ಅಪೊಸ್ತಲೊ 26

1ತೆಳಾಮಾ ಅಗ್ರಿಪ್ಪನೆ, ಪೌಲಾನೆ ತು ತಾರಾ ಪರಾ ಬೊಲಸಕ್ಸಿ ಕತಾಮಾ, ಪೌಲಾ ಹತ ಉಚೈನ, ಪ್ರತಿವಾದ ಸು ಕರ‍್ಯೊ ಕದ್ಯಾಮ. 2ಅಗ್ರಿಪ್ಪ ರಾಜಾ಼, ಯೆಹುದಿಯೊ ಮಪರ ಆರೊಪ ದಿವಾನು ಕ್ಹಾರಾ ಆರೊಪನಾ ಹುತಿ ತಾರಾ ಕ್ಹಾಮೊ ಮಿ ಹಮ್ನಾಜ಼ ಪ್ರತಿವಾದ ಕರಾನು ರ‍್ಹಯಲ ಹುತಿ, ಮನೆ ಧನ್ಯ ವ್ಹೈನ ಕವೈಲ್ಯುಸ. 3ಕಾಕದ್ಯಾಮ, ಯೆಹುದಿಯೊಮಾ ರ‍್ಹಯಲ ಕ್ಹಾರಿಯೊ ಪದ್ದತಿಯೊ, ವಿವಾದೊ ತು ಘನ್ನೊ ಬಲ್ಲಲವಾಲೊ ರ‍್ಹಶಿ. ಮಾರಿಯೊ ವಾತೊ ತಾಳ್ಮೆಕ್ಹು ಐಕು ಕೈನ ಮಾಂಗಿಲ್ಯುಸ. 4ಮಿ ನ್ಹಾನೊ ರ‍್ಹತಾಮಾತೊ, ಯೆರುಸೆಲಿಮಮಾ ಮಾರಾ ಸ್ವಂತ ದೆಶನಾ ಮನಕ್ಹೊನಾ ಕ್ಹಾತೆ ರ‍್ಹೈನ, ಜಿವ್ನಾ ಕರಲ ತರಿಕೊ ಕ್ಹಾರಾ ಯಹುದಿಯೊನೆ ಗ್ವತ್ತ ರ‍್ಹಯಲಜ಼ ಛೆ. 5"ಮಿ ಮಾರಾ ಧರ್ಮಮಾ ಘನ್ನು ಕಟ್ಟ ನಿಟ್ಟ ಕರಾನು ಪದ್ದತ ಫರಿಸಾಯರ ಪಾಳಿಮಾ ಕರಲ ಲಿಂಗತ ಫರಿಸಾಯರ ಲಿಂಗತ ಚಾ಼ಲಿಲಿನ ಗಯೊಸ ಕೈನ, ಶುರುತೊಬಿ ತ್ಯುನೊನೆ ಗ್ವತ್ತ ಛೆ ಸಾಕ್ಷಿ ಕವಾನು ಮನಸ ರ‍್ಹಯುಮ ತ್ಯುನೆ ಕೆ ಸಕಸ" 6ಹಮ್ನಾಬಿ ಕ್ಹುದಾ ಹಮಾರಾ ಪಿತೃವೊನೆ, ದಿದಲ ವಾತ ಪುರಾ ಥಾವಸ ಕವಾನು ಆಸನಾ ಹುತಿಜ಼, ಹಮೆ ಹಮ್ನಾ ಫೈಸಲಾನಾ ಹುತಿ ನ್ಹ್ಯಾ ಹುಬ್ರಯಾಸ. 7ಅಪ್ನಾ ಬಾರಾ ಖಾಂಧಾವಾಲಾ ದಿನ್ನ ರಾತ ಆಸಕ್ತಿಕ್ಹು ಕ್ಹುದಾನೆ ಆರಾದಾನಾ ಕರ್ತಾ ತೆ ವಾತನಿ ಫಲ ಮಳಾನಾ ಹುತಿ ಆಸ ಕರ್ತಾ ಛೆ. ರಾಜಾ಼, ತೆಜ಼ ಆಸನಾ ಹುತಿ ಯೆಹುದಿಯೊ, ಮಾರಾ ವಿರುದ್ದ ದೊಶಾರೊಪಣೆ ಕರಾಡಾಸ. 8(ಮಲಾಕಿ 7:9) ಕ್ಹುದಾ ಮರಲವಾಲಾವೊನೆ ಉಟಾಡಲ ಬರೊಕ್ಹೊ ಕರಾನೆ ಅಸಾದ್ಯ ವ್ಹೈ ಕೈನ ತುಮೆ ಕಾ ಫೈಸ್ಲೊ ಕರೊಶಿ? 9ಯಕ್ಕ ಕಾಲ್ಮಾ ನಜೆರೆತನಾ ಯೆಸುನಾ ನಾಮನೆ ವಿರುದ್ದ ಘನ್ನಾ ಕಾರ‍್ಯೊ ಕರು ಕೈನ ಹಮೆ ವಿಚಾರ ಕರ್ಲಿದ್ಯಾಸ. 10ಯೆರುಸೆಲಿಮಮಾ ತಿಮ್ಮಜ಼ ಕರ‍್ಯೊತೊ. ಖಾಸ ಯಾಜಕ ಕ್ಹು ಅದಿಕಾರ ಪಡ್ದಿನ ಕ್ಹುದಾನಾ ಮನಕ್ಹೊಮಾ ಘನ್ನಾ ಜ಼ನಾವೊನೆ ಜೆಲ್ಮಾ ಮುಕ್ಕಿನ, ತ್ಯುನೊನೆ ಮರ್ವಾನಿ ಶಿಕ್ಷಾ ಥಯಲ್ಪರ, ಮಿ ತಿನೆ ಸಮ್ಮತಿ ಕರೊಸ. 11ಕ್ಹಾರಿಯೊ ಸಬಾ ಮಂದಿರೊಮಾ, ಮಿ ತ್ಯುನೊನೆ ಘನ್ನಿ ಸಲಾ ತ್ಯುನೊನೆ ಶಿಕ್ಷಾ ದಿನ್ನ ತ್ಯುನೊಕ್ಹು ಕ್ಹುದಾನಾ ವಿರುದ್ದ ವಾತೊ ಬೊಲಾನಿಯೊ ಕೊಶಿಶ ಕರ‍್ಯೊ. ತೆನೈಸೊ ತ್ಯುನೊಪರ ಘನ್ನೊ ಶಿಟ್ಟ ಥೈನ ಬಿಜಾ಼ ಗಾಮ ಲಕ್ಕಾ ಗೈನ ತ್ಯುನೊನೆ ತ್ರಾಸ ಕರ‍್ಯೊ. 12ಎ ಉದ್ದೆಶಕ್ಹು ಮಿ ಖಾಸ ಯಾಜಕ ಕ್ಹು ಅದಿಕಾರ, ಆದೆಶ ವ್ಹಂದಿನ ದಮಸ್ಕ ಗಾಮೆ ಜಾ಼ವಾನಿ ವಾಟ್ಮಾ ರಾಜಾ಼, 13ದುಪಾರ್ನಾ ವಕ್ಹತ್ಮಾ ಆಕಾಶತೊ ಯಕ್ಕ ಉಜಾಲು ಮಾರಾ ಸುತ್ತೆ ವರಿ ಮಾರಾ ಕ್ಹಾತೆ ಆವಾಲಾವೊನಾ ಸುತ್ತೆ ಸುರ್ಯಾನು ಉಜಾಲಾ ಲಿಂಗತ ಘನು ಮಿಂಚಾ಼ನು ಮಿ ದೆಕ್ಯೊ. 14ಹಮೆ ಕ್ಹರಾ ಜಿಮಿನ್ಪರ ಪಡ್ತಾಮಾ, ಸೌಲಾ, ಸೌಲಾ, ತು ಮನೆ ಕಾ ತ್ರಾಸ ಕರಾಡ್ಯೊಸ? ಕಾಟಾನಾ ಝಾಡೊನೆ ವದ್ದ್ಯೊಮ ತುನೆಜ಼ ತ್ರಾಸ ನ್ಹವೈ ಸು? ಕೈನ ಹಿಬ್ರಿನಿ ಭಾಶಾಮಾ ಕವಾನಿ ವಾತ ಐಕ್ಯೊ. 15ತೆಳಾಮಾ ಮಿ, ಕರ್ತಾ, ತು ಕುನ ವ್ಹೈ? ಕತಾಮಾ ಕರ್ತಾ "ತು ತ್ರಾಸ ಕಾರಾನೊ ಯೆಸುಜ಼ ಮಿ ವ್ಹೈ. 16ತು ಉಟಿನ ತಾರಾ ಪಗೊಪರ ಹುಬ್ರೆ ತುನೆ ಮಾರೊ ಸೆವಕ ಕರಿನ ಸಾಕ್ಷಿನಾ ಹುತಿ ನೆಮಸಾನಾ ಹುತಿ ತುನೆ ದಿಕ್ಹ್ಯೊಸ ಹಮ್ನಾಬಿ ಅಗೊಬಿ ತುನೆ ದೆಕಾಡಾನು ದರ್ಶನೊಮಾ, ತುನೆ ದಿಕ್ಹಲನಾ ಹುತಿ ತು ಮಾರಿ ಸಾಕ್ಷಿ ಥೈನ ರ‍್ಹೌ. 17ಮಿ ತಾರಾ ಇಸ್ರಯೆಲ ಸ್ವಂತ ಮನಕ್ಹೊಕಂತೊ, ಯೆಹುದಿಯೊ ನೈಸೊ ಮನಕ್ಹೊಕ್ಹು ತ್ಯುನೊಕನ ತುನೆ ವಳೌಸ ಕದ್ಯೊ. 18ತ್ಯುನೆ ಅಂದಾರಾಮಾತಾ ಉಜಾ಼ಲಾನೆ, ಸೈತನನಾ ಹತ್ಮಾತಾ ಕ್ಹುದಾಕನ ಫರಿನ, ಮಪರ ಬರೊಕ್ಹೊ ಮ್ಹೆಲಲಕ್ಹು ಪಾಪನಿ ಮಾಫಿ, ಪರಿಶುದ್ಧ ರ‍್ಹಯಲವಾಲಾವೊನಾ ಕ್ಹಾತೆ ತ್ಯುನು ಹಕ್ಕ ವ್ಹಂದಿಲಿವಾನಾ ಹುತಿ, ತ್ಯುನಾ ಡೊಳಾ ಕ್ಹುಲು ಕೈನ ಮಿ ತುನೆ ತ್ಯುನೊಕನ ವಳೌಸ” ಕದ್ಯೊ. 19ತಿನಾಹುತಿ "ರಾಜಾ಼ ಥಯಲ ಅಗ್ರಿಪ್ಪ,ಮನೆ ಮಳೆಲ ಮಿ ಪರಲೊಕನು ದರ್ಶನ ದೆಕಲಪರ ತಿನೆ ಅವಿಧೆಯ ನೈ ಥೈನ. 20ತೆಳಾಮಾ ದಮಸ್ಕಮ್ಮಾ ಬಿ ವರಿ ಯೆರುಸಲೆಮ್ಮಾ ಬಿ ಯುದಾಯಮ್ಮಾಬಿ ಕ್ಹಾರಾ ಸಿಮೆ ರ‍್ಹಹೆಲವಾಲಾವೊನೆ ಬಿ ಮನಕ್ಹೊನೆ"ತುಮಾರಾ ಪಾಪೊನಾ ಹುತಿ ಪಶ್ಚಾತಾಪ ಪಡಿನ 21"ತೆ ತಿನಾಹುತಿ ಯೆಹುದಿಯೊ ದೆವಾಲಮ್ಮಾ ಮನೆ ಧರ್ಲಿನ ಖಲಾಸ ಕರು ಕೈನ ಕೊಶಿಶ ಕರ‍್ಯಾ. 22ತೆಳಾಮಾ ಕ್ಹುದಾ ಮನೆ ಮದತ ಕರ‍್ಯೊ. ತೆ ಹಮನಾತೊ ಹಮನೊನೆ ಮದತ ಕರಾಡ್ಯೊಸ. ತಿನಾಹುತಿ ಹಮ್ನಾ ಯ್ಹಾ ಹುಬರಯೊತೊ ವರಿ ಮಿ ದೆಕೆಲ ಸಂಗತಿಯೊನಾ ಹುತಿ ಮನಕ್ಹೊನೆ ಸಾಕ್ಷಿ ಕವಾಡೊತೊ. ತಿನಾಹುತಿ ಮಿ ಕೈಜ಼ ನವು ಕದೆವಾಚಿ, ಮೊಶೆ ವರಿ ಪ್ರವಾದಿಯೊನಾ ಕ್ಹಾಮೊ ನೆರವೆರಸ ಕೈನ ಕದಲ ಸಂಗತಿಯೊ ಕತೊವ್ಹತ್ತೊ. 23ಕ್ರಿಸ್ತಾ ದುಕ ಕರಲಿನ ಮರಿನ ಮರೆಲಮಾತೊ ಪೈಲಾನೊ ಥೈನ ಉಟಿನ ಐನ ಯೆಹುದಿಯೊನೆ ವರಿ ಯೆಹುದಿಯೊನೆ ನೈಸೊ ಮನಕ್ಹೊ ಕ್ಹಾರಾ ರಕ್ಷಣೆ ಉಜಾಲು ಲಾವಸ ಕೈನ ಪ್ರಸಿದ್ದಿ ಕರಾವಾಲೊ ಥಾಶಿ ಕೈನ" 24ಇಮ್ಮ ಪೌಲಾ ತಿನಾಕ್ಹು ವಾದ ಕರೊತ್ತೊ ಕತ್ತಾಮ್ಮಾ ಫೆಸ್ತಾ. ಪೌಲಾ ತುನೆ ಪಿಸಾಳೊ ಧರ‍್ಯುಸು, ಘನು ಒದಾನು ತುನೆ ಪಿಸಾಳು ಕರಿಪಡಸ, ಕೈನ ವದರಿನ ಕದ್ಯೊ. 25ತಿನಾಹುತಿ ಪೌಲಾ ಮಹಾರಾಜಾ಼ ಥಯಲ ಫೆಸ್ತಾ. ಮಿ ಪಿಸಾಳೊ ನ್ಹೈವೈ ಮಿ ಕವಾನು ಕ್ಹರಿನಾ ವಾತೊ ಛೆ ಕದ್ಯೊ. 26ರಾಜೊ಼ ಥಯಲ ಅಗ್ರಿಪ್ಪನೆ ತೆ ಸಂಗತಿಯೊ ಗೊತ್ತ ಛೆ. ತಿನಾಹುತಿ ತಿನಾ ಕ್ಹಾಮೊ ಮಿ ಧೈರ್ಯಕ್ಹು ಬೊಲುಸಕೈ. ತೆ ಸಂಗತಿಯೊಮ್ಮಾ ಯಕ್ಕಬಿ ಜ್ಹಾಕಿಲಿದೆಲ ನತ್ತಿ ನಂಬಾನು ಸುವೈ ಕದ್ಯಾಮ, ಕಾಕದ್ಯಾಮ್ಮಾ ತೆ ಯಕ್ಕ ಮೂಲಾಮ್ಮಾ ಥಯಲ ಕಾಮ್ಮ ನ್ಹವೈ. 27ರಾಜೊ಼ ಅಗ್ರಿಪ್ಪ, ಪ್ರವಾದಿಯೊನೆ ತು ನಂಬಶಿಸು? ಮನೆ ಗೊತ್ತಛೆ ಕೈನ ಕದ್ಯೊ" 28"ತಿನಾಹುತಿ ಅಗ್ರಿಪ್ಪ ರಾಜೊ಼ ಉತ್ತರಾ ದಿದ್ಯೊ ; ದಕ್ಹಿ ಕೊಶಿಶಕ್ಹು "ಮನೆ ಆಸಾನಕ್ಹು ಕ್ರಿಸ್ತ ಥವಾನಾಹುತಿ ಒಂಡಬಡಿ ಸು ತು? ಕೈನ ಕತ್ತಾಮ್ಮಾ" 29ಪೌಲಾ ಚೊ಼ಕು ವೈಸು ಕಟ್ಟವೈ ತೆ ಮನೆ ಖಾಸ ನ್ಹವೈ. ತು ಯಕ್ಲೊಜ಼ ನ್ಹವೈ ತೆಳಾಮಾ ಮನೆ ಕರಾನು ಹರಯಕ್ಲೊ ಮಾರಾನಿಂತ ಥೌ ಕೈನೆ ಮಿ ಕ್ಹುದಾನೆ ಪ್ರಾರ್ಥನಾ ಕರುಸ. ತಿನಾಹುತಿ ತೆ ಸಂಕೊಲೆಯೊ ಯಕ್ಕಜ಼ ತಮನೊನೆ ನಕೊ ಕೈನ ಕದ್ಯೊ. 30ರಾಜೊ಼ ಅಗ್ರಿಪ್ಪ,ರಾಜ್ಯಪಾಲ ಫೆಸ್ತಾ,ಬೆರ್ನಿಕೆ ವರಿ ತ್ಯುನಾಕ್ಹಾತೆ ಬೈಟೆಲ ಮನಕ್ಹೊ ಕ್ಹಾರಾ ಹುಬರೈನ. 31ತ್ಯಾತಾ ಭಾರಾ ಆಯಾ ತ್ಯುನೆ ಯಕ್ಕನೆ ಯಕ್ಕ ತೆ ಮನಕ್ಹನೆ ಮೌತನಿ ಶಿಕ್ಷಾ ದ್ಯು ನೈ ಕೈನ ವರಿ ಜೆಲಮ್ಮಾ ಘಾಲು ನೈ ಕೈನ ತೆ ಕ್ಹರಿ ಕೆಟ್ಟನು ಸುಜ಼ ನತಿ ಕರ‍್ಯೊ ಕೈನ ಕದ್ಯಾ. 32ತೆಳಾಮಾ ಅಗ್ರಿಪ್ಪ ಫೆಸ್ತಾನಾ, ತೆ ಸಿಸರನೆ ಮಾಂಗಿ ನೈ ಲಿದ್ಯೊಮ್ಮ,ಅನೆ ಚೊಡಾನಿ ವಾತ್ತ ವ್ಹತ್ತಿ ಕೈನ ಕದ್ಯೊ.