ಕೊಲೆಸ್ಸೆ 2

1ಮಿ ತುಮೊನೆಘನ್ನೊ ಕೊಶಿಶ ಕರಾಡ್ಯೊಸ ಕವಾನು ತುಮೊನೆ ಗ್ವತ್ತ ರ‍್ಹೌ ಕವಾನು ಎನೈಸೊ ವಲೊ ದೆಕಿಮಾ ರ‍್ಹಯವಾಲಾವೊನೆ ವರಿ ಮನೆ ನೈಸೊ ದೆಕಲವಾಲಾವೊನೆ ಮದತ ಕರಾನೆ ಕೊಶಿಶ ಕರಾಡ್ಯೊಸ. 2ತ್ಯುನೆ ಅಂತರ್ಯಮಾ ಆಸಕ್ತಿವಾಲಾ ಮಯಾಮಾ ಯಕ್ಕ ಥೈನ ರ‍್ಹೌ ಕೈನ 3ಯೆಸು ಸ್ವಾಮಿಮಾಜ್ ಹರಯಕ ಗ್ಯಾನ ವರಿ ಪುರಾ ಛೆ. 4ಕುನ್ನಜ ತುಮೊನೆ ಮಯಾನ ವಾತೊಕ್ಹು ಮೊಸ ಕರು ನೈ ಕೈನ ಮಿ ಆ ಕ್ಹಾರು ಕವಾಡೊಸ 5ಮಿ ತ್ಯಾ ತುಮೊಕೊನ ನೈ ರ‍್ಹೈತಬಿ ಆತ್ಮಾಕ್ಹು ತುಮಾರಾ ಕ್ಹಾತೆ ರ‍್ಹೈನ ತುಮೆ ಯಕ್ ತೊರ್ ತರಿಕಾಕ್ಹು ಚಾಲನು ವರಿ ತುಮೆ ಬರೊಕ್ಹಾಮಾ ಘಟ್ಟ್ಟ ಹುಬ್ರಯಲ ದೆಕಿನ ಘನ್ನೊ ಖುಶಿ ಥೌಸ. 6ತುಮೆ ಯೆಸು ಸ್ವಾಮಿನೆ ಮಲೈಲಿಂಗತ ತಿನೆ ಮ್ಹೈ ಥೈನ ಜಿವಸೊ. 7ತುಮೆ ತಿಮಾ ಬೆರುರಿನ,ತಿಮಾಜ಼ ಆಗಾ ಬಡತಾ ವರಿ ತುಮೊನೆ ಕದಲ ವಾಕ್ಯಾನಾ ಪ್ರಕಾರ ಬರೊಕ್ಹಾಕ್ಹು ರ‍್ಹೈನ ಕ್ಹುದಾನೆ ಜಾಸ್ತ-ಜಾಸ್ತ ಸ್ತೊತ್ರಾ ಕವೊ. 8ಮೊಸ ಕರಾನಾ ವರಿ ಕಾಮ ನೈಸೊ ಆವಾನಾ ತತ್ವಗ್ಯಾನ ಭೊದನೆಕ್ಹು ತುಮೊನೆ ಕುನ್ನ ತ್ಯುನಾ ಬಸಮಾ ಕರಲಿದ್ಯಾ ವಾಚಿ ಹುಶಾರ್ ರ‍್ಹವೊ. ಆ ಕ್ಹಾರು ಮನಕ್ಹೊನಿ ಪದ್ಧತ ವರಿ ಲೊಕನಿ ಬೊದನೆನೆ ಸಂಬಂದ ಪಡೆಲ ವ್ಹೈ ಕ್ರಿಸ್ತನೆ ನವೈ. 9ಕ್ಹುದಾನಿ ಹರಯಕ್ಕ ಗುನ್ ಕ್ರಿಸ್ತಮಾ ಹೊತ್ತು. 10ತೆ ಹರಯಕ್ಕ ಅದಿಕಾರ ವರಿ ಅದಿಕಾರಿಯೊತಿ ಉಪ್ಪರ ರ‍್ಹಯಲಕ್ಹು ತುಮೆ ತಿನಾಮಾ ರ‍್ಹೈನ ತಿನುಪುರಾ ಹೊಂದಿಲಿದ್ಯಾ. 11ಕ್ಹುದಾ ತಿಮಾ ಮನಕ್ಹೊನಾ ಹತೆನೈಸೊ ಥಾವಾನು ಖತ್ನಾ ಕರ‍್ಯೊಸ. ಕ್ರಿಸ್ತನಿ ಸುನ್ನತಿ ಶಾರಿರಿಕ ಥಯಲ ಪಾಪ್ನಿಯೊ ಚಾಳಿಯೊ ಕಾಡಿಪಾಡಾನುಜ಼ ವ್ಹೈ. 12ತುಮೆ ಬಾಪ್ತಿಸ್ಮ ಕ್ರಿಸ್ತನಾ ಕ್ಹಾತೆ ಬುರ‍್ಯಾ ವರಿ ತಿನೆ ಮರಲವಾಲಾವೊಮಾತೊ ಉಟಾಡಲ ಕ್ಹುದಾನಿ ತಾಕತಮಾ ಬರಕ್ಹೊ ಮ್ಹೆಲಾನಾ ಮುಲಕ ತಿನಾ ಕ್ಹಾತೆ ತುಮೆ ಉಟಿನ ಆಯಾಸ. 13ಅಪರಾದ ಕರ‍ಲ ಹುತಿ ವರಿ ಶರಿರನಾಭಾವ ಕ್ಹು ಮರಲವಾಲಾ ಥಯಲ ತುಮೊನೆ ಕ್ಹುದಾ ಕ್ರಿಸ್ತನಾ ಕ್ಹಾತೆ ಜಿವ್ತೊ ಕರ‍್ಯೊಸ ವರಿ ತ್ಯುನೆ ಕರಲ ತಪ್ಪ ಕ್ಹಾರಾ ಮಾಫ ಕರ‍್ಯೊಸ. 14ಅಪೆ ಪುರಾಜ಼ನಾ ಪಾಪಿಯೊ ವ್ಹೈ ಕೈನ ಅಪೊನೆ ದೆಕಾಡಿನ ದಿವಾನು ಆಗ್ಯಾನಾ ರುಪಮಾ ರ‍್ಹಯಲ ಕಾಗಜ್ ಕಾಡಿನ ಶಿಲುವಿಪರ ತೆ ಘಾಲ್ಲಿನ ಅಪೊಪರ ರ‍್ಹಯಲ ತೆ ಕಾಗಜ್ ಕಾಡಿಪಾಡ್ಯೊ. 15ತೆ ಅಪೊನೆ 16ತಿನಾಹುತಿ ಕ್ಹಾವಾಪಿವಾನಾ ಹುತಿ ರ್‍ಹೈನಕಾ ಸನ್ನ್ ಅಮಾಸ ವರಿ ಸಬ್ಬತ ದಿನ್ನನಾ ಹುತಿ ತುಮೆ ತಪ್ಪ ಕರಾಲಾ ವ್ಹೈ ಕೈನ ಕುನ್ನಜ ಫೈಸಲೊ ಕರ‍್ಯಾವಾಚಿ ರ‍್ಹವಾದೆ. 17ಆ ಕ್ಹಾರು ಖಾಲಿ ಆಗಾ ಥಾವಾನಾ ಕಾಮೊನು ಭೌಲು ಥಯುಸ, ಅನು ಅಸಲಿ ರುಪ ಕ್ರಿಸ್ತಜ ವ್ಹೈ. 18ಮನಸ್ಮಾ ಕಪಟ ಮುಕ್ಕಿಲಿನ ಮಾಂಡ್ಯಾಜ ದಕ್ಹಾಜ಼಼ನಾ ನ್ಹಾನಾ ಥೈನ ಚಾ಼ಲಿನ ಕ್ಹುದಾನಾ ದುತೊನೆ ಆರಾದನಾ ಕರಸ,ವರಿ ಹಮೊನೆ ದರ್ಶನ ಮಳ್ಯುಸ ಕೈನ ಪ್ಹುಗಸ,ಲೊಕನಾ ಗ್ಯಾನಖು ಹಮೆಜ಼ ಮ್ಹೊಟಾ ವ್ಹೈ ಕೈನ ಕವಸ,ತ್ಯುನೊನೆ ತುಮಾರಿ ಜ಼ಗಾ ಕಾಳ್ಳಿವಾನೆ ದಿವೊ ನಕೊ. 19ಅಮ್ಮ ರ‍್ಹಯಲವಾಲೊ ಕ್ರಿಸ್ತನೆ ಹೊಲ್ಸೆಲ ಭೆಜಾಖು ಸಂಬಂದ ತೊಡಿಲಿದಲ ಲಿಂಗತ ವ್ಹೈ, ಕಿಮ ಅಪ್ನೊ ಭೆಜೊ ಅಪ್ನಾ ಅಂಗನೆ ನರೊಖು ತಿನೆ ಚಾ಼ಯೆ ಥಯಲ ಬೆಳವಣಗಿ ದಿವಸ ತಿನಾಲಿಂಗತ ಕ್ರಿಸ್ತನೆ ಜುಡೆಲವಾಲೊ ತಿನಾಲಿಂಗತಜ಼ ಬೆಳ್ದತೊ ಜಾ಼ವಸ. 20ಲೊಕನಿ ಪೈಲಾ ರ‍್ಹೈಯಲ ಬೊದನೆನಾ ಪಾಲೆ ತುಮೆ ಕ್ರಿಸ್ತನಾ ಕ್ಹಾತೆ ಮರೆಲ ರ‍್ಹಯಾರೆ, ಹಮ್ನಾತೊಬಿ ಲೊಕನಾ ಮನಕ್ಹೊ ಕರಲ ಆಗ್ಯಾ ವರಿ ಉಪದೆಶ 21ಆ ದ್ಹರು ನಕೊ, ಅನು ಸ್ವಾದ ದೆಕು ನಕೊ,ತೆ ಮುಟ್ಟು ನಕೊ ಆ ಕ್ಹಾರಾ ವಾತೊನೆ ಅದಿನ ಕಾ ಥಾವೊಶಿ? 22ಆ ಕ್ಹಾರಾ ಮನಕ್ಹೊ ಕರಲ ಆಗ್ನೆ ವರಿ ಬೊದನೆ ಉಪಯೊಗ ಕರಿನ ಹಾಳ ಥಾವಾನಾ ಸಾಮ್ನೊನೆ ಸಂಬಂದ ಪಡೆಲ ವ್ಹೈ. 23ಆ ಕ್ಹಾರಾ ಉಪದೆಶ ಮನಕ್ಹೊ ಕರಲ ಪದ್ದತನಾ ಪ್ರಕಾರ, ಖಾಲಿ ದೆಕಾಡಾನಾ ಹುತಿ ಅಂಗನೆ ಬಗ್ಸಾಡಾನಾ ಹುತಿ ಗ್ಯಾನ ವ್ಹೈ ಕೈನ ದಿಕ್ಹಿನ ಆವಸ ಮಾತ್ರ ತೆ ಅಪ್ನಾಮಾ ರ‍್ಹಯಲ ದುನಿಯಾಮಾ ರ‍್ಹಯಲ ಆಶವೊನೆ ಭಂದಿನ ಘಾಲಾನೆ ನೈ ಆತು ವರಿ ಆ ಕ್ಹಾರು ಶಾನಾ ಕಾಮನು ನತ್ತಿ.