ಎಫೆಸ 3

ಯಹುದ್ಯೊ ನೈಸೊವಾಲಾವೊನೆ ಪೌಲಾನಿ ಸೆವೆ

1ಪೌಲಾ ಕವಾಲೊ ಮಿ ಕ್ರಿಸ್ತ ಯೆಸುನೊ ಸೆರೆ ಆಳ ವ್ಹೈ. ಯಹುದ್ಯೊ ನೈಸೊ ತುಮಾರಾ ಹುತಿ ಮಿ ಸೆರೆ ಆಳ ಥಯೊಸ. 2ಕ್ಹುದಾ ತಿನಿ ಕೃಪಾನಾ ಮುಲಕ ಮನೆ ಎ ಕಾಮ ದಿದ್ಯೊಸ ಕವಾನು ತುಮೊನೆ ಕ್ಹರಿಬಿ ಗ್ವತ್ತ ಛೆ. ತುಮೊನೆ ಮದತ ಕರಾನೆ ಕ್ಹುದಾ ಎ ಕಾಮ ಮನೆ ದಿದ್ಯೊ. 3ಕ್ಹುದಾ ತಿನಾ ದಡಿ ರ‍್ಹಯಲ ವಿಚಾರ ಮನೆ ತಿಳಸಾಯೊ ವರಿ ದೆಕಾಡ್ಯೊ. ಇನಾ ಹುತಿ ಮಿ ತೆಳಾಮಾಜ಼ ತುಮೊನೆ ದಕ್ಹು ಬರ್ದ್ಯೊಸ. 4ಮಿ ಬರ್ದಲ ಎ ಸಂಗತಿಯೊ ತುಮೆ ಒದಲ ರ‍್ಹಯಾಮ ಕ್ರಿಸ್ತನು ದಡಿ ರ‍್ಹಯಲ ಕ್ಹರಿನೆ ಮಿ ಕ್ಹರಿಬಿ ತಿಳದಿಲಿದ್ಯೊಸ ಕವಾನು ತುಮೊನೆ ಗ್ವತ್ತ ಥಾವಸ. 5ಪಾಚ಼ಲ್ಯಾ ಕಾಲಮಾ ರ‍್ಹಯಲ ಮನಕ್ಹೊನೆ ತೆ ದಡಿನೆ ರ‍್ಹಯಲ ಕ್ಹರಿನೆ ತೆ ತಿಳಸಾಯೊ ನೈ. ಹಮ್ನಾ ತುಬಿ ಕ್ಹುದಾ ತಿನಿ ಆತ್ಮಾನಾ ಮುಲಕ ತೆ ದಡಿನ ರ‍್ಹಯಲ ಕ್ಹರಿನೆ ತಿನಿ ಪರಿಶುದ್ಧ ಅಪೊಸ್ತಲೊನೆಬಿ ಪ್ರವಾದಿಯೊನೆಬಿ ದೆಕಾಡ್ಯೊಸ. 6ಎ ತೆ ದಡಿನೆ ರ‍್ಹಯಲ ಕ್ಹರಿ; ಯಹುದ್ಯೊ ನೈಸೊವಾಲಾ ಸುವಾರ್ತೆನಾ ಮುಲಕ ಕ್ರಿಸ್ತ ಯೆಸುಮಾ ರ‍್ಹವಾಲಾ ಥೈನ ಯೆಹುದಿಯೊನಾ ಕ್ಹಾತೆ ಯಕ್ಕಜ಼ ಅಂಗ ರ‍್ಹಯಲವಾಲಾ ವಾಗ್ದಾನಮಾ ಪಾಲ ಲಿವಾಲಾ ಥಯಾಸ. 7ಕ್ಹುದಾ ದಿದಲ ಖಾಸ ಕೃಪಾ ವರಕ್ಹು ಮಿ ಸುವಾರ್ತೆ ತಿಳಸಾನಾ ಹುತಿ ಸೆವಕ ಥಯೊ. ಕ್ಹುದಾ ತಿನಿ ತಾಕತ ಉಪಯೊಗ ಕರಿನ ಮನೆ ತೆ ಕೃಪಾ ವರ ದಿದ್ಯೊ. 8ಕ್ಹುದಾನಾ ಮನಕ್ಹೊಮಾ ಮಿಜ಼ ನ್ಹಾನೊ ವ್ಹೈ. ಕ್ರಿಸ್ತನಿ ಆಸ್ತಿನಾ ಹುತಿ ರ‍್ಹಯಲ ಸುವಾರ್ತೆನೆ ಮಿ ಯಹುದ್ಯೊ ನೈಸೊವಾಲಾವೊನೆ ತಿಳಸೌ ಕೈನ ಕ್ಹುದಾ ಮನೆ ಕೃಪಾ ವರ ದಿದ್ಯೊ. ತೆ ಆಸ್ತಿ ಪುರಾ ಕಳೈಲಿವಾನೆ ಸಾಧ್ಯ ನತ್ತಿ. 9ದಡಿನ ರ‍್ಹಯಲ ತಿನಾ ವಿಚಾರೊ ಕ್ಹಾರಾ ಮನಕ್ಹೊನೆ ತಿಳಸೌ ಕವಾನು ಕಾಮ ಕ್ಹುದಾ ಮನೆ ದಿದ್ಯೊ. ಪೈಲಾನಾ ಕಾಲ್ತು ತೆ ಕ್ಹುದಾ ಕನ ದಡಿನ ವ್ಹತ್ತು. ಹರಯಕ್ಕ ಸೃಷ್ಟಿ ಕರಲವಾಲೊ ಕ್ಹುದಾಜ಼ ವ್ಹೈ. 10ತಿನಾ ಬಿಜಾ಼-ಬಿಜಾ಼ ತರಾನು ಗ್ಯಾನ ಆಕಾಶ ಮಂಡಳಮಾ ರ‍್ಹವಾನಾ ಕ್ಹಾರಾ ಅದಿಪತಿಯೊನೆ ಅದಿಕಾರಿಯೊನೆ ಹಮ್ನಾ ಸಭೆನಾ ಮುಲಕ ಗ್ವತ್ತ ಥೌ ಕವಾನು ಕ್ಹುದಾನು ಉದ್ದೆಶ ವ್ಹತ್ತು. 11ಪೈಲಾನಾ ಕಾಲ್ತೊ ಎಜ಼ ಕ್ಹುದಾನು ವಿಚಾರ ವ್ಹತ್ತು. ಕ್ಹುದಾ ಅಪ್ನೊ ಪ್ರಭು ಥಯಲ ಯೆಸು ಕ್ರಿಸ್ತನಾ ಮುಲಕ ತಿನಿ ವಿಚಾರ ಲಿಂಗತ ಕರ‍್ಯೊ. 12ಅಪೆ ಕ್ರಿಸ್ತಮಾ ರ‍್ಹವಾನಾ ಬರೊಕ್ಹಾನಾ ಮುಲಕ ಕ್ಹುದಾ ಕನ ಸ್ವಾತಂತ್ರ ಕ್ಹು ವರಿ ಭೆವಾಚಿ ಜಾ಼ವಾನೆ ಸಾಧ್ಯ ಥಯು. 13ಇಮ್ಮ ರ‍್ಹತಾಮಾ ಮಿ ತುಮಾರಾ ಹುತಿ ಆವಾನಾ ತ್ರಾಸೊ ದೆಕಿನ ದುಖಿ ಥೈನ ಧೈರ್ಯ ಜ಼ವೈಲಿವೊ ನಕೊ. ಮಾರಾ ತ್ರಾಸೊ ತುಮೊನೆ ಮರ್ಯಾದಿ ಲಾವಸ.

ಕ್ರಿಸ್ತನಿ ಮಯಾ

14ತಿನಾಹುತಿ ಬಾನಾ ಕ್ಹಾಮಾ ಉಂದಾ ಗುಡ್ಗಾ ಘಾಲುಸ. 15ಭುಲೊಕಮಾ ವರಿ ಸ್ವರ್ಗಮಾ ರ‍್ಹವಾನು ಹರಯಕ್ಕ ಘರದಾನು ತಿನಾಕ್ಹು ತಿನು ಕ್ಹರಿ ನಾಮ ವ್ಹಂದಿಲಿವಸ. 16ಎ ತುಮಾರಾ ಆತ್ಮಾವೊನೆ ಘಟ್ಟ ಥೈನ ರ‍್ಹವಾನೆ ಚಾ಼ಯೆ ಥಯಲ ತಾಕತ ತಿನಿ ಮಹಿಮಾನಾ ಪ್ರಕಾರ ದಿವ್ ಕೈನ ಬಾ ಕನ ಮಾಂಗಿಲ್ಯುಸ. ತೆ ತಿನಿ ಆತ್ಮಾನಾ ಮುಲಕ ತುಮೊನೆ ತೆ ತಾಕತ ದಿವಸ. 17ತುಮಾರಾ ಬರೊಕ್ಹಾನಾ ಮುಲಕ ಕ್ರಿಸ್ತ ತುಮಾರಾ ಮನಸ್ಸೊಮಾ ರ‍್ಹೌ ಕೈನ ಪ್ರಾಥನಾ ಕರುಸ. ತುಮಾರಿ ಜಿವ್ನಾ ಮಯಾಮಾ ಘಟ್ಟ ಥೈನ ರ‍್ಹೌ ಕೈನ ವರಿ ಮಯಾನಾ ಉಪ್ಪರ ಭಂದೌ ಕೈನ ಮಾಂಗಿಲ್ಯುಸ. 18ತುಮೆ ವರಿ ಕ್ಹುದಾನಾ ಪರಿಶುದ್ಧ ಮನಕ್ಹೊ ಕ್ಹಾರಾ ಕ್ರಿಸ್ತನಿ ಮಯಾನಿ ಮಹತ್ವನೆ ಮತ್ಲಬ ಕರಿಲಿವಾನೆ ಚಾ಼ಯೆ ಥಯಲ ತಾಕತ ವ್ಹಂದಿಲಿದಲವಾಲಾ ಥೌ ಕೈನ ಪ್ರಾಥನಾ ಕರುಸ. ಕ್ರಿಸ್ತನಿ ಮಯಾನು ರುಂದಮಾ ಲಾಂಬಾಮಾ ವರಿ ಉಂಡಾಮಾ ಉಚ್ಚಾಮಾ ತುಮೆ ಅರ್ಥ ಕರಿಲ್ಯು ಕೈನ ಪ್ರಾಥನಾ ಕರುಸ. 19ಕ್ರಿಸ್ತನಿ ಮಯಾ ಮನಕ್ಹೊ ತಿಳ್ದಿಲಿವಾನೆ ಸಾಧ್ಯ ನತ್ತಿ. ತೆನೈಸೊ ತೆ ಮಯಾನೆ ತುಮೆ ತಿಳ್ದಿಲಿವಾಲಾ ಥೌ ಕೈನ ಪ್ರಾಥನಾ ಕರುಸ. ತೆಳಾಮಾ ತುಮೆ ಕ್ಹುದಾನೆ ಪುರಾ ಮನಸ್ಸಕ್ಹು ಭರಲವಾಲಾ ಥಾವಾನೆ ಸಾಧ್ಯ ಥಾವಸ. 20ಅಪ್ನೊಮಾ ಕಾಮ ಕರಾನು ತಿನಿ ತಾಕತಕ್ಹು ಅಪೆ ಪುಚ್ಚಾತಿಬಿ ವಿಚಾರ ಕರಾತಿಬಿ ಕೆಕ್ಲೊಕಿ ಘನ್ನು ಘನ್ನು ಕ್ಹುದಾ ಕರಸ. 21ತಿನೆ ಸಭೆಮಾಬಿ ಕ್ರಿಸ್ತ ಯೆಸುಮಾಬಿ ತಲ ತಲಾಂತರಮಾಬಿ ಯುಗ ಯುಗಾಂತರಬಿ ಮಹಿಮಾ ಥಾವಾದೆ. ಆಮೆನ.