Sikkiligar Bible
ಮಾರ್ಕ 2
ಯೆಸು ಲಕ್ವೊ ಮಾರಲವಾಲಾನೆ ಅರಾಮ ಕರಲ
(ಮತ್ತಾಯ 9:1-8; ಲುಕ 5:17-26)
ದಕ್ಹಾ ದಿನ್ನೊ ಥಯಲ್ಪರ ಯೆಸು ಕಪೆನೌರ್ಮಿ ಗಾಮೆ ಫರಿನ ಆಯೊ. ತೆ ಘರಮಾ (ಘರ ಕದ್ಯಾಮ ತೆ ರ್ಹಯಲ ಗಾಮ) ಆಯೊಸ ಕೈನ ಮನಕ್ಹೊನೆ ಸುದ್ದಿ ಗೊತ್ತ ಥೈ. ಮನಕ್ಹೊ ಮಳಿನ ಆಯಲಕ್ಹು ಘರನಾ ಬಾಕಲನಾ ಭಾರಿಬಿ ಜ಼ಗಾನ್ಹೊತಿ ಯೆಸು ತ್ಯುನೊನೆ ಉಪದೆಶ ಕರಾಡೊತೊ. ತೆಕ್ಲಾಮಾಜ಼಼ ಯಕ್ಕ ಲಕ್ವೊ ಮಾರಲವಾಲಾನೆ ಚ಼್ಯಾರ ಜ಼ನಾ ಉಚೈಲಿನ ತ್ಯಾ ಲಾಯಾ. ಮನಕ್ಹೊ ಗುಂಪ ಥೈನ ಹುಬ್ರಯಲಕ್ಹು ತ್ಯುನೆ ತಿಕನ ನಜಿಕ ಆವಾನೆ ಥಾಯೆ ನೈಸೊಕ್ಹು ತೆ ರ್ಹಯಲ ಘರನಾ ಉಪ್ಪರಲಿ ಛತ್ತ ಕಾಡಿನ ಜ಼ಗಾ ಕರಿನ ಲಕ್ವೊ ಮಾರಲ ರೊಗಿ ಕ್ಹುರಯಲ ವಚ್ಚಾ಼ನಾನಾ ಕ್ಹಾತೆ ಉತಾರ್ಯಾ. ಯೆಸು ತಿವ್ನೊ ಬರೊಕ್ಹೊ ದೆಕಿನ ತೆ ಲಕ್ವೊ ಮಾರಲವಾಲಾನೆ ದಿಕ್ರಾ ತಾರು ಪಾಪ ಮಾಫ ಥಯುಸ ಕದ್ಯೊ.
ತೆಳಾಮಾ ಶಾಸ್ತ್ರಿಯೊಮಾನಾ ದಕ್ಹಾ ಜ಼಼ನಾ ತ್ಯಾಜ಼ ಬೈಟ್ಯಾತಾ ಆಂ ಇಮ್ಮ ಕಾ ಬೊಲಾಡೊಸ? ಎ ಕ್ಹುದಾನಾ ವಿರುದ್ದ ವ್ಹೈ. ಕ್ಹುದಾನೆ ಯಕ್ಲಾನೆಜ಼ ಛೊಡಿನ ಬಿಜು಼ ಕುನ್ನ ಪಾಪ ಮಾಫ ಕರಸ? ಕೈನ ತ್ಯುನಾ-ತ್ಯುನಾ ಮನಸಮಾ ಕೈಲಿದ್ಯಾ.
ತ್ಯುನೆ ಇಮ್ಮ ಕೈಲಿವಾನು ತೆಳಾಮಾಜ಼ ಯೆಸು ತಿಳದಿಲಿದ್ಯೊ. ಯೆಸು ತ್ಯುನೊನೆ-ತುಮೆ ತುಮಾರಾ ಮನಸಮಾ ಇಮ್ಮ ಕಾ ತಿಳದಿಲಿವಾಡಾಸ? ಕಯು ಆಸಾನ (ಚೊ಼ಕು) ವ್ಹೈ. ತಾರು ಪಾಪ ಮಾಫ ಥೈ ಗಯುಸ ಕವಾನು ಸು? ಉಟಿನ ತಾರಾ ವಚ್ಚಾ಼ನಾಲಿನ ಚಾ಼ಲ ಕವಾನು ವ್ಹೈ? ವರಿಬಿ ಪಾಪ ಮಾಫ ಕರಾನೆ ಮನಕ್ಹನಾ ದಿಕ್ರಾನೆ ಭ್ಹುಲೊಕಮಾ (ದುನಿಯಾಮಾ) ಅದಿಕಾರ ಛೆ ಕವಾನು ತಿಳದಿಲಿವೊ ಕದ್ಯೊ. ಲಕ್ವೊ ಮಾರಲವಾಲಾನೆ ದೆಕಿನ, ಉಟಿನ ತಾರು ವಚ್ಚಾ಼ನು ಉಚೈನ ಘರೆ ಜಾ಼ ಕೈನ ತುನೆ ಕೌಸ ಕದ್ಯೊ. ತೆ ಉಟಲ ಬರೊಬ್ಬರ ತೆ ವಚ್ಚಾ಼ನು ಲಿನ ಕ್ಹಾರಾವೊನಾ ಕ್ಹಾಮಾತೊ ಗೈ ಪಡ್ಯೊ. ತಿನಾಹುತಿ ಕ್ಹಾರಾಜ಼ನಾ ಘಾಬ್ರಾಥೈನ - ಹಜು಼ನಲಕ್ಕಾ ಹಮೆ ಹೌ ಕೆಳಾಮಾಜ಼ ದೆಕ್ಯಾನತ್ತಿ ಕತಾ ಕ್ಹುದಾನೆ ನೆಣಸ್ತಾ ಗಯಾ.
ಯೆಸು ಲೆವಿನೆ ಬಲಾಯಲ
(ಮತ್ತಾಯ 9:9-13; ಲುಕ 5:27-32)
ಯೆಸು ತ್ಯಾಂತೊ ಫರಿನ ಸಮುಂದರಕನ ಗಯೊ ಮನಕ್ಹೊನು ಗುಂಪ ತಿಕನ ಆತಾಮಾ ಯೆಸು ತ್ಯುನೊನೆ ಕ್ಹುದಾನಿಯೊ ವಾತೊ ಶಿಕ್ಲಾಯೊ. ತೆ ತ್ಯಾಂತೊ ಜಾ಼ತಾಮಾ ಭು ಭಾಡಾನಾಹುತಿ ಬೈಟಲ ಅಲ್ಫಾಯನನೊ ದಿಕ್ರೊ ಲೆವಿನೆ ದೆಕಿನ ಮಾರಾ ಪಾಚೊ಼ ಆ ಕೈನ ಬಲಾತಾಮಾ ತೆ ಉಟಿನ ತಿನಾಪಾಚೊ಼ ಗಯೊ.
ತೆ ಥಯಲ್ಪರ ಲೆವಿನಾ ಘರಮಾ ಕ್ಹಾವಾನಾಹುತಿ ಯೆಸು ಬೈಟ್ಯೊ ಮ್ಹೊಟು ಗುಂಪ ಯೆಸುನಾ ಪಾಚು಼ ಐಯು ತಿಮಾ ಭು ಭಾಡಾವಾಲಾ ಪಾಪಿಯೊಬಿ ಗಯಾ, ವರಿ ಘನ್ನಾ ಜ಼ನಾ ಯೆಸು ವರಿ ತಿನಾ ಶಿಷ್ಯಾವೊನಾ ಕ್ಹಾತೆ ಕುಡ್ಯಾ ತೆವಾ ಘನ್ನಾ ಮನಕ್ಹೊ ವ್ಹತ್ತಾ. ಫರಿಸಾಯರೊ ಥಯಲ ಶಾಸ್ತ್ರಿಯೊಬಿ ಐನ. ಯೆಸು ಪಾಪಿಯೊನಾ ಕ್ಹಾತೆ ವರಿ ಭು ಭಾಡಾವಾಲಾವೊನಾ ಕ್ಹಾತೆ ಖಾವಾನು ದೆಕಿನ ತಿನಾ ಶಿಷ್ಯಾವೊಕನ ಕದ್ಯಾ ಆಂ ಪಾಪಿಯೊನಾ ಕ್ಹಾತೆ ಅನ್ನ ಖಾವಾಡೊಸ್ತೊ ಕದ್ಯಾ.
ಯೆಸು ತೆ ಐಕಿನ ಜವಾಬ ದಿದ್ಯೊ ಚೊ಼ಕಾ ರ್ಹಯಲವಾಲಾವೊನೆ ಡಾಕ್ಟರನಿ ಜ಼ರುರತ ನತ್ತಿ; ರೊಗಿಯೊನೆ ಡಾಕ್ಟರನಿ ಜ಼ರುರತ ಛೆ. ಮಿ ಚೊ಼ಕಾವೊನಾಹುತಿ ನತ್ತಿ ಆಯೊ ಪಾಪಿಯೊನಾಹುತಿ ಆಯೊಸ.
ಉಪಾಸನಾಹುತಿ ಸವಾಲ
ಯಕ್ಕ ಸಲಾ ಯೊಹಾನನಾ ಶಿಷ್ಯಾ ವರಿ ಫರಿಸಾಯರೊ ಉಪಾಸ ವ್ಹತ್ತಾ. ತ್ಯುನೆ ಯೆಸುಕನ ಐನ, ಯೊಹಾನನಾ ಶಿಷ್ಯಾ ವರಿ ಫರಿಸಾಯರೊ ಉಪಾಸ ಕರಾಡಾಸ್ತೊ? ತಾರಾ ಶಿಷ್ಯಾ ಉಪಾಸ ಕಾ ಕರತಾ ನೈ?
ಕೈನ ಪುಚ್ತಾಮಾ ಯೆಸು ತ್ಯುನೊನೆ ಹಿವಾಮಾ ಆಯಲ ಮನಕ್ಹೊ ತಿವ್ನಾ ಕ್ಹಾತೆ ನೌರೊ ರ್ಹತಾಸ್ತಾ ಉಪಾಸ ಕರು ಸು ಕರತಾ ನೈ! ಹಿವಾಮಾ ನೌರೊ ತಿವ್ನಾ ಕ್ಹಾತೆ ರ್ಹಯೆ ಲಕ್ಕಾ ಉಪಾಸ ಕರು ನೈ ವರಿ ನೌರೊ ತಿವ್ನೊಕಂತೊ ಜಾ಼ವಾನೊ ಟೈಮ ಆವಸ ತೆ ಟೈಮಮಾ ತ್ಯುನೆ ಉಪಾಸ ಕರಸ.
ಕುನ್ನಜ಼ ನವಾ ವಣ್ಣಾವೊನೊ ತುಕಡೊ ಜು಼ನ್ನಾ ವಣ್ಣಾನೆ ಲಗಾಡ್ತೊ ನೈ ಲಗಾಡ್ಯಾಮ ತೆ ನೌ ಪ್ಹಡಕು ಜು಼ನ್ನಾ ಪ್ಹಡಕಾನೆ ಕುಜೈ಼ಪಾಡಸ ಫಾಟಾನು ಹೆಚ್ಕಿ ಥಾವಸ. ಎನೈಸೊ ಕುನ್ನಬಿ ಜು಼ನ್ನಾ ಚಾ಼ಮ್ಡಾನಿ ಕೈಚಿಲಾಮಾ ನೌ ದ್ರಾಕ್ಷಿಯೊನು ರಕ್ಹ ಕುನ್ನಜ಼ ಘಾಲಿನ ನೈ ಮ್ಹೆಲ್ತು. ಕಾಕದ್ಯಾಮ ಮುಕ್ಯಾಮ ತೆ ದ್ರಾಕ್ಷಿನು ರಕ್ಹ ತೆ ಕೈಚಿಲಾವೊನೆ ಫಾಡಿನ ಹೆಟು ಪಡಿನ ಕೆಟ್ಟಿ ಜಾ಼ವಸ. ವರಿ ನೌ ದ್ರಾಕ್ಷಿಯೊನು ರಕ್ಹ ನಯ್ಯೊ ಕೈಚಿಲಾವೊಮಾಜ಼ ಘಾಲಿನ ಮುಕ್ಕು ಕದ್ಯೊ.
ಸಬ್ಬತ ದಿನ್ನನಾಹುತಿ ಪುಚ಼ಲ
ಯೆಸು ಸಬ್ಬತ ದಿನ್ನಮಾ ಖೆತ್ರೊಮಾತೊ ಜಾ಼ತಾ ಟೈಮಮಾ ಯೆಸುನಾ ಶಿಷ್ಯಾ ಜಾ಼ತಾ-ಜಾ಼ತಾ ಮಕ್ಕಾ (ಬುಟ್ಟಾ) ಭಾಗಿಲೆತಾ ವ್ಹತ್ತಾ. ಫರಿಸಾಯರೊ ತಿನೆ ದೆಕಿನ ಇವ್ನೆ ಸಬ್ಬತ ದಿನಮಾ ನೈಸೊ ಕರಾನು ಕಾಮ ಕಾ ಕರಾಡಾಸ ಕೈನ ಪುಚ್ಯಾ.
ಯೆಸು ತ್ಯುನೊನೆ ದಾವಿದ ವರಿ ತಿನಾ ಕ್ಹಾತೆ ರ್ಹಯಲವಾಲಾವೊನೆ ತ್ಯುನೊನೆ ಸುಜ಼ ನೈಸೊ ಭುಕ್ಕಾ ಥಯಲ ಟೈಮಾ ಸು ಕರ್ಯೊ ಕೈನ ತುಮೆ ಒದ್ಯಾನತ್ತಿ ಸು? ತೆ ಖಾಸ ಯಾಜಕ ಥಯಲ ಅಬಿಯ್ಯಾತರನ ಕಾಲಮಾ ದಾವಿದ ಕ್ಹುದಾನಾ ಘರಮಾ ಗೈನ, ಪದ್ದತ ನಿಂಗತ ಯಾಜಕನೆ ಛೊಡಿನ ಬಿಜು಼ ಕುನ್ನಜ಼ ಖೌ ನೈ ಕೈನ ಮೊಶೆನು ಧರಮ ಶಾಸ್ತ್ರ ಕವಸ್ತೊ. ಕ್ಹುದಾನೆ ಚ಼ಡಾಯಲ ರೊಕ್ಲೊ ತೆ ಖೈನ ತಿನಾ ಕ್ಹಾತೆ ರ್ಹಯಲವಾಲಾವೊನೆ ದಿದ್ಯೊತೊ ಕದ್ಯೊ.
ವರಿ ಯೆಸು ಕದಲ ಸಬ್ಬತ ದಿನ್ನ ಮನಕ್ಹೊನಾಹುತಿ ಆಯೊಸ ತೆನೈಸೊ ಮನಕ್ಹೊ ಸಬ್ಬತನಾಹುತಿ ನತ್ತಿ ಆಯಾ. ಇಮ್ಮ ರ್ಹತಾಮಾ ಮನಕ್ಹನೊ ದಿಕ್ರೊ ಸಬ್ಬತ ದಿನ್ನಪರ ಮಾಲಕ ಥಯೊಸ ಕೈನ ಕದ್ಯೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.