ಯಾಕೊಬ 2

ಭೆದ ಭಾವನಾ ಹುತಿ

1ಮಾರ ಭಾಯೊ ಭೆನೊ, ಮಹಿಮಾ ರ‍್ಹಯಲ ಅಪ್ನೊ ಕರ್ತಾ ಥಯಲ ಯೆಸು ಕ್ರಿಸ್ತನಾ ಉಪ್ಪರ ಬರೊಕ್ಹೊ ಮ್ಹೆಲಲವಾಲಾ ತುಮೆ ಯಕ್ಲಾನೆ ಹೆಟಾ ಯಕ್ಲಾನೆ ಉಪ್ಪರ ದೆಕಾಲಾ ರ‍್ಹೌ ನೈ. 2ಕಿಮ್ಮ ಕದ್ಯಾಮ ಯಕ್ಲೊ ಮನಕ್ಹ ಕ್ಹೊನಾನಿ ಇಟ್ಟಿಯೊ ವರಿ ಚೊ಼ಕಾ ರ‍್ಹಯಲ ವಣ್ಣಾ ಘಾಲ್ಲಿನ ತುಮಾರಾ ಸಬೆಮಾ ಆತಾಮಾ ವರಿ ಯಕ್ಕ ಗರಿಬ ಮನಕ್ಹ ಚೊ಼ಕಾ ನೈ ರ‍್ಹಯಲ ವಣ್ಣಾ ಘಾಲ್ಲಿನ ಆತಾಮಾ, 3ತುಮೆ ಚೊ಼ಕಾ ದಿಕ್ಹಾನಾ ವಣ್ಣಾ ಘಾಲ್ಲಿದಲವಾಲಾನೆ ಮರ್ಯಾದಿಕ್ಹು ದೆಕಿನ ತಿನೆ - ಆ ಉಪ್ಪರ ಬೈಟಾ ವರಿ ಗರಿಬನೆ ದೆಕಿನ ತು ತ್ಯಾ ಬೈಟ, ನೈತೊ ಹೆಟೊ ಬೈಟ ಕೈನ ಕದ್ಯಾಮ, 4ತುಮೆ ತುಮಾರಾ ತುಮಾರಾಮಾಜ಼ ಭೆದ ಭಾವ ಕರಾಲಾ ಥೈನ, ಯಕ್ಲಾನೆ ಅಮ್ಮ ಯಕ್ಲಾನೆ ತಿಮ್ಮ ಕೈನ ವಿಚಾರ ಕರಾಲಾ ಥಾವೊಶಿ ಸು ನೈ? 5ಮಾರಾ ಮಯಾನಾ ಭಾಯೊ ಭೆನೊ, ಐಕೊ ಕ್ಹುದಾ ಆ ದುನಿಯಾಮಾ ರ‍್ಹಯಲ ಗರಿಬೊನೆ ಬರೊಕ್ಹಾಮಾ ಸೌಕಾರ ವರಿ ತಿನೆ ಮಯಾ ಕರಾಲಾವಾಲಾವೊನೆ ತೆ ಕದಲ ತಿಮ್ಮ ತಿನಾ ರಾಜ್ಯಮಾ ಕೆಳಾಮಾಬಿ ರ‍್ಹವಾನೆ ಇನಿಲಿದ್ಯೊಸ ಸು ನೈ? 6ತುಮೆತೊ ಗರಿಬೊನೆ ಮರ್ಯಾದಿ ನೈಸೊ ಕರ‍್ಯಾ. ತುಮೊನೆ ತ್ರಾಸ ಕರಿನ ಫೈಸಲೊ ಕರಾನಿ ಜ಼ಗಾ ಎಳದಿನ ಲಿನ ಜ಼ಾವಾಲಾ ಸೌಕಾರೊ ನವೈ ಸು? 7ತುಮೊನೆ ಬಲಾಯಲ ತೆ ಕ್ಹಾರವೊತಿ ಉಪ್ಪರ ರ‍್ಹಯಲ ನಾಮನೆ ಕ್ಹರಾಪಾಲಾ ನವೈ ಸು? 8ರ‍್ಹೈತಬಿ ಪವಿತ್ರ ಗ್ರಂಥಮಾ ರ‍್ಹಯಲ ಲಿಂಗತ ತಾರಾ ಬಾಜು಼ ಘರವಾಲಾನೆ ತು ತುನೆ ಕಿಮ್ಮ ಮಯಾ ಕರಶಿ ತಿನಾ ಲಿಂಗತ ಮಯಾ ಕರು ಕೈನ ಕವಾನಿ ಮ್ಹೊಟಿ ಆಗ್ಯಾನಾ ಲಿಂಗತ ಚಾ಼ಲ್ಯಾರೆ, ತುಮೆ ಚೊ಼ಕು ಕರಾಲಾ ಥಾವೊಶಿ. 9ತೆನೈಸೊ ತುಮೆ ಆ ಛೊಡಿನ ಯಕ್ಲಾನೆ ಉಪ್ಪರ ಯಕ್ಲಾನೆ ಹೆಟಾ ದೆಕ್ಯಾಮ ಪಾಪ ಕರಾಲಾ ಥೈನ ವರಿ ತುಮೆ ಅಪರಾದಿ ವ್ಹೈ ಕೈನ ಪವಿತ್ರ ಗ್ರಂಥನಾ ಲಿಂಗತ ತುಮೊನೆ ಫೈಸಲೊ ಥಾವಸ. 10ಕಾಕದ್ಯಾಮ ಯಕ್ಲೊ ಪವಿತ್ರ ಗ್ರಂಥಮಾ ರ‍್ಹಯಲ ಪುರಾ ಚಾ಼ಲಿನ ಗೈನ ಕ್ಹಾಲಿ ಯಕ್ಕಮಾ ಚು಼ಕ್ಯೊಮ ತೆ ಕ್ಹಾರಾ ವಿಶಯಮಾ ಅಪರಾದಿ ಥಾವಸ. 11ಕಾಕದ್ಯಾಮ ವ್ಯಬಿಚಾರ ಕರು ನೈ ಕೈನ ಕದಲವಾಲೊಜ಼ ಯಕ್ಲಾನೆ ಖಲಾಸ ಕರು ನೈ ಕೈನಬಿ ಕದ್ಯೊಸ. ತಿನಾಹುತಿ ತು ವ್ಯಬಿಚಾರ ಕರ‍್ಯಾ ಬಗರ ರ‍್ಹೈತಬಿ ಯಕ್ಲಾನೆ ಖಲಾಸ ಕರಲ ರ‍್ಹಯಾರೆ ಪವಿತ್ರ ಗ್ರಂಥನಾ ವಿರುದ್ದ ಗಯಲ ಲಿಂಗತ ವ್ಹೈ. 12ತುಮೆ ಅಪೊನೆ ವಚಾಡಾನಾ ಪವಿತ್ರ ಗ್ರಂಥನಾ ಲಿಂಗತ ಫೈಸಲೊ ವ್ಹಂದಿಲಿವಾಲಾವೊನೆ ತ್ಯುನಾ ಲಿಂಗತಜ಼ ಬೊಲೊ ವರಿ ವಿಧೆಯ ಥಾವೊ. 13ಕಾಕದ್ಯಾಮ ಮರಗಾ ನೈ ದೆಕಾಡಾಲಾನೆ ಫೈಸಲಾನಾ ದಿನ್ನೆ ಮರಗಾ ನೈ ದೆಕಾಡತಾ. ಮರಗಾ ನ್ಯಾಯ ಫೈಸಲಾನಾ ದಿನ್ನನಾ ಉಪ್ಪರ ಝಿತ್ತಸ.

ಬರೊಕ್ಹೊ ಯಕ್ಕಜ಼ ನೈ ಚಾ಼ಲ್ತೊ ತಿನಾ ಲಿಂಗತ ಚಾಲು ಕವಾನಿ ಬೊದನೆ

14ಮಾರಾ ಭಾಯೊ ಭೆನೊ, ಯಕ್ಲೊ ತಿನೆ ಬರೊಕ್ಹೊ ಛೆ ಕೈನ ತಿನಾ ಲಿಂಗತ ತಿಮಾ ಕ್ರಿಯೆ ನೈ ರ‍್ಹಯರೆ ಸು ಉಪಯೊಗ ವ್ಹೈ? ತೆ ಬರೊಕ್ಹೊ ತಿನೆ ವಚಾ಼ಡಸ ಸು? 15ತುಮೊಮಾ ಯಾಕ್ಲಾ ಭೈನೆ ನೈತೊ ಯಕ್ಲಿ ಭೆನನೆ ಘಾಲ್ಯಾನೆ ವಣ್ಣಾ ವರಿ ತೆ ದಿನ್ನನು ಅನ್ನ ಚಾ಼ಯೆ ಥಯಲ ವಕ್ಹತಮಾ, 16ತುಮೊಮಾನೊ ಯಕ್ಲೊ ತಿನೆ ತೆ ಕ್ಹಾರು ದಿದ್ಯಾ ಬಗರ ಸಮಾಧಾನಕ್ಹು ಜಾ಼ವೊ, ಆಗ ಶೆಕಿಲಿವೊ, ಪೆಟ ಭರಿನ ಕ್ಹಾವೊ ಕೈನ ಕದ್ಯಾಮ ಸು ಉಪಯೊಗ ವ್ಹೈ? 17ತಿನಾ ಲಿಂಗತ ಕ್ರಿಯೆ ನೈಸೊ ಬರೊಕ್ಹೊ ಮರಲ ಲಿಂಗತಜ಼ ವ್ಹೈ. 18ರ‍್ಹೈತಬಿ ಯಕ್ಲೊ; ತುನೆ ಬರೊಕ್ಹೊ ಛೆ ವರಿ ಮಾರಾಮಾ ಕ್ರಿಯೆ ಛೆ ತು ತಾರಾಮಾ ಕ್ರಿಯೆ ನೈಸೊ ಬರೊಕ್ಹೊ ದೆಕಾಡ. ಮಿ ಮಾರಾ ಕ್ರಿಯೆಕ್ಹು ಬರೊಕ್ಹೊ ದೆಕಾಡುಸ ಕೈನ ಕತೊ ನೈ ಸು? 19ಕ್ಹುದಾ ಯಕ್ಲೊಜ಼ ವ್ಹೈ ಕೈನ ತು ಬರೊಕ್ಹೊ ಕರಶಿ ಸು? ತು ಬರೊಕ್ಹೊ ಕರಲ ಕರೆಟ್ಟ ವ್ಹೈ. ಮಾತ್ರಾ ಭುತ್ಡಾಬಿ ತಿನಾ ಲಿಂಗತಜ ತಿಳ್ದಿನ ಬುಚ್ಕಿನ ಕಾಪಸ. 20ಗ್ಯಾನ ನೈಸೊವಾಲಾ, ಕ್ರಿಯೆ ನೈಸೊ ಬರೊಕ್ಹೊ ಶಾನಾಜ಼ ಕಾಮೆ ಆತೊ ನೈ ಕೈನ ತುನೆ ಸಾಬಿತ ಕರು ಸು? 21ಅಪ್ನೊ ಪಿತೃ ಥಯಲ ಅಬ್ರಹಾಮ ತಿನೊ ದಿಕ್ರೊ ಥಯಲ ಇಸಾಕನೆ ಬಲಿ ದೆತಾಮಾ ಕ್ಹರಿಕ್ಹು ರ‍್ಹಯಲವಾಲೊ ವ್ಹೈ ಕೈನ ಕೈಲಿದಲ ತಿನಾ ಕ್ರಿಯೆಕ್ಹುಜ಼ ವ್ಹೈ ಸು ನೈ? 22ತಿನೊ ಬರೊಕ್ಹೊ ಕ್ರಿಯೆಕ್ಹುಜ಼ ಕಾಮ ಕರ‍್ಯುತು ವರಿ ತಿನಾ ಕ್ರಿಯೆಕ್ಹುಜ಼ ತಿನಾ ಬರೊಕ್ಹಾನು ಉದ್ದೆಶ ಪುರಾ ಥಯು ಕೈನ ದೆಕೆಸತೊ. 23ಅಬ್ರಹಾಮ ಕ್ಹುದಾಪರ ಬರೊಕ್ಹೊ ಕರ‍್ಯೊ, ತೆ ಬರೊಕ್ಹೊಜ಼ ತಿನಾ ಹಿಸಾಬಮಾ ನಿತಿ ವ್ಹೈ ಕೈನ ಕವೈಲಿವಾ ವರಕ್ಹು ಛೆ ಕವಾನು ಪವಿತ್ರ ಗ್ರOಥಮಾ ಬರ್ದಲ ತಿಮ್ಮ ಪುರಾ ಥಯು. ತಿನಾಹುತಿ ಅಬ್ರಹಾಮ ಕ್ಹುದಾನೊ ದೊಸ್ತ ವ್ಹೈ ಕೈಲಿದ್ಯೊ. 24ತಿನಾಹುತಿ ಮನಕ್ಹ ತೆ ಚಾ಼ಲಾಕ್ಹು, ತಿನಾ ಕಾಮೊಕ್ಹು ಚೊ಼ಕೊ ವ್ಹೈ ಕೈನ ಕವೈಲಿವಸ. ಕ್ಹಾಲಿ ಬರೊಕ್ಹಾಕ್ಹು ಯಕ್ಕಜ಼ ನ್ಹವೈ ಕೈನ ದೆಕೊಶಿ 25ತಿನಾ ಲಿಂಗತಜ಼ ಕೆಟ್ಟ ಕಾಮೊ ಕರಾಲಿ ರಾಹಾಬ ಕ್ಹಬಿರಿಯೊನೆ ತಿನಾ ಘರ್ಮಾ ಬಲೈಲಿನ ಮ್ಹೆಲಿನ, ತ್ಯುನೊನೆ ಬಿಜಾ಼ ವಾಟತಿ ವಳೈನ ತಿನಾ ತೆ ಕಾಮೊಕ್ಹುಜ಼ ಚೊ಼ಕಿ ವ್ಹೈ ಕೈನ, ತಿನೆ ಫೈಸಲೊ ಥಯೊ ನ್ಹೊತೊ ಸು? 26ಆತ್ಮಾ ನೈಸೊ ಕಿಮ್ಮ ಅಂಗ ಮರ‍್ಯುಸ ತಿನಾ ಲಿಂಗತ ಕಾಮ ನೈಸೊ ಬರೊಕ್ಹೊ ಮರಲ ಲಿಂಗತ ವ್ಹೈ.