Skip to content
BibleKenya

Sikkiligar Bible

ಮತ್ತಾಯ 3

ಬಾಪ್ತಿಸ್ಮ ದಿವಾನು ಯೊಹಾನನು ಉಪದೆಶ

ತೆ ಕಾಲಮಾ ಬಾಪ್ತಿಸ್ಮಾ ದಿವಾಲೊ ಯೊಹಾನ ಯುದಾಯನಾ ರಾನ್ಮಾ ಬೊದನೆ ಕವಾನು ಶುರು ಕರ‍್ಯೊ. ಸ್ವರ್ಗನೊ ರಾಜ್ಯ ನಜಿಕ ಆಯೊಸ. ತುಮೆ ತುಮಾರಾ ಪಾಪೊನಾಹುತಿ ಪಶ್ಚಾತಾಪ ಪಡಿನ ಕ್ಹುದಾಕನ ಫರೊ” ಕೈನ ತೆ ಬೊದನೆ ಕರ‍್ಯೊ. ಪ್ರಭುನಾಹುತಿ ವಾಟ ತಯ್ಯಾರ ಕರೊ;

ತಿನಿ ವಾಟ ಸಿದಾ ಚೊ಼ಕಿ ಕರೊ ಕೈನ ರಾನ್ಮಾ

ಅಡ್ಡಾಲಾನಿ ಆವಾಜ ಐಕು ಆವಾಡುಸ.

(ಯೆಶಾಯ 40:3) ಕೈನ ಬಾಪ್ತಿಸ್ಮಾ ದಿವಾಲಾ ಯೊಹಾನನಾಹುತಿ

ಪ್ರವಾದಿ ಥಯಲ ಯೆಶಾಯ ಕದಲ ವ್ಹೈ.

ಯೊಹಾನನಾ ವಣ್ಣಾ ಹುಂಟಾನಾ ಬಾಲೊಕ್ಹು ಕರಲ ವ್ಹತ್ತಾ. ತಿನೆ ಕಂಬರನೊ ಪಟ್ಟೊ ವ್ಹತ್ತೊ. ತಿನೆ ಫಿರಕಾ ವರಿ ರಾನನು ಜೆನ ಅನ್ನ ಲಿಂಗತ ವ್ಹತ್ತು. ಮನಕ್ಹೊ ಯೊಹಾನನು ಉಪದೆಶ ಐಕಾನೆ ಯೆರುಸಲೆಮತಾ, ಯುದಾಯ ವರಿ ಯೊರ್ದನ ನದಿನಾ ಸುತ್ತೆ ರ‍್ಹಯಲ ದಂಡಿಕನ ಕ್ಹಾರಾ ಜ಼ಗಾತಾ ಆವಾಡಾತಾ. ಮನಕ್ಹೊ ತ್ಯುನೆ ಕರಲ ಪಾಪ ವಪ್ಪಿ ಲಿದಲ್ಪರ ಯೊಹಾನ ತ್ಯುನೊನೆ ಯೊರ್ದನ ನದಿಮಾ ಬಾಪ್ತಿಸ್ಮಾ ದಿವಾಡೊತೊ.

ಘನ್ನಾ ಫರಿಸಾಯರೊ ವರಿ ಸದ್ದುಕಾಯರೊ ಯೊಹಾನನಾ ಹತೆ ಬಾಪ್ತಿಸ್ಮಾ ಕರೈಲಿವಾನಾಹುತಿ ಆಯಾ. ಯೊಹಾನ ತ್ಯುನೊನೆ ದೆಕಿನ, ತುಮೆ ಕ್ಹಾರಾ ಕ್ಹಾಪೊ ವ್ಹೈ! ಆವಾನು ರ‍್ಹಯಲ ಕ್ಹುದಾನಾ ಶಿಟ್ಟಕ್ಹು ವಾಚಾ಼ನೆ ತುಮೊನೆ ಹುಶಾರಕಿ ದಿದಲವಾಲು ಕುನ್ನ ವ್ಹೈ? ತುಮಾರು ಮನಸ ಕ್ಹರಿಮಾಜ಼ ಕ್ಹುದಾ ಬಗಲ ಛೆ ಕೈನ ಕವಾನು ತುಮೆ ಕರಾನಾ ಕಾಮೊಕ್ಹು ದೆಕಾಡೊ. ‘ಅಬ್ರಹಾಮ ಅಪ್ನೊ ಬಾ ವ್ಹೈ’ ಕೈನ ತುಮೆ ಸ್ವಕ್ಕ ಕರಾನು ಕಾ? ಕ್ಹುದಾ ಅಬ್ರಹಾಮನಾಹುತಿ ನ್ಯ್ಹಾ ರ‍್ಹಯಲ ದಗಡಾವೊಕ್ಹುಬಿ ಬಚ್ಚಾ಼ ಹುಟ್ಸಾವಾಸ ಕೈನ ಮಿ ತುಮೊನೆ ಕೌಸ. ಝಾಡೊ ಕತ್ರಿನ ನಾಕಾನೆ ಕೊಡ್ಲಿ ಹಮ್ನಾಜ ತಯ್ಯಾರ ಛೆ. ಚೊ಼ಕು ಫಲ ನೈ ದಿವಾನಾ ಹರಯಕ್ಕ ಝಾಡನೆ ಕತ್ರಿನ ಆಗಮಾ ಘಾಲಸ. ತುಮಾರಾ ಮನಸೊ ಕ್ಹುದಾ ಬಗಲ ಫರ್ಯಾಸ ಕವಾನು ದೆಕಾಡಾನಾಹುತಿ ಮಿ ತುಮೊನೆ ಪಾನಿಮಾ ಬಾಪ್ತಿಸ್ಮಾ ಕರೌಸ. ತೆನೈಸೊ ಮಾರಾ ಪಾಚೊ಼ ಆವಾಲೊ ಮಾರಾತಿ ತಾಕತವಾಲೊ ವ್ಹೈ. ತಿನಾ ಕಾರ್ಮಲಿಯೊನಾ ದೊರಿಯೊ ಛೊಡಾವಾನೆಬಿ ಮಿ ಯೊಗ್ಯ ನ್ಹವೈ. ತೆ ತುಮೊನೆ ಪವಿತ್ರ ಆತ್ಮಾಮಾ ಆಗಮಾ ಬಾಪ್ತಿಸ್ಮಾ ಕರಾವಸ. ತೆ ಬಿಯ್ಯಾವೊನೆ ಸ್ವಚ್ಛ ಕರಾನೆ ತಯ್ಯಾರ ಥಯೊಸ. ತೆ ಬಿಯ್ಯಾವೊನೆ ಕೊಂಡಾವೊಕ್ಹು ಜುದೊ ಕರಿನ ಚೊ಼ಕಾ ಬಿಯ್ಯಾವೊನೆ ಕಣಜಮಾ ಭರೈನ ಕೊಂಡಾವೊನೆ ನೈ ಇಜ್ಜಾ಼ವಾನಿ ಆಗಮಾ ಬಾಳಿ ಪಡಸ” ಕೈನ ಕದ್ಯೊ.

ಯೊಹಾನನಾ ಹತೆ ಯೆಸು ಬಾಪ್ತಿಸ್ಮಾ

(ಮಾರ್ಕ 1:9-11; ಲುಕ 3:21-22)

ತೆ ಟೈಮ ಯೊಹಾನನಾ ಹತೆ ಯೆಸು ಬಾಪ್ತಿಸ್ಮಾ ಲಿವಾನೆ ಗಲಿಲಾಯತೊ ಯೊರ್ದನ ನದಿನೆ ಆಯೊ. ತೆನೈಸೊ ಯೊಹಾನ, ಮಿಜ಼ ತಾರಾ ಹತೆ ಬಾಪ್ತಿಸ್ಮಾ ಕರೈ ಲಿವಾನು ಛೆ. ಇಮ್ಮ ರ‍್ಹತಾಮಾ ತು ಮಾರಾಕ್ಹು ಬಾಪ್ತಿಸ್ಮಾ ಲಿವಾನೆ ಮಕನ ಆವಾನು ಕಾ? ಕೈನ ತಿನೆ ಹುಬ್ರಾಡಾನೆ ದೆಕ್ಯೊ.

ತೆನೈಸೊ ಯೆಸು, ಹಮ್ನಾ ತು ಇನೆ ಒಪ್ಪಿಲೆ ಅಪೆ ಕ್ಹುದಾನಾ ಕ್ಹಾರಾ ಕಾಮೊ ಕರಾನು ಶೆ” ಕದ್ಯೊ. ತೆಳಾಮಾ ಯೊಹಾನ ಯೆಸುನೆ ಬಾಪ್ತಿಸ್ಮಾ ದಿವಾನೆ ಒಪ್ಪಿಲಿದ್ಯೊ. ಯೆಸು ಬಾಪ್ತಿಸ್ಮಾ ಲಿನ ಪಾನಿಮಾತೊ ಉಪ್ಪರ ಆಯೊ, ತೆಳಾಮಾಜ಼ ಹಬಾಳ ಕ್ಹುಲ್ಯು ಕ್ಹುದಾನಿ ಆತ್ಮಾ ಖಬುತರನಾ ರುಪ್ಮಾ ಉತ್ರಿನ ತಿನಾ ಉಪ್ಪರ ಆವಾನು ಯೆಸು ದೆಕ್ಯೊ. ತೆಳಾಮಾ ಸ್ವರ್ಗಮಾತು ಆವಾಜ ಐಯು "ಆಂ ಮಾರೊ ಮಾಯಾನೊ ದಿಕ್ರೊ ಯೆಸು ವ್ಹೈ, ಅನೆ ಮಿ ಘನ್ನೊ ಮೆಚ್ಯೊಸ".

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.