Skip to content
BibleKenya

Sikkiligar Bible

ಯೊಹಾನ 20

ಕ್ಹಾಲಿ ಮಜಾರ

(ಮತ್ತಾಯ 28:1-8; ಮಾರ್ಕ 16:1-8; ಲುಕ 24:1-12)

ಐತ್ವಾರ ಪಾಟೆ ಮಗ್ದಲನಿ ಮರಿಯಳ ಯೆಸುನಾ ಅಂಗ ರ‍್ಹಯಲ ಮಜಾರ ಕನ ಐ. ತೆಳಾಮಾ ಹಜು಼ನ ಅಂದಾರು ವ್ಹತ್ತು. ಮಜಾರನಾ ಬಾಕಲನೆ ಝಾಕಲ ಮ್ಹೊಟೊ ದಗ್ಡೊ ತ್ಯಾಂತೊ ಸರಕಾಯಲ ದೆಕಿನ ಮರಿಯಳ ಸಿಮೊನ ಪೆತ್ರಾ ವರಿ ಯೆಸು ಮಯಾ ಕರಾನಾ ವರಿಯಕ್ಲಾ ಶಿಷ್ಯಾ ಕನ ನ್ಹಾಟಿನ ಐನ"ತ್ಯುನೆ ಮಜಾರಮಾತಾ ಪ್ರಭುನೆ ಲಿನ ಗಯಾಸ, ತಿನೆ ಕಿಜಾ಼ ಮ್ಹೆಲ್ಯಾಸ ಕವಾನು ಹಮೊನೆ ಗ್ವತ್ತ ನತ್ತಿ" ಕೈನ ಕದಿ. ತಿನಾಹುತಿ ಪೆತ್ರಾ ವರಿಯಕ್ಕ ಶಿಷ್ಯೊ ಮಜಾರ ಕನ ಗಯಾ. ತ್ಯುನೆ ಭಂಬಿ ಜ಼ನಾ ನ್ಹಾಟತಾ ಗಯಾ. ತೆನೈಸೊ ತೆ ವರಿಯಕ್ಕ ಬಿಜೊ ಶಿಷ್ಯೊ ಪೆತ್ರಾತಿಬಿ ಜೊ಼ರ ನ್ಹಾಟತೊ ಮಜಾರ ಕನ ಗೈನ ಪೈಲಾ ಮುಟ್ಯೊ. ತೆ ಶಿಷ್ಯೊ ಡೊಗ್ಗಿನ ಮ್ಹೈ ದೆಕ್ಯೊ. ತ್ಯಾ ಫಡಕಾನಾ ತುಕ್ಡಾ ಪಡ್ಯಾತಾ ತೆನೈಸೊ ತೆ ಮ್ಹೈ ಗಯೊ ನೈ. ಪಾಚ಼ಲ್ತೊ ಆಯಲ ಪೆತ್ರಾ ಸಿದಾ ಮಜಾರನಾ ಮ್ಹೈ ಹೊಕ್ಯೊ. ಖಾದಿನಾ ಫಡಕಾ ತ್ಯಾ ಪಡಲ ತೆ ದೆಕ್ಯೊ. ಪಸ್ಟ ನ್ಹಾಟಿನ ಗಯಲ ತೆ ಶಿಷ್ಯೊಬಿ ಮ್ಹೈ ಗಯೊ. ವರಿ ದೆಕ್ಯೊ, ವರಿ ಬರೊಕ್ಹೊ ಕರ‍್ಯೊ. ತೆ ಪ್ಹಡಕು ಸುತ್ತಲ ರ‍್ಹೈನ, ಬಿಜಾ಼ ಖಾದಿನಾ ಫಡಕಾವೊತಿ ಜ಼ುದು ಥೈನ ಪಡ್ಯುತು. ಪಾಚ಼ಲ್ತೊ ತೆ ವರಿಯಕ್ಕ ಶಿಷ್ಯೊ ಮ್ಹೈ ಗಯೊ. ಮಜಾರ ಪೈಲಾ ಗೈನ ಮುಟ್ಯಲವಾಲೊ ತೆ ಶಿಷ್ಯೊ ವ್ಹೈ. ತೆ ಥಯಲ ಕ್ಹಾರು ದೆಕಿನ ಬರೊಕ್ಹೊ ಕರ‍್ಯೊ. ತೆ ಮರಿನ ವರಿ ಜಿವ್ತೊ ಥೈನ ಆವಸ ಕವಾನು ಪವಿತ್ರ ಗ್ರಂಥಮಾ ಬರ್ದಲ ಎ ಶಿಷ್ಯಾವೊನೆ ಹಜು಼ನ ಗ್ವತ್ತ ನ್ಹೊತು. ಪಾಚಾ಼ತಾ ಶಿಷ್ಯಾ ಪಾಚಾ಼ ಫರಿನ ಘರೆ ಗಯಾ.

ಯೆಸು ವರಿ ಮಗ್ದಲನಿ ಮರಿಯಳ

(ಮತ್ತಾಯ 28:9,10; ಮಾರ್ಕ 16:9-11)

ತೆನೈಸೊ ಮರಿಯಳ ರೊತಿ ಮಜಾರನಾ ಭಾರಿ ಹುಬ್ರೈತಿ. ತೆ ರೊತಿ ಡೊಗ್ಗಿನ ಮಜಾರಮಾ ದೆಕ್ತಾಮಾ, ಧೊಳಾ ವಣ್ಣಾ ಘಾಲ್ಲಿದಲ ಬೆ ಕ್ಹುದಾನಾ ದುತೊ ದೆಕಿ. ಯೆಸುನು ಅಂಗ ಮ್ಹೆಲಲ ಜ಼ಗಾ ಕನ ತ್ಯುನೊಮಾ ಯಕ್ಲೊ ಯೆಸುನಾ ಮಾತಾ ಕನ ವರಿ ಯಕ್ಲೊ ಪಗೊ ರ‍್ಹಯಲ ಜ಼ಗಾ ಕನ ಬೈಟ್ಯೊತೊ. ಕ್ಹುದಾನಾ ದುತೊ ಮರಿಯಳನೆ"ಬೈ, ಕಾ ರವಾಡಿಸ? ಕೈನ ಪುಚ್ಯಾ. ಮರಿಯಳ"ಮಾರಾ ಪ್ರಭುನು ಅಂಗ ದಕ್ಹಾ ಜ಼ನಾ ಲಿನ ಗಯಾಸ. ತ್ಯುನೆ ತಿನೆ ಕಿಜಾ಼ ಮ್ಹೆಲ್ಯಾಸ ಕವಾನು ಮನೆ ಗ್ವತ್ತ ನತ್ತಿ" ಕೈನ ಉತ್ತರ ದಿದಿ. ಮರಿಯಳ ಇಮ್ಮ ಕೈನ ಪಾಚಿ ಫರತಾಮಾ ಯೆಸು ತ್ಯಾಜ ಹುಬ್ರಯಲ ದೆಕಿ. ತೆನೈಸೊ ತೆ ಯೆಸುಜ ವ್ಹೈ ಕವಾನು ತಿನೆ ಗ್ವತ್ತ ನ್ಹೊತು. ಯೆಸು ತಿನೆ"ಬೈ, ಕಾ ರವಾಡಿಸ? ತು ಕಿನೆ ಹುಡಕಾಡಿಸ? ಕೈನ ಪುಚ್ಚೊ. ತೆ ಕ್ಹೆತರ ದೆಕಿಲಿವಾಲೊ ವಸೆ ಕೈನ ಮರಿಯಳ ತಿಳ್ದಿಲಿನ ತಿನೆ"ಬಾ, ತು ಯೆಸುನೆ ಲಿನ ಗಯೊಸ ಸು? ತಿನೆ ಕಿಜಾ಼ ಮ್ಹೆಲ್ಯೊಸ, ಮನೆ ಕೆ. ಮಿ ಗೈನ ತಿನೆ ಲಿನ ಔಸ" ಕೈನ ಕದಿ. ಯೆಸು ತಿನೆ"ಮರಿಯಳ" ಕದ್ಯೊ. ಮರಿಯಳ ಯೆಸು ಕನ ಫರಿನ, ಇಬ್ರಿಯ ಭಾಶಾಮಾ "ರಬ್ಬುನಿ" ಕದಿ. ರಬ್ಬುನಿ ಕದ್ಯಾಮ "ಗುರು ವ್ಹೈ" ಯೆಸು ತಿನೆ ಮನೆ ಮುಟ್ಟು ನಕೊ. ಮಿ ಬಾಕನ ಹಜು಼ನ ಫರಿನ ಗಯೊ ನತ್ತಿ. ತೆನೈಸೊ ಮಾರಾ ಭಾಯೊಕನ (ಶಿಷ್ಯಾ) ಗೈನ ಮಾರೊ ಬಾ ತುಮಾರೊ ಬಾ ಮಾರೊ ಕ್ಹುದಾ ತುಮಾರೊ ಕ್ಹುದಾ ಥಯಲವಾಲೊ ಮಿ ಫರಿನ ಚಾಲ್ಯೊಸ. ಕವಾನು ತ್ಯುನೊಕನ ಕೆ ಕೈನ ಕದ್ಯೊ. ಮಗ್ದಲನಿ ಮರಿಯಳ ಶಿಷ್ಯಾವೊಕನ ಗೈನ ಮಿ ಪ್ರಭುನೆ ದೆಕಿಶಿ ಕೈನ ಕದಿ ತೆ ಕ್ಹಾರಿಯೊ ಸಂಗತಿಯೊ ಕದಿ.

ಶಿಷ್ಯಾವೊನೆ ಯೆಸು ದರ್ಶನ ದಿದಲ

(ಮತ್ತಾಯ 28:16-20; ಮಾರ್ಕ 16:14-18; ಲುಕ 24:36-49)

ತೆ ದಿನ್ನ ಐತ್ವಾರ ವ್ಹತ್ತೊ. ತೆ ದಿನ್ನಾ ಕ್ಹಾಂಜೆ ಶಿಷ್ಯಾ ಕುಡಿನ ವ್ಹತ್ತಾ. ಯೆಹುದಿಯೊನಾ ಅದಿಕಾರಿಯೊನೆ ಭುಚಿ಼ಕಿನ ಬಾಕಲೊ ಘಾಲ್ಲಿನ ಘರನಾ ಮ್ಹೈ ವ್ಹತ್ತಾ. ತೆಳಾಮಾ ಯೆಸು ತ್ಯುನಾ ವಚ್ಮಾ ಐನ ಹುಬ್ರೈನ ತ್ಯುನೊನೆ ಶಾಂತಿ ತುಮೊಮಾ ರ‍್ಹವಾದೆ ಕೈನ ಕದ್ಯೊ. ಯೆಸು ಇಮ್ಮ ಕದಲ್ಪರ ತಿನಾ ಹತೊ ವರಿ ಪಾಕ್ಹಳಿ ದೆಕಾಡ್ಯೊ. ಪ್ರಭುನೆ ದೆಕಿನ ತ್ಯುನೆ ಘನ್ನಾ ಖುಶಿ ಥಯಾ. ಪಾಚ಼ಲ್ತೊ ಯೆಸು ವರಿ ಶಾಂತಿ ತುಮೊಮಾ ರ‍್ಹವಾದೆ ಬಾ ಮನೆ ಮೊಕಲ್ಯೊ. ತಿನಾ ನಿಂಗತಜ ಮಿ ತುಮೊನೆ ಮೊಕಲಾಡೊಸ. ಕೈನ ಕದ್ಯೊ. ಯೆಸು ಇಮ್ಮ ಕದಲ್ಪರ ಶಿಷ್ಯಾವೊಪರ ಯೆಸು ಪ್ಹುಕ್ಕಿನ ಪವಿತ್ರ ಆತ್ಮಾನೆ ಸ್ವಿಕಾರ ಕರೊ. ತುಮೆ ಕಿನಾ ಪಾಪ ಮಾಫ ಕರೊಶಿ ತ್ಯುನಾ ಪಾಪೊ ಮಾಫ ಕರಸ. ತುಮೆ ಕಿನಾ ಪಾಪೊ ಮಾಫ ನೈ ಕರತಾ ತ್ಯುನಾ ಪಾಪೊ ಮಾಫ ನೈ ಕರತಾ. ತ್ಯುನಾ ಪಾಪೊನೆ ಮಾಫಿ ನೈ ಮಳ್ತಿ ಕೈನ ಕದ್ಯೊ.

ತೊಮಾನೆ ಯೆಸು ದರ್ಶನ ದಿದಲ

ಯೆಸು ಆತಾಮಾ ಔಳಿ ಜೌಳಿ ಕವಾಲೊ ತೊಮ ಶಿಷ್ಯಾವೊನಾ ಕ್ಹಾತೆ ನ್ಹೊತೊ. ಬಾರಾ ಶಿಷ್ಯಾವೊಮಾನಾ ತೊಮ ಕವಾಲೊ ಯಕ್ಲೊ ವ್ಹತ್ತೊ. ಉಗ್ರಲ ಶಿಷ್ಯಾ ತೊಮಾನೆ ಹಮೆ ಪ್ರಭುನೆ ದೆಕ್ಯಾ ಕೈನ ಕದ್ಯಾ. ವರಿಬಿ ತೊಮಾ ತಿನಾ ಹತೊಮಾ ರ‍್ಹಯಲ ಮೊಳಾ ಮಾರಲ ದುಕಪರ ವರಿ ಪಾಕ್ಹಳಿಯೊನು ದುಖಪರ ಹತ ಮ್ಹೆಲಿನ ದೆಕೆ ಲಕ್ಕಾ ಮಿ ನಂಬತೊ ನೈ ಕೈನ ಕದ್ಯೊ. ಯಕ್ಕ ಹಪ್ತೊ ಥಯಲಪರ ಕ್ಹಾರಾ ಶಿಷ್ಯಾ ಯಕ್ಕ ಘರಮಾ ಮಳ್ಯಾತಾ. ತೊಮಾ ತ್ಯುನ ಕ್ಹಾತೆ ವ್ಹತ್ತೊ. ಪುರಾ ಬಾಕಲೊ ಘಾಲ್ಯಾತಾ ತೆಳಾಮಾ ಯೆಸು ಐನ ತ್ಯುನಾ ವಚ್ಮಾ ಹುಬ್ರೈನ ತ್ಯುನೊನೆ ಶಾಂತಿ ತುಮೊಮಾ ರ‍್ಹವಾದೆ ಕೈನ ಕದ್ಯೊ. ಪಾಚ಼ಲ್ತೊ ಯೆಸು ತೊಮಾನೆ ತಾರೊ ಬೊಟ ಘಾಲಿನ ಮಾರಾ ಹತೊ ದೆಕ. ತಾರೊ ಹತ ಮಾರಿಯೊ ಪಾಕ್ಹಳಿಮಾ ಘಾಲ ಸಂಶೊ ಕರ‍್ಯಾವಾಚಿ ಮನೆ ನಂಬಾಲೊ ಥಾ. ಕೈನ ಕದ್ಯೊ. ತೊಮಾ ಯೆಸುನೆ "ಮಾರಾ ಪ್ರಭು ಮಾರಾ ಕ್ಹುದಾ "ಕೈನ ಕದ್ಯೊ. ಯೆಸು ತುತೊ ಮನೆ ತು ದೆಕಿನ ನಂಬ್ಯೊ ಮನೆ ದೆಕ್ಯಾವಾಚಿ ನಂಬಾಲಾ ‍ಕ್ಹರಿಮಾಜ಼ ಧನೈ ವ್ಹೈ. ಕೈನ ಕದ್ಯೊ.

ಎ ಬುಕ್ಕ ಬರ್ದಲ ಉದ್ದೆಶ

ಯೆಸು ಹಜು಼ನ ತಿನಾ ಶಿಷ್ಯಾವೊನಾ ಕ್ಹಾಮೊ ಅದ್ಭುತ ಕಾಮೊ ಕರ‍್ಯೊ. ಎ ಅದ್ಭುತ ಕಾಮೊ ಪುಸ್ತಕಮಾ ಬರ್ದ್ಯಾ ನತ್ತಿ. ಯೆಸು ಹಜು಼ನ ಬಿಜಾ಼ ಅದ್ಭುತ ಕಾಮೊ ತಿನಾ ಶಿಷ್ಯಾನಾ ಕ್ಹಾಮೊ ಕರ‍್ಯೊಸ. ತೆನೈಸೊ ಎ ಬುಕ್ಮಾ ನತ್ತಿ ಬರ್ದ್ಯಾ. ವರಿ ಅಕ್ಲು ಕ್ಹಾರು ಬರ್ದಲ ಛೆ. ಕಾಕದ್ಯಾಮ ತುಮೆ ತಿಪರ ಬರೊಕ್ಹೊ ಮ್ಹೆಲು ಕೈನ ಎ ಕ್ಹಾರು ಬರ್ದಲ ವ್ಹೈ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.