ಕ್ಹುದಾನಿ ಕ್ಹರಿನಿ ವಾಕ್ಯಾ
1 ಥೆಸಲೊನಿಕ 2
ಥೆಸಲೊನಿಕಾಮಾ ಪೌಲಾನು ಕಾಮ
ಹಮಾರಾ ಭಾಯೊ ವರಿ ಭೆನೊ, ಹಮೆ ತುಮೊಕನ ಆಯಲ ಬೆಕ್ಕಾರ ಥಯು ನೈ ಕವಾನು ತುಮೊನೆ ಗ್ವತ ಛೆ. ಥೆಸಲೊನಿಕೆ ಆವಾತಿ ಪೈಲಾ ಹಮೆ ಫಿಲಿಪ್ಪಿಮಾ ಕೆಕ್ಲು ತ್ರಾಸ ಖಾದ್ಯಾ ಕೈನ ತುಮೊನೆ ಗ್ವತ್ತ ಛೆ. ತೆನೈಸೊ ಹಮೆ ಧೈರ್ಯಕ್ಹು ರ‍್ಹವಾನೆ ವರಿ ಕ್ಹುದಾಕಂತಿ ಆಯಲ ಸುವಾರ್ತೆ ಕವಾನೆ ಕ್ಹುದಾಜ಼ ಹಮೊನೆ ಆಸ್ರೊ ಕರ‍್ಯೊ. ಕ್ಹುದಾ ಸು ಕವಸ ತೆಜ಼ ಹಮೆ ಕದ್ಯಾ. ಹಮೆ ಕರಾನಿ ಭೊದನೆ ತಪ್ಪ ನ್ಹವೈ ವರಿ ಕೆಟ್ಟ ಉದ್ದೆಶ ತಿಮಾ ನತ್ತಿ ವರಿ ತುಮೊನೆ ಮೊಸ ಕರಾನೆ ಕೊಶಿಶ ನತ್ತಿ. ಹಮೆ ಸುವಾರ್ತೆ ತಿಳ್ಸಿಯೆಸ. ಕಾಕದ್ಯಾಮ ಕ್ಹುದಾ ಹಮೊನೆ ಪರಿಕ್ಷಾ ಕರ‍್ಯೊಸ ವರಿ ಸುವಾರ್ತೆ ಕವಾಹುತಿ ಹಮೊನೆ ದಿದ್ಯೊಸ. ತಿನಾಹುತಿ ಮನಕ್ಹೊನೆ ಮೆಚ್ಚಿಸಾನು ಛೊಡಿನ ಅಪ್ನೊ ಮನಸ ಪರಿಕ್ಷಾ ಕರಾಲೊ ಕ್ಹುದಾನೆಜ಼ ಮೆಚ್ಚಿಸಾನೆ ಕೊಶಿಶ ಕರಿಯೆಸ.
ಹಮೆ ತುಮೊಕನ ಆಯಲ ತುಮೊನೆ ಚೊ಼ಕೊಜ಼ ಕೈನ ಸುಳ್ಳ ಕೈನ ತುಮೊನೆ ಮಳ್ಳ ಕರಲಿವಾನೆ ನವೈ ಕೈನ ತುಮೊನೆ ಗ್ವತ್ತ ಛೆ. ಹಮೆ ತುಮೊಕಂತಾ ದೊಕ್ಡಾ ಕಾಳ್ಳಿವಾನೆ ಕೊಶಿಶ ಕರ‍್ಯಾ ನೈ; ಹಮಾರಿ ಆಸ ಝಾಕಿಲಿನ ವೆಷ ಘಾಲ್ಲಿದ್ಯಾನ್ಹೊತಾ. ಎ ಕ್ಹರಿ ವ್ಹೈಕೈನ ಕ್ಹುದಾನೆ ಗ್ವತ್ತ ಛೆ. ತುಮೊಕನ ರ‍್ಹವಾದೆ ಬಿಜಾ಼ವೊಕನ ಆವಾನು ಮಾನಾ ಮರ್ಯಾದಿ ತುಮೊಕ್ಹು ರ‍್ಹೈನೆಕಾ ವರಿ ಬಿಜಾ಼ ಮನಕ್ಹೊತಿ ರ‍್ಹೈನೆಕಾ ಹಮೆ ಕೆಳಾಮಾಜ಼ ಆಸ ಕರ‍್ಯಾನೈ.
ಹಮೆ ಕ್ರಿಸ್ತನಾ ಅಪೊಸ್ತಲೊ ಥೈನ ತುಮಾರಾ ಕ್ಹಾತೆ ರ‍್ಹತಾಮಾ, ಹಮಾರಾ ಹುತಿ ತುಮೊನೆ ರಬಾವಾನೆ ಹಮಾರೊ ಅದಿಕಾರ ಉಪಯೊಗ ಕರ ಸಕ್ತಾತಾ. ತೆನೈಸೊ ತುಮಾರಾ ಕ್ಹಾತೆ ಹಮೆ ಘನ್ನಾ ಶಾಂತ ವ್ಹತ್ತಾ. ಮಾ ತಿನಾ ನ್ಹಾನಾ ಬಚ್ಚಾ಼ವೊನೆ ಕಿಮ ಜ಼ತ್ತನೆ ದೆಕಿಲಿವಸ ಹಮೆ ತಿಮ್ಮಜ಼ ದೆಕಿಲಿದ್ಯಾ. ತುಮೊನೆ ಹಮೆ ಘನ್ನಾ ಮಯಾ ಕರ‍್ಯಾ. ತಿನಾಹುತಿ ಕ್ಹುದಾನಿ ಸುವಾರ್ತೆ ತುಮಾರಾ ಕ್ಹಾತೆ ಕೈಲಿವಾನೆ, ಯಕ್ಕಜ಼ ನೈಸೊ, ತುಮಾರಾ ಹುತಿ ಹಮಾರೊ ಜ಼ಲಮ ದಿವಾನೆ ಬಿ ತಯ್ಯಾರ ಥಯಾ. ಹಮಾರಾ ಭಾಯೊ ವರಿ ಭೆನೊ, ಹಮೆ ಅನುಭವಿಸಲ ತ್ರಾಸ ವರಿ ತುಮೊನೆ ಶೆ ಛೆ. ತುಮೊನೆ ಕ್ಹುದಾನು ಉಪದೆಶ ಕರತಾಮಾ ತುಮೆ ರಾಬಲ ದೊಕ್ಡಾಮಾ ವಾಟೊ ದ್ಯು ನೈ ಕೈನ ತುಮೊನೆ ತ್ರಾಸ ಥೌ ನೈ ಕೈನ ದಿನ್ನ ರಾತ ರಾಬಿನ ಜಿವ್ನಾ ಚ಼ಲಾವಾಡ್ಯಾತಾ.
ವಿಸ್ವಾಶಿಯೊ ರ‍್ಹಯಲ ತುಮಾರಾ ಕ್ಹಾತೆ ಹಮಾರು ನಡುವಳಿಕೆಕ್ಹು ರ‍್ಹತಾಮಾ ತಪ್ಪ ಕರೆನೈಸೊ ರ‍್ಹೈನ ವರಿ ಪರಿಶುದ್ಧ ರ‍್ಹೈನ ವರಿ ಕೆಟ್ಟ ನೈಸೊ ರ‍್ಹೈನ ಜಿವ್ನಾ ಕರ‍್ಯಾತಾ. ಎ ಕ್ಹಾರು ಕ್ಹರಿ ವ್ಹೈ ಕೈನ ತುಮೆಜ಼ ಸಾಕ್ಷಿ ವ್ಹೈ ವರಿ ಕ್ಹುದಾಬಿ ಸಾಕ್ಷಿ ಥಯೊಸ. ಯಕ್ಲಾನಾ ಕ್ಹಾತೆ ಹಮೆ ಇಮ್ಮ ವ್ಹತ್ತಾ ಕೈನ ತುಮೊನೆ ಗ್ವತ್ತ ಛೆ. ಹಮೆ ತುಮೊನೆ ಪ್ರೊತ್ಸಾಹಿತ ಕರ‍್ಯಾ ವರಿ ತುಮೊನೆ ಮಯಾ ಕರ‍್ಯಾ. ವರಿ ಹಮೆ ತಮನೊನೆ ವಿಂತಿ ಕರ‍್ಯಾ ತುಮೊನೆ ತಿನಿ ರಾಜ್ಯನೆ ವರಿ ಮಹಿಮಾನೆ ಬಲಾಯಲ ಕ್ಹುದಾನಾ ಹುತಿ ಯೊಗ್ಯ ರ‍್ಹಯಲ ಜಿವ್ನಾ ಕರೊ ಕೈನ ತುಮೊನೆ ಕದ್ಯಾ. ತೆ ತುಮೊನೆ ತಿನಿ ರಾಜ್ಯಮ್ಮಾ ವರಿ ಮಹಿಮಾ ಪಾಲ ಲಿವಾನೆ ಬಲಾಯಾಸ.
ತುಮೆ ಕ್ಹುದಾನು ಸಂದೆಶ ವಪ್ಪಿಲಿದಲಹುತಿ ಹಮೆ ಕ್ಹುದಾನೆ ಹಮೆಶಾಬಿ ಸ್ತುತಿ ಕರಿಯೆಸ. ಹಮೊಕ್ಹು ತೆ ಸಂದೆಶ ಐಕಿನ, ತೆ ಕ್ಹುದಾನಿ ವಾಕ್ಯಾ ವ್ಹೈ ಕೈನಜ಼ ವಪ್ಪಿಲಿದ್ಯಾಸ ತೆನೈಸೊ ಮನಕ್ಹೊ ಕದಲ ವಾಕ್ಯಾಕ್ಹು ನ್ಹವೈ. ಎ ಕ್ಹರಿಮಾಜ಼ ಕ್ಹುದಾನು ಸಂದೆಶ ವ್ಹೈ. ತೆ ಸಂದೆಶಪರ ಬರೊಕ್ಹೊ ಕರಲ ಹುತಿಜ಼ ತುಮೊಮಾ ತೆ ಕಾಮ ಕರಸ. ಹಮಾರಾ ಭಾಯೊ ವರಿ ಭೆನೊ, ತುಮೆ ಯುದಾಯಮ್ಮಾ ರ‍್ಹಯಲ ಕ್ಹುದಾನಿ ಸಬೆ ಲಿಂಗತ ಛೆ. ಯೆಸು ಕ್ರಿಸ್ತಮಾ ಬರೊಕ್ಹೊ ಮ್ಹೆಲಲ ಹುತಿ ತ್ಯುನೆ ಬಿಜಾ಼ ಯೆಹುದಿಯೊನಾ ಮನಕ್ಹೊನಾ ಹತೆ ತ್ರಾಸ ಖಾದ್ಯಾ. ತಿಮ್ಮಜ ತಮೆಬಿ ತಮಾರಾ ಸ್ವಂತ ಮನಕ್ಹು ತ್ರಾಸ ಕ್ಹಾವೊ. ತೆ ಮನಕ್ಹೊ ಪ್ರಭು ಥಯಲ ಯೆಸುನೆ ವರಿ ಪ್ರವಾದಿಯೊನೆ ಖಲಾಸ ಕರಿಪಾಡ್ಯಾ. ತ್ಯುನಾ ದೆಶಮಾತಾ (ಜುದೆಯ) ಹಮೊನೆ ಜ಼ಬರದಸ್ತಿಕ್ಹು ಭಾರಾ ಘಾಲಿಪಾಡ್ಯಾ. ತ್ಯುನೆ ಕ್ಹುದಾನೆ ಪಸಂದ ನ್ಹೊತಾ ವರಿ ಕ್ಹಾರಾ ಮನಕ್ಹೊನಾ ವಿರುದ್ಧ ಛೆ. ಹೊ, ಯೆಹುದಿ ನೈಸೊ ಮನಕ್ಹೊ ರಕ್ಷಣೆ ದಿವಾನಿ ಸುವಾರ್ತೆ ಅಪೆ ಕಯೆನೈಸೊ ಅಪೊನೆ ತಡ್ದಾನೆ ತ್ಯುನೆ ಕೊಶಿಶ ಕರಾಡಾಸ. ಇಮ್ಮ ತ್ಯುನೆ ತ್ಯುನಾ ಪಾಪೊನೆ ಹಜು಼ನ ದಕ್ಹಾ ಪಾಪೊಕ್ಹು ಘಡೊ ಭರಿನ ಆಯೊಸ. ಲಾಸ್ಟೆ ಕ್ಹುದಾನಿ ಶಿಟ್ಟ ತ್ಯುನಾ ಉಪ್ಪರ ಆವಸ.
ಮಾರಾ ಭಾಯೊ ಭೆನೊ, ಹಮೆ ತುಮೊಕ್ಹು ದಕ್ಹಿಯೆಳ ಛೊಡಿನ ಗಯಾತಾ. ವಿಚಾರಕ್ಹು ನೈ ಶಾರಿರಿಕ್ಹು ದುರ ಥಯಾಸ. ತುಮೊನೆ ದೆಕಾನೆ ಘನ್ನಿ ಆಸಕ್ಹು ಘನ್ನಾ ಕೊಶಿಶ ಕರ‍್ಯಾ. ಹೊ, ತುಮೊಕನ ಔ ಕರ‍್ಯಾತಾ. ಪೌಲಾ ಥಯಲ ಮಿ, ಕ್ಹರಿಬಿ ಘನ್ನಿಸಲಾ ಔ ಕೈನ ಕೊಶಿಶ ಕರ‍್ಯೊ, ತೆನೈಸೊ ಮನೆ ಸೈತಾನ ಹುಬ್ರಾಡ್ಯೊ. ಯೆ ಥಯಲ ಪರ ಅಪ್ನೊ ಪ್ರಭು ಥಯಲ ಯೆಸು ಕ್ರಿಸ್ತ ಆಯಲಪರ ಹಮೆ ತಾರಿಫ ಕರಲಿವಾನಿ ಹಮಾರಿ ಆಸ, ಹಮಾರಿ ಖುಶಿ, ಹಮಾರಿ ಕಿರಿಟ ತುಮೆಜ಼ ವ್ಹೈ. ಕ್ಹರಿಮಾಜ಼ ತುಮೆ ಅಭಿಮಾನ ವ್ಹೈ. ಹಮಾರಿ ಖುಶಿ ಥಯಾಸ.
ಕ್ಹುದಾನಿ ಕ್ಹರಿನಿ ವಾಕ್ಯಾ. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.