Sikkiligar Bible
ಯೆಹುಶು 9
ಯೊರ್ದನಾ ತಳಾನಾ ತ್ಯಾ ಡೊಂಗರನಾ ಉಪ್ಪರಲ್ಯು ಗಾಮ ಇಳಕಲನು ಗಾಮ ಲೆಬುನಿನಾ ಕ್ಹಾಮು ರ್ಹವಾನು ಮಹಾ ಸಾಗರನು ದಂಡಿ ಗಾಮ ಅಮಾ ರ್ಹಯಲ ಅಮೊರಿನಾ ಹಿತ್ತಿನಾ ಕಾನನಾ ಪೆರಿಜಿನಾ ಹಿವ್ವಿನಾ ಯೆಬುಸಿನಾ ರಾಜಾ ಚಾಲಲ ಸಂಗತಿಯೊ ಐಕಿನ ಯಕ್ಕಜ ಮನಸಕ್ಹು ಯೆಹುಶುವಾನೆ ಇಸ್ರಾಯಲೊನೆಬಿ ವಿರೊಧ ಥೈನ ಯುದ್ದ ಕರಾನಾ ಹುತಿ ಕುಡ್ಯಾ. ಯೆರಿಕೊವಾಲಾವೊನೆ ಆಯಿ ಕವಾನಾ ಗಾಮವಾಲಾವೊನೆ ಯೆಹುಶುವಾ ಬಲಿ ದಿದಲ ಸುದ್ದಿ ಗಿಬ್ಯೊನಿನಾ ನಿವಾಸಿಯೊ ಐಕಿನ ತ್ಯುನೆ ಯಕ್ಕ ಯುಕ್ತಿ ಕರ್ಯಾ.ಕಿಮ ಕದ್ಯಾಮ ತ್ಯುನೆ ತ್ಯುನಾ ಗದ್ಡಾನಾ ಉಪ್ಪರ ಜುನ್ನಾ ಕೊತ್ಳಾ ಘಾಲಿನ ತ್ಯುನಾ ಉಪ್ಪರ ಫಾಟಿನ ಗೈನ ಭಾಂದಲ ದ್ರಾಕ್ಷಾರಕ್ಹನು ಜುನ್ನಾ ಬುದ್ದಲಿಯೊನೆ ಉಚೈನ ಫಾಟಲ ಜುನ್ನಾ ಚಪ್ಪಲೊನೆ ಘಾಲ್ಲಿನ ಜುನ್ನಾ ವಣ್ಣಾವೊನೆ ಬುಳಾಸಾಯಲ ಬಚಕಾವೊನಾ ತುಕಡಾವೊನಿ ಬುತ್ತಿ ಭಾಂದಿಲಿನ ಹಮೆ ರಾಯಭಾರಿ ವೈ ಕೈನ ಗಿಲ್ಗಾಲಮಾ ರ್ಹಯಲ ಯೆಹುಶುವಾನಾ ಪಾಳೆಯೆನೆ ಐನ ತಿನೆ ವರಿ ಇಸ್ರಾಯಲೊವೊನೆ ಹಮೆ ದುರ ಗಾಮತಾ ಆಯಾಸ; ತುಮೆ ಹಮಾರಾ ಕ್ಹಾತೆ ಒಡಂಡಿಕೆ ಕರಲಿವೊ ಕೈನ ಕದ್ಯಾ. ಹಮೆ ದುರ ಗಾಮತಾ ಆಯಾಸ; ತುಮೆ ಹಮಾರಾ ಕ್ಹಾತೆ ಒಡಂಡಿಕೆ ಕರಲಿವೊ ಕೈನ ಕದ್ಯಾ. ತೆಳಾಮಾ ಇಸ್ರಾಯಲೊ ಹಿವ್ವಿಯೊ ಥಯಲ ತ್ಯುನೊನೆ ತುಮೆ ಯಕ್ಕ ಸಮಯಮಾ ಆ ಅಪ್ನಾ ಗಾಮೊನೊಜ ನಿವಾಸಿಯೊ ಥಯಲ ರ್ಹೌ; ತೆ ಪಕ್ಷ ಮಾ ಹಮೆ ತುಮಾರಾ ಕ್ಹಾತೆ ಒಡಂಡಿಕೆ ಕರಲಿವಾನು ಕಿಮ್ಮ ವ್ಹೈ ಕೈನ ಉತ್ತರ ದಿದ್ಯೊ. ತ್ಯುನೆ ಯೆಹಉಶುವಾನೆ ಹಮೆ ತಾರಾ ದಾಸೊ ಥಯಾಸ ಕೈನ ತೆ ತ್ಯುನೊನೆ ತುಮೆ ಕುನ್ನ ವ್ಹೈ, ಕಿಜಾನಾ ವ್ಹೈ ಕೈನ ಪುಚ್ಯೊ. ತಿನಾಹುತಿ ತ್ಯುನೆ ತಾರಾ ಸೆವಕ ಥಯಲ ಹಮೆ ತಾರೊ ಕ್ಹುದಾ ಥಯಲ ಯಹೊವಾ ನಾಮನಾ ಮಹತ್ತನಾ ನಿಮಿತ್ತ ಘನಾ ದುರ ಗಾಮಾತಾ ಆಯಾಸ. ಹಮಾರಾ ಮ್ಹೊಟಾ ಗಾಮವಾಲಾ ತಿನಾ ಐಗುಪ್ತಮಾ ಕರಲ ಅದ್ಬುತ ಕಾರ್ಯೊನಿ ಸುದ್ದಿನೆ ಹೆಷ್ಬೊನನೊ ರಾಜೊ ಥಯಲ ಸಿಹೊನ, ಅಷ್ಟರೊತಮಾ ರ್ಹಯಲ ಬಾಷಾನಿನೊ ರಜೊಥಯಲ ಓಗ ಕವಾಲಾ ಬೆಜನಾ ಅಮೊರಿನಾ ರಾಜಾವೊನೆ ಕರಲ ಕ್ಹಾರು ಐಕಿನ ತುಮೆ ಪ್ರಯಾಣನಾಹುತಿ ಬುತ್ತಿ ಭಾಂದಿಲಿನ ಗೈನ ಇಸ್ರಾಯಲನಾ ಕ್ಹಾಮಾ ಐನ ಹಮೆ ತುಮಾರಾ ಸೆವಕ ವ್ಹೈ; ತುಮೆ ಹಮಾರಾ ಕ್ಹಾತೆ ಒಡಂಬಡಿಕೆ ಕರಲಿವೊ ಕೈನ ತ್ಯುನೊನೆ ಮಾಂಗಿಲಿವೊ ಕೈನ ಹಮ್ನೊನೆ ಮೊಕಲಾಯಾ. ಹಮೆ ತುಮೊನೆ ಕ್ಹಾಮಾ ಆವಾನಾಹುತಿ ಘರ ಛೊಡಿನ ಜಾತಾಮಾ ಜಾವಾನಾಹುತಿ ಲಿದಲ ರೊಕಲೊ ಉನ್ನೊವ್ಹತ್ತೊ; ಹಮ್ನಾ ಕ್ಹುಕ್ಹೈನ ತುಕಡಾ ತುಕಡಾ ಥಯಾಸ ದೆಕೊ. ಹಮೆ ದ್ರಾಕ್ಷಿನೊ ರಕ್ಹ ಭರಲಿದಲ ತೆ ಹಂಡ್ಲಾ ನವಾ ವ್ಹತ್ತಾ; ಹಮ್ನಾ ಫಾಟ್ಯಾಸ. ಹಮಾರಾ ವಣ್ಣಾ ಚಪ್ಪಲೊ ದಿರ್ಘಪ್ರಯಾಣಕ್ಹು ಜುನ್ನಾ ಥಯಾಸ ಕೈನ ಕದ್ಯಾ. ತೆಳಾಮಾ ಇಸ್ರಾಯಲೊ ತ್ಯುನಾ ಬುತ್ತಿಮಾನು ದಕ್ಹು ಕಾಳ್ಳಿದ್ಯಾ. ತೆ ನೈಸೊ ಯಹೊವಾನೆ ಯಹೊವಾನೆ ಪ್ಯುಚ್ಚಾ ನೈ. ಯೆಹುಶುವಾ ತ್ಯುನಾ ಕ್ಹಾತೆ ತುಮೊನೆ ಜಿವಕ್ಹು ವಚಾ಼ಡುಸ ಕೈನ ಸಮಾಧಾನನೊ ಒಡಂಬಡಿಕೆ ಕರಲಿದ್ಯೊ.ಸಮೂಹ ಪ್ರದಾನೊ ಕ್ಹಮ ಘಾಲ್ಯಾ. ಒಡಂಬಡಿಕೆ ಥೈನ ತನ್ನದಿನಪರ ತ್ಯುನಾ ಕ್ಹಾಮಾ ರ್ಹವಾಲಾ ಅಪ್ನಾ ವಚ್ಮಾ಼ಜ಼ ರ್ಹವಾಲಾ ಥಯಾಸ ಕೈನ ಇಸ್ರಾಯಲೊನೆ ಗೊತ್ತ ಥಯು.ಕಿಮ್ಮ ಕದ್ಯಾಮ ಇಸ್ರಾಯಲೊ ತನ್ನವಾ ದನ್ನಮಾ ಗೈನ ಸೆರಲ ಗಿಬ್ಯೊನ್, ಕೆಫಿೀರಾ, ಬೆರೊತ, ಕಿರ್ಯತ್ಯಾರಿಮ ಕವಾನಾ ತ್ಯುನಾಜ ಥಯಾತಾ. ಸಮೂಹ ಪ್ರದಾನೊ ಇಸ್ರಾಯಲೊನೊ ಕ್ಹುದಾ ಥಯಲ ಯಹೊವಾನಾ ನಾಮಮಾ ತ್ಯುನೊನೆ ಕ್ಹಮ ಘಾಲಲಹುತಿ ಇಸ್ರಾಯಲೊ ತ್ಯುನೊನೆ ಮಾರxಯಾ ನೈ. ತೆನೈಸೊ ಸಮೂಹನಾ ಕ್ಹಾರಾ ಪ್ರಧಾನನೊ ವಿರೊದ ಥೈನ ಗುಣ ಗುಟ್ಯಾ. ತೆಳಾಮಾ ಪ್ರದಾನೊ ಕ್ಹಾರಾ ಸರ್ವ ಸಮುಹವಾಲಾವೊನೆ ಹಮೆ ಇಸ್ರಾಯಲೊನೊ ಕ್ಹುದಾ ಥಯಲ ಯಹೊವಾನಾ ನಾಮಮಾ ತ್ಯುನೊನೆ ಕ್ಹಮ ಘಾಲಲಕ್ಹು ತ್ಯುನೊನೆ ಮಟ್ಟಾನೆ ಥಾವಸ. ಹಮೆ ಘಾಲಲ ಕ್ಹಮನಾ ಹುತಿ ಕ್ಹುದಾನಿ ಶಿಟ್ಟ ಅಪ್ನಾ ಉಪ್ಪರ ನೈ ಆಯಲ ನಿಂಗತ ಕರಿಯೆ. ತ್ಯುನೆ ಸಮೂಹನೆ ಕ್ಹಾರಾ ಲಾಕ್ಡಾ ಕತ್ರಾಲಾ ಪಾನಿಲಾವಾಲಾ ಥೈನ ಬಾಳಾದೆ ಕೈನ ಕದ್ಯಾ. ಪ್ರದಾನನಾ ವಾತನಿಂಗತಜ಼ ಥಯು. ಯೆಹುಶುವಾ ಗಿಬ್ಯೊನನೆ ಬಲೈನ ತ್ಯುನೊನೆ ತುಮೆ ಹಮಾರಾ ವಚ್ಮಾ ರ್ಹವಾಲಾ ರೈತಬಿ ಘನಾ ದುರ ವ್ಹೈ ಕೈನ ಹಮೊನೆ ವಂಚಲ ಕಾವೈ? ಇನಾಹುತಿ ತುಮೆ ಪಾಪ ಕರಲವಾಲಾ ವ್ಹೈ. ತುಮೆ ಕೆಳಾಮಾಬಿ ದಾಸ ಥೈನ ಮಾರಾ ಕ್ಹುದಾನಾ ಗುಡಿನೆ ಲಾಕ್ಡಾ ಕತ್ರಾಲಾ ಪಾನಿ ಲಾವಾಲಾ ಥಯು ಕೈನ ಕದ್ಯೊ. ತ್ಯುನೆ ಯೆಹುಶುವಾನೆ ತಾರೊ ಕ್ಹುದಾ ಥಯಲ ಯಹೊವಾ ತಿನೊ ಸೆವಕ ಥಯಲ ಮೊಶೆನೆ ಮಿ ತುಮೊನೆ ಆ ದೆಶ ಕ್ಹಾರು ದೆತಾಮಾ ತುಮೆ ಅನಾ ಕ್ಹಾರಾನಿವಾಸಿಯೊನೆ ಕತ್ರಿಪಡುಕೈನ ಆಜ್ಞಾಕರಲ ಐಕಿನ ಹಮಾರೊ ಜ್ಯೂ ಕಾಡೊಸಿ ಕೈನ ಬುಚ್ಕಿನ ಅಮ್ಮ ಕರ್ಯಾ. ಹಮ್ನಾ ಹಮೆ ತಾರಾ ಹತ್ಮಾ ರ್ಹೆಯಸ ತುನೆ ಚೊಕು ಕವಾನು ನ್ಯಾಯಕವಾನು ದಿಕ್ಹಾನು ಹಮೊನೆ ಕರ ಕೈನ ಉತ್ತರ ದಿದ್ಯೊ. ಯೆಹುಶುವಾ ತೆ ಪೈಲಾಜ ಕದಲನಿಂಗತ ಕರ್ಯೊ.ತೆ ತ್ಯುನೊನೆ ಇಸ್ರಾಯಲನಾ ಹತ್ಮಾತಾ ಸಂಹೃದ ಥಯಾ ಕೈನ ಚುಕೈಲಿನ ಸಮೂಹನಾಹುತಿ ಯಹೊವಾ ಇನಿಲಿವಾನಾ ಜ಼ಗಾಮಾ ತೆ ಯಜ್ಞವೆದಿನಾಹುತಿ ಲಾಕ್ಡಾ ಕತ್ರಾಲೊ ಪಾನಿ ಲಾವಾಲೊ ನೆಮಸ್ಯೊ. ತ್ಯುನೆ ಹಮ್ನಾಲಕ್ಕಾ ತೆಜ ಕಾಮ ಕರಸ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.