1 ಕೊರಿಂಥ 4

ಕ್ರಿಸ್ತನಾ ಅಪೊಸ್ತಲೊ

1ಮನಕ್ಹೊ ಅಪೊನೆ ಕ್ರಿಸ್ತನಾ ಸೆವಕೊ ವ್ಹೈ ಕೈನ ತುಮೆ ತಿಳದಿಲಿದಲ ರ‍್ಹೌ. ಕ್ಹುದಾ ತಿನಾ ರಹಸ್ಯ ರ‍್ಹಯಲ ಕ್ಹರಿ ಅಪೊನೆ ಒಪ್ಸಿನ ದಿದ್ಯೊಸ ಕೈನ ಕೈಲ್ಯು. 2ಇಮ್ಮ ರ‍್ಹತಾಮಾ, ಜವಾಬ್ದಾರಿ ಲಿದಲವಾಲಾ ಸೆವಕ ಮಾಲಕನೆ ಕಾಮೊಮಾ ಬರೊಕ್ಹೊವಾಲಾ ವ್ಹೈ ಕೈನ ದೆಕಾಡು. 3ತುಮೆಜ಼ ಮನೆ ವಿಚಾರಣೆ ಕರ‍್ಯಾ ತುಬಿ ಕಯಾಬಿ ಮನಕ್ಹನಾ ಮುಕಾಂತರ ನ್ಯಾಯಾಲಯಮಾ ಮನೆ ವಿಚಾರಣೆ ಥೈಯು ತುಬಿ ಮಿ ಚಿಂತಾ ನೈ ಕರ‍್ತೊ. ತೆನೈಸೊ ಮನೆ ಮಿಜ಼ ವಿಚಾರಣೆ ನೈ ಕರಲೆತೊ. 4ಮಿ ತಪ್ಪ ಕರ‍್ಯೊಸ ಕೈನ ಮಾರಿ ಮನಸಾಕ್ಷಿನೆ ದಿಕ್ಹಾಡು ನತ್ತಿ. ತೆ ಮನೆ ನಿರದೊಶಿ ಥೈನ ನೈ ಕರಸಕ್ತು. ಮನೆ ನ್ಯಾಯನೊ ಪೈಸ್ಲೊ ಕರಾಲೊ ಪ್ರಭು ಯಕ್ಲೊಜ಼ ವ್ಹೈ. 5ತಿನಾಹುತಿ ಕರೆಟ್ಟ ಟೈಮತಿ ಪೈಲಾ ಪೈಸ್ಲೊ ಕರೊ ನಕೊ. ಅಂದಾರಾಮಾ ದಡಿರ‍್ಹಯಲ ಕ್ಹಾರಾವೊನಾ ಉಪ್ಪರ ತೆ ಉಜಾಲು ದಿವಸ. ಮನಕ್ಹೊನಾ ಮನಸೊ ರಹಸ್ಯ ರ‍್ಹಯಲ ಉದ್ದೆಶೊ ತೆ ದೆಕಾಡಿನ ದಿವಸ. ತೆಳಾಮಾ ಹರ ಯಕ್ಲಾನೆ ಆವಾನು ಹೊಗಳಿಕೆ ಕ್ಹುದಾಕ್ಹುಜ಼ ಆವಸ. 6ಭಾಯೊ ಭೆನೊ, ಮಿ ತುಮಾರಾ ಹುತಿ ಎ ವಿಶಯೊಮಾ ಅಪೊಲೊಸನೆ ವರಿ ಮನೆ ಉದಾಹರಣೆ ಕರಿನ ದಿದ್ಯೊಸ. ಕಾ ಕದ್ಯಾಮ ಬರ್ದಲ ನಿಯಮೊ ಚಾ಼ಲಿಂಜಾ಼ ಕವಾನಿ ವಾಕ್ಯಾನು ಮತ್ಲಬ ತುಮೆ ಹಮಾರಾಕ್ಹು ಶಿಕ್ಕು. ತೆಳಾಮಾ ತುಮೆ ಯಕ್ಲಾನಾ ವಿಷಯಮಾ ಹೆಚ್ಕಿ ಥೈನ ವರಿಯಕ್ಲಾನೆ ದ್ವೆಶ ನೈ ಕರ‍್ತಾ. 7ತುಮೊನೆ ಬಿಜಾ಼ ಮನಕ್ಹೊ ತಿಬಿ ಚೊ಼ಕಾ ಕೈನ ಕುನ್ ಕವಸ? ತುಮೊಕನ ರ‍್ಹವಾನು ಹರಯಕ್ಕ ಕ್ಹುದಾಜ಼ ತುಮೊನೆ ದಿದ್ಯೊಸ. ಇಮ್ಮ ರ‍್ಹತಾಮಾ, ತುಮಾರಾ ಸ್ವಂತ ತಾಕತಕ್ಹು ತೆ ಕ್ಹಾರು ಪಡ್ದಿಲಿದ್ಯಾಸ ಕೈನ ಕಾ ಜಂಬಾ ಕೊಚ್ಚಿಲಿವೊಶಿ? ತುಮೊಕನ ರ‍್ಹಯಲ ಕ್ಹಾರುಜ಼ ತೆ ದಿದಲ ದಾನ ನ್ಹವೈ ಸು? 8ತುಮೊನೆ ಚಾ಼ಯೆ ಥಯಲ ಹರಯಕ್ಕ ತುಮೊನೆ ಛೆ ಕೈನ ತುಮೆ ತಿಳ್ದಿಲಿದ್ಯಾಸ. ತುಮೆ ತುಮೊನೆಜ಼ ಸೌಕಾರೊ ವ್ಹೈ! ಕೈನ ರಾಜಾ಼ ವ್ಹೈ ಕೈನ ತಿಳ್ದಿಲಿದ್ಯಾ ನತ್ತಿ. ತುಮೆ ಕ್ಹರಿಮಾಜ಼ ರಾಜಾ಼ ರ‍್ಹವತ್ತೊ ಮನೆ ಕೆಕ್ಲಿಕಿ ಖುಶಿ ಥಾತಿತಿ. ಹಮ್ನಾ ಹಮೆ ತುಮಾರಾ ಕ್ಹಾತೆ ರಾಜಾ಼ ಥಾತಾತಾ. 9ತೆನೈಸೊ ಕ್ಹುದಾ ಮನೆಬಿ ವರಿ ಉಗ್ರಲ ಅಪೊಸ್ತಲೊನೆಬಿ ಲಾಸ್ಟ ಸ್ಥಾನ ದಿದ್ಯೊಸ ಕೈನ ಮನೆ ದಿಕ್ಹಸ. ಕ್ಹಾರಾ ಮನಕ್ಹೊನಾ ಕ್ಹಾಮಾ ಹಮೆ ಮೌತನೆ ಗುರಿ ಥಯಲವಾಲಾ ಥಯಾಸ. ಹಮೆ ದೆವ ದುತೊನೆಬಿ ಮನಕ್ಹೊನೆಬಿ ಕ್ಹಾರಿ ಜಗತ್ನೆ ಮಜಾ಼ಕ ಥಯಾಸ. 10ಹಮೆ ಕ್ರಿಸ್ತನಾ ಹುತಿ ಪಿಸಾಳಾ ಥಯಾಸ. ತೆನೈಸೊ ತುಮೆ ತುಮೊನೆ ಕ್ರಿಸ್ತಮಾ ಘನ್ನಾ ಗ್ಯಾನಿಯೊ ಕೈನ ತಿಳ್ದಿಲಿದ್ಯಾಸ. ಹಮೆ ತಾಕತ ನೈಸೊವಾಲಾ ಥಯಾಸ, ತೆನೈಸೊ ತುಮೆ ತುಮೊನೆಜ಼ ತಾಕತವಾಲಾ ವ್ಹೈ ಕೈನ ತಿಳ್ದಿಲಿದ್ಯಾಸ. ಮನಕ್ಹೊ ತುಮೊನೆ ಮರ್ಯಾದಿ ದಿವಸ; ಹಮೊನೆ ತುಬಿ ತ್ಯುನೆ ಮರ್ಯಾದಿ ನೈ ದೆತಾ. 11ಹಮ್ನಾಬಿ ಹಮೆ ಭುಕ್ಕಾ ಥಯಾಸ; ತರಕ್ಹಾ ಥಯಾಸ; ಘಾಲಿವಾನೆ ಕಮ್ಮ ವಣ್ಣಾ ರ‍್ಹಯಲವಾಲಾ ಥಯಾಸ. ತೆಳಾಮ ತೆಳಾಮಾ ಹಮೊನೆ ಮಾರ ಬೆಟ್ತೊ ರ‍್ಹವಸ; ಹಮೊನೆ ಘರಬಿ ನತ್ತಿ. 12ಹಮೆ ಖಾವಾನಾ ಹುತಿ ಹಮಾರಾ ಹತೊಕ್ಹು ಕಷ್ಟ ಪಡ್ದಿನ ರಾಬಿಯೆಸ. ಮನಕ್ಹೊ ಹಮೊನೆ ಕ್ಹರಾಪಸ, ಹಮೆ ತುಬಿ ತ್ಯುನಾ ಹುತಿ ಆಶಿರ್ವಾದ ಮಾಂಗಿಲಿಯೆಸ. ಮನಕ್ಹೊ ಹಮೊನೆ ತ್ರಾಸ ಕರ‍್ಯಾ ತುಬಿ ತಡ್ದಿಲಿಯೆಸ. 13ಮನಕ್ಹೊ ಹಮಾರಾ ಹುತಿ ಕೆಟ್ಟ ವಾತೊ ಬೊಲಸ. ಹಮೆ ತುಬಿ ತ್ಯುನೊನೆ ಚೊ಼ಕಾ ವಿಷಯೊ ಕಯೆಸ. ಆಜ಼ ಲಕ್ಕಾಬಿ ಮನಕ್ಹೊ ಹಮೊನೆ ದುನಿಯಾಮಾನಿ ಕಸಾ ವ್ಹೈ ಕೈನ ಜಿಮಿನ ಪರ ರ‍್ಹಯಲ ಹೊಲಸ ವ್ಹೈ ಕೈನ ತಿಳ್ದಿಲಿದ್ಯಾಸ. 14ತುಮೊನೆ ಸರಮ ಲಾವಾನಾ ಹುತಿ ಮಿ ಕೊಶಿಶ ಕರಾಡೊ ನತ್ತಿ. ತೆನೈಸೊ ತುಮೆ ಮಾರಾ ಮಯಾನಾ ಬಚ಼್ಚಾ ಥಯಲ ಹುತಿ ತುಮೊನೆ ಹುಶಾರ ಕರಾನಾ ಹುತಿ ಎ ಸಂಗತಿಯೊ ಬರ್ದಾಡೊಸ. 15ತುಮೊನೆ ಕ್ರಿಸ್ತಮಾ ದಕ್ಹ ಹಜಾ಼ರ ಜ಼ನಾ ಮಾಸ್ತರೊ ವಸೆ, ತೆನೈಸೊ ಘನ್ನಾ ಜ಼ನಾ ಬಾಪೊ ನತ್ತಿ. ಸುವಾರ್ತೆನಾ ಮುಲಕ ಕ್ರಿಸ್ತ ಯೆಸುಮಾ ಮಿಜ಼ ತುಮೊನೆ ಆತ್ಮಿಕ ಬಾ ಥಯೊಸ. 16ತಿನಾಹುತಿ ತುಮೆ ಮಾರಾ ನಿಂಗತ ರ‍್ಹೌ ಕೈನ ಮಿ ತುಮೊಕನ ಮಾಂಗಿಲ್ಯುಸ. 17ತಿನಾಹುತಿಜ಼, ಮಿ ತುಮೊಕನ ತಿಮೊಥೆನೆ ವಳಾವಾಡೊಸ, ತೆ ಪ್ರಭುಮಾ ಮಾರೊ ದಿಕ್ರೊ ಥಯೊಸ. ಮಿ ತಿನೆ ಮಯಾ ಕರುಸ. ತೆ ಬರೊಕ್ಹಾವಾಲೊ ಥಯೊಸ. ಮಿ ಕ್ರಿಸ್ತ ಯೆಸುಮಾ ರ‍್ಹವಾನಾ ತರಿಕಾನೆ ತೆ ತುಮೊನೆ ಶೆ ಕರಾವಸ. ಹರಯಕ್ಕಬಿ ಕ್ಹಾರಾ ಸಭೆಮಾ ಮಿ ತಿನಾ ನಿಂಗತಜ಼ ಜಿವ್ನಾ ಉಪದೆಶ ಕರುಸ. 18ತುಮೊಮಾ ದಕ್ಹಾ ಜ಼ನಾ ಜಂಬಾ ಕೊಚ್ಚಿ ಲಿವಾಡಾಸ. ಮಿ ತುಮೊಕನ ವರಿ ನೈ ಆತೊ ಕೈನ ವಿಚಾರ ಕರಿನ ತುಮೆ ಜಂಬಾ ಕೊಚ್ಚಿ ಲಿವಾಡಾಸ. 19ತೆನೈಸೊ ಮಿ ಘನ್ನೊ ಜ಼ಲ್ದಿ ತುಮೊಕನ ಔಸ. ಪ್ರಭುನಿ ಚಿತ್ತ ರ‍್ಹೈಮ, ಮಿ ಐನ ಜಂಬಾ ಕೊಚ್ಚಿ ಲಿವಾನಾ ವಾತ ನ್ಹವ್ಹೈ, ತ್ಯುನೆ ಸು ಕರಸಕ್ತಾ ಕವಾನು ತಿಳ್ದಿಲ್ಯುಸ. 20ಕಾಕದ್ಯಾಮ ಕ್ಹುದಾನಿ ರಾಜ್ಯ ಕ್ಹಾಲಿ ವಾತ ನ್ಹವ್ಹೈ ತೆ ತಾಕತ ಥಯುಸ. 21ತುಮೆ ಕಯು ಪಸಂದ ಕರೊಶಿ? ಮಿ ಲಾಕಡಿ ಲಿನ ಔ ಸು? ತೆನೈಸೊ ಮಯಾ ವರಿ ಶಾಂತಕ್ಹು ಔ ಸು?