Skip to content
BibleKenya

Sikkiligar Bible

ಆದಿ 34

ದಿನಾ ವರಿ ಶೆಕಮವಾಲಾ

ಯಾಕೊಬನೆ ಲೆಯಳಮಾ ಹುಟ್ಟಲ ದಿಕ್ರಿ ಥಯಲ ದಿನಳ ಯಕ್ಕ ದಿನ್ನ ತೆ ದೆಶನಾ ಬಾಕ್ಡಿಯೊನೆ ಮಳಾನೆ ಐ. ದೆಶಾದಿಪತಿ ಥಯಲ ಹಿವ್ವಿಯನೊ ಥಯಲ ಹಮೊರನೊ ದಿಕ್ರೊ ಶೆಕೆಮ ತಿನೆ ದೆಕಿನ ಲಿಂಗೈನ ಮಾನಭಂಗ ಕರಲಕ್ಹು. ತಿನು ಮನಸ ಯಾಕೊಬನಿ ದಿಕ್ರಿ ಥಯಲ ದಿನಳನಾ ಉಪ್ಪರಜ಼ ವ್ಹತ್ತು. ತೆ ಛೊಕರಿನೆ ಪ್ಯಾರ ಕರಿನ ತಿನಾ ಕ್ಹಾತೆ ಮನಸ ಮಳ್ಳ ಕರಾನಾ ವಾತೊ ಬೊಲ್ಯೊ. ಶೆಕೆಮ ತಿನೊ ಬಾ ಥಯಲ ಹಮೊರನೆ, 'ತು ಆ ಛೊಕರಿನೆ ಮನೆ ಹಿವಾ ಕರು” ಕೈನ ಮಾಂಗಿಲಿದ್ಯೊ. ಯಾಕೊಬ ತಿನಿ ದಿಕ್ರಿ ದಿನಳನೆ ಶೆಕೆಮತು ಮಾನಭಂಗ ಥಯಲ ಐಕಲಪರ ತಿನಾ ದಿಕ್ರಾ ರಾನ್ಮಾ ಬೈಲೊನೊ ಕೈದಾಡಾತಾ. ತ್ಯುನೆ ಆಯೆಲಕ್ಕುನ ತೆ ಗಪ್ಪಜ಼ ವ್ಹತ್ತೊ. ತೆಕ್ಲಮಾಜ಼ ಶೆಕೆಮನೊ ಬಾ ಥಯಲ ಹಮೊರ ಯಾಕೊಬನಾ ಕ್ಹಾತೆ ಬೊಲಾನೆ ಆಯೊ. ಯಾಕೊಬನಾ ದಿಕ್ರಾ ಆಯೆಲ್ಪರ ಘಾಬ್ರಾ ಥೈನ ಘನ್ನಾ ಶಿಟ್ಟ ಥಯಾ. ಶತಕೆಮ ಯಾಕೊಬನಿ ದಿಕ್ರಿನೆ ಮಾನಭಂಗ ಕರಿನ ಇಸ್ರಾಯೆಲರೊಮಾ ಘನ್ನಿ ಕೆಟ್ಟ ಮರ್ಯಾದಿ ಜಾ಼ವಾನು ಕಾಮ ಕರ‍್ಯೊಸ. ಹಮೊರ ತ್ಯುನೊನೆ, 'ಮಾರೊ ದಿಕ್ರೊ ಥಯಲ ಶೆಕೆಮ ತುಮಾರಿ ಛೊಕ್ರಿನೆ ಆಸಕ್ಹು ಮೊಹ ಕರ್ಯೊಸ, ತಿನೆ ತಿನಾ ಕ್ಹಾತೆ ಹಿವಾ ಕರಿನ ದ್ಯು ಕೈನ ತುಮೊನೆ ಮಾಂಗಿಲ್ಯುಸ. ಎನೈಸೊ ತುಮೆ ಹಮೊಮಾಜ಼ ರ‍್ಹೈನ ತುಮಾರಾ ದಿಕ್ರಿಯೊನೆ ಹಮೊನೆ ದೆತಾ ಹಮಾರಾ ದಿಕ್ರಿಯೊನೆ ತುಮೆ ಲೆತಾ ಹಮಾರಾ ಕ್ಹಾತೆ ರ‍್ಹವೊ. ದೆಶ ಪುರಾ ತುಮಾರಾ ಕ್ಹಾಮು ಛೆ ತ್ಯಾ ರ‍್ಹೈನ ವ್ಯಾಪಾರ ಕರಿನ, ಆಸ್ತಿ ಕಮೈಲೆ ಸಕಿಯೆಸ” ಕೈನ ಕದ್ಯೊ. ಪಾಚಲ್ತೊ ಶೆಕೆಮ ತೆ ಛೊಕರಿನಾ ಬಾನೆಬಿ ವರಿ ಮ್ಹೊಟಾ ಭಾಯೊನೆ, 'ತುಮಾರಿ ದಯಾ ಮಪರ ರ‍್ಹವಾದೆ, ತುಮೆ ಕದಲ ಅಕ್ಲು ದ್ಯುಸ. ತುಮೆ ಕದಲಕ್ಕುನ್ನ ದಹೆಜ಼ ಕಾಣಿಕೆ ಛೊಕ್ರಿನಾ ಹುತಿ ದ್ಯುಸ. ಲೆಕಿನ ತೆ ಛೊಕ್ರಿನೆ ಮನೆ ಬೈಕೊ ಕರಿನ ದಿವೊ” ಕದ್ಯೊ. ಶೆಕೆಮ ತ್ಯುನಿ ನ್ಹಾನಿ ಭೆನ ಥಯಲ ದಿನಳನೆ ಮಾನಭಂಗ ಕರಲಕ್ಹು ಯಾಕೊಬನಾ ದಿಕ್ರಾ ತಿನೊ ಬಾ ಥಯಲ ಹಮೊರನೆ ಫರಿನ ಉತ್ತರ ದಿದ್ಯಾ. ತಿನಾ ಹುತಿ ತಿನಾ ಭಾಯೊ ತಿನೆ, 'ತು ಹಮಾರಿ ಭೆನ್ನೆ ಹಿವಾ ಕರಿಲಿವಾನೆ ಹಮೆ ತುನೆ ಮೊಕೊ ನೈ ದೆಸಕತಾ; ಕಾ ಕದ್ಯಮ ತುನೆ ಹಜುನ ಖತ್ನಾ ನತ್ತಿ ಥೈ. ಹಮಾರಿ ಭೆನ ತುನೆ ಹಿವಾ ಕರಿಲಿವಾನು ತಪ್ಪ ಥಾವಸ. ಲೆಕಿನ ತು ವರಿ ತಾರಾ ಗಾಮ್ನಾ ಕ್ಹಾರಾ ದಣಗಾ ಹಮಾರಾ ದಾಕ್ಹಲ ಖತ್ನಾ ಕರೈಲಿದ್ಯಾರೆ ತು ಹಮಾರಿ ಭೆನ್ನೆ ಹಿವಾ ಕರಲೆ ಸಕಶಿ. ಪಾಚಲ್ತಾ ತುಮಾರಾ ಪಟ್ಟಾ ಹಮಾರಾ ಛೊಕರಿಯೊನೆ ಹಿವಾ ಕರಲೆ ಸಕಸ ವರಿ ಹಮಾರಾ ಪಟ್ಟಾ ತುಮಾರ ಛೊಕರಿಯೊನೆ ಹಿವಾ ಕರಲೆ ಸಕೆಸ. ತೆಳಾಮ ಅಪೆ ಯಕ್ಕಜ ಜನಾಂಗ ಥೈಯೆಸ. ತೆನೈಸೊ ತುಮೆ ಖತ್ನಾ ನೈ ಕರೈಲಿದ್ಯಾರೆ ಹಮೆ ದಿನಳನೆ ಬಲೈ ಲಿಂಗೈಯೆಸ” ಕೈನ ಕದ್ಯಾ. ತ್ಯುನೆ ಕದಲ ಹಮೊರನೆ ಬಿ ಶೆನೆಮನೆ ಬಿ ಚೊಕು ವ್ಹೈ ಕೈನ ಲಾಗ್ಯು. ದಿನಳನಾ ಮ್ಹೊಟಾ ಭಾಯೊ ಕದಲ ಕರಾನೆ ಶೆಕೆಮ ಖುಶಿಕ್ಹು ಒಪ್ಪಿಲಿದ್ಯೊ. ಶೆಕೆಮನೆ ತ್ಯುನಾ ಕುಟುಂಭಮಾ ಖಾಸ ವ್ಹತೊ. ಹಮೊರ ವರಿ ಶೆಕೆಮ ತ್ಯುನಾ ಗಾಮ್ನಾ ಸಬೆನಾ ಜ಼ಗಾಕನ ಗಯಾ. ತ್ಯುನೆ ಗಾಮ್ನಾ ದಾಣಗಾವೊನಾ ಕ್ಹಾತೆ ಬೊಲಿನ, 'ಎ ಇಸ್ರಾಯಲರೊನೆ ಅಪ್ನಾ ದೊಸ್ತೊ ಥೈನ ರ‍್ಹವಾನು ಇಷ್ಟಾ ಛೆ; ಇವನೆ ಅಪ್ನಾ ದೆಶಮಾ ರ‍್ಹೈನ ಅಪ್ನಾ ಕ್ಆತೆ ಸಮಾಧಾನಕ್ಹು ರ‍್ಹವಾನು ಹಮೊನೆ ಬಿ ಇಷ್ಟಾ ಛೆ; ಅಪೊನೆ ಚಾಯೆ ಥಯಲ ಅಕ್ಲಿ ಜ಼ಗಾ ಅಪ್ನೊಕನ ಛೆ. ಹಮೆ ತ್ಯುನಾ ಛೊಕ್ರಿಯೊನೆ ಹಿವಾ ಕರಿಲಿವನೆ ಅಪ್ನಾ ಛೊಕರಿಯೊನೆ ತ್ಯುನೊನೆ ಹಿವಾ ಕರಿನ ದಿವಾನೆ ಬಿ ಹಮೆ ಖಶಿ ಥೈಯೆಸೆ. ತೆನೈಸೊ ಅಪೆ ಕರಾನು ಯಕ್ಕಜ ಯಕ್ಕ ಕಾಮ ಸು ವ್ಹೈ ಕದ್ಯಾಮ, ಇಸ್ರಾಯೆಲರೊನಾ ನಿಂಗತಜ಼ ಅಪ್ನಾ ಕ್ಹಾರಾ ದಾಣಗಾ ಖತ್ನಾ ಕರೈಲ್ಯು. ಅಪೆ ಇಮ್ಮ ಕರ‍್ಯಾಮ, ತ್ಯುನಾ ಕ್ಹಾರಾ ಬೈಲೊ ಬಕ್ರಿಯೊತಿಬಿ ಜಾನ್ವರೊತಿಬಿ ಸೌಕಾರೊ ಥೈಯೆಸ. ಅಪೆ ಆಂ ಒಪ್ಪಂದ ತ್ಯುನಾ ಕ್ಹಾತೆ ಕರಿಲಿದ್ಯಾಮ ತ್ಯನೆ ಅಪ್ನಾ ಕ್ಹಾತೆ ನ್ಹ್ಯಾಜ ವಾಸ ಕರಸ” ಕೈನ ಕದ್ಯಾ. ಸಬೆನಿ ಜ಼ಗಾಮಾ ರ‍್ಹಯಲ ಜ್ಹಾರಾ ದಾಣಗಾ ಹಮೊರನಾ ವರಿ ಶೆಕೆಮನಾ ವಾತೊನೆ ಒಪ್ಪಿಲಿದ್ಯಾ. ಪಾಚಲ್ತಾ ಕ್ಹಾರಾ ದಾಣಗಾ ಖತ್ನಾ ಕರೈಲಿದ್ಯಾ. ತನ್ವಾ ದಿನ್ನ ಥಯೊತಬಿ ಖತ್ನಾ ಕರೈಲಿದಲ ದಾಣಗಾ ಹಜುಬಿ ದುಕ್ಕಮಾ ವ್ಹತ್ತಾ. ಎ ಟೈಮಮಾ ದಾಣಗಾ ತಾಕತ ನೈಸೊವಾಲಾ ರೈಸ ಕೈನ ಯಾಕೊಬನಾ ಬೆ ದಿಕ್ರಾ ಥಯಲ ಸಿಮೆಯೊನ ವರಿ ಲೆವಿನೆ ಗ್ವತ್ತ ವ್ಹತ್ತು. ತಿನಾಹುತಿ ತ್ಯುನೆ ತಲ್ವಾರೊ ಲಿನ ಗೈನ ತ್ಯಾ ರ‍್ಹಯಲ ಕ್ಹಾರಾ ದಾಣಗಾವೊನೆ ಖಲಾಸ ಕರಿಪಾಡ್ಯಾ. ದಿನಳನಾ ಮ್ಹೊಟಾ ಭಾಯೊ ಥಯಲ ಸಿಮೆಯೊನ ವರಿ ಲೆವಿಯ ಹಮೊರನೆ ವರಿ ತಿನೊ ದಿಕ್ರೊ ಥಯಲ ಶೆಕೆಮನೆ ಖಲಾಸ ಕರಿನ ದಿನಳನೆ ಶೆಕೆಮನಾ ಘರ್ತಾ ಬಲೈಲಾಯಾ. ಯಾಕೊಬನಾ ದಿಕ್ರಾ ಗಾಮ್ಮಾ ಗೈನ ತ್ಯಾ ರ‍್ಹಯಲ ಹರಿಯಕ್ಕ ಲಿದ್ಯಾ. ತ್ಯುನಿ ಭೆನ್ನಿ ಶೆಕೆಮ ಮರ್ಯಾದಿ ಕಾಡಲಕ್ಹು ತ್ಯುನೆ ಹಜುನಬಿ ಸಿಟ್ಟಮಾಜ಼ ವ್ಹತ್ತಾ. ಅಮ್ಮ ದಿನಳನಾ ಮ್ಹೊಟಾ ಭಾಯೊ ತ್ಯುನಾ ಬೈಲೊ ಬಕ್ರಿಯೊನೆ ಗದ್ಡಾವೊನೆ ಗಾಮ್ಮಾ ರ‍್ಹಯಲ ವರಿ ಖೆತರೊಮಾ ರ‍್ಹಯಲ ಕ್ಹಾರಿ ಆಸ್ತಿ ಲಿದ್ಯಾ. ತ್ಯುನಿಯೊ ಬಾಕ್ಡಿಯೊನೆ ಬಚ್ಚಾ಼ವೊನೆ ಧರಿನ ಘರೊಮಾ ರ‍್ಹಯಲ ಕ್ಹಾರು ಕಾಳಿದ್ಯಾ. ತೆನೈಸೊ ಯಾಕೊಬ ಸಿಮೆಯೊನನೆ ವರಿ ಲೆವಿನೆ, 'ತುಮೆ ಮನಿ ಅಪಾಯನೆ ಗುರಿ ಕರ್‍ಯಾಸ. ಎ ದೆಶಮಾ ರ‍್ಹಯಲ ಕ್ಹಾರಾ ಕಾನಾನ್ಯರೊ ವರಿ ಪರಿಜಿಯರೊ ಮನೆ ದ್ವೆಷ ಕರಿನ ಇರೊದ ಥಾವಸ. ಮನೆ ರ‍್ಹಯಲ ಮನಕ್ಹ ದಕ್ಹಾ ಜನಾ ವ್ಹೈ. ಎ ದೆಶಮಾ ರ‍್ಹಯಲ ಮನಕ್ಹೊ ಕ್ಹಾರಾ ಯಕ್ಕ ಥೈನ ಮಳಿನ ಮನೆ ವಿರೊದ ಥೈನ ಹೊರಾಡ್ಯಾಮ ಮಿ ವರಿ ಮಾರಾ ಮನಕ್ಹೊ ಪುರಾ ನಾಶ ಥೈಯೆಸ” ಕೈನ ಕದ್ಯೊ. ಲೆಕಿನ ದಿನಳನಾ ಮ್ಹೊಟಾ ಭಾಯೊ, 'ಹಮಾರಿ ಭೆನ್ನೆ ತೆ ಮನಕ್ಹೊ ಸುಳಿ ದಾಕ್ಹಲ ಉಪಯೊಗ ಕರಾದೆ ಹಮೆ ಛೊಡಿಯೆ ಸು? ನೈ, ಹಮಾಎಇ ಭೆನ್ನೆ ತ್ಯುನೆ ಕರಲ ತಪ್ಪ ವ್ಹೈ” ಕೈನ ಕದ್ಯಾ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.