾ ದಿಕ್ರಾನೆ ಬಿ ದಿದ್ಯೊಸ. ಕಾಕದ್ಯಾಮ ತೆ ದಿಕ್ರೊ ಮನಕ್ಹೊನೆ ದಿಕ್ರೊ ಥಯೊಸ. 28"ತಿನಾಹುತಿ ಘಾಬ್ರಾ ಥಾವೊ ನಕೊ. ಕಾಕದ್ಯಾಮ ಮರಲವಾಲಾ ಕ್ಹಾರಾ ತಿನೊ ಅವಾಜ಼ ಐಕಾನೊ ದಿನ್ನ ಆವಸ. 29ವರಿ ತ್ಯುನೆ ತಿವ್ನೊ ಮಾತೊ ಉಟಿನ ಆವಸ; ಕುನ್ನ ಚೊ಼ಕು ಕರಲ ರ‍್ಹವಸ ತ್ಯುನೆ ಜಿವ್ತಾ ಥೈನ ಉಟಸ, ವರಿ ಕುನ್ನ ಕೆಟ್ಟ ಕರ‍್ಯುಸ ಜಿವ್ತಾ ಥೈನ ತ್ಯುನೊನೆ ಪೈಸ್ಲೊ ಥಾವಸ.

ಯೆಸುನಾ ಹುತಿ ಸಾಕ್ಷಿಯೊ

30"ಮಾರಾಕ್ಹು ಮಿಜ಼ ಸುಜ಼ ಕರತೊ ನೈ. ಕ್ಹುದಾ ಕದಲ ತಿಮ್ಮಜ ಮಿ ಐಕಿನ ಫೈಸಲೊ ಕರುಸ. ತಿನಾಹುತಿ ಮಾರೊ ಫೈಸಲೊ ಕರೆಟ್ಟ ವ್ಹೈ. ಕಾಕದ್ಯಾಮ, ಮಾರಿ ಮರ್ಜಿ ಲಿಂಗತ ಕರಾಡ್ಯೊ ನತ್ತಿ. ಮನೆ ವಳಾಯಲವಾಲಾನಿ ಮರ್ಜಿ ಲಿಂಗತ ಕರುಸ.

31"ಮಾರಾ ಹುತಿ ಮಿಜ಼ ಸಾಕ್ಷಿ ದಿದ್ಯೊಮ, ತೆ ಸಾಕ್ಷಿ ಕ್ಹರಿನಿ ನ್ಹವೈ. 32ತೆನೈಸೊ ಮಾರಿ ಹುತಿ ಸಾಕ್ಷಿ ದಿವಾಲೊ ಯಕ್ಕ ಮನಕ್ಹ ಛೆ. ತೆ ದಿವಾನಿ ಸಾಕ್ಷಿ ಕ್ಹರಿಜ ವ್ಹೈ ಕೈನ ಮನೆ ಗ್ವತ್ತ ಛೆ. 33"ತುಮೆ ಯೊಹಾನ ಕನ ಸಂದೆಶ ಕವಾಲಾವೊನೆ ಮೊಕ್ಲ್ಯಾ. ತೆ ತುಮೊನೆ ಕ್ಹರಿನಾ ಹುತಿ ಸಾಕ್ಷಿ ದಿದ್ಯೊಸ. 34ತೆನೈಸೊ ಮಾರಾ ಹುತಿ ಮನಕ್ಹೊನೆ ಕವಾನಾ ಹುತಿ ಮನೆ ಮನಕ್ಹನಿ ಸಾಕ್ಷಿನಿ ಜರುರತ್ತ ನತ್ತಿ. ತೆನೈಸೊ ತುಮೊನೆ ಬಿಡುಗಡೆ ಥಾವಾನಾ ಹುತಿ ಮಿ ಎ ಸಂಗತಿಯೊ ಕವಾಡ್ಯೊಸ. 35ಯೊಹಾನ ದಿವ್ವೊ ಲಾಗಲಲಿಂಗತ ವ್ಹತ್ತೊ ತೆ ಉಜಾಲು ದಿದ್ಯೊ, ವರಿ ತುಮೆ ತಿನು ಉಜಾಲಾನೆ ದಕ್ಹಾ ಟೈಮ ಖುಶಿಕ್ಹು ಅನುಭವ ಲಿವಾನೆ ದೆಕ್ಯಾ. 36ತೆನೈಸೊ ಮಾರಿ ಸಾಕ್ಷಿ ಯೊಹಾನತಿಬಿ ಮ್ಹೊಟಿ ಸಾಕ್ಷಿ ಛೆ. ಮಿ ಕರಾನಾ ಕಾಮೊಜ ಮಾರಿ ಸಾಕ್ಷಿಯೊ ಥಯೊಸ. ಬಾ ಮನೆ ದಿದಲ ಎ ಕಾಮೊಜ, ಬಾ ಮನೆ ವಳಾಯೊಸ ಕೈನ ದೆಕಾಡಸ. 37ವರಿ ಮನೆ ವಳಾಯಲ ಬಾ ಮಾರಾ ಹುತಿ ಸಾಕ್ಷಿ ದಿದ್ಯೊಸ. ತೆನೈಸೊ ತುಮೆ ತಿನಿ ಆವಾಜ ಕೆಳಾಮಾಜ ಐಕ್ಯಾ ನೈ. ತೆ ಕಿಮ್ಮ ಛೆ ಕೈನ ತುಮೆ ಕೆಳಾಮಾಜ ದೆಕ್ಯಾ ನೈ. 38ವರಿ ತುಮೆ ಬಾನು ಉಪದೆಶನೆ ಬರೊಕ್ಹೊ ಕರ‍್ಯಾ ನೈ. ಕಾಕದ್ಯಾಮ ಬಾ ವಳಾಯಲವಾಲಾನೆ ತುಮೆ ಬರೊಕ್ಹೊ ಕರ‍್ಯಾ ನೈ. 39ತುಮೆ ಪವಿತ್ರ ಗ್ರಂಥೊ ಅಬ್ಯಾಸ ಕರೊಶಿ. ಕಾಕದ್ಯಾಮ ತೆ ಪವಿತ್ರ ಗ್ರಂಥ ತುಮೊನೆ ಹಮೆಶಾನೊ ಜ಼ಲಮ ದಿವಸ ಕವಾನು ತುಮಾರಿ ವಿಚಾರ ವ್ಹೈ ತೆನೈಸೊ ತೆಜ಼ ಪವಿತ್ರ ಗ್ರಂಥೊಮಾ ಮಾರಾ ಹುತಿ ತಿಳ್ಸಾವಸ! 40ತೆನೈಸೊ ಜ಼ಲಮ ವ್ಹಂದಿಲಿವಾನೆ ತುಮೆ ಮಕನ ಆವಾನೆ ಮನಸ ಕರ‍್ತಾ ನೈ.

41ಮನಕ್ಹತಿ ಆವಾನಿ ಹೊಗಳಿಕೆ ಮನೆ ನಕೊ. 42ತೆನೈಸೊ ತುಮೆ ಕೆವಾ ಮನಕ್ಹೊ ವ್ಹೈ ಕೈನ ಮನೆ ಗ್ವತ್ತ ಛೆ. ವರಿ ಕ್ಹುದಾನಾ ಉಪ್ಪರ ತುಮೊನೆ ಮಯಾ ನತ್ತಿ ಕೈನ ಮನೆ ಗ್ವತ ಛೆ. 43ಮಿ ಮಾರಾ ಬಾನಾ ಅದಿಕಾರನಾ ಕ್ಹಾತೆ ಆಯೊಸ. ತೆನೈಸೊ ತುಮೆ ಮನೆ ಸ್ವಿಕಾರ ನೈ ಕರಿಲೆತಾ. ತೆನೈಸೊ ಕುನ್ನಬಿ ಯಕ್ಲೊ ತಿನಾ ಸ್ವಂತ ಅದಿಕಾರಕ್ಹು ಆಯಾಮ ತುಮೆ ತಿನೆ ಸ್ವಿಕಾರ ಕರೊಶಿ. 44ತುಮೆ ಯಕ್ನೆ ಯಕ್ಕ ಸನ್ಮಾನ ದ್ಯು ಕೈನ ಆಸ ಕರೊಶಿ. ತೆನೈಸೊ ಯಕ್ಕಜ಼ ಕ್ಹುದಾತಿ ಆವಾನಿ ಸನ್ಮಾನ ಲಿವಾನೆ ತುಮೆ ಕೆಳಾಮಾಜ ಕೊಶಿಶ ನೈ ಕರ‍್ತಾ. ಇಮ್ಮ ರ‍್ಹಯುಮ ತುಮೆ ಮನೆ ಕಿಮ್ಮ ಬರೊಕ್ಹೊ ಕರೊಶಿ? 45ಮಿ ಬಾನಾ ಕ್ಹಾಮೊ ಹುಬ್ರೈನ ತುಮೊನೆ ತಪ್ಪ ಕರಲವಾಲಾ ವ್ಹೈ ಕೈನ ಕೌಸ ಕೈನ ತುಮೆ ವಿಚಾರ ಕರೊ ನಕೊ. ತುಮೊನೆ ವಚಾ಼ಡಸ ಕೈನ ತುಮೆ ಆಸ ಕರಲ ಮೊಶೆ ತುಮಾರಾ ಉಪ್ಪರ ಸಾಕ್ಷಿ ಕವಸ. 46ತುಮೆ ಕ್ಹರಿಬಿ ಮೊಶೆನೆ ಬರೊಕ್ಹೊ ಕರಲ ರ‍್ಹವತೊ, ಮಪರಬಿ ಬರೊಕ್ಹೊ ಕರ‍್ತಾತಾ. ಕಾಕದ್ಯಾಮ ತೆ ಮಾರಾ ಹುತಿಜ ಬರ್ದ್ಯೊಸ. 47ತೆನೈಸೊ ಮೊಶೆ ಬರ್ದಲ ತುಮೆ ಬರೊಕ್ಹೊ ನೈ ಕರ‍್ತಾ ಇಮ್ಮ ರ‍್ಹಯುಮ ಮಿ ಕವಾನಿಯೊ ವಾತೊಪರ ತುಮೆ ಕಿಮ್ಮ ಬರೊಕ್ಹೊ ಕರ ಸಕೊಶಿ?