Skip to content
BibleKenya

Sikkiligar Bible

ಮಿಕ 5

ಇಸ್ರಾಯೆಲನೆ ವಚಾಡಾಲೊ ರಾಜೊ಼

ತಾಕತವರ ಥಯಲ ನಗರ. ತಾರಾ ಸೈನಿಕೊನೆ ಜ಼ಮ್ಮಾ. ತ್ಯುನೆ ಹಮಾರಾ ಉಪ್ಪರ ದಾಳಿ ಕರಾನೆ ಸುತ್ತೆಬಿ ಆಯಾಸ. ಇಸ್ರಾಯಲನಾ ನಾಯಕನೆ ಗಾಲಪರ ಲಾಕ್ಡಿಕ್ಹು ಮಾರಸ.

ಎಪ್ರಾತನು ಬೆತ್ಲೆಹೆಮ ತು ಯೆಹುದನಾ ಗಾಮಮಾ ಘನು ನ್ಹಾನು ಗಾಮ ಥಾಸಿ. ತಾರಾಮಾ ರ‍್ಹವಾನು ಕುಟುಂಬ ದಕ್ಹುಜಾ಼ ವ್ಹೈ. ತೆನೈಸೊ ಇಸ್ರಾಯಲನೆ ಆಳಾಲೊ ಮಾರಾಹುತಿ ತಾರಾಕ್ಹು ಹೊರಾಡಸ. ತಿನಿ ಶುರುವಾತ ಪೈಲಾನಾ ಕಾಲತುಜ಼ ಥಯುಸ.

ಬಾಕ್ಡಿ ತಿನಾ ದಿಕ್ರಾನೆ ಜ಼ನ್ನೆಲಕ್ಕಾ ಯಹೊವಾ ತಿನಾ ಮನಕ್ಹೊನೆ ಕ್ಹಲಾಸ ಕರಿಪಡಸ. ತೆ ಥಯಲ್ಪರ ಉಗ್ರಲ ತಿನಾ ಭಾಯೊ ಇಸ್ರಾಯಲ ಮನಕ್ಹೊಕನ ವಾಪಸ ಆವಸ. ತೆಳಾಮಾ ಇಸ್ರಾಯಲನೆ ಕಾಯ್ದಾವಾಲೊ ಯಹೊವಾನಾ ತಾಕತಮಾ ತಿನೊ ಕ್ಹುದಾ ಥಯಲ ಯಹೊವಾನಾ ನಾಮಮಾಬಿ ಹುಬ್ರೈನ ತಿನಾ ಹಿಂಡನೆ ಚ಼ರಾವಸ. ತಿನಾ ಮಹತ್ತ ಜಿಮಿನಿ ಕ್ಹಾರಿ ಜ಼ಗಾ ಪ್ರಸರಿನಾಹುತಿ ತ್ಯುನೆ ಸಮಾಧಾನಕ್ಹು ರ‍್ಹವಸ.

ತೆಳಾಮಾ ಶಾಂತಿ ಥಾವಸ. ಹೊ, ಅಶ್ಶುರನಿ ಸೆನಾ ಅಪ್ನಾ ದೆಶೆ ಐನ ಹಮಾರಾ ಕ್ಹಾಸ ಭಾಂದಲನೆ ಕ್ಹುಂದಿಪಡಸ. ತೆನೈಸೊ ಇಸ್ರಾಯಲನೆ ಕಾಯ್ದಾವಾಲೊ ಕ್ಹಾತ ಬಕ್ರಾ ಚ಼ರಾವಾಲಾವೊನೆ ಆಟ ತಾಕತವರ ನಾಯಕೊನೆ ಇನಸ. ತ್ಯುನೆ ತ್ಯುನಾ ತಲ್ವಾರೊನೆ ಉಪಯೊಗ ಕರಿನ ಅಶ್ಶುರವಾಲಾವೊನೆ ಕಾಯ್ದಿಸ. ತ್ಯುನೆ ನಿಮ್ರೊದನ ದೆಶನೆ ಆಳಸ. ಹತ್ಮಾ ತಲ್ವಾರ ಧರಲಿನ ತೆ ಮನಕ್ಹೊನೆ ಆಳಸ. ತೆನೈಸೊ ಇಸ್ರಾಯಲನೊ ರಾಜೊ಼ ಅಶ್ಶುರತೊ ಹಮೊನೆ ವಚಾ಼ಡಸ. ತ್ಯುನೆ ಹಾಮಾರಾ ದೆಶೊಮಾ ಐನ ಹಮಾರಾ ಗಾಮೊನೆ ಕ್ಹುಂದಿನ ಹಾಳ ಕರ್ತಾಮಾ ಹಮೆ ವಾಚಿ಼ಯೆಸ.

ತೆನೈಸೊ ಜನಾಂಗೊಮಾ ಭಿಕರಾವಾನು ಇಸ್ರಾಯಲನಾ ಅಳದಿನ ಉಗ್ರಸ.ಯಹೊವಾಕ್ಹು ಆವಾನು ಮಂಜ ನಿಂಗತ ರ‍್ಹವಸ. ತೆ ತ್ಯುನೊ ವರಿ ತ್ಯುನಾ ಸಂತತಿವಾಲಾವೊ ಕಾಯ್ದಿತು ನೈ. ತ್ಯುನೆ ಚಾ಼ರಾಪರ ಪಡಲ ಪಾನಿ ನಿಂಗತ ರ‍್ಹವಸ. ತೆ ಪಾನಿ ಕಿನೆಜ಼ ಕಾಯ್ದುತು ನೈ. ತೆನೈಸೊ ಜನಾಂಗೊಮಾ ಬಿಕ್ಹಾರಾಯಲ ಯಾಕೊಬನು ವಂಶ ಅಳದಿನ ಉಗ್ರಸ. ರಾನಮಾ ರ‍್ಹವಾನಾ ಜಾನವರೊಮಾ ಸಿಂಹಾಡೊ ಕಿಮ್ಮ ರ‍್ಹವಸ. ತಿಮ್ಮಜ಼ ರ‍್ಹವಸ. ಬಕ್ರಾವೊನಾ ಹಿಂಡನಾ ವಚ್ಮಾ ರ‍್ಹವಾನು ಜಾ಼ಂಜಿಮಾನ ಸಿಂಹಾಡಾ ನಿಂಗತ ರ‍್ಹವಸ.ತೆ ತಿನೆ ಮನಸಾ ನಿಂಗತ ಫರಸ. ತೆ ಯಕ್ಕ ಜಾನವರನೆ ಧರ್ಯಾರೆ ತಿನೆ ಛೊಡಾವಾನೆ ಕ್ಹಿಕ್ಹುಜ಼ ಸಾದ್ಯ ನತ್ತಿ ಮನಕ್ಹೊನು ತಿನಾ ನಿಂಗತ ರ‍್ಹವಸ. ತು ತಾರಾ ದುಶ್ಮನೊಪರ ಹತ್ತ ಉಚೈನ ತ್ಯುನೊನೆ ನಾಶ ಕರಸಿ.

ಇಸ್ರಾಯೆಲನೊ ಮುಢ ಬರೊಕ್ಹೊ ವರಿ ನಾಶ

ಯಹೊವಾ ಕವಾನು ಸುವೈ ಕದ್ಯಾರೆ, ತೆ ಟೈಮಾ ತಾರಾ ಘೊಡಾವೊನೆ ಮಿ ಕಾಡಿಪಡಸ. ತಾರಾ ರಥೊನೆ ನಾಶ ಕರುಸ. ತಾರಾ ದೆಶಮಾ ರ‍್ಹವಾನಾ ಗಾಮೊನೆ ಹಾಳ ಕರುಸ. ತಾರಾ ಕೊಟೆನೆ ನಾಶ ಕರುಸ. ತು ಹಮ್ನಾತೊ ಮಾಟಾ ಮಂತ್ರಾ ನೈ ಕರ್ತೊ. ಭವಿಷ್ಯ ವರಿ ಕಣಿ ಕವಾಲಾ ಮನಕ್ಹೊ ಹಮ್ನಾತಾ ತಾರಾಮಾ ನೈ ರ‍್ಹತಾ. ತಾರಾ ವಿಗ್ರಹವೊನೆ ವರಿ ದಗ್ಡಾ ಕ್ಹಂಬಾವೊನೆ ಫೊಡಿನ ನಾಶ ಕರುಸ. ತಾರಾ ಹತೆಕ್ಹು ಕರಲ ಸಾಮ್ನೊನೆ ತು ಪೂಜಾ ಕರ್ತೊ ನೈ. ಮಿ ತಾರಾ ಅಶೆರ ಕ್ಹಂಬಾವೊನೆ ಸುಳ್ಳ ಕ್ಹುದಾವೊನೆ ನಾಶ ಕರುಸ. ತಾರಾ ಗಾಮೊನೆ ನಾಶ ಕರುಸ. ದಕ್ಹಾ ಜನಾಂಗೊ ಮಾರಾ ವಾತನೆ ಕಾನ ದೆತಾ ನೈ. ತೆಳಾಮಾ ಮಿ ಮಾರಿ ಶಿಟ್ಟನೆ ಲೈನ ತುಮೊನೆ ಕ್ಹಲಾಸ ಕರುಸ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.