Sikkiligar Bible
ಯಾಕೊಬ 5
ಸೌಕಾರೊನಾ ನಡತೆಕ್ಹು ಹುಶಾರ
ಸೌಕಾರೊ, ತುಮೊನೆ ಆವಾನಾ ತ್ರಾಸೊನಾಹುತಿ ರವೊ, ಗೊಳಾಡೊ. ತುಮಾರಿ ಆಸ್ತಿ, ದೌಲತ ನಾಶ ಥೈಸ. ತುಮಾರಾ ವಣ್ಣಾವೊನೆ ನುಶಿ ಲಾಗಿಸ. ತುಮಾರು ಕ್ಹೊನು, ರುಪ್ಪು ಜಂಗ ಲಾಗಿನ ಮಾತಿನೆ ಸಂವಾ ಥಯುಸ. ತ್ಯುನು ಜಂಗ ತುಮೊನೆ ವಿರುದ್ದ ಸಾಕ್ಷಿ ಥೈನ, ಆಗ ನಿಂಗತ ತುಮಾರಾ ಮಾಕ್ಹನೆ ಬಾಳಿ ಪಡಸ. ಅಂತ್ಯ ಕಾಲ ಅಯುತುಬಿ ಆಸ್ತಿ ಜ಼ಮಾ ಕರಿಲಿನ ಮ್ಹೆಲಿ ಲಿದ್ಯಾಸ.
ದೆಕೊ, ತುಮಾರಾ ಖೆತರೊಮಾ ಕಾಮ ಕರಲವಾಲಾವೊನೆ ಹಮಾಲಿ ದಿದ್ಯಾಬಗರ ಮೊಸ ಕರ್ಯಾಸ. ತೆ ಹಮಾಲಿನು ಅವಾಜ಼ ವರಿ ಕಾಮ ಕರಲವಾಲಾವೊನು ಅವಾಜ಼ ಸ್ವರ್ಗನಾ ಸೈನ್ಯನೊ ಸೆನಾದಿಶ್ವರ ಥಯಲ ಕರ್ತಾನಾ ಕಾನೊಪರ ಗೈನ ಮುಟ್ಟಿಸ. ಭುಲೊಕಮಾ ತುಮೆ ಸುಖಾ ಕ್ಹಾವಾನಾಹುತಿ ತುಮೊನೆ ಪಸಂದ ಆಯಲ ತಿಮ್ಮ ಜಿವ್ನಾ ಕರಾಡಾಸ; ತುಮೆ ಚೊ಼ಕಾ ಮನಕ್ಹೊನೆ ಶಿಕ್ಷಾ ದಿದ್ಯಾಸ. ತ್ಯುನೆ ತುಮೊನೆ ವಿರುದ ನೈ ರ್ಹಯಾತಬಿ ತ್ಯುನೊನೆ ಕ್ಹಲಾಸ ಕರ್ಯಾ.
ತ್ರಾಸ ಖಾವಾಲಾ ಕ್ರೈಸ್ತರೊನೆ ಪ್ರೊತ್ಸಾಹ
ಭಾಯೊ ಭೆನೊ, ತಾಳ್ಮೆಕ್ಹು ರ್ಹವೊ, ಪ್ರಭು ಥಯಲ ಯೆಸು ಆವಸ. ತಿನಾಹುತಿ ತ್ಯಾ ಲಕ್ಕಾ ತಾಳ್ಮೆಕ್ಹು ರ್ಹವೊ. ತಿನಿ ಅಮುಲ್ಯ ಕಿಮ್ಮತ ಜಿಮಿನತಿ ಆಯೆಲಕ್ಕಾ ರೈತ ತಾಳ್ಮೆಕ್ಹು ಕೈದಸ. ಪಸ್ಟನು ವರಿ ಲಾಸ್ಟನು ಪಾನಿ ತಿನಾ ಫಸಲನಾ ಉಪ್ಪರ ಪಡೆಲಕ್ಕಾ ರೈತ ತಾಳ್ಮೆಕ್ಹು ಕೈದಲ ರ್ಹವಸ. ತುಮೆ ತಾಳ್ಮೆಕ್ಹು ರ್ಹೌ. ತುಮಾರಿ ನಿರಿಕ್ಷೆ ಛೊಡೊ ನಕೊ. ಪ್ರಭು ಯೆಸು ಜಲ್ದಿ ಆವಾನೊ ಛೆ.
ಭಾಯೊ ಭೆನೊ, ಯಕ್ಕನಾ ಉಪ್ಪರ ಯಕ್ಲಾ ತಪ್ಪ ಕವೊ ನಕೊ. ತುಮೆ ತಪ್ಪ ಕವಾನು ನೈ ಹುಬ್ರಾಡ್ಯಮ ದೊಶಿಯೊ ಕೈನ ತುಮೊನೆ ತಿರ್ಪ ಕರಸ. ಫೈಸಲೊ ಕರಾಲೊ ಆವಾನೆ ತಯ್ಯಾರ ಥಯೊಸ. ಭಾಯೊ ಭೆನೊ, ಪ್ರಭುನಿ ವಿಷಯಮಾ ಕದಲ ಪ್ರವಾದಿಯೊ ತುಮೊನೆ ಮಾದರಿ ಥೈನ ರ್ಹವಾದೆ. ತ್ಯುನೆ ಘನ್ನಾ ತರಾನಾ ತ್ರಾಸೊ ಖಾದ್ಯಾತಬಿ ತಾಳ್ಮೆಕ್ಹು ವ್ಹತ್ತು. ತಡ್ದಿಲಿನ ರ್ಹಯಲವಾಲಾವೊನೆ ಧನ್ಯ ವೈ ಕೈನ ಕಯೆಸ ನೈ. ಯೊಬನಿ ತಾಳ್ಮೆನಾಹುತಿ ತುಮೊನೆ ಗ್ವತ್ತ ಛೆ. ಯೊಬ ಕ್ಹಾರಾ ತರಾನಾ ತ್ರಾಸೊ ಖಾದಲ್ಪರ ಪ್ರಭು ತಿನೆ ಮದದ ಕರ್ಯೊ. ಪ್ರಭು ಮರಗಾಲೊ ವರಿ ದಯಾ ದೆಕಾಡಾಲೊ ವ್ಹೈ ಕೈನ ಎ ದೆಕಾಡಸ.
ಮಾರಾ ಭಾಯೊ ಭೆನೊ, ತುಮೆ ವಾಗ್ದಾನ ಕರತಾಮಾ ಕ್ಹಮ್ಮ ಘಾಲೊ ನಕೊ. ಎ ಘನ್ನು ಕ್ಹಾಸ ವ್ಹೈ. ತುಮೆ ಕದಲ ವಾತ ಪುರಾ ಕರಾನೆ ಪರಲೊಕನಾ, ಭುಲೊಕನಾ ವರಿ ಬಿಜಾ಼ ಕಯಾ ನಾಮನೆ ಉಪಯೊಗ ಕರೊ ನಕೊ. ವ್ಹೈ ಕದ್ಯಾಮ, ವ್ಹೈ” ಕವೊ. ನೈ ಕದ್ಯಾಮ ನೈ” ಕವೊ. ತುಮೆ ಇಮ್ಮ ಕರ್ಯಾಮ, ತುಮೊನೆ ದೊಶಿ ಕೈನ ತಿರ್ಪ ನೈ ಥಾತು.
ತುಮೊಮಾ ತ್ರಾಸನೆ ಮ್ಹೈ ಥಯಲವಾಲೊ ಪ್ರಾಥನಾ ಕರು. ತುಮೊಮಾ ಕ್ಹುಶಿಕ್ಹು ರ್ಹವಾಲೊ ಗಿದ್ದೊ ಕೌ. ತುಮೊಮಾ ಅರಾಮ ನೈಸೊವಾಲೊ ತೆ ಸಭೆಮಾ ಮ್ಹೊಟಾ ರ್ಹಯಲವಾಲಾವೊನೆ ಬಲೌ. ಮ್ಹೊಟಾ ತಿನೆ ತೆಲ ಲಗಾಡಿನ, ಕರ್ತಾನಾ ನಾಮಪರ ತಿನಾಹುತಿ ಪ್ರಾಥನಾ ಕರು.
ಬರೊಕ್ಹಾಕ್ಹು ಕರಲ ಪ್ರಾಥನಾ ರೊಗಿನೆ ಅರಾಮ ಕರಸ. ಕರ್ತಾ ತಿನೆ ವಚಾ಼ಡಸ. ಯಕ್ಕೆಳೆ, ತೆ ಮನಕ್ಹ ಪಾಪ ಕರ್ಯೊಮ, ಕ್ಹುದಾ ತೆ ಕ್ಹಾರಾ ಪಾಪೊನೆ ಮಾಫ ಕರಸ. ತುಮೆ ಕರಲ ತಪ್ಪೊ ಯಕ್ನೆ ಯಕ್ಕ ಕೆಳಾಮಾಬಿ ಕತಾ ರ್ಹವೊ. ಪಾಚ಼ಲ್ತಾ ಯಕ್ನಾಹುತಿ ಯಕ್ಲಾ ಪ್ರಾಥನಾ ಕರೊ. ತುಮೆ ಇಮ್ಮ ಕರ್ಯಾಮ, ಕ್ಹುದಾ ತುಮೊನೆ ಬಿಡುಗಡೆ ಕರಸ. ನಿತಿವಂತ ಘನ್ನಿ ಆಸಕ್ತಿಕ್ಹು ಕರಲ ಪ್ರಾಥನಾ ತಾಕತ ರ್ಹಯಲ ವ್ಹೈ. ಎಲಿಯಬಿ ಅಪ್ನಾ ನಿಂಗತ ಯಕ್ಕ ಮನಕ್ಹ ವ್ಹತ್ತೊ. ಪಾನಿ ಔನೈ ಕೈನ ತೆ ಪ್ರಾಥನಾ ಕರಲ ಟೈಮಮಾ ಕ್ಹಡಾತನ್ನ ವರಕ್ಹಲಕ್ಕಾ ತೆ ಗಾಮಮಾ ಪಾನಿಜ಼ ಐಯು ನೈ! ಪಾಚ಼ಲ್ತೊ ಎಲಿಯಾ ಪಾನಿ ಔ ಕೈನ ಪ್ರಾಥನಾ ಕರಲ್ಪರ ಹಬಾಳಮಾತು ಪಾನಿ ಐನ ಜಿಮಿನಮಾ ವರಿ ಬೆಳೆ ಐ.
ಮಾರ ಭಾಯೊ ಭೆನೊ, ತುಮೊಮಾ ಯಕ್ಲೊ ಕ್ಹರಿಕ್ಹು ದುರ ಥೈನ ಫರತೊ ರ್ಹಯೊಮ, ಬಿಜೆಕ್ಲೊ ತಿನೆ ಮದದ ಕರಿನ ತಿನೆ ಕ್ಹರಿಮಾ ಚ಼ಲೌ. ಇನೆ ಶೆಂಮಾ ಮ್ಹೆಲ್ಲಿವೊ; ಯಕ್ಕ ಪಾಪಿನೆ ಕೆಟ್ಟ ವಾಟಮಾತೊ ಚೊ಼ಕಿ ವಾಟಮಾ ಚ಼ಲಾವಾಲೊ ತೆ ಪಾಪಿನಾ ಆತ್ಮಾನೆ ಮರಣಕ್ಹು ಪಾರ ಕರಲವಾಲೊ ಘನ್ನಾ ಪಾಪೊನೆ ಮಾಫಿ ಮಳೆನಿಂಗತ ಕರಲವಾಲೊ ಥಾವಸ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.