ಯೊಹಾನ 10

ಕುರಬುರ‍್ಯಾನಿ ಸಾಮ್ಯ

1ಯೆಸು"ಮಿ ತುಮೊನೆ ಕ್ಹರಿಜ ಕೌಸ. ಬಕ್ರಾನಿ ಹಕ್ಕಿಮಾ ಬಾಕಲಮಾತೊ ಆಯವಾಚಿ ಬಿಜಿ ಬಗಲ್ತೊ ಗೊಡಿ ಉಡಿನ ಆವಾಲೊ ಚ್ವಟ್ಟೊಜ ವರಿ ಕಾಳ್ಳಿನ ಜಾ಼ವಾಲೊ ವ್ಹೈ. 2ಕುನ್ನ ಬಾಕಲಮಾತೊ ಆವಸ ತೆ ಮನಕ್ಹ ಕುರಬುರ‍್ಯೊ ವ್ಹೈ. 3ಕೈದಾಲೊ ಕುರಬುರ‍್ಯಾನೆ ಬಾಕಲ ಕಾಡಸ. ವರಿ ಬಕ್ರಾ ತಿನಾ ಅವಾಜ಼ ಐಕಸ. ತೆ ಬಕ್ರಾವೊನೆ ನಾಮ ಲಿನ ಬಲಾತಾಮಾ ಬಕ್ರಾ ತಿನಿ ಅವಾಜ಼ ಐಕಸ. ವರಿ ತೆ ತ್ಯುನಾ ಅಗು ಚಾಲ್ತೊ ಪಾಚೊ಼ ಬಲೈ ಲಿನ ಜಾ಼ವಸ. 4ಕೆಳಾಮಾ ತೆ ತಿನಾ ಕ್ಹಾರಾ ಬಕ್ರಾವೊನೆ ಭಾರೊ ಬಲೈ ಲಿನ ಜಾ಼ವಸ ತೆಳಾಮಾ ತೆ ಅಗೊ-ಅಗೊ ಜಾ಼ವಸ ತಿನಾ ಬಕ್ರಾ ತಿನಾ ಪಾಚಾ಼-ಪಾಚಾ಼ ಜಾ಼ವಸ. ಕಾಕದ್ಯಾಮ ತೆ ಬಕ್ರಾ ತಿನಿ ಸ್ವರ ವಳಕಸ.. 5ತೆನೈಸೊ ಬಕ್ರಾ ತ್ಯುನೊನೆ ನೈ ಗ್ವತ್ತ ರ‍್ಹಯಲ ಮನಕ್ಹನಾ ಪಾಚಾ಼ ಕೆಳಾಮಾಜ ನೈ ಜಾ಼ತಾ. ತಿನಾಹುತಿ ತ್ಯುನೆ ತೆ ತಿಕಂತಾ ದುರ ಜಾ಼ವಸ. ಕಾಕದ್ಯಾಮ ತ್ಯುನೆ ನೈ ಗ್ವತ್ತ ರ‍್ಹಯಲ ಮನಕ್ಹನೊ ಅವಾಜ಼ ವಳಕ್ತಾ ನೈ "ಕೈನ ಕದ್ಯೊ.

6ಯೆಸು ಕದಲ ಎ ಸಾಮ್ಯ ತ್ಯುನೊನೆ ಕದ್ಯೊ. ತೆನೈಸೊ ಇನು ಮತ್ಲಬ ತ್ಯುನೊನೆ ಗ್ವತ್ತ ಥಯು ನೈ.

ಯೆಸು ಚೊ಼ಕೊ ಕುರಬುರ‍್ಯೊ ವ್ಹೈ

7ತಿನಾಹುತಿ ಯೆಸು ವರಿ"ಮಿ ತುಮೊನೆ ಕ್ಹರಿಜ ಕೌಸ. ಮಿಜ಼ ಬಕ್ರಾವೊನೆ ಬಾಕಲ ವ್ಹೈ. 8ಮಿ ಆವಾತಿ ಪೈಲಾ ಆಯಲವಾಲಾ ಚವಟ್ಟಾ ವ್ಹತ್ತಾ ವರಿ ಉದಾಳ್ಳಿವಾಲಾ ವ್ಹತ್ತಾ. ಬಕ್ರಾ ತ್ಯುನು ಐಕ್ಯಾ ನೈ. 9ಮಿಜ಼ ಬಾಕಲ ವ್ಹೈ. ಕುನ್ನ ಮಾರಾ ಮುಲಕ ಮ್ಹೈ ಜಾ಼ವಸ ತೆ ಬಿಡುಗಡೆ ವ್ಹಂದಿಲಿವಸ. ತೆ ಮ್ಹೈ ಆ ಸಕಸ. ಭಾರೊಬಿ ಜಾ಼ ಸಕಸ ವರಿ ತಿನೆ ಚಾರೊ ಮಳಸ. 10ಚ್ವಟ್ಟೊ ಚೊ಼ರಿ ಕರಾನೆ ಖಲಾಸ ಕರಾನೆ ಹಾಳ ಕರಾನೆಜ ಆವಸ. ಮಿತೊ ಜ಼ಲಮ ದಿವಾನೆ ಆಯೊಸ ತೆ ಪರಿಪುರ್ಣ ಜ಼ಲಮ ವ್ಹೈ.

11"ಮಿಜ಼ ಚೊ಼ಕೊ ಕುರಬುರ‍್ಯೊ ವ್ಹೈ. ಚೊ಼ಕೊ ಕುರಬುರ‍್ಯೊ ಬಕ್ರಾವೊನೆ ಹುತಿ ತಿನು ಜ಼ಲಮ ದಿವಸ. 12ಕುಲಿ ಆಳ ಕುರಬುರ‍್ಯೊ ನ್ಹವೈ ವರಿ ಬಕ್ರಾ ಕುಲಿ ಆಳನಾ ಸ್ವಂತನಾ ನ್ಹವೈ. ತಿನಾಹುತಿ ಕುಲಿ ಆಳ ತೊಳ ಆವಾನು ದೆಕಿನ ಬಕ್ರಾವೊನೆ ಛೊಡಿನ ನ್ಹಾಟಿ ಜಾ಼ವಸ. ತೆಳಾಮಾ ನರಿಯೊ ಬಕ್ರಾವೊಪರ ಹಮ್ಲೊ ಕರಿನ ತ್ಯುನೊನೆ ಜುದಾ ಕರಿ ಪಡಸ. 13ತೆ ಮನಕ್ಹ ನ್ಹಾಟಿ ಜಾ಼ವಸ. ಕಾಕದ್ಯಾಮ ತೆ ಖಾಲಿ ಕುಲಿ ಆಳ ವ್ಹೈ. ತೆ ಬಕ್ರಾವೊನೆ ಹುತಿ ಕ್ಹರಿಮಾಜ಼ ಚಿಂತಾ ನೈ ಕರ‍್ತೊ. 14"ಮಿ ಚೊ಼ಕೊ ಕುರಬುರ‍್ಯೊ ವ್ಹೈ. ತಿಮ್ಮ ಮಿ ಮನೆ ಬಾ ತಿಳ್ದಿಲಿದ್ಯೊಸ ತಿಮ್ಮ ಬಾನೆ ಮಿ ತಿಳ್ದಿಲಿದ್ಯೊಸ. ತಿನಾ ಲಿಂಗತಜ ಮಿ ಮಾರಾ ಬಕ್ರಾವೊನೆ ವಳಕುಸ ವರಿ ತೆ ಮನೆ ವಳಕಸ. ವರಿ ಮಿ ಮಾರಾ ಬಕ್ರಾವೊನಾ ಹುತಿ ಜ಼ಲಮ ದಿವಾನೆ ತಯ್ಯಾರ ಛೆ. 15ಮನೆ ಬಿಜಾ಼ ಬಕ್ರಾಬಿ ಛೆ. ತೆ ನ್ಹ್ಯಾ ರ‍್ಹವಾನಾ ಆ ಹಕ್ಕಿಮಾ ನತ್ತಿ. ಮಿ ತೆ ಬಕ್ರಾವೊನೆಬಿ ಮ್ಹೈ ಲೌಜ. 16ತೆ ಬಕ್ರಾ ಮಾರಿ ಸ್ವರ ಐಕಸ. ತೆಳಾಮಾ ಯಕ್ಕಜ಼ ಗುಂಪ ರ‍್ಹವಸ ವರಿ ಯಕ್ಲೊಜ ಕುರಬುರ‍್ಯೊ ರ‍್ಹವಸ.

17ಬಾ ಮನೆ ಮಯಾ ಕರಸ. ಕಾಕದ್ಯಾಮ ಮಿ ಮಾರೊ ಜ಼ಲಮ ವರಿ ವ್ಹಂದಿಲಿವಾನಾ ಹುತಿ ದಿವ್ಸ. 18ಮಾರೊ ಜ಼ಲಮ ಮಕಂತೊ ಕುನ್ನಜ ನೈ ಉದಾಳೆ ಲೆಸಕ್ತು; ಮಿಜ಼ ತಿನೆ ಮಾರಿ ಇಷ್ಟಾಕ್ಹು ದಿವ್ಸ. ಮಾರೊ ಜ಼ಲಮ ದಿವಾನೆಬಿ ವರಿ ತಿನೆ ವಾಪಸ ಲಿವಾನೆಬಿ ಮನೆ ಹಕ್ಕ ಛೆ. ಇಮ್ಮ ಕರು ಕೈನ ಬಾಜ ಮನೆ ಆಗನ್ಯಾ ದಿದ್ಯೊಸ "ಕೈನ ಕದ್ಯೊ.

19ವರಿ ಎ ಸಂಗತಿಯೊ ಐಕಿನ ಯೆಹುದಿಯೊಮಾ ವರಿ ಭೆದ ಹುಟ್ಯು. 20ತ್ಯುನೊಮಾ ಘನ್ನಾ ಜ಼ನಾ"ತಿನಾಮಾ ಭುತಡು ಛೆ. ಎ ಪಿಸಾಳೊ ಛೆ. ತಿನು ಕಾ ಐಕಾಡಾಸ? ಕೈನ ಕದ್ಯಾ. 21ತೆನೈಸೊ ಬಿಜಾ಼ ಮನಕ್ಹೊ"ಎ ವಾತೊ ಭುತಡು ಧರಲ ಮನಕ್ಹನಿಯೊ ವಾತೊ ನ್ಹವ್ಯೆ. ಕುಡ್ಡಾವೊನಾ ಡೊಳಾ ದಿವಾನೆ ಭುತಡಾಕ್ಹು ಥಾವಸ ಸು? ಕೈನ ಕದ್ಯಾ.

ಯೆಸುನೆ ಇನ್ಕಾರ ಕರಲ

22ಯೆರುಸಲೆಮಮಾ ದೆವಾಯಲನೆ ಕರಾನಿ ಪ್ರತಿಷ್ಟೆನು ಸನ್ನ ಚಾಲಾಡ್ಯುತು. ತೆಳಾಮಾ ಥಂಡನಾ ದಿನ್ನೊ ವ್ಹತ್ತಾ. 23ಯೆಸು ದೆವಾಲಯಮಾ ಸೊಲೊಮೊನನಾ ಮಂಟಪ ಕನ ಫರಾಡೊತೊ. 24ತೆಳಾಮಾ ಯೆಹುದಿಯೊನಾ ಅದಿಕಾರಿಯೊ ಯೆಸುನಾ ಅಗಾ ಪಾಚಾ಼ ಹುಬ್ರಯಾ. ತ್ಯುನೆ ತಿನೆ"ಹಜು಼ನ ಕೆಕ್ಲಿ ಯೆಳ ತಾರಾ ಹುತಿ ಹಮೊಕ್ಹು ಕೆಕ್ಲಾ ದಿನ್ನ ಝಾಕಿನ ಮ್ಹೆಲ್ಸಿ? ಕ್ಹರಿ ಸು ಛೆ ಖುಲ್ಲಾ ಕೆ. ತು ಕ್ರಿಸ್ತ ವ್ಹೈ ಸು? ಕೈನ ಪುಚ್ಯಾ.

25ತೆ ವಾತೆ ಯೆಸು "ಮಿ ತೆಳಾಮಾಜ಼ ತುಮೊನೆ ಕದ್ಯೊ. ತೆನೈಸೊ ತುಮೆ ಬರೊಕ್ಹೊ ಕರ‍್ಯಾ ನೈ. ಮಿ ಮಾರಾ ಬಾನಾ ಅದಿಕಾರಕ್ಹು ಕರಾನಾ ಅದ್ಭುತ ಕಾಮೊ ಮಾರಾಹುತಿ ಸಾಕ್ಷಿ ದಿವಸ. 26ತೆನೈಸೊ ತುಮೆ ಬರೊಕ್ಹೊ ನೈ ಕರ‍್ತಾ. ಕಾಕದ್ಯಾಮ ತುಮೆ ಮಾರಾ ಬಕ್ರಾ ನ್ಹವ್ಹೈ. 27ಮಾರಾ ಬಕ್ರಾ ಮಾರಿ ಆವಾಜನೆ ಐಕಸ. ಮಿ ತ್ಯುನೊನೆ ತಿಳ್ದಿಲಿದ್ಯೊಸ ವರಿ ತೆ ಬಕ್ರಾ ಮಾರಾ ಪಾಚಾ಼ ಆವಸ. 28ಮಾರಾ ಬಕ್ರಾವೊನೆ ಮಿ ಹಮೆಶಾನೊ ಜ಼ಲಮ ದಿವ್ಸ. ತ್ಯುನೆ ಕೆಳಾಮಾಬಿ ಮರ್ತಾ ನೈ, ವರಿ ತ್ಯುನೊನೆ ಕುನ್ನಜ ಮಕಂತಾ ಉದಾಳಿನ ದುರ ಕರಾನೆ ಥಾತು ನೈ. 29ತ್ಯುನೊನೆ ಮಾರೊ ಬಾಜ ಮನೆ ದಿದ್ಯೊ. ತೆ ಕ್ಹಾರಾವೊತಿಬಿ ಮ್ಹೊಟೊ ವ್ಹೈ. ತ್ಯುನೊನೆ ಮಾರಾ ಬಾನಾ ಹತ್ತಮಾತಾ ಕುನ್ನಜ ನೈ ಉದಾಳಿ ಲೆಸಕ್ತು. 30ಬಾ ವರಿ ಮಿ ಯಕ್ಕಜ಼ ವ್ಹೈ "ಕೈನ ಉತ್ತರ ದಿದ್ಯೊ. 31ತೆಳಾಮಾ ವರಿ ಯಹುದ್ಯೊ ಯೆಸುನೆ ಮಾರಾನಾ ಹುತಿ ದಗ್ಡಾ ಇನಿಲಿದ್ಯಾ. 32ತೆನೈಸೊ ಯೆಸು ತ್ಯುನೊನೆ"ಮಿ ಬಾಕಂತೊ ಘನ್ನಾ ಚೊ಼ಕಾ ಕಾಮೊ ಕರಿನ ದೆಕಾಡ್ಯೊಸ. ವರಿ ಎ ಚೊ಼ಕಾ ಕಯಾ ಕಾಮ್ನಾ ಹುತಿ ತುಮೆ ಮನೆ ದಗ್ಡಾಲಿನ ಮಾರಾನೆ ದೆಕಾಡ್ಯಾಸ? ಕೈನ ಪುಚ್ಯಾ.

33ಯಹುದ್ಯೊ"ಹಮೆ ತುನೆ ದಗ್ಡಾಲಿನ ಮಾರಾನು ತು ಕರಲ ಕಯಾಜ ಕಾಮೊಕ್ಹು ನ್ಹವೈ. ತು ಕರಾನಾ ಕ್ಹುದಾನಿ ದುಷಣೆನಾ ಹುತಿಜ ವ್ಹೈ. ತು ಖಾಲಿ ಯಕ್ಕ ಮನಕ್ಹ ರ‍್ಹೈನ ತುನೆ ತುಜ಼಼ ಕ್ಹುದಾಜ ವ್ಹೈ ಕೈನ ಕೈಲಿವಾಡ್ಯೊಸ! ಕೈನ ಉತ್ತರ ದಿದ್ಯಾ.

34ತಿನೆ ಯೆಸು "ತುಮಾರಾ ಧರಮಶಾಸ್ತ್ರಮಾ" ಮಿ ತುಮೆ ಕ್ಹುದಾವೊ ಕೈನ ಕದಲ "ಬರ್ದಲ ನತ್ತಿ ಸು? ಕೈನ ಉತ್ತರ ದಿದ್ಯೊ. 35ಯಕ್ಕೆಳೆ ತೆ ತ್ಯುನೊನೆ ಕ್ಹುದಾವೊ ವ್ಹೈ ಕೈನ ಕ್ಹುದಾನಿ ವಾತೊ ಐಯೊಸ ತ್ಯುನೊನೆ ಕ್ಹುದಾವೊ ವ್ಹೈ ಕೈನ ಬಲಾವಾನು ರ‍್ಹಯುಮ ಪವಿತ್ರ ಗ್ರಂಥನೆ ಸುಳ್ಳ ಕವಾನೆ ಥಾತು ನೈ. 36ಇಮ್ಮ ರ‍್ಹವಾನು ರ‍್ಹಯುಮ ಬಾ ತಿನಾ ಸ್ವಂತವಾಲಾ ವ್ಹೈ ಕೈನ ಇನಿಲಿನ ದುನಿಯಾಮಾ ಮೊಕ್ಲಲವಾಲಾನ ಹುತಿ ಕಿ ರ‍್ಹಸ? ಮಿ "ಕ್ಹುದಾನೊ ದಿಕ್ರೊ ವ್ಹೈ" ಕೈನ ಕದಲ ಹುತಿ ತುಮೆ ಮಿ ದುಷಣೆ ಕರಾಡ್ಯೊಸ ಕೈನ ಕವಾನು ಕಾ? 37ಮಾರೊ ಬಾ ಕಾಮೊ ಮಿ ನೈ ಕರ‍್ಯಾಮ, ಮಿ ಕವಾನು ಬರೊಕ್ಹೊ ಕರೊ ನಕೊ. 38ತೆನೈಸೊ ಮಿ ತಿಮ್ಮ ಕರಾನು ರ‍್ಹಯುಮ ತಿಮ್ಮ ರ‍್ಹಯುತಬಿ ತುಮೆ ಮನೆ ನಂಬಾಡ್ಯಾ ನತ್ತಿ. ಅದ್ಭುತನೆ ನಂಬೊ ಇಮ್ಮ ಬಾ ಬಿ ಮಾರಾಮಾ ಛೆ ವರಿ ಮಿ ತಿಮಾ ಛೆ ಕೈನ ತುಮೊನೆ ಗ್ವತ್ತ ಥಾವಸ.

39ಯೆಸುನೆ ಧರಾನೆ ಯಹುದ್ಯೊ ವರಿ ಕೊಶಿಶ ಕರ‍್ಯಾ. ತೆನೈಸೊ ಯೆಸು ತ್ಯುನಾಕ್ಹು ಚುಕೈಲಿದ್ಯೊ.

40ಪಾಚಲ್ತೊ ಯೆಸು ಯೊರ್ದನ ನದಿನಾ ಬಿಜಿ ದಂಡಿಯೆ ಫರಿನ ಗಯೊ. ಯೊಹಾನ ಪೈಲಾ ಬಾಪ್ತಿಸ್ಮ ಕರಾವಾನಿ ಜ಼ಗಾಯೆ ಯೆಸು ಗೈನ ತ್ಯಾಜ ರ‍್ಹಯೊ. 41ತೆಳಾಮಾ ಘನ್ನಾ ಮನಕ್ಹೊ ತಿಕನ ಆಯಾ" ಯೊಹಾನ ಕೆಳಾಮಾಜ ಅದ್ಭುತ ಕಾಮೊ ಕರ‍್ಯೊ ನೈ. ತೆನೈಸೊ ಯೊಹಾನ ಎ ಮನಕ್ಹನಾ ಹುತಿ ಕದಲ ಹರ ಯಕ್ಕ ಕ್ಹರಿ ವ್ಹೈ "ಕೈನ ಕದ್ಯಾ. 42ವರಿ ತ್ಯಾ ಘನ್ನಾ ಮನಕ್ಹೊ ಯೆಸುಪರ ಬರೊಕ್ಹೊ ಕರ‍್ಯಾ.