1 ಕೊರಿಂಥ 1

1ಪೌಲಾ ಬರ್ದಾನು ಪತ್ರ. ಕ್ರಿಸ್ತ ಯೆಸುಮಾ ಅಪೊಸ್ತಲ ಥಾವಾನಾಹುತಿ ಮಿ ಕ್ಹುದಾನಾ ಚಿತ್ತನಿಂಗತ ಬಲಾಯಲವಾಲೊ ವ್ಹೈ. ಮಿ ಎ ಪತ್ರ ಕ್ರಿಸ್ತಮಾ ಅಪ್ನೊ ಭೈ ಥಯಲ ಸೊಸ್ಥೆನನಾ ಕ್ಹಾತೆ ಬರ್ದಾಡೊಸ. 2ಕ್ರಿಸ್ತ ಯೆಸುಮಾ ಪವಿತ್ರ ಥೈನ ಕರಲ ಕೊರಿಂಥನಾ ಕ್ಹುದಾನಾ ಸಬೆವಾಲಾವೊನೆ ಎ ಪತ್ರ ಬರ್ದಾಡೊಸ. ತುಮೆ ಕ್ಹುದಾನಾ ಪವಿತ್ರ ಮನಕ್ಹೊ ಥಾವಾನೆ ಬಲಾಯಲವಾಲಾ ವ್ಹೈ. ಪ್ರಭು ಥಯಲ ಯೆಸು ಕ್ರಿಸ್ತನಾ ನಾಮಪರ ಬರೊಕ್ಹೊ ಮ್ಹೆಲಾಲಾ ಕ್ಹಾರಾ ಮನಕ್ಹೊನಾ ಕ್ಹಾತೆ ತುಮೆಬಿ ಬಲಾಯಲವಾಲಾ ಥಯಾಸ. ಯೆಸು ಕ್ರಿಸ್ತ ತ್ಯುನೊನೆಬಿ ವರಿ ಅಪೊನೆಬಿ ಪ್ರಭು ಥಯೊಸ. 3ಅಪ್ನೊ ಬಾ ಥಯಲ ಕ್ಹುದಾಕ್ಹು ಪ್ರಭು ಥಯಲ ಯೆಸು ಕ್ರಿಸ್ತಕ್ಹು ತುಮೊನೆ ಕೃಪಾ ಶಾಂತಿ ಮಳಾದೆ.

ಕ್ರಿಸ್ತನೊ ಆಶಿರ್ವಾದ

4ಕ್ರಿಸ್ತ ಯೆಸುಮಾ ಕ್ಹುದಾ ತುಮೊನೆ ದಿದಲ ಕೃಪಾನಾ ಹುತಿ ಮಿ ತುಮಾರಾ ಹುತಿ ಕೆಳಾಮಾಬಿ ಕ್ಹುದಾನೆ ಸ್ತುತಿ ಕರುಸ. 5ಕಾಕದ್ಯಾಮ, ಕ್ರಿಸ್ತ ಯೆಸುಮಾ ತುಮೆ ಕ್ಹಾರಿ ತರಾಮಾ ಸೌಕಾರೊ ವ್ಹೈ, ಗ್ಯಾನಿಯೊ ವ್ಹೈ ವರಿ ವಾತೊ ಬೊಲಾಮಾ ಹುಷಾರ ಥಯಾಸ. 6ಎನೈಸೊ, ಕ್ರಿಸ್ತ ಯೆಸುನಾ ಹುತಿ ಸಾಕ್ಷಿ ತುಮೊಮಾ ಛೆ ತಿನಾಹುತಿ ತುಮೆ ಘಟ್ಟ ಛೆ. 7ಇಮ್ಮ ರ‍್ಹಯಮ, ಅಪ್ನೊ ಪ್ರಭು ಥಯಲ ಯೆಸು ಕ್ರಿಸ್ತ ವರಿ ಆವಾನು ಕೈದತಾ ರ‍್ಹಯಲ ತುಮೆ ಕ್ಹುದಾ ಕಂತು ಆವಾನಿ ಹರಯಕ್ಕ ಆತ್ಮಿಕನಿ ವರಾ ವ್ಹಂದಿಲಿವಾನು ಚು಼ಕೈಲೆತಾ ನೈ. 8ಯೆಸು ತುಮೊನೆ ಲಾಸ್ಟ ಲಕ್ಕಾ ವಚಾ಼ಡಸ. ಅಪ್ನೊ ಪ್ರಭು ಥಯಲ ಯೆಸು ಕ್ರಿಸ್ತ ನ್ಯಾಯನೊ ಫೈಸಲಾನಾ ದಿನ್ಮಾ ತುಮೆ ನಿರದೊಷಿಯೊ ಥಾವೊಶಿ. 9ಕ್ಹುದಾ ಬರೊಕ್ಹೊವಾಲೊ ಥಯೊಸ. ಕ್ಹುದಾನೊ ದಿಕ್ರೊ ಥಯಲ ವರಿ ಪ್ರಭು ಥಯಲ ಯೆಸು ಕ್ರಿಸ್ತನಾ ಜ಼ಲಮಮಾ ವಾಟೊ ಲಿವಾಲಾ ಥೌ ಕೈನ ತುಮೊನೆ ಬಲಾಯಲವಾಲೊಜ಼ ಕ್ಹುದಾ ವ್ಹೈ.

ಕೊರಿಂಥ ಸಭೆಮಾ ತ್ರಾಸೊ

10ಭಾಯೊ ಭೆನೊ, ಅಪ್ನೊ ಪ್ರಭು ಥಯಲ ಯೆಸು ಕ್ರಿಸ್ತನಾ ನಾಮ ಪರ ಮಿ ತುಮೊಕನ ಮಾಂಗಿಲಿವಾನು ಸು ವ್ಹೈ ಕದ್ಯಾಮ, ವಾದವಿವಾದ ನೈಸೊ ಬಿನ್ನಭೆದ ನೈಸೊ ಯಕ್ಕಜ಼ ಮನಸ್ಸಕ್ಹು ಯಕ್ಕಜ಼ ಉದ್ದೆಶಕ್ಹು ತುಮೆ ಯಕ್ಕಜ಼ ಥೈನ ರ‍್ಹವೊ. 11ಮಾರಾ ಭಾಯೊ ಭೆನೊ, ಖ್ಲೊಯೆಯನಾ ಘರತಾ ಆಯಲ ದಕ್ಹಾ ಜ಼ನಾ ತುಮಾರಾ ಹುತಿ ಮನೆ ಕದ್ಯಾ. ತುಮಾರಾ ವಚ್ಮಾ ವಾದ ವಿವಾದ ಚಾ಼ಲಾಡುಸ ಕೈನ ಮನೆ ಗ್ವತ್ತ ಥಯು. 12ಕದ್ಯಾಮ, ತುಮೊಮಾ ಯಕ್ಲೊ "ಮಿ ಪೌಲಾ ನಿಂಗತ ಚಾ಼ಲಾಲೊ ವ್ಹೈ ಕೈನ ಯಕ್ಲೊ, ಅಪೊಲೊಸ ನಿಂಗತ ಚಾ಼ಲಾಲೊ ವ್ಹೈ ಕೈನ ವರಿಯಕ್ಲೊ, ತೆ ಪೆತ್ರಾ ನಿಂಗತ ಚಾ಼ಲಾಲೊ ವ್ಹೈ ಕೈನ ವರಿಯಕ್ಲೊ, ತೆ ಕ್ರಿಸ್ತ ನಿಂಗತ ಚಾ಼ಲಾಲೊ ವ್ಹೈ ಕೈನ ಕವಸ. 13ಕ್ರಿಸ್ತ ಯೆಸು ಭಾಗ ಭಾಗ ಜು಼ದೊ ಥಯೊಸ ಸು? ತುಮಾರಾ ಹುತಿ ಶಿಲುಬಿಪರ ಮರಲವಾಲೊ ಪೌಲಾ ವ್ಹೈ ಸು? ತುಮೆ ಬಾಪ್ತಿಸ್ಮ ಕರೈಲಿದಲ ಪೌಲಾನಾ ನಾಮಪರ ವ್ಹೈ ಸು? 14ತುಮೊಮಾ ಕ್ರಿಸ್ಪ ವರಿ ಗಾಯನ ಇವ್ನೊನೆ ಛೊಡಿನ ಬಿಜಾ಼ ಕಿನೆಜ಼ ಮಿ ಬಾಪ್ತಿಸ್ಮ ಕರಾಯೊ ನತ್ತಿ ಕೈನ ಕ್ಹುದಾನೆ ಸ್ತೊತ್ರಾ ಕರುಸ. 15ತಿನಾಹುತಿ ತುಮೊಮಾ ಕುನ್ನಜ಼ ಬಾಪ್ತಿಸ್ಮ ಮಾರಾ ನಾಮಪರ ಲಿದ್ಯಾಸ ಕವಾನು ಕೆ ನೈ ಸಕ್ತಾ. 16(ಹೊ, ಸ್ತೆಫನನಾ ಘರವಾಲಾವೊನೆ ಬಾಪ್ತಿಸ್ಮ ದಿದ್ಯೊಸ. ಇವ್ನೊನೆ ನೈಸೊ ವರಿ ಕಿನೆಜ಼ ಬಾಪ್ತಿಸ್ಮ ದಿದಲ ಮನೆ ಶೆ ನತ್ತಿ) 17ಯೆಸು ಕ್ರಿಸ್ತ ಮನೆ ವಳಾಯಲ ಬಾಪ್ತಿಸ್ಮ ದಿವಾನೆ ನ್ಹವ್ಹೈ. ಸುವಾರ್ತಾ ಕವಾನೆ ವಳಾಯೊಸ. ತೆಬಿ ವಾತೊಮಾ ಹುಶಾರ ರ‍್ಹವಾಕ್ಹು ನ್ಹವ್ಹೈ. ತಿಮ್ಮ ಕದಲ ರ‍್ಹಯಮ, ಕ್ರಿಸ್ತ ಯೆಸುನು ಶಿಲುಬಿಪರ ಚ಼ಡಲ ಸುಜ಼ ಉಪಯೊಗ ಥಾತುನ್ಹೊತು.

ಕ್ಹುದಾನಿ ತಾಕತ ವರಿ ಕ್ರಿಸ್ತನು ಗ್ಯಾನ

18ಪವಿತ್ರ ಗ್ರಂಥ ಅಮ್ಮ ಕವಸ; "ಗ್ಯಾನಿಯೊನು ಗ್ಯಾನ ಹಾಳ ಕರುಸ. 19ಶಾಣ್ಯಾವೊನಿ ಶಾಣಪನನೆ ದುರ ಕರುಸ" 20ಇಮ್ಮ ರ‍್ಹತಾಮಾ, ಗ್ಯಾನಿ ಕಿಜಾ಼ ಛೆ? ವಿದ್ಯಾವಂತ ಕಿಜಾ಼ ಛೆ? ಎ ಕಾಲನೊ ತತ್ವ ಗ್ಯಾನಿ ಕಿಜಾ಼ ಛೆ? ಕ್ಹುದಾ ದುನಿಯಾನಿ ಗ್ಯಾನನೆ ಪಿಸಾಳುಪನ ಕರ‍್ಯೊಸು? 21ಎ ಕ್ಹುದಾನಿ ಗ್ಯಾನನಿ ವಿಚಾರ ಅಮ ವ್ಹತ್ತು. ದುನಿಯಾ ತಿನಿ ಸ್ವಂತ ಗ್ಯಾನನಾ ಮುಲಕ ಕ್ಹುದಾನೆ ತಿಳ್ದಿಲಿದಿ ನ್ಹೊತಿ. ತಿನಾಹುತಿ ಪಿಸಾಳಾ ಲಿಂಗತ ದಿಕ್ಹಾನು ಸಂದೆಶನಾ ಮುಲಕ ಬರೊಕ್ಹೊ ಕರಾಲಾವೊನೆ ವಚಾ಼ಡಾನು ಕ್ಹುದಾನೆ ಚೊ಼ಕು ಲಾಗ್ಯು. 22ಯಹುದ್ಯೊ ಅದ್ಭುತ ಕಾಮೊ ಪುಚ಼್ಚಸ. ಗ್ರಿಕವಾಲಾವೊನೆ ಗ್ಯಾನ ಚಾ಼ಯೆ. 23ಅಪೆ ತುಬಿ, ಶಿಲುಬಿ ಪರ ಘಾಲ್ಯಲ ಕ್ರಿಸ್ತನಾ ಹುತಿ ಬೊಧನೆ ಕರೆಸ. ಎ ಯಹುದಿಯೊನೆ ಮ್ಹೊಟಿ ಅಡಚ಼ನ ಥೈಸ; ಯೆಹುದಿ ನೈಸೊ ಮನಕ್ಹೊನೆ ಪಿಸಾಳಾ ಲಿಂಗತ ದಿಕ್ಹಸ. 24ಕ್ಹುದಾಕ್ಹು ಬಲಾಯಲ ಮನಕ್ಹೊ ಯೆಹುದಿಯೊಬಿ ಯಹುದ್ಯೊ ನೈ ರ‍್ಹಯಲವಾಲಾಬಿ ತ್ಯುನೊನೆ ಕ್ರಿಸ್ತ ಕ್ಹುದಾನಿ ತಾಕತ ಥಯೊಸ; ವರಿ ಕ್ಹುದಾನಿ ಗ್ಯಾನ ಥಯೊಸ. 25ಕ್ಹುದಾನು ಪಿಸಾಳು ಪನಬಿ ಮನಕ್ಹೊನಿ ಗ್ಯಾನತಿಬಿ ಮ್ಹೊಟು ವ್ಹೈ. ಕ್ಹುದಾನಿ ಬಲಹಿನತೆಬಿ ಮನಕ್ಹೊನಿ ತಾಕತ ತಿಬಿ ತಾಕತವರ ಥಯುಸ. 26ಭಾಯೊ ಭೆನೊ, ಕ್ಹುದಾ ತುಮೊನೆ ಬಲಾಯಲ ಪರ ತುಮೆ ಕಿಮ್ಮ ವ್ಹತ್ತಾ ಕೈನ ಶೆ ಕರಿಲಿವೊ. ದುನಿಯಾನಿ ಇಸಾಬಮಾ ತುಮೊಮಾ ಘನ್ನಾ ಜ಼ನಾ ಗ್ಯಾನಿಯೊ ಥಯಾ ನ್ಹೊತಾ; ಅದಿಕಾರಿಯೊ ಥಯಾ ನ್ಹೊತಾ; ಖಾಸ ಘರ್ದಾನಾವೊನೆ ಮಳಲವಾಲಾ ಥಯಾ ನ್ಹೊತಾ. 27ತೆನೈಸೊ ಕ್ಹುದಾ ಎ ದುನಿಯಾನಾ ಗ್ಯಾನಿಯೊನೆ ಸರಮ ಲಾವಾನಾ ಹುತಿ ಪಿಸಾಳಾವೊನೆ ಇನಿಲಿದ್ಯೊಸ. ತಾಕತ ರ‍್ಹಯಲವಾಲಾವೊನೆ ಸರಮ ಲಾವಾನಾ ಹುತಿ ತಾಕತ ನೈಸೊವಾಲಾವೊನೆ ಇನಿಲಿದ್ಯೊಸ. 28ದುನಿಯಾ ಕಿನೆ ಖಾಸ ನ್ಹವ್ಹೈ ಕೈನ ವಿಚಾರ ಕರಸ ಕಿನೆ ದ್ವೆಷ ಕರಸ ವರಿ ಕಾಮ ನೈಸೊ ವ್ಹೈ ಕೈನ ದೆಕಾಡಸ ತಿನೆಜ಼ ಕ್ಹುದಾ ಇನಿಲಿದ್ಯೊ. ದುನಿಯಾ ಕಿನೆ ಖಾಸ ವ್ಹೈ ಕೈನ ವಿಚಾರ ಕರಸ ತಿನೆ ಹಾಳ ಕರಾನೆ ಕ್ಹುದಾ ಇಮ್ಮ ಕರ‍್ಯೊ. 29ಇಮ್ಮ ರ‍್ಹತಾಮಾ ಕ್ಹುದಾನಾ ಕ್ಹಾಮಾ ಕುನ್ನಜ಼ ಹೆಮ್ಮೆ ಪಡ್ದಿಲಿವಾನೆ ಸಾಧ್ಯ ನತ್ತಿ. 30ತುಮೊನೆ ಕ್ರಿಸ್ತ ಯೆಸುನಿ ಅನ್ಯುನೆತೆಮಾ ಕರಲವಾಲೊಜ಼ ಕ್ಹುದಾ ವ್ಹೈ. ಕ್ರಿಸ್ತ ತುಮಾರಾ ಹುತಿ ಕ್ಹುದಾಕ್ಹು ಆಯಲ ಗ್ಯಾನ ಥಯೊಸ. ಅಪೆ ನಿತಿವಂತ ಥಾವಾನೆ ಹುತಿ, ಪಾಪಕ್ಹು ಬಿಡುಗಡೆ ಥಾವಾನಾ ಹುತಿ ವರಿ ಪವಿತ್ರ ಥಾವಾನಾ ಹುತಿ ಕ್ರಿಸ್ತಜ಼ ಕಾರಣ ಥಯೊಸ. 31ತಿನಾಹುತಿ ಪವಿತ್ರ ಗ್ರಂಥ ಬರ್ದಲ ನಿಂಗತ ಹೆಮ್ಮ ಥಾವಾಲೊ ಪ್ರಭುಮಾಜ಼ ಹೆಮ್ಮೆ ಥೌ.”