ರುತ
Ruth
Introduction from this edition
ರುತ
ರುತ
ವಳಕ
ಇಸ್ರೆಯಲನಾ ನ್ಯಾಯಸ್ತಾಪಕನಾ ಕಾಲಮಾ ಇಸ್ರಾಯೆಲನಾ ಖಾಂದಾನಮಾ ಥಯಲ ಯಕ್ಕ ಅದ್ಭುತ ಕಾಮನಾ ಹುತಿ ರುತ ಪುಸ್ತಕಮಾ ದೆಕಾಡಸ. ಎ ಖಾಂದಾನಮಾ ಮಾ ನವೊಮಿ , ತಿನಾ ಮಾಟಿನೆ ವರಿ ತಿನಾ ಬೆ ಬಚ್ಚಾವೊನೆ ಮೊವಾಬ ಕವಾನಾ ಬಿಜಾ಼ ದೆಶಮಾ ರ್ಹತಾಮಾ ತ್ಯಾ ತ್ಯನು ಮೌತ ಥಾತಾಮಾ ಯಕ್ಕ ಮ್ಹೊಟೊ ದುರಂತ ಅನುಭವಿಸಸ. ತೆ ನೈಸೊ ಪಾಚಾತಿ ನವೊಮಿ ವ್ಹೌವೊ ರ್ಹಯಲಮಾನಿ ಯಕ್ಲಿನೆ ಮೊವ್ಯಬ ದೆಶವಾಲಿ ರ್ಹಯಲ ರುತ ಇಸ್ರಾಯೆಲೆ ಫರಿನ ಗೈನ ತಿನು ಕ್ಹಾತ ದ್ಯುಸ ಕೈನ ಬರೊಕ್ಹೊ ದಿಲಾತಾಮಾ ಆಶಿರ್ವಾದ ಹೊಂದಿಲಿವಸ. ಪಾಚಾ಼ತೊ ಬುವಜನ ಕವಾಲೊ ತಿವ್ನಾ ಖಾಂದಾನವಾಲೊ ತ್ಯುನೊನೆ ರಾಕಸ. ವರಿ ರುತನೆ ಹಿವಾ ಕರಿಲಿವಾಹುತಿ ವಪ್ಪಿಲಿಸ ರುತ ವರಿ ನವೊಮಿ ಆಶಿರ್ವಾದ ಹೊಂದಿಲಿವಸ. ನ್ಯಾಯಸ್ಥಾಪಕೊನೊ ವಕ್ಹತ ಕೆಟ್ಟ ವ್ಹತೊ ವರಿ ಘನ್ನಾ ಇಸ್ರಾಯೆಲೊ ಕಾನುನನೆ ಕಿಮ್ಮತ ದಿದ್ಯಾವಾಚಿ ಜಿವ್ನಾ ಕರಡ್ಯಾತಾ. ತೆ ನೈಸೊ ನವೊಮಿ, ರುತ ವರಿ ಬೊವಜ ಕ್ಹುದಾನಾ ನಿಯಮೊ ಪಾಲ್ಸಾನಾಹುತಿ ದೆಕಾಡಿನೆ ದೆತಾತಾ. ರುತ ಪುಸ್ತಕ ಕುನ್ನ ಬರದ್ಯುಸ ಕವಾನು ಗ್ವತ್ತ ನತ್ತಿ. ತಿನಿ ತಾರಿಕಬಿ ಗ್ವತ್ತ ನತ್ತಿ. ತೆ ನೈಸೊ ದಕ್ಹಾಜ಼ನಾ ಎ ಇಸ್ರೆಲ ದೆಶ ಭ್ರಷ್ಟ ಪಾಚಾ಼ತಾ ಇಪಯೊಗ ಕರಲ ಹಿಬ್ರು ಭಾಶಾ ಪ್ರಕಾರ ಬರ್ದಲ ಛೆ ಕೈನ ವಿಚಾರ ಕರಸ. ಇಸ್ರೆಲ ನೈತೊ ರುತ ದಾವಿದ ರಾಜಾನಿ ಪರ ಬುಡಿ ಥಯಲ ಕವಾನು ವ್ಹೈ. ಇನೊ ಮತ್ಲಬ ವ್ಹೈ ಎ ಯೆಸುನಿ ಪುರ್ವಜ ವ್ಹೈ. ಕ್ಹುದಾನೆ ಸೆರಲ ವ್ಹೈ ಕವಾನು ಅಪೆ ಕಯಾ ಖಾಂದಾನವಾಲಾ ವ್ಹೈ ಕವಾನು ಯಕ್ಕಜ಼ ಮನಸ್ಪರ ಆಧಾರ ಛೆ ಕವಾನು ದೆಕಾಡಿನೆ ದಿವಸ.
ಭಾಗೊ
1 ಅಧ್ಯಾಯ 1 ಮಾ ನವೊಮಿ ಕುಟುಂಬ ವರಿ ತ್ಯುನೆ ಅನುಭವಿಸಲ ದುರಂತ ವರಿ ಪಾಚಾ಼ತಿ ನವೊಮಿ ವರಿ ರುತ ಇಸ್ರೆಯಲ ಫರಿನ ಆಯಾಸ ಕವಾನು ದೆಕಾಡಿನೆ ದಿವಸ.
2 ಅಧ್ಯಾಯ 2 ಮಾ ರುತ ತಿನಾ ಖೆತರಮಾ ಅನಾಜ಼ ಕಾಟತಾಮಾ ಬುವಜನ ತಿನೆ ಕಿಮ್ಮ ಮಳ್ಯೊ ಅಪೆ ದಕಿಯೆಸ.
3 ಅಧ್ಯಾಯ 3 ಮಾ ಪಾಚಾತೊ ಬುವಜನ ತಿಮ್ಮ ಕರಾನೆ ವಪ್ಪಸ ಬುವಜನ ತ್ಯುನೊ ಸಂದಿರ್ಹಯಲ ಹುತಿ ರುತನೆ ಹಿವಾಕರಿಲಿವಾನು ವರಿ ತ್ಯುನೊನೆ ದೆಕಾರಣಕಿ ಕರಿಲಿವಾನಾಹುತಿ ಪುಚತಾಮಾ ವರಿ ರುತನೆ ಕಿಮ್ಮ ಮೊಕಲಿ ಕವಾನು ದೆಕಾಡಿನೆ ದಿವಸ.
4 ಅಧ್ಯಾಯ 4 ಮಾ ಬುವಜನ ನವೊಮಿ ಮರಲ ಮಾಟಿನಿ ಆಸ್ತಿ ಕಿಮ್ಮ ಇಕ್ಕಾತೊ ಲಿದ್ಯೊ ರುತನೆ ಕಿಮ್ಮ ಹಿವಾ ಕರಿಲಿದ್ಯೊ ಕವಾನು ದೆಕಾಡಿನೆ ದಿವಸ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.