ಆದಿ 42

ಯೊಸೆಫನಾ ಭಾಯೊ ಅನಾಜ಼ ಲಿವಾನೆ ಇಜಿಪ್ಟ್ನೆ ಗಯಲ

1ಹಮಾರಾ ಬಾನಿ ಕ್ಹಾರಿ ಆಸ್ತಿ ಯಾಕೊಬನಾ ಪಾಲಿ ಥೈ, ಹಮಾರಾ ಬಾನಿ ಆಸ್ತಿಕ್ಹುಜ಼ ತೆ ತೆಕ್ಲೊ ಸೌಕಾರತನಾ ಮಳಿ ಲಾಬಾನನಾ ಬಚ್ಚಾಜ ಕೈಲಿವಾನು ವಾತೊ ಯಾಕೊಬ ಐಕ್ಯೊ. 2ತೆಜ಼ ನೈಸೊ ಯಾಕೊಬ ಲಾಬಾನನು ಮ್ಹೊಡು ದೆಕ್ತಾಮಾ ಪೈಲಾನಿಂಗತ ದಿಕ್ಹ್ಯು ನೈ. 3ವರಿ ಯಹೊವಾ ಯಾಕೊಬನೆ ತು ತಾರಾ ಬಾನಾ ದೆಶನೆ ತಾರಾ ಬಂದುವೊಕನಬಿ ಫರಿನ ಜಾ಼ ಮಿ ತಾರಾ ಕ್ಹಾತೆ ರ‍್ಹೌಸ ಕೈನ ಕದ್ಯೊ. 4ಅಮ್ಮ ರ‍್ಹಲಕ್ಹು ಯಾಕೊಬ ರಾಹೆಳನೆ ಲೆಯಳನೆ ತಿನಾ ಬಕ್ರಾ-ಬಕ್ರಿಯೊನು ಹಿಂಡನೆ ಚರಾವಾನಾ ರಾನ್ಮಾ ಬಲೈನ. 5ತಿವ್ನೊನೆ ಕದಲ ಸುವೈ ಕದ್ಯಾಮ ತಾರಾ ಬಾನು ಮ್ಹೊಡು ಮಾರಾ ವಿಷಯಮಾ ಪೈಲಾ ನಿಂಗತ ನತ್ತಿ ಕೈನ ದಿಕ್ಹ್ಯುಸ ತಿಮ್ಮ ರ‍್ಹಯುತಬಿ ಮಾರಾ ಬಾನೊ ಕ್ಹುದಾ ಮಾರಾಕ್ಹಾತೆ ಛೆ . 6ಮಿ ತುಮಾರಾ ಬಾನಿ ಸೆವಾ ಪುರಾ ಮನಸಕ್ಹು ಕರ‍್ಯೊಸ. ತೆ ಕ್ಹಾರು ತುಮೊನೆ ಗ್ವತ್ತ ಛೆ. 7ವರಿಬಿ ತುಮಾರೊ ಬಾ ಮನೆಮೊಸ ಕರಿನ ಮಾರೊ ಪಗಾರ ದಖಾಸಲಾ ಬದಲಿ ಕರ‍್ಯೊ. ಮನೆ ಕ್ಹುದಾ ತಿನಾಹತಿ ಮೊಸ ಕರಾನೆ ಥಯು ನೈ. 8ತುಮಾರೊ ಬಾ ಮನೆ, ಚಿಕ್ಕಿಯೊ ರ‍್ಹಯಲ ಬಕ್ರಾ ತುನೆ ಪಗಾರ ರ‍್ಹಯವಾದೆ ಕೈನ ತೆ ಕತಾಮಾ ಕ್ಹಾರಾಜ಼ ಹಿಂಡ ಚಿಕ್ಕಿಯೊನಾ ಥಯಾ.ತೆ ಘೆರಿಯೊ ರ‍್ಹಯಲ ತಾರೊ ಪಗಾರ ಥೈನ ರ‍್ಹವಾದೆ ಕೈನ ಕತಾಮಾ ಬಕ್ರಾ ಕ್ಹಾರಾ ಘೆರಿಯೊನಾ ವ್ಹತಾ. 9ಇಮ್ಮ ಕ್ಹುದಾ ತುಮಾರಾ ಬಾನಾ ಬಕ್ರಾ ಕ್ಹಾರಾ ವರಿ ಜಾನವರೊ ತಕಂತೊ ಕಾಡಿನ ಮನೆ ದಿದ್ಯೊ. 10ಬಕ್ರಾ ಪೆಟ್ಟ ರ‍್ಹತಾಮಾ ಮಿ ಕ್ಹಪನಮಾ ದೆಕ್ತಾಮಾ ಬ್ಕಾವೊನಾ ಕ್ಹಾತೆ ಸಂಗಮ ಕರ್ತಾಮಾ ಬಕ್ರಿಯೊ ಕ್ಹಾರಿಯೊ ಘೆರಿಯೊ, ಚಿಕ್ಕಿಯೊ ಮಚ್ಚೆ ಥೈನ ದಿಕ್ಹಿಯೊ. 11ತೆ ಕ್ಹಪನಮಾ ದೆವದುತ, ಯಾಕೊಬ ಕೈನ ಬಲಾತಾ ಮಿ ನ್ಹ್ಯಾ ಛೆ ಕೈನ ಕತಾಮಾ 12ತೆ ಮನೆ, ಲಾಬಾನ ತಾರಿ ವಿಷಯಮಾ ಚಾ಼ಲಿಲಿದಲ ತರಿಕೊ ಮಿ ದೆಕ್ಯೊಸ, ತಿನಾಹುತಿ ಡೊಳೊ ಉಚೈನ ಬಕ್ರಿಯೊನಾ ಕ್ಹಾತೆ ಬಕ್ರಾ ಸಂಗಮ ಕರಾಲಾ ಬ್ಕರಾವೊನೆ ದೆಕೊ ಗೆರಿಯೊ, ಚಿಕ್ಕಿಯೊ, ಮಚ್ಚನಿ ವ್ಹತಿಯೊ. 13ತಾರಾ ಖಂಬಾನೆ ಅಭಿಶೆಕ ಕರಿನ ಮನೆ ಕ್ಹಮ್ಮ ಕರಲ ಬೆತೆಲನೊ ಕ್ಹುದಾ ಮಿಜ಼ ವ್ಹೈ ಹಮ್ನಾ ತು ಉಟಿನ ಆ ದೆಶನೆ ಛೊಡಿನ ತು ಹುಟ್ಟಲ ದೆಶನೆ ಬಿ ವರಿ ತಾರಾ ಕ್ಹಾಂದಾನ ಕನ ಫರಿನ ಜಾ಼ ಕೈನ ಕದ್ಯೊ. 14ಯಾಕೊಬ ಎ ವಾತೊ ಕದಲ್ಪರ ರಾಹೆಳ ವರಿ ಲೆಯಳ ಹಮಾರಾ ಬಾನಾ ಘರ‍್ಮಾ ಹಮ್ನಾ ಹಮೊನೆ ಸು ಪಾಲ ಛೆ? 15ತೆ ಹನೊನೆ ಬಿಜಾ಼ ವ್ಹೈ ಕೈನ ದೆಕಸ್ತೊ ತೆ ಹಮೊನೆ ಇಕ್ಕಿನ ಹಮೊಕ್ಹು ಮಳಲ ರೊಕ್ಕಾ ತೆ ಯಕ್ಲೊ ಗಳಿಗಯೊಸ್ತೊ. 16ತಿನಾಹುತಿ ಕ್ಹುದಾ ಅಪ್ನಾ ಬಾ ಕಂತೊ ಕಾಳಿದಲ ಆಸ್ತಿ ಪುರಾ ಹಮೊನೆ ಬಿ ವರಿ ಹಮಾರಾ ಬಚ್ಚಾವೊನೆ ಬಿ ದಿದ್ಯೊಸ್ತೊ ಕ್ಹುದಾ ಕಿಮ ಕವಸ ತಿಮ್ಮಜ಼ ಕರ ಕೈನ ಉತ್ತರ ದಿದ್ಯಾ. 17ತೆಳಾಮಾ ಯಾಕೊಬ ತಿನಾ ಬಚ್ಚಾವೊನೆ ವರಿ ತಿನಿಯೊ ಬಾಕ್ಡಿಯೊನೆ ಹುಂಟಪರ ಚ಼ಡಾಯೊ. 18ತೆ ಗಳಸಲ ಕ್ಹಾರಿ ಆಸ್ತಿ ಪದ್ದನ ಅರಾಮ ದೆಶಮಾ ಗಳಸಲ ಕ್ಹಾರಾ ಜಾನವರನೆ ಲಿನ ಕಾನಾನ ದೆಶೆ ತಿನಾ ಬಾ ಥಯಲ ಇಸಾಕಕನ ಚಾಲ್ಯಾ. 19ತೆಳಾಮಾ ಲಾಬಾನ ತಿನಾಬಕ್ರಾನಾ ಬಾಲೊ ಕತ್ರಾನಾ ಹುತಿ ಗಯೊತೊ. ಇಮ್ಮ ರ‍್ಹತಾಮಾ ರಾಹೆಲ ತಿನಾ ಬಾನಾ ಘರ್ಮಾ ರ‍್ಹಯಲ ಮೊರ್ತಿಯೊ ಚೊ಼ರಿ ಕರ್ಲಿದಿ. 20ತೆನೈಸೊ ಯಾಕೊಬ ಅರಾಮ್ಯನೊ ಲಾಬಾನನೆ ತಿಳಸಾಯಾ ವಾಚಿ ತಿನೆ ಮೊಸ ಕರಿನ ಗೈಪಡ್ಯೊ. 21ಅಮ್ಮ ತೆ ತಿನಿ ಆಸ್ತಿ ಪುರಾ ಲಿನ ಯುಫ್ರೆಟಿಸ ಮ್ಹೊಟಿ ನದಿನೆ ದಾಟಿನ ಗಿಲ್ಯಾದ ಕವಾನಾ ಡೊಂಗರನಿ ವಾಟ ಧರಿನ. 22ಯಾಕೊಬ ಫರಿನ ಗಯೆಲ ತನ್ನ ದಿನ್ನ ಥಯಲ್ಪರ ಲಾಬಾನನೆ ಗ್ವತ ಥಾತಾಮಾ. 23ತೆ ತಿನಾ ಸಂಬಧಿಕೊನೆ ಮಳೈನ ಕ್ಹಾತ ದಿನ್ನ ಪ್ರಯಾಣ ಕರಿನ ಯಾಕೊಬನಾ ಪಾಚೊ಼ ಗೈನ ಗಿಲ್ಯಾದ ಡೊಂಗರನಾ ಗಾಮ್ಮಾ ತಿನೆ ಮಳ್ಯೊ. 24ತೆನೈಸೊ ತೆ ರಾತೆ ಕ್ಹುದಾ ಅರಾಮ್ಯನೊ ಥಯಲ ಲಾಬಾನನಾ ಕ್ಹಪನಮಾ ಐನ ತು ಯಾಕೊಬನಾ ಕ್ಹಾತೆ ಚೊ಼ಕು ಕೆಟ್ಟ ಬೊಲ್ಯಾ ಬಗರ ಹುಶಾರಕಿಕ್ಹು ರ‍್ಹೆ ಕದ್ಯೊ. 25ತೆ ಥಯಲ್ಪರ ಲಾಬಾನ ಯಾಕೊಬನೆ ಮಳಲ್ಪರ ಯಾಕೊಬ ಡೊಂಗರ‍್ಮಾ ತಿನು ಝುಪಡು ಘಾಲಿದ್ಯೊತೊ ಲಾಬಾನಬಿ ತಿನಾ ಮನಕ್ಹೊನಾ ಕ್ಹಾತೆ ತೆಜ಼ ಗಿಲ್ಯಾದ ಡೊಂಗರ‍ಮಾ ಝುಪಡು ಘಾಲಿದ್ಯೊ. 26ಲಾಬಾನ ಯಾಕೊಬನೆ ಆ ಸು ವ್ಹೈ ತು ಕರಲ? ತು ಮಾರಾ ದಿಕ್ರಿಯೊನೆ ಯುದ್ಧಮಾ ಧರಿನ ಲಾಯೆನಿಂಗತ ಲಿನ ಮನೆ ಕದ್ಯಾವಾಚಿ ತ್ಯಾಂತೊ ಐಪಡ್ಯೊಸ್ತೊ. 27ಕಾ ಮನೆ ಮೊಸ ಕರಿನ ಚೊ಼ರಿ ಕರಲನಿಂಗತ ಐಪಡ್ಯೊ? ಮಿ ಕ್ಹುಶಿಕ್ಹು ತುನೆ ಗಿದ್ದೊ, ನ್ಹಾಚಾಲಾ ವರಿ ಘನ್ನ ತರಾನಾ ವಾದ್ಯೊನಾ ಕ್ಹಾತೆ ತುನೆ ವಳಾತೊತೊ. 28ತೆನೈಸೊ ತು ಮಾರಾ ದಿಕ್ರಿಯೊನೆ ವರಿ ಮಾರಾ ನಾತ್ನಾ-ನಾತ್ನಿಯೊನೆ ಬಿ ಗಳೆ ಮಳನೆ ನೈ ಥಯಲನಿಂಗತ ಕರ‍್ಯೊಸ ತು ಕರಲ ಪಿಸಾಳಾನು ಕಾಮ ವ್ಹೈ. 29ತುಮೊನೆ ಕೆಟ್ಟ ಕರಾನೆ ಮಕನ ತಾಕತ ಶೆ ತೆನೈಸೊ ಕಾಲನಾ ರಾತೆ ತಾರಾ ಬಾನೊ ಕ್ಹುದಾ ಯಾಕೊಬನೆ ಚೊಕು ರ‍್ಹವಾದೆ ಕೆಟ್ಟ ರ‍್ಹವಾದೆ ಬೊಲು ಕದ್ಯಾವಾಚಿ ತಿಮ್ಮಜ಼ ಹುಶಾರಕ್ಹು ರ‍್ಹೆ ಕೈನ ಕದ್ಯೊ. 30ತೆನೈಸೊ ತುನೆ ತಾರಾ ಬಾನಾ ಘರೆ ಜಾ಼ವಾನಿ ಘನ್ನಿ ಆಸ ರ‍್ಹಯಲಕ್ಹು ತು ಜೌ಼ ಲಾಗ್ಯು ತೆನೈಸೊ ತು ಮಾರಾ ದೆವಸ್ಥಾನೊನೆ ಕಾ ಚೊ಼ರಿ ಕರ‍್ಯೊ? ಕೈನ ಪುಚ್ಯೊ಼. 31ತಿನಾಹುತಿ ಯಾಕೊಬ ಲಾಬಾನನೆ ತು ತಾರಾ ದಿಕ್ರಿಯೊನೆ ಜ಼ಬರದಸ್ತಿಕ್ಹು ಮಕಂತೊ ಕಾಳೆಶಿ ಕೈನ ಭುಚ್ಕಿನ ಐಪಡ್ಯೊ. 32ತಾರಾ ದೆವಸ್ಥಾನೊ ಕಿಕನ ಮಳಸ ತ್ಯುನೆ ಮರಾದೆ. ಮಾರಾ ಸಂಭಂದಿಕರೊನಾ ಕ್ಹಾಮೊಜ಼ ಮಾರಿ ಆಸ್ತಿನೆ ಮೊಜ಼ ಸಕ್ಸಿ. ತಿಮಾ ಸುಬಿ ತಾರು ಮಳ್ಯುಮ ತೆ ತು ಲೆ ಕೈನ ಕದ್ಯೊ. ರಾಹೆಳ ತೆ ದೆವಸ್ಥಾನೊನೆ ಚೊ಼ರಿ ಕರಲ ಯಾಕೊಬನೆ ಗ್ವತ ನ್ಹೊತು. 33ಲಾಬಾನ ಯಾಕೊಬನಾ ಝುಪ್ಡಾಮಾಬಿ, ಲೆಯಳನಾ ಝುಪ್ಡಾಮಾಬಿ, ತೆ ಭಂಬಿ ದಾಸಿಯೊನಾ ಝುಪ್ಡಾವೊಮಾಬಿ ಹುಡಕ್ಯೊ. ತೆನೈಸೊ ತಿನೆ ಸುಜ಼ ಮಳ್ಯು ನೈ. ಲೆಯಳನು ಝುಪ್ಡು ಛೊಡಿನ ರಾಹೆಳನಾ ಝುಪ್ಡಾನೆ ಆಯೊ. 34ರಾಹೆಳ ತೆ ಮುರತಿಯೊನೆ ಲಿನ ಉಂಟನಾ ಚಾಮ್ಡಾನಾ ಕೈಚಿಲಾಮಾ ಘಾಲಿನ ತಿವ್ಯುನಾ ಉಪ್ಪರ ಬೆಟಿತಿ. ಲಾಬಾನ ಝುಪ್ಡಾಮಾ ರ‍್ಹಯಲ ಕ್ಹಾರು ಸಾಮನ ದೆಕ್ಯೊತಬಿ ತಿನೆ ದಿಕ್ಹ್ಯಾ ನೈ. 35ರಾಹೆಳ ತಿನಾ ಬಾನೆ, 'ಬಾ ಮಿ ತಾರಾ ಕ್ಹಾಮಿ ಉಟಿನ ನೈ ಹುಬ್ರೈರೆ ಶಿಟ್ಟ ಥವು ನಕೊ, ಮಿ ಭಾರಿ ಥೈಸ” ಕೈನ ಕದಿ. ತಿ ಚೊ಼ಕಿತರಾ ಹುಡಕ್ಯೊತಬಿ ತೆ ಮುರತಿಯೊ ನೈ ಮಳಲಕ್ಹು ಫರಿನ ಗೈಪಡ್ಯೊ. 36ತೆಳಾಮಾ ಯಾಕೊಬ ಘನ್ನೊ ಶಿಟ್ಟ ಥೈನ ಲಾಬಾನನೆ ಜೊ಼ರ ವದರಿನ, 'ತು ಅಕ್ಲೊ ಘಾಬ್ರೊ ಥೈನ ಮಾರಾ ಪಾಚೊ಼ ಲಾಗಿನ ಆವಾ ವರಕ್ಹು ಮಿ ಸು ತಪ್ಪ ಕರ‍್ಯೊಸ? 37ಮಾರಾ ಸಾಮನಮಾ ಪುರಾ ತು ಧುಂಡಾ ಅಕಲು ಮಿ ಸು ತಪ್ಪ ಕರ‍್ಯೊತೊ? ತಾರು ಸ್ವಂತ ಮಾರಾಮಾ ಸು ಬಿ ಮಳ್ಯು ಸು? ಮಾರಾ ಸಂಬಂದಿಕರೊನಾ ಕ್ಹಾಮೊ ಬಿ ತಾರಾ ಸಂಬಂದಿಕರೊನಾ ಕ್ಹಾಮೊ ಬಿ ತೆ ಲೈನ ಮ್ಹೆಲ. ಇವುನೆಜ಼ ಅಪೆ ಭ್ಹಂಬಿ ಜ಼ನಾವೊನು ನ್ಯಾಯ ಕರಾದೆ. 38ಮಿ ತಾರಾ ಕ್ಹಾತೆ ಇಕ್ಹ ವರಕ್ಹ ವ್ಹತ್ತೊ. ತಾರಾ ಹಿಂಡೊನಾ ಹೆಣ್ಣ ಬಕರಿಯೊನಾ ಬಚ್ಚಾವೊನೆ ಖಲಾಸ ಕರಿ ಪಾಡ್ಯೊ ನೈ. ತಾರಾ ಹಿಂಡನಾ ಟಗರೊನೆ ಮಿ ಸು ಖೈ ಪಾಡ್ಯೊ ನೈ.